नितीश चव्हाण आणि रुचिरा जाधवचं ‘भाई खुळावलो’ हे नवीन मालवणी गाणं प्रदर्शित, सोशल मीडियावर गाण्याची चर्चा !

मुंबई: मालवणी भाषेचा खट्याळपणा, कोकणी-गोवन संगीताचा साज आणि प्रेमात पडलेल्या एका गावठी भाईची भन्नाट कथा यांचा अनोखा मिलाफ असलेलं ‘भाई खुळावलो’ हे गाणं प्रेक्षकांच्या भेटीला आलं आहे. पुर्वा म्युझिक प्रस्तुत आणि सेव्हन सीज मोशन पिक्चर्स निर्मित या गाण्याची निर्मिती समीर परब यांनी केली असून, गाण्याचं संगीत आणि दिग्दर्शन प्रितीश प्रकाश कामत यांनी केलं आहे. गायक नागेश मुरवेकर यांच्या खट्याळ आणि मिश्कील आवाजामुळे गाण्याला अस्सल मालवणी रंग लाभला आहे. या गाण्यात अभिनेता नितीश चव्हाण आणि अभिनेत्री रुचिरा जाधव प्रमुख भूमिकेत आहेत.

गाण्याच्या संकल्पनेबद्दल संगीतकार-दिग्दर्शक प्रीतीश कामत सांगतात की, “सुरुवातीला या गाण्याचे बोल मराठीमध्ये तयार करण्यात आले होते. मात्र, संगीतबद्ध करताना गाण्याला आणखी वेगळा आणि हटके टच देण्याची गरज जाणवली. त्यातून एका मुलीच्या प्रेमात पडलेल्या गावातील भाईची व्यक्तिरेखा आणि त्याची गंमतीदार प्रेमकहाणी साकारण्याची कल्पना सुचली. ‘खुळावलो’ हा मालवणी भाषेतील शब्दप्रयोग या व्यक्तिरेखेला आणि कथेला अगदी साजेसा वाटल्याने संपूर्ण गाणं मालवणी भाषेत पुन्हा साकारण्यात आलं. गाण्याच्या संगीतामध्ये मालवणी आणि कोकणी लोकसंगीतासोबत गोवन संगीताची झलक देण्यात आली असून, स्थानिक फोक आणि तारकर्लीच्या वातावरणाशी जुळणारी संगीताची वाईब तयार करण्यात आली आहे. विशेष म्हणजे या गाण्याच्या संगीत निर्मितीची सुरुवात अकापेला पद्धतीने करण्यात आली होती. केवळ वोकल्सच्या माध्यमातून संगीताचा बेस तयार करत पुढे त्यामध्ये विविध वाद्यांचा समावेश करण्यात आला.”

अभिनेत्री रूचिरा जाधव या गाण्याच्या चित्रीकरणा दरम्यानचा गंमतीदार किस्सा सांगते, “कोकणात शूट होतं म्हणून मी फार उत्सुक होते. पण शूटींग दरम्यान मला समुद्रात बुडण्याचा सीन होता असं कळलं. मला आधीच पाण्याची भीती वाटते. मी टीमला हे सांगताच सगळ्यांनीच चिंता व्यक्त केली. परंतु प्रोडक्शनने आवश्यक सुरक्षा व्यवस्था आणि लाइफसेव्हर्सची व्यवस्था केलेली. आणि मग अश्याप्रकारे मी तो सीन यशस्वीपणे पूर्ण केला. त्या सीनमधील माझे हावभाव हे खरे आहेत. सकाळी ८ वाजल्यापासून दुसऱ्या दिवशी सकाळी ७ वाजेपर्यंत सुरू असलेल्या या शूटमध्ये मी, सहकलाकार नितीश आणि तंत्रज्ञांनी खूप धमाल  केली. त्यामुळे शूटिंगदरम्यानची धमाल आणि गाण्याची रंगत व्हिडिओमध्येही जिवंतपणे उमटली आहे.”

नितीश चव्हाण यांच्या नृत्याला विशेष महत्त्व देण्यात आलं असून पुण्यकर उपाध्याय यांनी कोरिओग्राफी केली आहे. गाण्याचं चित्रीकरण मालवण आणि तारकर्ली परिसरात करण्यात आलं असून MTDC, तारकर्ली आणि सोलकढी रेस्टॉरंट या ठिकाणांचा विशेष वापर करण्यात आला आहे. चित्रीकरणादरम्यान आलेले मजेशीर अनुभवही या व्हिडिओमध्ये पाहायला मिळतात. या गाण्याचे गीतकार सचिन कोतुळकर, अरेंजर उदय साळवी, फिमेल व्होकल्स प्राजक्ता माने, कोरस गोविंद कांबळे, विपुल कदम, श्रीकांत शिरसाट आणि प्रितीश कामत असून रूपक ठाकूर यांनी मिक्सिंग आणि मास्टरिंग केलं आहे. व्हिडिओचं दिग्दर्शन आणि एडिटिंग प्रितीश प्रकाश कामत यांनी, छायांकन आणि कलरिंग शशि उपाध्याय यांनी, तर प्रॉडक्शन डिझाइन प्रवीण चिंदरकर आणि टीम यांनी केलं आहे. हेमंत सोनावणे कार्यकारी निर्माते असून कॉस्च्युम स्टायलिंग ओंकार माने, तर मेकअप आणि हेअर सौरभ बर्डे यांनी केलं आहे. पूर्वा म्युझिकसाठी पूर्वा भगवान मिश्रा प्रेझेंटर, आर्यन भूदत्त मॅनेजमेंट आणि श्रद्धा शुक्ला मार्केटिंगची जबाबदारी सांभाळत आहेत. मालवणी भाषेतील मिश्कील संवाद, रंगतदार संगीत, नृत्य आणि प्रेमात पडलेल्या ‘भाई’ची मजेशीर कहाणी यामुळे ‘भाई खुळावलो’ हे गाणं प्रेक्षकांसाठी एक वेगळा आणि मनोरंजक संगीत अनुभव ठरणार आहे. सध्या हे गाणं सोशल मीडियावर व्हायरल होत आहे.

कोकणची माती अशी की, ती फक्त भात पिकवत नाही, तर माणसंही घडवते. आंबा-फणसाच्या दाट राईतून, माडा-पोफळींच्या सावलीतून आणि खाडीच्या खारट वाऱ्यातून एक अवखळ, बेभान आणि तितकंच निखळ आयुष्य इथं फुलतं. हर्णै, मुरुड, आंजर्ले, मुर्डी या समुद्रकिनाऱ्यांपासून वर दापोलीपर्यंत पसरलेल्या याच त्रिकोणी प्रदेशात वसलंय एक गाव म्हणजे गारंबी. याच गारंबीत जन्माला येते एक गोष्ट, जी काळाच्या पडद्याआड जात नाही, उलट पिढ्यानपिढ्या तितकीच ताजी राहते ती म्हणजे “गारंबीचा बापू”. गुरुप्रसाद फिल्म्स आणि विषय प्रॉडक्शन्स यांच्या बॅनरखाली निर्मिती केलेला हा चित्रपट दिग्दर्शक गुरुप्रसाद यांनी नव्या तंत्रज्ञानाची जोड देत नव्या रूपात साकारला आहे.

