गौतमी पाटील आणि भाऊ कदम यांच्या जोडीची जादू

दादा कोंडके यांच्या अजरामर गाण्याला नव्या अंदाजात सादर करण्यात आलेल्या ‘हिल पोरी हिला’ या गाण्याने सध्या सोशल मीडियासह यूट्यूबवर धुमाकूळ घातला आहे. महाराष्ट्रापुरते मर्यादित न राहता हे गाणे आता देशभरातील प्रेक्षकांचे लक्ष वेधून घेत असून, यूट्यूब इंडियाच्या ट्रेंडिंग यादीत २४व्या क्रमांकावर पोहोचले आहे.

या गाण्यात पहिल्यांदाच महाराष्ट्राची लोकप्रिय नृत्यांगना गौतमी पाटील आणि विनोदाचा बादशाह भाऊ कदम ही जोडी एकत्र झळकली आहे. त्यांच्या केमिस्ट्रीने आणि दमदार सादरीकरणाने प्रेक्षकांची मनं जिंकली असून सोशल मीडियावर या जोडीची जोरदार चर्चा रंगली आहे.

दादा कोंडके यांच्या गाजलेल्या गाण्याचा नवा अवतार

दादा कोंडके यांच्या ‘आंधळा मारतो डोळा’ या चित्रपटातील ‘हिल हिल पोरी हिला’ हे गाणे त्या काळात प्रचंड लोकप्रिय ठरले होते. तब्बल ५२ वर्षांनंतर या गाण्याला आधुनिक संगीत, नवी दृश्यभाषा आणि आकर्षक सादरीकरणाची जोड देत त्याचे रिमेक व्हर्जन प्रेक्षकांसमोर आणण्यात आले आहे.

जुन्या गाण्याचा आत्मा कायम ठेवत नव्या पिढीला भावेल अशा पद्धतीने केलेल्या सादरीकरणामुळे हे गाणे सर्व वयोगटातील प्रेक्षकांना आकर्षित करत आहे.

कोकणातील निसर्गरम्य लोकेशन्सची साथ

या गाण्याचे चित्रीकरण कोकणातील सुंदर आणि निसर्गरम्य परिसरात करण्यात आले आहे. हिरव्यागार डोंगररांगा, समुद्रकिनारे आणि मनमोहक लोकेशन्समुळे गाण्याच्या दृश्यांना विशेष उठाव मिळाला आहे.

गाण्यात गौतमी पाटील आणि भाऊ कदम विविध आकर्षक लूकमध्ये दिसतात. पारंपरिक नऊवारी साडीपासून रेट्रो आणि वेस्टर्न स्टाईलपर्यंत अनेक वेगवेगळ्या रूपांमध्ये दोघांनीही प्रेक्षकांचे लक्ष वेधून घेतले आहे.

सोशल मीडियावर चाहत्यांचा भरभरून प्रतिसाद

‘हिल पोरी हिला’ प्रदर्शित झाल्यापासून सोशल मीडियावर त्याची जोरदार चर्चा सुरू आहे. गाण्यातील नृत्य, संगीत, लोकेशन्स आणि गौतमी-भाऊ यांच्या नव्या जोडीचे नेटकऱ्यांनी विशेष कौतुक केले आहे.

“गौतमीचा पुन्हा एकदा जलवा पाहायला मिळाला”, “भाऊ कदम आणि गौतमीची जोडी भन्नाट आहे”, “जुन्या गाण्याला दिलेला नवा ट्विस्ट अप्रतिम” अशा प्रतिक्रिया चाहत्यांकडून व्यक्त केल्या जात आहेत.

देशभरात लोकप्रियतेचा नवा टप्पा

यूट्यूब इंडियाच्या ट्रेंडिंग यादीत २४व्या क्रमांकावर झेप घेत ‘हिल पोरी हिला’ने आपल्या लोकप्रियतेची जोरदार नोंद केली आहे. महाराष्ट्रातील लोकसंगीत, नृत्य आणि मनोरंजनाची ताकद पुन्हा एकदा राष्ट्रीय पातळीवर पोहोचवण्यात या गाण्याने महत्त्वाची भूमिका बजावली आहे.

