नाशिक येथे भरलेल्या चौथ्या विश्व मराठी संमेलनात महाराष्ट्र चित्रपट, रंगभूमी आणि सांस्कृतिक विकास महामंडळाचे दादासाहेब फाळके चित्रनगरी दालन विशेष आकर्षण ठरत आहे. या दालनाला विशेषतः तरुणाईचा उत्स्फूर्त प्रतिसाद मिळत असून सिनेसृष्टीत करिअर करू इच्छिणाऱ्या युवक-युवतींसाठी हे दालन माहितीचा खजिना ठरत आहे.

महामंडळाच्या व्यवस्थापकीय संचालक स्वाती म्हसे पाटील यांच्या संकल्पनेतून आणि मार्गदर्शनाखाली हे दालन उभारण्यात आले आहे.

महामंडळाच्या व्यवस्थापकीय संचालक स्वाती म्हसे पाटील यांच्या संकल्पनेतून आणि मार्गदर्शनाखाली हे दालन उभारण्यात आले आहे. महाराष्ट्र चित्रपट, रंगभूमी आणि सांस्कृतिक विकास महामंडळामार्फत चित्रपट क्षेत्रासाठी विविध योजना आणि उपक्रम राबवले जातात. एक खिडकी योजना, दर्जेदार मराठी चित्रपटांसाठी अर्थसहाय्य योजना, राज्य मराठी चित्रपट पुरस्कार सोहळा, तसेच चित्रपताका आंतरराष्ट्रीय चित्रपट महोत्सव यांसारख्या उपक्रमांची सविस्तर माहिती येथे दिली जात आहे.

कंटेंट क्रिएशन झोनला तरुणाईचा प्रतिसाद

या दालनातील सर्वाधिक लक्षवेधी उपक्रम म्हणजे खास तरुणांसाठी उभारलेला ‘कंटेंट क्रिएशन झोन’. महाविद्यालयीन विद्यार्थी आणि नवोदित तरुणांना कंटेंट क्रिएटर बनण्याची इच्छा असते. त्यांच्यासाठी येथे प्रत्यक्ष कॅमेऱ्यासमोर उभे राहून स्वतःचा कंटेंट सादर करण्याची संधी देण्यात येत आहे. या अनुभवातून चित्रीकरणाचे विविध पैलू समजण्यास मदत होत आहे. विशेष म्हणजे या झोनमध्ये तरुणांसोबत ज्येष्ठ नागरिकही उत्साहाने सहभाग घेताना दिसत आहेत.

कृत्रिम बुद्धिमत्तेला घाबरू नका – तंत्रज्ञानाचा स्वीकार करा

भविष्यातील माध्यमविश्व कृत्रिम बुद्धिमत्तेच्या आधारावर अधिक वेगाने विकसित होणार असल्याचा संदेश या दालनातून देण्यात येत आहे. कृत्रिम बुद्धिमत्तेला घाबरण्याऐवजी योग्य प्रशिक्षण घेऊन तंत्रज्ञान आत्मसात करण्याचे आवाहन नवोदित तरुणांना करण्यात आले आहे.

तरुणांसाठी विशेष प्रशिक्षण वर्गांची माहिती

महाराष्ट्र चित्रपट, रंगभूमी आणि सांस्कृतिक विकास महामंडळ आणि Film and Television Institute of India (एफटीआयआय) यांच्या सामंजस्य करारातून विविध प्रशिक्षण वर्ग चालवले जात आहेत. चित्रपटनिर्मिती, दिग्दर्शन, तांत्रिक कौशल्य आणि माध्यम प्रशिक्षणाबाबतची माहिती या दालनात सविस्तरपणे देण्यात आली आहे.

विश्व मराठी संमेलनात उभारलेले हे दादासाहेब फाळके चित्रनगरी दालन केवळ माहितीपर नाही, तर नव्या पिढीला सिनेविश्वाकडे प्रेरित करणारे व्यासपीठ ठरत आहे.

