रंगभूमीपासून पडद्यापर्यंतचा प्रवास

मराठी चित्रपटसृष्टीमध्ये सातत्याने नवे चेहरे दाखल होत असतात. काही कलाकार आपल्या पहिल्याच भूमिकेतून प्रेक्षकांचे लक्ष वेधून घेतात, तर काही आपल्या अभिनयाच्या जोरावर वेगळी ओळख निर्माण करतात. या नव्या पिढीतील आश्वासक कलाकारांपैकी अभिनेता ऋषी मनोहर हे नाव विशेषत्वाने पुढे येताना दिसत आहे. रंगभूमीवर अभिनयाची भक्कम पायाभरणी करत ऋषीने विविध माध्यमांमधून स्वतःची वेगळी छाप पाडली आहे.

सहज अभिनयातून निर्माण केली स्वतंत्र ओळख

‘दादा, एक गुड न्यूज आहे’ या नाटकातून तसेच ‘पेट पुराण’ या लोकप्रिय वेबसिरीजमधून ऋषी मनोहर यांनी आपल्या अभिनयाची झलक प्रेक्षकांना दाखवली. सहज अभिनय, प्रभावी स्क्रीन प्रेझेन्स आणि साकारलेल्या पात्रांमध्ये पूर्णपणे समरस होण्याची क्षमता ही त्यांची जमेची बाजू मानली जाते. त्यामुळे अल्पावधीतच त्यांनी प्रेक्षकांचे आणि उद्योगातील जाणकारांचे लक्ष वेधून घेतले आहे.

नायकाला साजेसं व्यक्तिमत्त्व आणि अभिनयाची खोली

आजच्या स्पर्धात्मक मनोरंजनविश्वात अभिनयातील वैविध्य आणि नायकाला साजेसं व्यक्तिमत्त्व या दोन्ही गुणांचा संगम क्वचितच पाहायला मिळतो. ऋषी मनोहर यांच्यामध्ये हे दोन्ही गुण प्रकर्षाने जाणवतात. प्रत्येक भूमिकेकडे गांभीर्याने पाहण्याची त्यांची वृत्ती आणि सातत्याने स्वतःला अधिक समृद्ध करण्याचा प्रयत्न यामुळे मराठी चित्रपटसृष्टीत त्यांच्याकडे एका आश्वासक अभिनेत्याच्या नजरेने पाहिले जात आहे.

‘कप बशी’ ठरू शकतो कारकिर्दीतील महत्त्वाचा टप्पा

येत्या १९ जून रोजी प्रदर्शित होणारा ‘कप बशी’ हा चित्रपट ऋषी मनोहर यांच्या कारकिर्दीतील महत्त्वाचा टप्पा ठरण्याची शक्यता व्यक्त केली जात आहे. या चित्रपटातून प्रेक्षकांना त्यांच्या अभिनयाची आणखी एक नवी बाजू पाहायला मिळणार आहे. नव्या दमदार कलाकारांच्या शोधात असलेल्या मराठी चित्रपटसृष्टीमध्ये ऋषी मनोहर हे नाव अधिक ठळकपणे समोर येत आहे.

भूमिकांमधून स्वतःला नव्याने शोधण्याचा प्रयत्न

आपल्या अभिनय प्रवासाबद्दल बोलताना ऋषी मनोहर म्हणतात, “प्रत्येक भूमिका माझ्यासाठी केवळ एक व्यक्तिरेखा नसते, तर स्वतःला नव्याने शोधण्याची संधी असते. अभिनेता म्हणून प्रत्येक वेळी काहीतरी वेगळं, अधिक प्रामाणिक आणि अधिक परिणामकारक साकारण्याचा माझा प्रयत्न असतो. ‘कप बशी’मधील भूमिका माझ्यासाठी विशेष ठरली आहे. या भूमिकेतून प्रेक्षकांना माझ्या अभिनयाची एक नवी बाजू अनुभवायला मिळेल आणि त्या प्रवासाशी ते मनापासून जोडले जातील, अशी आशा आहे.”

उद्याचा दमदार चेहरा म्हणून ऋषीकडे लक्ष

रंगभूमीवर घडलेला आणि अभिनयातील प्रामाणिकपणा जपणारा ऋषी मनोहर हा चेहरा मराठी चित्रपटसृष्टीच्या नव्या पिढीतील महत्त्वाचा अभिनेता म्हणून उदयास येत आहे. आगामी काळात त्याच्या अभिनयाचा प्रवास आणखी उंची गाठेल, अशी अपेक्षा रसिक प्रेक्षक व्यक्त करत आहेत.