यशाच्या निमित्ताने स्वरूप स्टुडिओसला भेट

‘देऊळ बंद २ : आता परीक्षा देवाची’ या चित्रपटाला मिळालेल्या अभूतपूर्व यशानिमित्त सुप्रसिद्ध लेखक-दिग्दर्शक प्रवीण विठ्ठल तरडे यांनी ठाणे येथील स्वरूप स्टुडिओस या चित्रपट निर्मिती संस्थेला विशेष भेट दिली. स्वरूप स्टुडिओससोबतच्या आगामी चित्रपट प्रकल्पाच्या निमित्ताने ही भेट आयोजित करण्यात आली होती.

केक कापून साजरा केला आनंदोत्सव

यावेळी अभिनेता अंकुश चौधरी, स्वरूप स्टुडिओसचे सचिन नारकर आणि विकास पवार यांनी ‘देऊळ बंद २’ला मिळालेल्या भरघोस प्रतिसादाबद्दल प्रवीण विठ्ठल तरडे यांचे अभिनंदन केले. चित्रपटाच्या यशाचा आनंद साजरा करण्यासाठी प्रवीण तरडे यांच्या हस्ते खास केक कापण्यात आला आणि उपस्थितांनी हा संस्मरणीय क्षण उत्साहात साजरा केला.

‘हा स्वामींचा आशीर्वाद’ – प्रवीण विठ्ठल तरडे

या प्रसंगी बोलताना प्रवीण विठ्ठल तरडे म्हणाले, “’देऊळ बंद २’च्या यशाचा आनंद संपूर्ण मराठी चित्रपटसृष्टी साजरा करत आहे, याचा मला मनापासून आनंद आहे. प्रेक्षकांनी चित्रपटावर दाखवलेलं प्रेम आणि मिळालेला प्रतिसाद हा स्वामी समर्थांचा आशीर्वाद आहे. या यशामागे प्रेक्षकांची श्रद्धा आणि विश्वास हीच खरी ताकद आहे.”

यशाचा प्रवास कायम चर्चेत

‘देऊळ बंद २’ने प्रदर्शित झाल्यापासून महाराष्ट्रभरात प्रेक्षकांचा उत्स्फूर्त प्रतिसाद मिळवत बॉक्स ऑफिसवर दमदार कामगिरी केली आहे. चित्रपटाच्या यशानिमित्त सुरू असलेल्या विविध भेटीगाठी आणि सत्कार कार्यक्रमांमधून संपूर्ण टीमचा उत्साह आणखी वाढताना दिसत असून, मराठी चित्रपटसृष्टीत या यशाची चर्चा कायम आहे.

‘सखा माझा पांडुरंग’मध्ये ८ वर्षांची लीप; संत सखुबाईंच्या भूमिकेत सान्वी जांबेकर

सन मराठीवरील लोकप्रिय भक्तिमय मालिका ‘सखा माझा पांडुरंग’ प्रेक्षकांच्या पसंतीस उतरत असून संत सखुबाईंच्या भक्तिमय प्रवासाने रसिकांच्या मनात विशेष स्थान निर्माण केले आहे. आतापर्यंत बालकलाकार स्वराली खोमणे हिने साकारलेल्या संत सखुबाईंच्या बालपणीच्या भूमिकेला प्रेक्षकांनी भरभरून प्रेम दिले. आता मालिकेत ८ वर्षांची लीप घेण्यात येणार असून संत सखुबाईंच्या आयुष्यातील नवा अध्याय उलगडणार आहे.

या नव्या पर्वात संत सखुबाईंची भूमिका अभिनेत्री सान्वी जांबेकर साकारणार आहे. नुकताच मालिकेचा नवा प्रोमो प्रदर्शित करण्यात आला असून त्याला प्रेक्षकांचा उत्स्फूर्त प्रतिसाद मिळत आहे. या नव्या पर्वाच्या निमित्ताने मालिकेची पत्रकार परिषदही सेटवर पार पडली. यावेळी मालिकेतील कलाकार, निर्माते संगीत कुलकर्णी आणि संपूर्ण टीम उपस्थित होती. येत्या ४ जूनपासून दररोज सायंकाळी ७.३० वाजता हे नवं आवर्तन प्रेक्षकांना पाहायला मिळणार आहे.