घाटावर जशी पाटलाची सत्ता चालते, तशी कोकणात खोताची चालते. पण सत्ता आली की तिच्यासोबत माज येतोच, आणि माजातून जन्म घेते हुकूमशाही. गारंबीतला अण्णा खोत हा असाच एक निरंकुश सत्ताधीश. त्याच्या जुलमी वर्तनाला, त्याच्या दहशतीला जो एकटा आव्हान देतो, तो म्हणजे बापू. कुणाची भीड न बाळगणारा, स्वतःच्याच तालात जगणारा, अचाट आणि बेफाट वागणारा हा तरुण गारंबीत “अफाट बापू” म्हणून ओळखला जातो. त्याच्या याच बंडखोर आयुष्यात येणारी राधा – श्री. ना. पेंडसे यांच्या काळाच्या पुढे जाणाऱ्या लेखणीतून साकारलेली, त्या नावाला पुरेपूर न्याय देणारी व्यक्तिरेखा आणि अण्णा खोतच्या सावटाखाली दबलेलं गारंबी गाव, हीच खरी या कथेची ओळख.

कोकणच्या मातीतील याच सिद्धहस्त कथेला श्री. ना. पेंडसे यांच्या शब्दांतून शशी पेंडसे यांनी पुन्हा पडद्यावर उतरवलंय. प्रसाद ओक बापूच्या भूमिकेत आपल्या सहज अभिनयातून त्या कलंदर वृत्तीला जिवंत करणार आहेत, तर देविका दफ्तरदार राधाच्या भूमिकेत तितक्याच ताकदीने उभ्या राहतील. यतिन कार्येकर अण्णाच्या क्रूर सत्तेला पडद्यावर आणतील, तर जयवंत वाडकर (मुसा), शशी पेंडसे (विठोबा) आणि माधवी सोमण (मावशी) या व्यक्तिरेखांमधून गारंबीचं इरसाल विश्व अधिक ठसठशीत होईल. जयसिंग यांच्या छायांकनातून कोकणचं सौंदर्य आणि रांगडेपण दोन्ही टिपलं जाईल.

आणि या साऱ्याला जोड मिळेल ती वैशाली सामंत यांच्या संगीताची. अवधूत गुप्ते, स्वप्निल बांदोडकर, उर्मिला धनगर आणि खुद्द वैशाली सामंत यांच्या आवाजातून कोकणची लोकधून पुन्हा एकदा प्रेक्षकांच्या काळजाला भिडेल.

एकाधिकारशाहीविरुद्धच्या संघर्षाची आणि मानवी स्वभावाचे विविध पैलू उलगडणारी ही कथा नव्या तंत्रज्ञानाच्या साथीने प्रेक्षकांसमोर येणार आहे. कोकणच्या मातीतील हा अनोखा बाज पुन्हा एकदा अनुभवण्यासाठी आणि ‘गारंबीचा बापू’च्या या नव्या प्रवासाचे साक्षीदार होण्यासाठी प्रेक्षकही आता उत्सुक आहेत!

येत्या व्हॅलेंटाईन्स डेला प्रेमाला मिळणार आहे एक वेगळा ट्विस्ट!  एका अद्भुत प्रेमकथेला हॉरर आणि कॉमेडीची जोड मिळणार आहे.

या चित्रपटाचं पहिलं पोस्टर नुकतंच प्रदर्शित करण्यात आलं आहे.एका बाजूला जिवंत हात आणि दुसऱ्या बाजूला भुताटकी हात. तर या दोन्ही हातांच्या मध्ये काट्यांनी वेढलेलं लाल गुलाबाचं फूल आहे. पोस्टरमधूनच प्रेम आणि हॉररची खास झलक पाहायला मिळते त्यामुळे ही प्रेमकथा वेगळी असणार याची उत्सुकता वाढते.

‘सुपर डुपर’ सिनेमाच्या यशानंतर लेखक-दिग्दर्शक समीर आशा पाटील पुन्हा एकदा वेगळ्या विषयासह प्रेक्षकांच्या भेटीला येत आहेत.

मराठी इंडस्ट्रीतील आणि आजच्या घडीचे लोकप्रिय कलाकार या चित्रपटात एकत्र दिसणार आहेत. प्रथमेश परब, रितिका श्रोत्री, ओंकार भोजने, पार्थ भालेराव, रोहित माने, विनायक माळी आणि सयाजी शिंदे मुख्य भूमिकेतून प्रेक्षकांचे मनोरंजन करतील.

प्रेमाची भन्नाट गोष्ट, सोबत भुताटकीचा ट्विस्ट आणि हसून हसून लोटपोट करणारा विनोद! या आगळ्यावेगळ्या रोमँटिक हॉरर कॉमेडी जॉनरमधून साकारलेला हा चित्रपट तरुणाईसाठी मनोरंजनाची खास मेजवानी ठरणार आहे.

डॉ. पल्लवी जाधव, डॉ. गजानन जाधव आणि राम जाधव यांनी या चित्रपटाची निर्मिती केली असून, समीर आशा पाटील यांनी लेखन आणि दिग्दर्शन केलं आहे.

या सिनेमामुळे २०२७ चा व्हॅलेंटाईन चित्रपटगृहात वेगळा ठरणार हे नक्की.

‘अमर प्रेम कथा’ संपूर्ण महाराष्ट्रात या व्हॅलेंटाईन्स डेला मोठ्या पडद्यावर नक्की बघा !

अभिनेत्री मोनालिसा बागलने आजवर वेगवेगळ्या चित्रपटांतून उत्तमोत्तम भूमिका साकारल्या आहेत. आता ‘काकुळ’ या थरारक रहस्यपटात मोनालिसा महत्त्वाच्या भूमिकेत दिसणार असून, नोव्हेंबर २०२६ मध्ये हा चित्रपट मोठ्या पडद्यावर प्रदर्शित होणार आहे.