‘अप्पी आमची कलेक्टर’नंतर झी मराठीवर पुनरागमन

‘अप्पी आमची कलेक्टर’ मालिकेतील अर्जुन या भूमिकेमुळे घराघरात पोहोचलेला अभिनेता रोहित परशुराम आता पुन्हा एकदा झी मराठीच्या माध्यमातून प्रेक्षकांच्या भेटीला येत आहे. ‘कृष्णाईच्या लेकी’ या नव्या मालिकेत तो ‘शंकर’ ही महत्त्वाची भूमिका साकारणार असून या व्यक्तिरेखेबाबत प्रेक्षकांमध्ये उत्सुकता निर्माण झाली आहे.

कोल्हापूरच्या मातीतला रांगडा शंकर

आपल्या भूमिकेबद्दल बोलताना रोहित म्हणाला, “मी शंकर ही व्यक्तिरेखा साकारत आहे. गावच्या सावकार मातोश्रींचा मुलगा, व्यायामाची आवड असलेला आणि कोल्हापूरच्या मातीत वाढलेला रांगडा तरुण. एका बिनधास्त आणि मनमोकळ्या मुलीच्या प्रेमात पडल्यावर त्याच्या आयुष्यात घडणारे बदल, प्रेम आणि आई यांच्यामध्ये समतोल साधताना होणारी त्याची गोड दमछाक आणि त्याचा भावनिक प्रवास या भूमिकेतून पाहायला मिळणार आहे.”

ऑडिशनपासून मालिकेपर्यंतचा प्रवास

या भूमिकेची संधी कशी मिळाली याबद्दल सांगताना रोहितने एक खास आठवण शेअर केली. “मी ‘कमळी’ मालिकेच्या सेटवर आदित्यला भेटायला गेलो होतो. त्यावेळी दिग्दर्शक अनिकेत साने झी मराठीसाठी नवी मालिका करत असल्याचं समजलं. मी लगेच त्यांना भेटलो, ऑडिशन दिली. त्यानंतर अनेक फेऱ्या, सीन वर्क आणि चर्चेनंतर मला ही भूमिका मिळाली. झी मराठीच्या कुटुंबात पुन्हा सहभागी होणं माझ्यासाठी खूप आनंदाची गोष्ट आहे.”

भूमिकेसाठी खास तयारी

‘शंकर’ साकारण्यासाठी रोहित विशेष मेहनत घेत आहे. कोल्हापुरी बोलीभाषा, लहेजा, शारीरिक बांधा आणि व्यक्तिरेखेची मानसिकता समजून घेण्यासाठी तो सातत्याने तयारी करत आहे.

“कोल्हापुरी भाषा शिकण्याचा प्रयत्न करतोय. भरपूर व्यायाम, योग्य आहार आणि नियमित दिनचर्या पाळतोय. स्क्रिप्टचं सखोल वाचन करत आहे, जेणेकरून शंकर अधिक प्रामाणिकपणे साकारता येईल,” असे तो सांगतो.

निसर्गरम्य वातावरणात रंगतंय चित्रीकरण

मालिकेचे चित्रीकरण मुंबईबाहेरील सुंदर आणि निसर्गरम्य परिसरात सुरू आहे. हिरवाई, मोकळं वातावरण आणि गावाकडच्या जीवनशैलीमुळे कलाकारांना काम करताना वेगळी ऊर्जा मिळत असल्याचे रोहितने सांगितले.

“गावाकडचं वातावरण शंकरसारखी व्यक्तिरेखा जगण्यासाठी खूप मदत करतं. संपूर्ण टीमसाठी हा अनुभव संस्मरणीय ठरत आहे,” असे तो म्हणाला.

निवेदिता सराफ यांच्यासोबत काम करण्याचा आनंद

मालिकेत ज्येष्ठ अभिनेत्री निवेदिता सराफ यांच्यासोबत काम करण्याची संधी मिळाल्याबद्दल रोहित विशेष भावूक झाला आहे.