संत सखुबाईंचा संघर्ष नव्या रूपात

मालिकेबद्दल बोलताना निर्माते संगीत कुलकर्णी म्हणाले, “संत सखुबाई या एक सामान्य स्त्री असल्या तरी विठ्ठलभक्तीत त्यांनी स्वतःला पूर्णपणे अर्पण केलं. आयुष्यातील प्रत्येक संकटाला त्यांनी धैर्याने सामोरं जात भक्तीचा मार्ग स्वीकारला. आजच्या काळातील प्रत्येक स्त्रीसाठी त्या प्रेरणास्थान आहेत. संत सखुबाईंबद्दल उपलब्ध माहिती तुलनेने कमी असल्याने त्यांच्या जीवनप्रवासाचा परिचय प्रेक्षकांना करून देण्याचा प्रयत्न या मालिकेतून केला जात आहे. ८ वर्षांच्या लीपनंतर त्यांची निस्सीम भक्ती आणि संघर्ष नव्या रूपात समोर येणार आहे. हा संघर्ष केवळ त्यांच्यापुरता मर्यादित न राहता समाजासाठीही प्रेरणादायी ठरणार आहे.”

‘ही भूमिका साकारणं म्हणजे आशीर्वाद’

संत सखुबाईंची भूमिका साकारणारी अभिनेत्री सान्वी जांबेकर म्हणाली, “संत सखुबाईंची भूमिका साकारण्याची संधी मिळणं हे माझ्यासाठी मोठं भाग्य आहे. प्रेक्षकांनी या मालिकेवर आणि सखुवर प्रचंड प्रेम केलं आहे, त्यामुळे माझी जबाबदारी आणखी वाढली आहे. या भूमिकेसाठी मी मालिकेचे आधीचे भाग अनेकदा पाहिले आहेत. सखुच्या स्वभावातील आणि भावविश्वातील प्रत्येक बारकावा समजून घेण्याचा प्रयत्न केला आहे. मालिकेची संपूर्ण टीम मला खूप सहकार्य करत आहे. पहिल्या भागाच्या चित्रीकरणादरम्यान तब्बल २४ तास पाण्यात भिजत शूटिंग केलं. संत सखुबाईंच्या आयुष्यातील संकटांचा सामना करताना त्यांची श्रद्धा कधीच ढळली नाही. त्याच भावनेने मी ही भूमिका साकारत आहे. छोट्या सखुवर जसं प्रेम प्रेक्षकांनी केलं, तसंच प्रेम मला देखील मिळेल, अशी आशा आहे.”

भक्ती, श्रद्धा आणि संघर्षाचा नवा अध्याय

८ वर्षांच्या लीपनंतर ‘सखा माझा पांडुरंग’ मालिकेत संत सखुबाईंच्या जीवनातील अधिक खडतर आणि प्रेरणादायी प्रवास उलगडणार आहे. विठ्ठलभक्ती, श्रद्धा, त्याग आणि संकटांवर मात करण्याची ताकद यांची सांगड घालणारा हा नवा अध्याय प्रेक्षकांसाठी भावनिक आणि प्रेरणादायी ठरणार आहे.

मराठी चित्रपटसृष्टीत सातत्याने नवे प्रयोग होत असून प्रेक्षकांना वेगळ्या धाटणीचे चित्रपट देण्याचा प्रयत्न सुरू आहे. याच परंपरेत आता ‘घबाडकुंड’ हा चित्रपट एका आगळ्यावेगळ्या संकल्पनेसह प्रेक्षकांच्या भेटीला येत आहे. नुकताच प्रदर्शित झालेल्या ट्रेलरने रहस्य, भय आणि थरार यांची उत्सुकता शिगेला पोहोचवली आहे. ट्रेलरमधील प्रत्येक दृश्य प्रेक्षकांना गूढतेच्या अधिक खोल गर्तेत घेऊन जातं आणि शेवटपर्यंत उत्सुकता कायम ठेवतं.

‘आयकॉन दी स्टाईल’ प्रस्तुत आणि डॉ. रसिक कदम निर्मित ‘घबाडकुंड’ हा मराठीतील पहिला सिनेमॅटिक युनिव्हर्स म्हणून ओळखला जात आहे. दिग्दर्शक प्रितम एस. के. पाटील यांनी या चित्रपटाचे दिग्दर्शन केले असून, येत्या १९ जून रोजी हा चित्रपट संपूर्ण महाराष्ट्रात प्रदर्शित होणार आहे.