‘स्वप्निल गोगावले एंटरटेनमेंट ‘च्या बॅनरखाली ‘काकुळ’ या चित्रपटाच्या निर्मितीची धुरा स्वप्निल विजया सहदेव गोगावले यांनी सांभाळली असून गौरी गोगावले, सोनाली लगड, सोमा दास आणि डॉ. सचिन भालेराव यांनी सहनिर्माते म्हणून बाजू सांभाळली आहे; तर दिग्दर्शन सूरज रघुनाथ पडवळ यांनी केले आहे. मोनालिसासह या चित्रपटात अक्षय टंकसाळे, संजय खापरे, यश डिंबळे, भूषण मंजुळे, आरती शिंदे, विवेक यादव, प्रकाश धिंडले हे कलाकारही महत्त्वपूर्ण भूमिकेत पाहायला मिळणार आहेत. या चित्रपटातील गाण्यांना उदय देशपांडे, पी. शंकरन आणि सिद्धांत बोरावके यांनी संगीतबद्ध केले असून छायांकनाची धुरा वीरधवल पाटील यांनी सांभाळली आहे.

रहस्य, भय आणि सामाजिक सूडभावना हे ‘काकुळ’ या चित्रपटाचे मुख्य वैशिष्ट्य आहे. गावातील श्रीमंत आणि राजकीय वारसा लाभलेला संग्राम, त्याच्या आयुष्यात कल्पना या तरुणीचा प्रवेश झाल्यानंतर एकापाठोपाठ एक धक्कादायक घटना घडू लागतात. समाजातील स्त्रीविरोधी मानसिकता, पुरुषसत्ताक वृत्ती आणि वाईट कर्मांची फळे कशी भोगावी लागतात, या संकल्पनेवर ‘काकुळ’ हा चित्रपट बेतला आहे. प्रेक्षकांना विचार करायला लावणारा आणि थरारक अनुभव देणारा हा चित्रपट ठरेल. आजवरच्या मराठी रहस्यपट आणि भयपटांमध्ये ‘काकुळ’ नक्कीच वेगळा ठसा उमटवेल, यात शंका नाही. त्यामुळे या रहस्याचा उलगडा होण्यासाठी आता प्रेक्षकांना नोव्हेंबरची वाट पाहावी लागणार आहे.

सई ताम्हणकर, सिद्धार्थ चांदेकर आणि सखी गोखले यांच्या प्रमुख भूमिका असलेल्या “ अडकित्ता “चित्रपटाचा प्रीमियर ११ सप्टेंबर २०२६ रोजी फक्त मराठी झी ५ वर !

खऱ्या भावना आणि सर्वसामान्यांच्या आयुष्यातील अनुभव मांडणाऱ्या कथा प्रेक्षकांसमोर आणण्याची आपली वचनबद्धता कायम ठेवत मराठी झी5 नेहमीच प्रेक्षकांना नवनवीन कलाकृतीची ओळख करून देत असतो. अश्यातच आगामी “अडकित्ता” चित्रपटाचा प्रीमियर 11 सप्टेंबर 2026 रोजी होणार आहे.

नातेसंबंध, कुटुंबातील नात्यांची गुंतागुंत आणि आजच्या समाजातील वास्तवाचा वेध घेणाऱ्या प्रभावी मराठी ओरिजिनल्समध्ये ‘अडकित्ता’ची भर पडणार आहे. पालकत्व, विश्वास आणि जिव्हाळ्याच्या नात्यातील गुंतागुंत मांडणारी उत्कंठावर्धक आणि भावनिक कथा या चित्रपटातून प्रेक्षकांसमोर आणण्यात येणार आहे.

आशुतोष परांडकर दिग्दर्शित आणि मंगेश पवार अँड कंपनी व जॅकपॉट एंटरटेनमेंट निर्मित ‘अडकित्ता’ हा कुटुंबातील नातेसंबंध, काम आणि वैयक्तिक आयुष्यातील समतोल तसेच दुसऱ्याची काळजी घेण्याची जबाबदारी यांमधील भावनिक गुंतागुंतीचा वेध घेणारा कौटुंबिक चित्रपट आहे.

सई ताम्हणकर, सिद्धार्थ चांदेकर आणि सखी गोखले यांच्या प्रमुख भूमिका असलेल्या या चित्रपटात उत्तम कलाकारांना एका हळुवार आणि भावस्पर्शी कथेसाठी एकत्र आणण्यात आले आहे. रोजच्या जीवनातील अनुभव मांडणाऱ्या कथानकाला भावनांची खोली देणाऱ्या ‘अडकित्ता’मधून मानवी भावनांशी घट्ट नाते राखत प्रेक्षकांना विचार करायला आणि चर्चा करायला प्रवृत्त करणाऱ्या वेगळ्या कथा सादर करण्याची मराठी झी5ची वचनबद्धता आणखी मजबूत करण्यात आली आहे.

“अडकित्ता” ची कथा काय आहे?
गौतम आणि कस्तुरी हे आनंदी आणि स्वतंत्र विचारांचे जोडपे आहे. आपापल्या करिअरवर लक्ष केंद्रित करत त्यांनी आपल्या मूळ गावापासून दूर सुखाचे आयुष्य उभे केले आहे. मात्र मूल होऊ देण्याचा निर्णय घेतल्यानंतर त्यांचे आयुष्य पूर्णपणे बदलते. कठीण गर्भावस्थेनंतर त्यांचा मुलगा ओंकारचा मुदतपूर्व जन्म होतो. त्यानंतर एकीकडे पालकत्वाची आव्हाने सांभाळताना दुसरीकडे आपले व्यावसायिक आयुष्यही सुरळीत ठेवण्याची कसरत या दोघांना करावी लागते.

कौटुंबिक जबाबदाऱ्या आणि करिअर यांचा मेळ घालणे कठीण होऊ लागल्यानंतर ओंकारची काळजी घेण्यासाठी हे जोडपे मंगल नावाच्या नॅनीची मदत घेते. सुरुवातीला नव्याने आलेल्या पालकत्वाच्या जबाबदाऱ्या सांभाळण्यासाठी त्यांना मंगलचा मोठा आधार मिळतो. मात्र कस्तुरी आणि गौतम तिच्यावर अधिकाधिक अवलंबून राहू लागतात, तशी त्यांच्या घरातील परिस्थितीही बदलू लागते. हळूहळू त्यांच्या निर्णयांवर, दैनंदिन सवयींवर आणि घरातील कारभारावर मंगलचा प्रभाव वाढू लागतो. अखेर तिची उपस्थिती मदत म्हणून कमी आणि नियंत्रण म्हणून अधिक जाणवू लागते.

मदतीची गरज असलेल्या एका तरुण जोडप्याची साधी वाटणारी ही कथा पुढे विश्वास, परावलंबित्व आणि कुटुंब व घरातील नात्यांच्या मर्यादा यांचा वेध घेणारी उत्कंठावर्धक कथा होते.