अन्य देशांतील अमराठी भाषिकांनीही मराठी सादरीकरण केले

मुंबई: मराठीचे वैभव जागतिक स्तरावर पोहोचवण्याच्या उद्देशाने सुरू झालेल्या ‘मराठी मूड’ चॅनलतर्फे मराठी भाषा दिनानिमित्त आयोजित ‘बोला मराठी’ पुरस्कार सोहळा प्रभादेवी येथील पु. ल. देशपांडे कला अकादमीच्या मिनी थिएटरमध्ये दिमाखात पार पडला. अवघ्या एका आठवड्यात या उपक्रमाने राज्यासह देश-विदेशातील मराठीप्रेमींचा उत्स्फूर्त प्रतिसाद मिळवत डिजिटल विश्वात आपला ठसा उमटवला.

एका आठवड्यात देश-विदेशातून प्रतिसाद
२१ फेब्रुवारीपासून ऑनलाइन नोंदणी सुरू झाल्यानंतर महाराष्ट्र, गुजरात, मध्य प्रदेश आणि कर्नाटक येथील स्पर्धकांनी मोठ्या संख्येने सहभाग नोंदवला. विशेष म्हणजे भारताबाहेरून पाकिस्तान आणि दुबईसह विविध देशांतील सहभागीही या स्पर्धेत सामील झाले. अमराठी भाषिकांनीही मराठी भाषेत सादरीकरण करून सर्वांचे लक्ष वेधून घेतले.

“मराठी माझ्यासाठी काय आहे?” या संकल्पनेवर सादरीकरणे
“मराठी माझ्यासाठी काय आहे?” या मध्यवर्ती संकल्पनेवर आधारित स्पर्धेत वय वर्षे ५ पासून ते ६५ वर्षांच्या ज्येष्ठ स्पर्धकांपर्यंत सर्वांनी कविता, कथाकथन, गाणी आणि स्टँड-अप कॉमेडीच्या माध्यमातून मराठीबद्दलचे आपले विचार मांडले. मराठी भाषेची ओढ आणि अभिमान या विविध कलाविष्कारांतून ठळकपणे उमटला.

मान्यवरांची उपस्थिती आणि परीक्षण
या सोहळ्याला प्रमुख पाहुणे व परीक्षक म्हणून दिग्दर्शक संजय जाधव, ज्येष्ठ साहित्यिक व बालकवी एकनाथ आव्हाड आणि लोकप्रिय कंटेंट क्रिएटर नील साळेकर (Just Neel Things) उपस्थित होते. अभिनेत्री संजना पाटील यांनी कार्यक्रमाचे सूत्रसंचालन केले. संपूर्ण कार्यक्रम ‘marathimood’ या यूट्यूब चॅनलवर उपलब्ध होणार आहे.

चार गटांमधून अंतिम १६ विजेते
बालगट, शालेय गट, महाविद्यालयीन गट आणि खुला गट अशा चार गटांतील सादरीकरणांचे परीक्षण करून परीक्षकांनी अंतिम १६ विजेत्यांची निवड केली. गटानुसार विजेत्यांची नावे २७ फेब्रुवारी २०२६ रोजी संध्याकाळी ‘मराठी मूड’ यूट्यूब चॅनलवर जाहीर करण्यात येणार आहेत.

रोख पारितोषिकांची घोषणा
चारही गटांतील विजेत्यांना अनुक्रमे प्रथम, द्वितीय, तृतीय आणि चतुर्थ क्रमांकासाठी १ लाख, ७५ हजार, ५० हजार आणि २५ हजार रुपये अशी पारितोषिके दिली जाणार आहेत. तसेच स्पर्धेतील सहभागी पर्शियन बीता आणि पाकिस्तानी जहानवी यांना २५ हजार रुपयांचा विशेष पुरस्कार जाहीर करण्यात आला आहे.