रहस्याच्या शोधात सहा जणांची धोकादायक मोहीम

‘घबाडकुंड’ची कथा एका गूढ रहस्याभोवती फिरते. एका अनाकलनीय रहस्याचा उलगडा करण्यासाठी सहा जण धोकादायक प्रवासाला निघतात. मात्र या शोधयात्रेदरम्यान त्यांना अशा घटनांचा सामना करावा लागतो, ज्या त्यांच्या कल्पनेच्याही पलीकडच्या असतात. भीती, अंधश्रद्धा, गूढ शक्ती आणि अनपेक्षित घटनांनी भरलेला हा प्रवास पुढे जात असताना अनेक धक्कादायक रहस्ये उलगडत जातात.

घबाडकुंडमध्ये नेमकं काय दडलं आहे? या गूढतेमागचं खरं सत्य काय आहे? आणि या प्रवासातून कोण सुरक्षित परतणार? अशा अनेक प्रश्नांची उत्तरं चित्रपटात पाहायला मिळणार आहेत.

थरार, भय आणि रहस्याचा संगम

चित्रपटाचा ट्रेलर पाहिल्यानंतर हा केवळ रहस्यपट नसून एक वेगळाच सिनेमॅटिक अनुभव असल्याचं स्पष्ट होतं. रहस्यमय वातावरण, अंगावर काटा आणणारे प्रसंग, अनपेक्षित वळणं आणि कथानकातील सतत वाढणारा थरार यामुळे ‘घबाडकुंड’ प्रेक्षकांना वेगळ्याच विश्वात घेऊन जाणार आहे.

निर्माते डॉ. रसिक कदम यांनी चित्रपटाबद्दल बोलताना सांगितले की, प्रेक्षकांना या चित्रपटात अनेक धक्कादायक सरप्राईजेस अनुभवायला मिळतील. मराठी चित्रपटसृष्टीत यापूर्वी न पाहिलेला अनुभव देण्याचा प्रयत्न या चित्रपटातून करण्यात आला आहे.

दमदार कलाकारांची फौज

चित्रपटात शशांक शेंडे, संदीप पाठक, देवदत्त नागे, कुशल बद्रिके, प्राजक्ता हनमघर, स्मिता पायगुडे-अंजुटे, वैष्णवी कल्याणकर, रॉकी देशमुख, आरोही भोईर, योगेश प्रकाश तनपुरे आणि साहिल अनलदेवर यांसारखे कलाकार महत्त्वाच्या भूमिकांमध्ये झळकणार आहेत. प्रत्येक पात्र कथानकाच्या गूढतेत भर घालणार असल्याचे ट्रेलरमधून दिसून येते.

१९ जूनला उलगडणार गूढ रहस्य

रहस्य, भय, थरार आणि सिनेमॅटिक विश्वाचा अनोखा संगम असलेला ‘घबाडकुंड’ प्रेक्षकांसाठी एक वेगळाच अनुभव ठरणार आहे. मराठीतील पहिल्या सिनेमॅटिक युनिव्हर्सची सुरुवात करणारा हा चित्रपट १९ जूनपासून चित्रपटगृहांत प्रदर्शित होणार असून, त्यामागील गूढ सत्य जाणून घेण्यासाठी प्रेक्षक उत्सुक आहेत.

मराठी चित्रपटसृष्टीत रहस्यपटांची समृद्ध परंपरा आहे आणि त्या परंपरेला पुढे नेणारा आणखी एक महत्त्वाकांक्षी चित्रपट म्हणजे ‘दृश्य-अदृश्य’. ५६व्या आंतरराष्ट्रीय भारतीय चित्रपट महोत्सवात (IFFI) कौतुकाची थाप मिळवलेल्या या चित्रपटाचा थरारक ट्रेलर नुकताच प्रदर्शित झाला असून, येत्या १९ जून २०२६ रोजी हा चित्रपट संपूर्ण महाराष्ट्रात प्रदर्शित होणार आहे.