“निवेदिता सराफ यांच्या प्रोजेक्टमध्ये फक्त एका दृश्यात उभं राहायलाही मला आनंद झाला असता. इथे तर मी मुख्य भूमिकेत आहे. त्यांच्या अनुभवातून खूप काही शिकायला मिळणार आहे. त्यांचं व्यक्तिमत्त्व, अभिनयातील सहजता आणि सकारात्मक ऊर्जा प्रेरणादायी आहे,” असे रोहितने सांगितले.

प्रेक्षकांच्या प्रेमाची अपेक्षा

‘अप्पी आमची कलेक्टर’मधील अर्जुन या भूमिकेला प्रेक्षकांनी भरभरून प्रेम दिलं. आता ‘शंकर’लाही तितकंच प्रेम मिळेल, असा विश्वास रोहितला आहे.

“साताऱ्याच्या मातीतला अर्जुन आणि कोल्हापूरच्या लाल मातीतला शंकर मला जणू भावंडांसारखे वाटतात. अर्जुननंतर आता शंकरच्या रूपात मी पुन्हा प्रेक्षकांसमोर येतोय. त्यांनी जसं आतापर्यंत प्रेम दिलं, तसंच प्रेम आणि आशीर्वाद शंकरलाही मिळेल, अशी अपेक्षा आहे,” असे तो म्हणाला.

१५ जूनपासून भेटणार ‘कृष्णाईच्या लेकी’

स्त्रीशक्ती, स्वाभिमान आणि नात्यांचा भावनिक प्रवास उलगडणारी ‘कृष्णाईच्या लेकी’ ही नवी मालिका १५ जूनपासून दररोज सायंकाळी ७ वाजता झी मराठीवर प्रेक्षकांच्या भेटीला येणार आहे.

वटवृक्ष एंटरटेनमेंट निर्मित आणि प्रवीण विठ्ठल तरडे लिखित-दिग्दर्शित ‘देऊळ बंद २ : आता परीक्षा देवाची’ हा चित्रपट सध्या महाराष्ट्रभर बॉक्स ऑफिसवर दमदार कामगिरी करत आहे. प्रेक्षकांच्या उत्स्फूर्त प्रतिसादानंतर चित्रपटाच्या कलाकार आणि तंत्रज्ञांच्या टीमने महाराष्ट्राचे मुख्यमंत्री देवेंद्र फडणवीस यांची सदिच्छा भेट घेतली.

मुंबई येथे पार पडलेल्या या विशेष भेटीत मुख्यमंत्री देवेंद्र फडणवीस यांनी ‘देऊळ बंद २’च्या संपूर्ण टीमचे अभिनंदन करत चित्रपटाच्या यशाबद्दल आनंद व्यक्त केला. समाजातील विविध स्तरांतील प्रेक्षकांना एकत्र आणण्याची ताकद या चित्रपटात असल्याचे सांगत त्यांनी चित्रपटाच्या पुढील वाटचालीसाठी शुभेच्छा दिल्या.

या भेटीदरम्यान ज्येष्ठ अभिनेते मोहन जोशी, लेखक-दिग्दर्शक प्रवीण विठ्ठल तरडे, निर्माते कैलास वाणी, अभिनेत्री स्नेहल तरडे, अभिनेते रमेश परदेशी, देवेंद्र गायकवाड, अतुल कुडले, सुनील पालकर, तंत्रज्ञ संकेत धोटकर, छायाचित्रकार प्रशांत मिसळे, जगदीश चव्हाण तसेच लीड मीडिया पीआर आणि मार्केटिंगचे कुशल कोंडे आणि अनुप गोरे उपस्थित होते.

यावेळी प्रवीण विठ्ठल तरडे म्हणाले, “प्रेक्षकांनी ‘देऊळ बंद २’ला भरभरून प्रेम दिलं आहे. महाराष्ट्रातील रसिक प्रेक्षकांचे आम्ही मनापासून ऋणी आहोत. त्यातच राज्याच्या मुख्यमंत्र्यांकडून मिळालेलं हे कौतुक आमच्या संपूर्ण टीमसाठी प्रेरणादायी आहे.”

प्रदर्शनानंतर ‘देऊळ बंद २’ने ग्रामीण आणि शहरी अशा दोन्ही भागांतील प्रेक्षकांची मनं जिंकली आहेत. राज्यातील अनेक चित्रपटगृहांमध्ये चित्रपटाचे शो हाऊसफुल्ल होत असून, दुसऱ्या आठवड्यातही चित्रपटाची घोडदौड कायम आहे. शेतकरी, युवक, महिला आणि ज्येष्ठ नागरिक अशा सर्वच स्तरांतील प्रेक्षक सहकुटुंब चित्रपटगृहांकडे वळताना दिसत आहेत.