मान्यवरांचे कौतुक आणि पुढील वर्षी मोठी योजना
मराठी भाषेसाठी असे उपक्रम सातत्याने होत राहिले पाहिजेत आणि ‘बोला मराठी’मुळे मराठीला जागतिक मंच मिळत असल्याचे मत संजय जाधव यांनी व्यक्त केले. छोटे चॅनल असूनही मोठे पाऊल उचलून अल्पावधीत यशस्वी उपक्रम राबवल्याबद्दल एकनाथ आव्हाड यांनी कौतुक केले. नव्या पिढीला मराठीचे बाळकडू देण्याचे काम ‘मराठी मूड’ करत असल्याचे मत नील साळेकर यांनी मांडले.

‘बोला मराठी’ उपक्रमाला अवघ्या सात दिवसांच्या तयारीनंतर मिळालेला प्रतिसाद थक्क करणारा असून पुढील वर्षी हा उपक्रम अधिक भव्य स्वरूपात राबवला जाईल, अशी माहिती ‘मराठी मूड’चे चॅनल हेड शंतनु जोशी यांनी दिली.

मराठी भाषेचा जागतिक जागर करण्यासाठी उचललेले हे पाऊल आता डिजिटल विश्वात नवा अध्याय लिहित आहे.

मराठी साहित्य आणि संस्कृतीचा स्वरमयी जागर! ‘मराठी भाषा गौरव दिनी’ उलगडणार ‘गौरव माय मराठीचा’!

मराठी ही केवळ आपल्या राज्याची अधिकृत भाषा नसून त्याला नुकताच ‘अभिजात भाषा’ हा बहुमान प्राप्त झाला आहे. या ऐतिहासिक निर्णयाचा आनंद द्विगुणित करण्यासाठी आणि २७ फेब्रुवारी रोजी साजऱ्या होणाऱ्या ‘मराठी भाषा गौरव दिना’चे औचित्य साधून, श्री गुरु एस. नायर यांच्या प्रॉडक्शनतर्फे ‘गौरव माय मराठीचा’ हे भव्य गीत रसिक प्रेक्षकांच्या भेटीला येत आहे. विशेष म्हणजे गुरु एस. नायर मी.यांनीच या गीताचे दिग्दर्शनही केले आहे.

मराठी भाषेचा सांगीतिक जागर

गेल्या अनेक वर्षांपासून कला क्षेत्रात सक्रिय असलेले आणि अनेक नामवंत कलावंतांचे यशस्वी स्टेज शो आयोजित करणारे गुरु नायर यांनी मराठी भाषेच्या प्रेमापोटी या गीताची निर्मिती केली आहे. मराठी भाषेचा समृद्ध इतिहास, विविधतेने नटलेली परंपरा आणि भाषेचा गौरव मांडण्याचा एक प्रामाणिक प्रयत्न या गाण्यातून करण्यात आला आहे. हे गीत बालकलाकार कुमार आदित्य जी. नायर आणि कोरस यांनी गायले असून, मराठी साहित्याचे आणि संस्कृतीचे दर्शन यातून घडणार आहे.

बालकलाकार आदित्यची भरारी

गायक कुमार आदित्य जी. नायर याने अत्यंत कमी वयात आपल्या गायकीची मोहोर उमटवली आहे. त्याने यापूर्वी कविता पौडवाल, उत्तरा केळकर, वैशाली सामंत, नागेश मोरवेकर आणि अभिजीत सावंत यांसारख्या दिग्गज गायकांसोबत गाणी गायली आहेत. आता ‘गौरव माय मराठीचा’ या गाण्यातून तो पुन्हा एकदा आपल्या आवाजाने रसिकांना मंत्रमुग्ध करण्यास सज्ज झाला आहे.

दिग्गज तंत्रज्ञांची साथ

या गीताचे शब्द आणि संगीत किशोर मोहिते (वादक, महाराष्ट्राची हास्य जत्रा फेम) यांनी दिले आहे. किशोर मोहिते यांनी यापूर्वीही आदित्यच्या अनेक गीतांना संगीतबद्ध केले आहे. संगीताची अधिक रंगत वाढवण्याचे काम संगीत संयोजक सुदेश गायकवाड यांनी केले आहे. या वैशिष्ट्यपूर्ण गीताचे दिग्दर्शन स्वतः गुरु एस. नायर यांनी केले आहे.