आरएसटी कॅनव्हास प्रस्तुत या चित्रपटाची निर्मिती प्रद्योत पेंढारकर, अनिल वर्खडे, दत्ताजी थोरात, धनंजय थोरात, पृथ्वीराज खेडकर, युवराज खेडकर आणि अश्विनी खेडकर यांनी केली आहे. ‘कुरुक्षेत्र’, ‘बंदीशाळा’ आणि ‘एबी अँड सीडी’ यांसारख्या गाजलेल्या चित्रपटांचे दिग्दर्शक मिलिंद लेले यांनी या चित्रपटाचे दिग्दर्शन केले असून कथा आणि पटकथाही त्यांनीच लिहिली आहे. संवाद लेखन अस्मिता कुलकर्णी यांनी केले आहे.

रहस्य, संशय आणि गूढतेची पकड

ट्रेलरची सुरुवात रोहित या पात्राला २५ लाख रुपयांचे इन्सेन्टिव्ह मिळणार असल्याच्या प्रसंगाने होते. मात्र हे इन्सेन्टिव्ह नेमके कशासाठी आहे, याची माहिती त्याची पत्नी तन्वीलाही नसते. त्यानंतर अचानक त्यांच्या लहान मुलगी इशा बेपत्ता होते आणि कथानकाला धक्कादायक वळण मिळते.

इशाच्या शोधासाठी पोलिस तपास सुरू होतो. मात्र तपास जसजसा पुढे सरकतो तसतसे अनेक गूढ प्रश्न उभे राहतात. हॉटेलमधील लोकांच्या मते तन्वी एकटीच आली होती. सीसीटीव्ही कॅमेरे बंद आहेत. साक्षीदारांच्या जबानी एकमेकांशी जुळत नाहीत. त्यातच तन्वीचा पती रोहित मृतावस्थेत सापडतो आणि संपूर्ण प्रकरण अधिकच गुंतागुंतीचे बनते.

तन्वी सांगत असलेली कथा खरी आहे का? इशा खरंच अस्तित्वात होती का? रोहितचा खून कोणी केला? नेमकं कोण सत्य सांगतंय आणि कोण खोटं बोलतंय? या सर्व प्रश्नांची उत्तरं शोधण्याचा रोमांचक प्रवास म्हणजे ‘दृश्य-अदृश्य’.

पूजा सावंतचा वेगळा अवतार

या चित्रपटात पूजा सावंत मुख्य भूमिकेत दिसणार असून तिने साकारलेली ‘तन्वी’ ही व्यक्तिरेखा तिच्या आजवरच्या भूमिकांपेक्षा पूर्णपणे वेगळी आहे. ट्रेलरमध्ये तिच्या अभिनयातील भावनिक संघर्ष, अस्वस्थता आणि गूढता प्रभावीपणे दिसून येते.

चित्रपटात तिच्यासोबत अशोक समर्थ, सुव्रत जोशी, हार्दिक जोशी, अक्षया गुरव, विद्याधर जोशी आणि केया इंगळे यांच्याही महत्त्वपूर्ण भूमिका आहेत.

भक्कम तांत्रिक टीम

चित्रपटाचे छायांकन अमोल साळुंके यांनी केले असून संकलन सचिन वाघ यांचे आहे. रंगभूषा महेश बराटे यांनी तर वेशभूषा कीर्ती जंगम-जोशी यांनी केली आहे. गीतकार वलय मुळगुंद यांच्या गीतांना आशिष मुजुमदार आणि देवदत्त बाजी यांनी संगीत दिले आहे. प्रियांका बर्वे आणि निधी हेगडे यांच्या आवाजातील गाणी चित्रपटाच्या भावविश्वाला अधिक प्रभावी बनवणार आहेत.

ट्रेलरमधील रहस्य, थरार आणि मानसशास्त्रीय खेळी पाहता ‘दृश्य-अदृश्य’ हा चित्रपट प्रेक्षकांना शेवटपर्यंत खिळवून ठेवणारा अनुभव देईल, अशी अपेक्षा व्यक्त केली जात आहे. जे दिसतं तेच खरं असतं का आणि दृश्यामागे दडलेलं अदृश्य सत्य नेमकं काय आहे, याचा उलगडा १९ जून रोजी मोठ्या पडद्यावर होणार आहे.