स्वामी समर्थांच्या भक्तीचा संदेश, भावनिक कथानक आणि प्रभावी सादरीकरणामुळे ‘देऊळ बंद २ : आता परीक्षा देवाची’ हा चित्रपट यंदाच्या वर्षातील सर्वाधिक चर्चेत असलेल्या मराठी चित्रपटांपैकी एक ठरला असून, त्याच्या यशाचा प्रवास अजूनही वेगाने सुरू आहे.

ठाणे : यंदाच्या प्रतिष्ठित कान्स चित्रपट महोत्सवामध्ये मराठी कलाकारांनी खास मराठमोळा ठसा उमटवला. अभिनेत्री प्राजक्ता माळी हिने कान्सच्या रेड कार्पेटवर पारंपरिक नऊवारी साडीत केलेल्या आकर्षक एन्ट्रीने सर्वांचे लक्ष वेधून घेतले. विशेष म्हणजे, तिच्या या चर्चित लूकला ठाण्यातील निरुपाज येवला पैठणी अँड सिल्क सारीजच्या खास साडीचा साज लाभला होता.

गेल्या काही दिवसांपासून सोशल मीडियावर आणि मनोरंजनविश्वात प्राजक्ताच्या या लूकची मोठ्या प्रमाणात चर्चा रंगली आहे. मोरपिशी छटेतील नऊवारी, त्यावर भरजरी शेला, पारंपरिक नथ, ठुशी, कमरपट्टा आणि मराठमोळा दागिन्यांचा साज अशा संपूर्ण लूकमधून तिने महाराष्ट्राची सांस्कृतिक ओळख जागतिक मंचावर अभिमानाने सादर केली.

कान्सच्या रेड कार्पेटवर सहसा वेस्टर्न गाऊन्स आणि ग्लॅमरस फॅशन पाहायला मिळते. मात्र, प्राजक्ताने भारतीय परंपरा आणि महाराष्ट्राच्या सांस्कृतिक वैभवाला प्राधान्य देत नऊवारीची निवड केल्याने तिचा लूक सर्वांपेक्षा वेगळा आणि उठून दिसणारा ठरला. फॅशनप्रेमींसह मराठी प्रेक्षकांनीही तिच्या या निर्णयाचे भरभरून कौतुक केले आहे.

‘निरुपा सारीज’ने तयार केलेल्या या साडीमध्ये पारंपरिक विणकाम, आकर्षक रंगसंगती आणि आधुनिक एलिगन्स यांचा सुंदर मिलाफ पाहायला मिळाला. मराठमोळ्या साड्यांची समृद्ध परंपरा जागतिक स्तरावर पोहोचवण्याचे काम या निमित्ताने झाले असल्याची भावना अनेकांनी व्यक्त केली.

प्राजक्ताने स्वतः सोशल मीडियावर कान्समधील अनुभव शेअर करत ‘मराठी ठसका’ जागतिक रेड कार्पेटवर घेऊन जाण्याचा आनंद व्यक्त केला होता. तिच्या या पोस्टनंतर चाहत्यांसह अनेक कलाकारांनीही तिच्यावर कौतुकाचा वर्षाव केला. निरुपाज सारीज हा खात्रीशीर येवला पैठणी आणि सिल्क साड्या देणारा ब्रँड आहे. प्राजक्तासह चित्रपट सृष्टीतील सुबोध भावे, अभिजित खांडकेकर, अपूर्वा नेमळेकर, पूजा सावंत’ सिद्धार्थ चांदेकर, केतकी माटेगावकर, हेमल इंगळे, पल्लवी पाटील आदी कलाकारांनी निरुपाज भेट देत येथील साड्यांचे कौतुक केले आहे.

‘निरुपा सारीज’च्या संस्थापिका निरुपा तायडे म्हणाल्या, “भारतीय साडी ही केवळ फॅशन नसून संस्कृती आणि परंपरेची ओळख आहे. प्राजक्ता माळीसारख्या लोकप्रिय अभिनेत्रीने जागतिक मंचावर आमच्या साडीची निवड करणे हा आमच्यासाठी अत्यंत अभिमानाचा क्षण आहे. कान्ससारख्या प्रतिष्ठित मंचावर ठाण्यातील ब्रँडची झळाळी पाहायला मिळाल्याने स्थानिक फॅशन उद्योगातही उत्साहाचे वातावरण असून, भारतीय पारंपरिक साड्यांची जागतिक लोकप्रियता पुन्हा अधोरेखित झाली आहे.”