‘अडकित्ता’ च वेगळेपण – आधुनिक काळातील पालकत्वाचा आनंद आणि त्यातील आव्हाने मांडणारी, आपल्या आयुष्याशी नाते सांगणारी कथा. प्रसंगानुरूप घडणाऱ्या घटना, भावनिक नाट्य, कौटुंबिक नातेसंबंध आणि मानवी नाती यांचा वेगळा मिलाफ. व्यावसायिक जबाबदाऱ्या आणि कौटुंबिक जबाबदाऱ्या यांचा समतोल साधताना दररोज करावी लागणारी कसरत प्रभावीपणे मांडण्यात आली आहे. सई ताम्हणकर, सिद्धार्थ चांदेकर आणि सखी गोखले यांचा भूमिकांमधील बारकावे दाखवणारा अभिनय. सहानुभूती, समजूतदारपणा, क्षमा आणि आपल्या प्रिय व्यक्तींसाठी आपण घेत असलेले निर्णय यांचा वेध. गोंधळ आणि धावपळीच्या प्रसंगांतही विनोद आणि नात्यांमधील जिव्हाळा शोधणारी एक हृदयस्पर्शी कथा.

चित्रपटा विषयी बोलताना मंगलची भूमिका साकारणारी सई ताम्हणकर सांगते “गौतम आणि कस्तुरीच्या आयुष्यात अगदी अनपेक्षित वेळी मंगलचा प्रवेश होतो आणि हळूहळू ती त्यांच्या आयुष्याचा महत्त्वाचा भाग होते. वरवर दिसते त्यापेक्षा मंगलच्या व्यक्तिमत्त्वात बरेच काही दडलेले आहे आणि तिच्या भूमिकेतील हीच गोष्ट मला विशेष रंजक वाटली. वेगवेगळे विचार आणि स्वभाव असलेली माणसे प्रेमाच्या एका समान धाग्यामुळे अखेर एकाच भूमिकेवर कशी येऊ शकतात, हे ‘अडकित्ता’मध्ये अतिशय सुंदर पद्धतीने दाखवण्यात आले आहे”


गौतमची भूमिका साकारणारा सिद्धार्थ चांदेकर म्हणाला, “आपले आयुष्य कसे जगायचे, हे आपण पूर्णपणे ठरवले आहे, असे गौतमला वाटत असते. मात्र पालकत्वामुळे त्याचे सगळेच गणित बदलते. मला ही व्यक्तिरेखा जवळची वाटली, कारण त्याचा गोंधळ आणि त्याची धडपड ही आपल्या सर्वांच्या परिचयाच्या परिस्थितीतून निर्माण होते. एकीकडे त्याला आपल्या कुटुंबासाठी वेळ द्यायचा आहे, तर दुसरीकडे स्वतःचे करिअरही घडवायचे आहे. ‘अडकित्ता’मध्ये या परिस्थिती विनोद आणि जिव्हाळ्याने मांडण्यात आल्या आहेत, पण त्यामागे एक भावनिक प्रवासही आहे. आपण आयुष्यात घेत असलेले निर्णय, निभावत असलेल्या भूमिका आणि या दोन्हींत समतोल कसा साधायचा, याबद्दल गौतम आणि कस्तुरीचा प्रवास प्रेक्षकांमध्ये चर्चा घडवून आणेल, अशी मला आशा आहे.”

कस्तुरीची भूमिका साकारणारी सखी गोखले म्हणाली, “कस्तुरी ही शहरात राहणारी स्वतंत्र विचारांची स्त्री आहे. विभक्त कुटुंबात नव्याने आलेले मातृत्व सांभाळताना ती आपल्या महत्त्वाकांक्षाही पूर्ण करण्याचा प्रयत्न करत आहे. हा संघर्ष अनेकांच्या आयुष्यात दिसतो, मात्र त्याबद्दल फारसे बोलले जात नाही. त्यामुळे ‘अडकित्ता’ची कथा आणि कस्तुरीची व्यक्तिरेखा अनेकांना आपल्या आयुष्याशी मिळतीजुळती वाटेल. आपल्या सर्वांना दररोज ज्या गुंतागुंतीच्या परिस्थितींचा सामना करावा लागतो, त्यांचा सखोल वेध घेतानाच ‘अडकित्ता’ आपल्या आयुष्याचे प्रतिबिंबही दाखवतो.”

‘अडकित्ता’ 11 सप्टेंबर 2026 रोजी केवळ मराठी झी5वर बघायला विसरू नका !

मुंबई, 1 सप्टेंबर: भारतातील आघाडीच्या आणि प्रभावशाली इलेक्ट्रॉनिक संगीत कलाकारांपैकी एक असलेल्या न्युकेलियाने आपल्या आगामी ‘आला रे आला’ या गाण्याची खास झलक सादर केली. भारतीय लोकसंगीत आणि पॉप-कल्चरमधील प्रभावांना ग्लोबल बास म्युझिकसोबत अनोख्या पद्धतीने जोडणाऱ्या न्युकेलियाने चिंचपोकळीचा चिंतामणी गणपतीच्या पवित्र आगमन सोहळ्यानिमित्त ही झलक म्हणून अनोखी मान वंदना दिली
‘कूचा मॉन्स्टर’, ‘बास राणी’ आणि ‘राजा बाजा’ यांसारख्या गाजलेल्या संगीतनिर्मितींसाठी तसेच EDC लास वेगास, NH7 वीकएंडर आणि सुंबर्न यांसारख्या मोठ्या संगीत महोत्सवांमधील दमदार सादरीकरणांसाठी न्युकेलिया ओळखला जातो. भारतीय आणि जागतिक संगीतप्रवाहांचा अनोखा संगम घडवणाऱ्या त्याच्या संगीताने भारतातील समकालीन इलेक्ट्रॉनिक संगीताच्या क्षेत्रावर स्वतःची वेगळी छाप निर्माण केली आहे.
चिंचपोकळीचा चिंतामणी गणपतीच्या आगमन सोहळ्यात ‘आला रे आला’ची विशेष झलक सादर करणे हे न्युकेलियासाठी एका अर्थाने भावनिक घरवापसीच ठरली. मुंबई आणि तिच्या गणेशोत्सवाशी असलेले त्याचे दीर्घकाळचे नाते या निमित्ताने पुन्हा अधोरेखित झाले. यापूर्वीही न्युकेलियाने आपल्या संगीताच्या माध्यमातून गणपती उत्सवाचा जल्लोष साजरा केला आहे. 2015 मध्ये गणपती विसर्जनाच्या दिवशी त्याने ‘बास राणी’ हा प्रसिद्ध अल्बम लाँच केला होता.
‘आला रे आला’च्या माध्यमातून न्युकेलिया पुन्हा एकदा गणेशोत्सवातील ऊर्जा, भावना आणि भव्य उत्साहाला आपल्या खास संगीतशैलीतून मानवंदना देत आहे. या गाण्याची झलक गणेशोत्सवाची ओळख असलेल्या उत्साहपूर्ण वातावरणाचे आणि संसर्गजन्य जल्लोषाचे दर्शन घडवते. न्युकेलियाच्या दमदार इलेक्ट्रॉनिक संगीताचा अनोखा ठेका आणि मुंबईच्या उत्सवी वातावरणाची रंगत यांचा सुंदर संगम या गाण्यात अनुभवायला मिळतो.