काही दिवसांपूर्वीच ‘लाईव्ह’ या मराठी चित्रपटाची घोषणा करण्यात आल्यानंतर गीत ध्वनीमुद्रणाने चित्रपटाचा मुहूर्त करण्यात आला. त्यानंतर चित्रपटाच्या चित्रीकरणाला सुरुवात करण्यात आली आहे. प्रसारमाध्यमांमध्ये झळकलेल्या बातम्यांनी ‘लाईव्ह’बाबत रसिकांमध्ये उत्सुकता वाढवली आहे. सध्या या चित्रपटाचे चित्रीकरण वेगात सुरू आहे.

रिद्धी बिद्दी व्हिजन्स या बॅनरखाली निर्माते सुमित पांडे ‘लाईव्ह’ चित्रपटाची निर्मिती करीत आहेत. या चित्रपटाचे प्रस्तुतकर्ते छबी असीम हल्दर असून, लेखक-दिग्दर्शक संजीव राय आहेत. या चित्रपटाची प्रेरणादायी कथा एका महत्त्वकांक्षी तरुणीभोवती फिरणारी आहे. या कथेच्या अनुषंगाने विविध मुद्द्यांवर प्रकाश टाकण्यात येणार असून, समाजातील विविध घटनांचा वेध घेण्यात येणार आहे. नायिकेच्या संघर्ष आणि न्याय-हक्काच्या लढाईची हृदयस्पर्शी गोष्ट सांगणाऱ्या या चित्रपटाचे चित्रीकरण मुंबईतील मढ, गोरेगाव तसेच आजूबाजूच्या परिसरात सुरू आहे. ‘लाईव्ह’ या शीर्षकावरून चित्रपटात काय पाहायला मिळणार याची कल्पना येत नाही. त्यामुळे चित्रपटाबाबत उत्सुकता वाढली आहे.

या चित्रपटाविषयी दिग्दर्शक संजीव राय म्हणाले की, ‘लाईव्ह’ चित्रपटाची कथा समाजातील वास्तव चित्र दाखवणारी आहे. आजच्या युगात सर्वच क्षेत्रांमध्ये तरुणींनी आपले वर्चस्व सिद्ध केले आहे, तरीही त्यांच्या समोरील आव्हाने कमी झालेली नाहीत. या चित्रपटाची कथाही अशाच आव्हानात्मक प्रवासावर आधारलेली असून, सरकारी व्यवस्थेचा पर्दाफाश करणारी आहे. समाजातील विविध घटकांचा समावेश असलेला हा चित्रपट आजवर कधीही प्रकाशात न आलेले पैलूंवर प्रकाश टाकणार आहे. वास्तवाला मनोरंजनाची जोड देत ‘लाईव्ह’ चित्रपटाच्या माध्यमातून एक संगीतप्रधान कलाकृती प्रेक्षकांच्या भेटीला आणण्यासाठी ‘लाईव्ह’ चित्रपटाची संपूर्ण टिम खूप मेहनत घेत असल्याचेही राय यांनी सांगितले.

दिग्दर्शक संजीव राय आणि पूनम विभूते यांनी चित्रपटातील अर्थपूर्ण संवाद लिहिले आहेत. या चित्रपटात मिलिंद गुणाजी, अनंत जोग, निशिगंधा वाड, रूपाली जाधव, हितेन तेजवानी, सागर काळे, अनिल नागरथ, नम्रता जाधव, विनय राजपूत आदी कलाकारांच्या भूमिका आहेत. गीतकार महालिंग कंठाळे यांनी गीतलेखन केले असून, संगीतकार दिनेश अर्जुना आणि अमन श्लोक या चित्रपटातील गीतांना संगीत देणार आहेत. डिओपी गोपी सिनेमॅटोग्राफी करीत असून, सैफुद्दीन शेख कला दिग्दर्शकाची बाजू सांभाळत आहेत.

“मुलगी ही ओझं नाही, तर घराचा आधार आहे” या संदेशाची भावस्पर्शी मांडणी

समाजातील रूढी, परंपरा आणि स्त्रियांविषयीच्या भेदभावपूर्ण मानसिकतेवर भाष्य करणाऱ्या कथा नेहमीच प्रेक्षकांच्या मनाला स्पर्श करतात. अशाच आशयघन आणि प्रेरणादायी कथानकासह झी मराठीवर नवी मालिका ‘कृष्णाईच्या लेकी’ प्रेक्षकांच्या भेटीला येत आहे. एका खंबीर आईचा संघर्ष, तिच्या मुलींची स्वप्नं आणि समाजाने घालून दिलेल्या चौकटींविरुद्धची त्यांची झुंज या मालिकेतून उलगडणार आहे.