मराठी आणि हिंदी मनोरंजनसृष्टीत आपल्या दमदार अभिनयाने वेगळी ओळख निर्माण करणारी अभिनेत्री सई ताम्हणकर कायमच वेगळ्या धाटणीच्या भूमिका स्वीकारताना दिसते. विविध विषय, नवे प्रयोग आणि आव्हानात्मक व्यक्तिरेखा यांमुळे तिने प्रेक्षकांच्या मनात विशेष स्थान निर्माण केले आहे. आता सई लवकरच ‘तुंबाडची मंजुळा’ या चित्रपटातून एका नव्या भूमिकेत प्रेक्षकांच्या भेटीला येणार आहे.

या चित्रपटाचे दिग्दर्शन नवोदित दिग्दर्शक विविध कोरगांवकर यांनी केले असून, नव्या दिग्दर्शकांसोबत काम करण्याचा अनुभव सईने नुकताच शेअर केला आहे. नव्या दिग्दर्शकांबरोबर काम करताना मिळणाऱ्या अनुभवांविषयी बोलताना तिने आपल्या सुरुवातीच्या दिवसांच्या आठवणींनाही उजाळा दिला.

सई म्हणाली, “नवीन व्यक्तीसोबत आणि त्यांच्या पहिल्या प्रोजेक्टसाठी काम करणं नेहमीच खास असतं. अशा वेळी मला माझ्या सुरुवातीच्या दिवसांची आठवण होते. जेव्हा मी या इंडस्ट्रीत नवीन होते, तेव्हा अनेक दिग्दर्शक आणि निर्मात्यांनी माझ्यावर विश्वास ठेवला होता. त्यांच्यामुळेच मला स्वतःला सिद्ध करण्याची संधी मिळाली. आज जर मी एखाद्या नव्या दिग्दर्शकाला किंवा कलाकाराला तीच सकारात्मक भावना देऊ शकत असेन, तर ते माझ्यासाठी खूप महत्त्वाचं आणि समाधान देणारं असतं.”

ती पुढे म्हणाली, “मला नेहमी वेगवेगळ्या कार्यपद्धती असलेल्या दिग्दर्शकांसोबत काम करायला आवडतं. प्रत्येक दिग्दर्शकाचा दृष्टिकोन वेगळा असतो. त्यामुळे नवीन वातावरण, नवीन विचारसरणी आणि वेगळ्या प्रकारचं काम करण्याची संधी मिळते. एखाद्याच्या पहिल्याच आणि त्याच्यासाठी अत्यंत महत्त्वाच्या प्रकल्पाचा भाग होणं ही खूप समृद्ध करणारी भावना असते. नव्या प्रतिभेला आणि नव्या आवाजांना पाठिंबा देण्यात एक वेगळंच समाधान मिळतं.”

सईने आजवर मराठी आणि हिंदी चित्रपटसृष्टीतील अनेक नामांकित दिग्दर्शकांसोबत काम केलं आहे. ‘मटका किंग’मध्ये नागराज मंजुळे, ‘डब्बा कार्टेल’मध्ये हितेश भाटिया, ‘अग्नी’मध्ये राहुल ढोलकिया, ‘ग्राउंड झिरो’मध्ये तेजस प्रभा विजय देवोस्कर आणि ‘मिमी’मध्ये लक्ष्मण उतेकर यांच्यासारख्या दिग्दर्शकांसोबत तिने महत्त्वपूर्ण भूमिका साकारल्या आहेत.

सईच्या अभिनयातील सातत्य, भूमिकांची वैविध्यता आणि प्रत्येक व्यक्तिरेखेला दिलेला वेगळा स्पर्श यामुळे ती आजही प्रेक्षकांची आवडती अभिनेत्री आहे. ‘तुंबाडची मंजुळा’मधील तिची नवी भूमिका आणि नवोदित दिग्दर्शकासोबतची ही नवी जुळवाजुळव प्रेक्षकांसाठी उत्सुकतेचा विषय ठरत आहे. आगामी काळातही सई अनेक दर्जेदार आणि वेगळ्या कथांचा भाग होणार असल्याची चर्चा आहे.