न्युकेलिया म्हणाला, “गणपतीचा उत्सव माझ्या मनात नेहमीच एक विशेष स्थान राखून आहे. या काळात मुंबईत जाणवणारी ऊर्जा इतर कशासारखीच नाही. या उत्सवात लोक, संगीत आणि जल्लोष एका अतिशय सुंदर पद्धतीने एकत्र येतात. 2015 मध्ये गणपती विसर्जनाच्या दिवशी मी ‘बास राणी’ लाँच केला होता. त्यामुळे यंदा पवित्र आगमन सोहळ्याच्या निमित्ताने ‘आला रे आला’ची झलक घेऊन पुन्हा परतणे माझ्यासाठी खूप खास आहे.”
मात्र, न्युकेलियासाठी भारताच्या उत्सवी संस्कृतीशी असलेले नाते केवळ पारंपरिक संगीत कार्यक्रम किंवा मोठ्या मंचांपुरते मर्यादित नाही. भविष्यात या उत्सवांचा अनुभव थेट त्या परिसरांमध्ये आणि समुदायांमध्ये घेऊन जाण्याची त्याची इच्छा आहे, जिथे या उत्सवांची खरी ऊर्जा निर्माण होते.
तो पुढे म्हणाला, “अशा प्रकारचे आणखी उत्सव साजरे करायला मला नक्कीच आवडेल. ‘गली सर्किट’सारखी संकल्पना मला प्रत्यक्षात आणायची आहे, ज्यामध्ये उत्सवाच्या काळात मी संगीताचा हा अनुभव शहरातील गल्ल्यांमध्ये आणि विविध परिसरांमध्ये घेऊन जाईन. केवळ मोठ्या मंचांवर कार्यक्रम करण्याऐवजी, या शहरांना त्यांची ओळख देणाऱ्या लोकांपर्यंत आणि समुदायांपर्यंत संगीत आणि जल्लोष थेट पोहोचवायचा आहे.”
ही संकल्पना न्युकेलियाच्या संगीताला पारंपरिक कॉन्सर्टच्या चौकटीबाहेर घेऊन जाण्याच्या व्यापक दृष्टिकोनाचे प्रतीक आहे. भारतातील सर्वाधिक उत्साही आणि रंगतदार उत्सवांना प्रेरणा देणाऱ्या समुदायांच्या अगदी जवळ संगीत पोहोचवण्याची त्याची ही दृष्टी आहे. ‘आला रे आला’च्या माध्यमातून तो समकालीन इलेक्ट्रॉनिक संगीताचा ठेका भारतीय सांस्कृतिक लयींसोबत जोडत आहे आणि भविष्यात अधिक जवळच्या, जिव्हाळ्याच्या आणि समुदाय-केंद्रित उत्सवांचा अनुभव निर्माण करण्याच्या दिशेने वाटचाल करत आहे.
**‘आला रे आला’**च्या रिलीजची उत्सुकता वाढत असताना, या विशेष मानवंदनेमुळे भारतातील तरुणाई, संस्कृती आणि उत्सवांच्या भावनेशी न्युकेलियाचे दीर्घकाळचे नाते पुन्हा एकदा अधोरेखित झाले आहे.
भारताच्या प्रभावशाली इलेक्ट्रॉनिक संगीत कलाकारांपैकी एक असलेला न्युकेलिया भारतीय लोकसंगीत आणि पॉप-कल्चरमधील प्रभावांना ग्लोबल बास म्युझिकसोबत अनोख्या पद्धतीने जोडण्यासाठी ओळखला जातो. ‘कूचा मॉन्स्टर’, ‘बास राणी’ आणि ‘राजा बाजा’ यांसारख्या गाजलेल्या संगीतनिर्मितींपासून ते EDC लास वेगास, NH7 वीकएंडर आणि सुंबर्न यांसारख्या आंतरराष्ट्रीय आणि देशातील प्रमुख संगीत महोत्सवांमधील सादरीकरणांपर्यंत, त्याने भारताच्या समकालीन इलेक्ट्रॉनिक संगीतविश्वाला आकार देणारी स्वतःची वेगळी संगीतभाषा आणि वारसा निर्माण केला आहे.

पाच फुटाचा बच्चन’चा टीझर लाँचआपल्या अनोख्या नावाने चर्चेत असलेल्या, एका कीर्तनकार तरुणीची गोष्ट सांगणाऱ्या ‘पाच फुटाचा बच्चन’ या चित्रपटाचा टीजर नुकताच सोशल मीडियावर लाँच करण्यात आला आहे. उत्तम कलाकारांचा समावेश असलेला हा चित्रपट येत्या ९ ऑक्टोबरला संपूर्ण महाराष्ट्रात प्रदर्शित होणार आहे.

‘पाच फुटाचा बच्चन’ या चित्रपटात तरूण कीर्तनकार मुलीची गोष्ट आहे. तिच्या कीर्तनात कोल्हापुरी भाषा आहे. संतांचे अभंग तिला मुखोद्गत आहेत. जनमानसात तिचं प्रचंड नाव आहे. उंचीने पाच फूट असलेल्या या तडफदार मुलीला ‘पाच फुटाचा बच्चन’ म्हणून ओळखलं जातं. या प्रमुख भूमिकेतून श्रुती मधुदीप ही अभिनेत्री पदार्पण करत आहे. नुकत्याच प्रदर्शित झालेल्या या चित्रपटाच्या टिजरने प्रेक्षकांना खिळवून ठेवले आहे. यात तगड्या कलाकारांची फौज आहे. त्यांचे नवे लुक बघून, पात्रांची झलक बघून उत्सुकता तयार होते आहे. मराठी मनाला भावणाऱ्या कीर्तन या विषयाला हा सिनेमा साद घालतो आहे, असं दिसतं आहे. अवघ्या दीड मिनिटाचा हा टीजर अत्यंत नाट्यमय असून त्यातील दृश्यांनी प्रेक्षकांची मने खिळवून ठेवली आहेत. या चित्रपटात नेमकं काय घडणार आहे, याची उत्सुकता आता शिगेला पोचली आहे.

मूळ प्रायोगिक एकपात्री नाटकातून मांडण्यात आलेल्या या गोष्टीला प्रेक्षकांचा तूफान प्रतिसाद मिळाला होता. मराठी मनाची नस पकडेल अशा या नाटकाचे चित्रपटात रूपांतर झाले आहे. नाटकातून चित्रपटात रूपांतर होण्याच्या या दैदीप्यमान यादीत या चित्रपटाचे नाव जोडले गेल्याने या चित्रपटाविषयीचं कुतूहल वाढलं आहे. या नाट्यमय कलाकृतीत नेमकं काय घडणार हे पाहण्यासाठी ९ ऑक्टोबरपर्यंत प्रतीक्षा करावी लागणार आहे.