कृष्णाईची प्रेरणादायी कहाणी

या मालिकेची मध्यवर्ती व्यक्तिरेखा आहे कृष्णाई. आयुष्यात अनेक संकटांचा सामना करत ती आपल्या मुलींना शिक्षण, संस्कार आणि आत्मविश्वासाची शिदोरी देते. मुलींचाच जन्म झाल्यामुळे तिच्या पतीने दुसरे लग्न केले, तर समाज आणि कुटुंबानेही तिला कमी लेखले. मात्र या सर्व परिस्थितीतही कृष्णाई खचत नाही. मुलगा नसल्याने स्त्रीचे मूल्य कमी होत नाही आणि मुलीही कोणत्याही बाबतीत मुलांपेक्षा कमी नसतात, हे ती आपल्या कृतीतून सिद्ध करते.

तीन मुली, तीन स्वभाव, तीन वेगळे संघर्ष

कृष्णाईच्या तीन मुलींचा प्रवास ही मालिकेची मुख्य ताकद आहे. मोठी मुलगी शारदा शांत, संयमी आणि आईप्रमाणे समजूतदार आहे. गौरी अन्यायाविरुद्ध आवाज उठवणारी, बंडखोर आणि धाडसी आहे. तर सौदामिनी महत्त्वाकांक्षी, स्वप्नाळू आणि करिअरकेंद्रित आहे. समाजाच्या विविध बंधनांना आणि अन्यायाला सामोरे जाताना या तिघींच्या आयुष्यात अनेक आव्हाने उभी राहतात. मात्र प्रत्येक वेळी कृष्णाई त्यांना खंबीरपणे उभं राहण्याची प्रेरणा देते.

स्त्रीशक्ती, शिक्षण आणि स्वाभिमानाचा संदेश

मुलींच्या शिक्षणासाठी, स्वातंत्र्यासाठी आणि त्यांच्या स्वप्नांच्या पूर्ततेसाठी सुरू असलेली धडपड मालिकेचा महत्त्वाचा भाग आहे. कौटुंबिक दबाव, समाजाचे नियम, लग्न, करिअर आणि नातेसंबंधांतील गुंतागुंत यांमधून अनेक भावनिक आणि नाट्यमय घडामोडी घडताना दिसणार आहेत. “मुलगी ही ओझं नसून घराचा आधार असते” हा मालिकेचा मुख्य संदेश प्रेक्षकांपर्यंत प्रभावीपणे पोहोचवला जाणार आहे.

निवेदिता सराफ पुन्हा झी मराठीवर

या मालिकेच्या निमित्ताने ज्येष्ठ अभिनेत्री निवेदिता सराफ पुन्हा एकदा झी मराठीवर महत्त्वाच्या भूमिकेत दिसणार आहेत. कृष्णाईच्या भूमिकेतून त्या एका संघर्षशील, स्वाभिमानी आणि प्रेरणादायी आईचं व्यक्तिमत्त्व साकारणार आहेत. त्यांच्या सोबत ट्वीकल यादव, रोहित परशुराम, स्मिता सरवदे, संजय कुलकर्णी, साक्षी गांधी आणि एकता लब्दे यांची दमदार कलाकार फळी पाहायला मिळणार आहे.

सक्षम टीमची साथ

लेखक तेजेश घाटगे यांनी मालिकेची कथा लिहिली असून अनिकेत साने दिग्दर्शनाची धुरा सांभाळत आहेत. ओशन फिल्म्स निर्मित ही मालिका संवेदनशील विषयांची वास्तवदर्शी मांडणी आणि प्रभावी कथनशैलीमुळे प्रेक्षकांच्या मनात विशेष स्थान निर्माण करेल, अशी अपेक्षा व्यक्त केली जात आहे.

‘कृष्णाईच्या लेकी’ १५ जूनपासून दररोज संध्याकाळी ७ वाजता फक्त झी मराठीवर प्रेक्षकांच्या भेटीला येणार आहे.