कौस्तुभ रमेश देशपांडे यांनी चित्रपटाचं लेखन आणि दिग्दर्शन केलं आहे. राहुल कर्णिक आणि ऑर्फियस स्टुडिओज यांनी ‘पाच फुटाचा बच्चन’ या चित्रपटाची निर्मिती केली आहे. चित्रपटात श्रुती मधुदीप, गौरी नलावडे, शशांक शेंडे, चिन्मयी सुमीत, क्षितीश दाते, पुष्कराज चिरपुटकर, आशय कुलकर्णी, ओमप्रकाश शिंदे, विनोद वणवे यांच्या भूमिका आहेत. अभिषेक शेटे यांनी छायांकन, सौरभ प्रभुदेसाई यांनी संकलन, निरंजन पेडगावकर यांनी संगीत, तर प्रदीप आवटे यांनी गीतलेखन केले आहे.

Teaser Link

Thank you

Darshan S.Musale
(Media Planet)

देशसेवा ज्याच्या रक्तात भिनली आहे पण केवळ शारीरिक अडचणींमुळे ज्याचे लष्करामध्ये भरती होण्याचे स्वप्न अधुरे राहिले अशा एका सामान्य मुलाच्या जिद्दीने आणि अफाट आत्मविश्वासाने मराठी चित्रपटसृष्टीत एक नवा इतिहास रचला आहे.

एनसीसीपासून सुरू झालेला प्रवास फौजी बांधवांचे महत्त्व घराघरांपर्यंत पोहोचवण्याचे स्वप्न, नोटबंदी आणि कोरोनासारखी आव्हाने जवळच्या मित्राचा अपघाती मृत्यू आणि ऐन रिलीजच्या वेळी मार्गदर्शकावर आलेला आरोग्याचा प्रसंग ! या सर्व महाप्रचंड आव्हानांवर मात करत ‘फौजी’ हा चित्रपट आता प्रेक्षकांच्या भेटीला सज्ज झाला आहे.

या संपूर्ण आणि प्रेरणादायी प्रवासात नाथ विश्वनाथसाहेब यांच्या मोलाच्या मार्गदर्शनाने, आणि सुधीरदादा पाटसकर यांचे खंबीर नेतृत्व या मुळे फौजी या चित्रपटाला एक अभेद्य बळ मिळाले आहे. घनश्याम येडे यांना लहानपणापासूनच देशासाठी काहीतरी करण्याची तीव्र ओढ होती. कॉलेजमध्ये असताना एनसीसीमध्ये उत्कृष्ट कामगिरी करत त्यांनी सैनिकांविषयीचा नितांत आदर जपला परंतु शारीरिक अडचणींमुळे त्यांना सैन्यात प्रत्यक्ष जाता आले नाही.

सैनिकांचे खरे महत्त्व आणि त्यांच्या त्यागाची गाथा प्रत्येकापर्यंत पोहोचवलीच पाहिजे या ज्वलंत विचारातून त्यांच्या डोक्यात ‘फौजी’ चित्रपटाचा विचार जन्मला ! या प्रवासात त्यांची भेट सुहास गरगडे यांच्याशी झाली. दोघांचीही परिस्थिती सामान्य, पण फौजींसाठी काहीतरी करण्याची जिद्द अफाट. मग बँका, पतसंस्था,सावकार यांच्या माध्यमातून सर्वतोपरी प्रयत्न करत चित्रपट उभा करण्याचे धाडस त्यांनी केले.

अनेक प्रयत्न करूनही चित्रपट पूर्ण करणे सोपे नव्हते. त्यात नोटबंदी पाठोपाठ आलेला कोरोना काळ कठीण ठरला. मग वासुदेव महाराज गरुड यांचे आशीर्वाद आणि सतीश नाझरकर, अशोक नाझ्रकर,गणेश गुंजाळ, डॉ. शंकर तळबे, सुनील गावडे, अशोक गाडे, प्रवीण बुरुंगे, राजेंद्र करणे, विष्णुपंत नेवाळे, शिवाजी दडस, कोंडीबा नलावडे ,जोतीबा घाडगे यांसारख्या सहकार्यांच्या बळावर चित्रपट हळूहळू पूर्णत्वास येऊ लागला.

चित्रपट अंतिम टप्प्यात असतानाच काळाने घाला घातला. चित्रपटातील प्रमुख पात्रांपैकी एक आणि जवळचा जिवलग मित्र सुहास गरगडे यांचा अपघातात दुर्दैवी मृत्यू झाला. या आघाताने चित्रपट अर्ध्यावरच लटकला आणि शून्यातून विश्व निर्माण करणाऱ्या दिग्दर्शकावर स्वतःचे घर ,जमीन गहाण ठेवण्याची वेळ आली.तरी पण खचून न जाता जिवलग मित्राचे स्वप्न पूर्ण करण्यासाठी त्याचा धाकटा भाऊ मयूर गरगडे याला त्याच्या जागी घेऊन मित्राला खरी श्रद्धांजली दिली,स्वार्थासाठी न जाता,स्वताला त्रास घेऊन,स्वतचेच नुकसान करून घेतले पण शब्द बदलला नाही.

पण चित्रपटाचे पुढे काय? मग ज्यांना घनश्याम यांनी आपले सर्वस्व आणि वडीलस्थान मानले, त्या नाथ विश्वनाथ साहेब यांनी घनशामसाठी “फौजी”यासारख्या सामाजिक चित्रपटाच्या पाठीशी उभे राहत आपले अमूल्य मार्गदर्शन व साथ दिली. साहेबांचे आशीर्वाद, त्यांची प्रेरणा आणि सहनिर्माती सौ. स्वप्नजा विश्वनाथ यांच्या रूपाने या कुटुंबाने फौजी चित्रपटासाठी आपले दरवाजे सताड उघडे केले. या दोन्ही महान व्यक्तींच्या खंबीर साथीमुळे चित्रपट यशस्वीपणे उभा राहण्यास मोठी मदत झाली.सेन्सॉरचे टप्पे पार करून चित्रपटाची रिलीज तारीख ठरली.

मात्र रिलीजची तारीख जवळ येत असताना नाथ विश्वनाथ साहेब मृत्यूच्या दाढेत सापडले. अशा बिकट प्रसंगी त्यांच्या मुलीने स्वतःच्या शरीराचा भाग देऊन साहेबांना जीवदान दिले. साहेबांच्या समाधानासाठी चित्रपटाची रिलीज तारीख पुढे ढकलली नाही.ज्या दिवशी चित्रपट रिलीज झाला, त्या दिवशी चित्रपटगृहात काय होते याकडे कोणाचेच लक्ष नव्हते; कारण सर्वांसाठी विश्वनाथ साहेब वाचणे सर्वात महत्त्वाचे होते. पण घनश्याम येडे यांच्या मनात असलेला ठाम विश्वास होता “साहेब जगले तर असे अनेक चित्रपट मी पुन्हा उभे करू शकेन, हाच त्यांचा विश्वास आज खरा ठरला.

अशा अटीतटीच्या प्रसंगी चित्रपटात एकलव्य प्रतिष्ठान,सुधीरदादा पाटसकर हे ‘प्रस्तुतकर्ता’ म्हणून अत्यंत समर्थपणे पुढे आले. चित्रपट पाहिल्यानंतर घनश्याम येडे यांच्यामधील अफाट देशप्रेम, त्यांचा साधेपणा आणि प्रामाणिक स्वभाव सुधीरदादांच्या मनाला भिडला. हा चित्रपट घराघरांपर्यंत पोहोचलाच पाहिजे, या भावनेने त्यांनी फौजीसाठी हवी ती ताकद लावण्याचा आणि आपला संपूर्ण पाठिंबा देण्याचा शब्द दिला.

सुधीरदादांच्या या दिलदार आणि खंबीर भूमिकेमुळे या प्रवासाला एक भक्कम आकार मिळाला. आणि आज विश्वनाथ साहेबां आणि सुधीरदादा पाटसकर यांच्या सारख्या दिलदार व्यक्तींच्या साथीमुळे हा चित्रपट मोठ्या दिमाखात प्रेक्षकांच्या भेटीला आता खरा येतोय.

दिग्गजांची फौज आणि संगीताची मेजवानी या चित्रपटात सौरभ गोखले, प्राजक्ता गायकवाड, शाहबाज खान, टीनू वर्मा, संजय खापरे, नागेश भोसले, हंसराज जगताप, अश्विनी कासार आणि खुद्द घनश्याम येडे यांसारख्या दिग्गज कलाकारांची फौज पाहायला मिळणार आहे.

शान, वैशाली माडे, बेला शेंडे, आदर्श शिंदे, उर्मिला धनगर आणि कविता राम यांच्या सुरेल आवाजाने या चित्रपटाला आणखी उंची प्राप्त करून दिली आहे. “फौजी” हा केवळ एक चित्रपट नसून, मराठी सिनेसृष्टीतील आजवरचा सैनिकांच्या व्यथा सांगणारा मराठीतील सर्वात मोठा चित्रपट ठरला आहे. हा चित्रपट प्रत्येकाने आवर्जून पहावा असाच आहे. फौजी 27 नोव्हेंबर २०२६ रोजी प्रदर्शित होणार आहे.

‘महाराष्ट्र एपस्टीन फाईल्स’ हा आगामी चित्रपट घोषणा झाल्यापासूनच जोरदार चर्चेत आहे. प्रदर्शित केलेल्या पहिल्या पोस्टरने रसिकांमध्ये उत्सुकता वाढविल्यानंतर या चित्रपटातील दीपाली सय्यद यांचा लुक रिव्हील करण्यात आला. त्यानंतर सोशल मीडियावर या चित्रपटाने अक्षरश: धुमाकूळ घातला. समाजात घडणाऱ्या घटनांचे प्रतिबिंब ‘महाराष्ट्र एपस्टीन फाईल्स’ या चित्रपटात पाहायला मिळणार असल्याने नेटकऱ्यांमध्ये उत्सुकतेचे वातावरण आहे. अशातच प्रदर्शित झालेल्या या चित्रपटाच्या टिझरने उत्सुकता शिगेला पोहोचवली आहे. २ ऑक्टोबर २०२६ रोजी हा चित्रपट संपूर्ण महाराष्ट्रात प्रदर्शित होणार आहे.

आनंदी पिक्चर्स अमरावती आणि सचिन रोडे पाटील प्रस्तुत ‘महाराष्ट्र एपस्टीन फाईल्स’ या मराठी सिनेमाची निर्मिती फ्लेमिंगो क्रिएशन आणि मातोश्री एन्टरटेन्मेंटच्या बॅनरखाली करण्यात आली आहे. देवेंद्र भट, सूर्यकांत भुंडे आणि प्रशांत कदमपुरे या चित्रपटाचे निर्माते आहेत. ‘महाराष्ट्र एपस्टीन फाईल्स’ चित्रपटाचे दिग्दर्शक स्वरूप सावंत यांनी या चित्रपटाद्वारे समाजातील भोंदूगिरीवर थेट प्रहार केला आहे. प्रदर्शित झालेल्या टिझरच्या सुरुवातीला पांढऱ्या रंगाची टोयोटा क्रिस्टा कार एका आलिशान बंगल्यासमोर येऊन थांबते. एकीकडे अंगात वारे आलेली एक स्त्री घुमताना दिसते, तर दुसरीकडे अभिनेत्री दीपाली सय्यदची एन्ट्री होते. ती ज्या बाबाकडे आलेली असते त्याचा सहायक (अभिनेता अक्षय टंकसाळे) अमरावतीहून कोणीतरी पैशांची बॅग आणल्याचे सांगतो. दीपाली आपल्या उजव्या हाताची अनामिका म्हणजेच करंगळीच्या बाजूचे बोट कापते आणि रक्ताभिषेक करते. त्यानंतर थेट नाशिकमधील सहकारवाडा पोलिस स्टेशन पाहायला मिळते. एक तरुण दैवी शक्ती असल्याचे भासविणाऱ्या बाबाच्या भोंदूगिरीची स्टोरी पोलिसांना सांगताना दिसतो. हे सर्व पाहिल्यावर ‘महाराष्ट्र एपस्टीन फाईल्स’ या चित्रपटात काय पाहायला मिळेल याचा सहज अंदाज येतो.

हा चित्रपट केवळ भोंदूबाबाचा बुरखा फाडणार नसून, अनेकांच्या चेहऱ्यावरील मुखवटे उतरवणार असल्याची जाणीव टिझर पाहिल्यावर होते. याबाबत दिग्दर्शक स्वरूप सावंत म्हणाले की, प्रेक्षकांच्या भेटीला आलेला टिझर खऱ्या अर्थाने चित्रपटाची तोंडओळख करून देणारा आहे. इतकेच नव्हे तर विचारही करायला लावणारा आहे. प्रदर्शनापूर्वीच या चित्रपटावर नाना तऱ्हेचे आरोप केले जात असून, अडथळा आणला जात आहे, पण विरोध करण्यापूर्वी अगोदर चित्रपट पाहावा असे आवाहन मी तमाम रसिकांना करत आहे. जे सत्य आहे ते आम्ही चित्रपटाच्या माध्यमातून जगासमोर आणून समाजात घडणाऱ्या घटना प्रकाशझोतात आणत आहोत. यासोबतच चहूबाजूंनी प्रेक्षकांचे परीपूर्ण मनोरंजन याची काळजीही या चित्रपटात घेण्यात आली आहे. ‘आता सगळं उघड होणार…!’ ही चित्रपटाची टॅगलाईन तंतोतंत खरी असल्याचे ‘महाराष्ट्र एपस्टीन फाईल्स’ पाहिल्यावर नक्कीच जाणवेल.

‘महाराष्ट्र एपस्टीन फाईल्स’ या चित्रपटात दीपाली सय्यदसोबत उदय टिकेकर, अक्षय टंकसाळे महत्त्वपूर्ण भूमिकेत दिसणार आहेत. सागरकुमार एस. जैन यांनी कथालेखन केले असून, संजय नवगिरे यांनी पटकथा व संवादलेखन केले आहे. डिओपी आकाश काकडे या चित्रपटाची सिनेमॅटोग्राफी केली असून, कला दिग्दर्शनाची महत्त्वपूर्ण जबाबदारी अक्षय आंबेकर यांनी सांभाळली आहे. वेशभूषा आकांक्षा गांधी यांनी केली आहे. नेहा घोडके प्रॉडकशन कंट्रोलर असून, सचिन घनवट प्रोडक्शन हेड आहेत.

पॅनोरमा स्टुडिओज, कल्ट डिजिटल आणि प्रकाश फिल्म्स यांच्या धोरणात्मक भागीदारीअंतर्गत निर्मित ‘तुझ्या आयला’ या आगामी मराठी चित्रपटाचा टिझर नुकताच लोकप्रिय अभिनेत्री अमृता खानविलकरच्या हस्ते प्रदर्शित करण्यात आला आहे. राष्ट्रीय पुरस्कार विजेते दिग्दर्शक सुजय डहाके यांनी या चित्रपटाचे दिग्दर्शन केले असून, हा चित्रपट २५ सप्टेंबर रोजी महाराष्ट्रभरातील चित्रपटगृहांमध्ये प्रदर्शित होणार आहे.

अभिनेत्री अमृता खानविलकरने ‘तुझ्या आयला’च्या टिझरचे अनावरण करत सुजय डहाके यांच्या अनोख्या खेळाचे कौतुक केले आहे. याविषयी बोलताना अमृताने सांगितले, सुजय डहाके यांच्या कोणत्याही चित्रपटाची पहिली झलक कायमच एक वेगळीच उत्सुकता निर्माण करते. तुम्ही त्यांच्या चित्रपटाचा टिझर प्ले करता आणि अवघ्या १० सेकंदांत त्यांच्या विश्वात पूर्णपणे गुरफटून जाता — असं विश्व, जिथे ते स्वतःला कोणत्याही आडपडद्याशिवाय, कोणतीही तडजोड न करता मांडताना दिसतात. ‘तुझ्या आयला’चा टिझर पाहताना मलाही अगदी असंच जाणवलं. हा टिझर थेट भिडतो. हा चित्रपट नेमका कशाबद्दल आहे, हे सांगण्यापासून तो अजिबात मागे हटत नाही, काहीही लपवत नाही किंवा गोष्टी गूढ ठेवण्याचा प्रयत्न करत नाही आणि आश्चर्याची गोष्ट म्हणजे, हाच प्रामाणिकपणा या चित्रपटाबद्दलची उत्सुकता आणखी वाढवतो. त्यामुळे आता उत्कंठेने खिळवून ठेवणाऱ्या अनुभवासाठी सज्ज व्हा, कारण ‘तुझ्या आयला’ तुम्हाला थेट तुमच्या बालपणीच्या एका आठवणीच्या कोपऱ्यात घेऊन जाणारा वाटतोय — रॉ, नॉस्टॅल्जिक, गोंधळाने भरलेला आणि तरीही मनाच्या अगदी जवळचा.

‘शाळा’, ‘श्यामची आई’ यांसारखे आशयघन चित्रपट बनविणाऱ्या सुजय डहाके यांनी ‘तुझ्या आयला’ या चित्रपटाद्वारे एक अनोखे धाडस केले असून, हा चित्रपट अतिशय महत्त्वपूर्ण विषयावर आधारित आहे. टिझर खूप उत्कंठावर्धक आहे. शीर्षकाची सुरुवात शाब्दिक हिंसेने होत असली तरी हा खेळ नेमका कोणता आहे? हे जाणून घेण्याची उत्सुकता ‘तुझ्या आयला’चा टिझर पाहिल्यावर जागी होते. ‘शिवी नाय खेळाचं नाव हाय ते’ ही शीर्षकासोबत असलेली टॅगलाइन चित्रपटाची मध्यवर्ती संकल्पना स्पष्ट करणारी आहे.

‘तुझ्या आयला’बाबत दिग्दर्शक सुजय डहाके म्हणतात की, ‘शाब्दिक हिंसेने मला नेहमीच भुरळ घातली आहे आणि त्रास दिला आहे. आज हे आपल्या संस्कृतीत सामान्य झाले आहे, तरीही त्याचा प्रभाव खोलवर आहे. विशेषत: ते शब्द जेव्हा आपल्यासाठी प्रेम आणि आदराची मूर्ती असलेल्या आईबद्दल वापरले जातात, तेव्हा अशा भाषेच्या मुळांवर प्रश्नचिन्ह निर्माण होते. या चित्रपटाद्वारे, मला शब्दांची शक्ती आणि त्यांच्यामुळे होणारे नुकसान यावर ऑफलाइन आणि डिजिटल दोन्ही ठिकाणी चर्चा सुरू करायची आहे.’

पॅनोरमा स्टुडिओजच्या वतीने कुमार मंगत पाठक, अभिषेक पाठक आणि मुरलीधर छतवानी, कल्ट डिजिटलच्या वतीने सुनील जैन, आदित्य जोशी, तर प्रकाश फिल्म्सच्या वतीने राजेश सिंह यांनी चित्रपटाची निर्मिती केली आहे. सुशांत वेंगुर्लेकर, मोहित अरोरा आणि मेघना प्रमाणिक सहनिर्माते आहेत.

या चित्रपटात राजश्री देशपांडे, रोहिणी हट्टंगडी, संभाजी भगत, अभिजित थिटे, सोहम बाबर आणि अभिषेक झेंडे यांच्या प्रमुख भूमिका असून, अनेक गुणी बालकलाकारही या चित्रपटाचा भाग आहेत.

‘तुझ्या आयला’ हा चित्रपट २५ सप्टेंबर रोजी महाराष्ट्रभरातील चित्रपटगृहांमध्ये प्रदर्शित होणार आहे.