मराठी भाषेचा आदर वाढावा आणि भाषेची महती सर्वांपर्यंत पोहोचावी, या सामाजिक भावनेतून निर्माण केलेल्या या गीताला सर्व मराठी प्रेमींनी उदंड प्रतिसाद द्यावा आणि आपल्या गोड प्रतिक्रिया द्याव्यात, अशी अपेक्षा निर्माते गुरु नायर यांनी व्यक्त केली आहे.

सात भाषांमधील प्रतिभावंत कथाकथनकारांचा राष्ट्रीय शोध

संस्कृती, सर्जनशीलता आणि व्यापकतेवर आधारित भविष्योन्मुख कॉन्टेन्ट इकोसिस्टम उभारण्याच्या दिशेने महत्त्वाचे पाऊल टाकत ‘Z’ तर्फे झी शॉर्ट फिल्म कॉन्टेस्ट या देशव्यापी उपक्रमाची घोषणा करण्यात आली आहे. देशभरातील नवोदित चित्रपटनिर्मात्यांचा शोध घेऊन त्यांना मार्गदर्शन, व्यासपीठ आणि संधी उपलब्ध करून देणे हा या स्पर्धेचा मुख्य उद्देश आहे. हा उपक्रम ओम्नीचॅनेल स्वरूपात राबवला जाणार असून भारतीय मनोरंजन क्षेत्रातील बहुभाषिक प्रतिभेला राष्ट्रीय स्तरावर आणण्याचा प्रयत्न यातून होणार आहे.

---

हिंदी ते कन्नड – सात प्रमुख भाषांचा समावेश

या स्पर्धेत हिंदी, मराठी, बंगाली, तेलुगू, तामिळ, मल्याळम आणि कन्नड या सात प्रमुख भारतीय भाषांचा समावेश करण्यात आला आहे. विविध सांस्कृतिक पार्श्वभूमी आणि चित्रपट परंपरांमधील कथाकथनकारांना एकत्र आणून त्यांना राष्ट्रीय स्तरावर प्रतिष्ठित मंच देण्याचा ‘Z’चा प्रयत्न आहे.

---

दिग्गज दिग्दर्शकांचे प्रभावी परीक्षक पॅनल

या स्पर्धेचे विशेष आकर्षण म्हणजे भारतीय चित्रपटसृष्टीतील दिग्गज दिग्दर्शकांचे परीक्षक मंडळ. हिंदी चित्रपटसृष्टीत धाडसी आशयासाठी ओळखले जाणारे अनुराग कश्यप, मराठीतील सांस्कृतिक प्रभाव असलेले चित्रपट घडवणारे रवि जाधव, बंगाली चित्रपटसृष्टीतील आशयघन दिग्दर्शक सृजित मुखर्जी, भव्यतेसाठी प्रसिद्ध असलेले तेलुगू दिग्दर्शक नाग अश्विन, सामाजिक विषयांवरील प्रभावी चित्रपट करणारे समुथिरकणी, मल्याळम चित्रपटसृष्टीतील दृश्यात्मक धाडसासाठी ओळखले जाणारे लिजो जोस पेलिसेरी आणि कन्नडमधील भावनिक कथाकथनासाठी प्रसिद्ध हेमंत राव हे या परीक्षक मंडळात सहभागी झाले आहेत.

---

नवोदितांना मार्गदर्शन, संधी आणि रोख बक्षिसे

या स्पर्धेत सहभागी होणाऱ्या फिल्ममेकर्सना केवळ राष्ट्रीय स्तरावर ओळख मिळण्याची संधी नाही, तर रोख बक्षिसांसह ‘Z’च्या व्यापक कॉन्टेन्ट इकोसिस्टममधील विविध सहकार्याच्या संधीही उपलब्ध होणार आहेत. डिजिटल, टेलिव्हिजन आणि चित्रपटगृह अशा तिन्ही माध्यमांवर प्रभावी कथा सादर करण्याची क्षमता विकसित करण्यावर या उपक्रमाचा भर आहे.

---

राष्ट्रीय पातळीवर संधींना संस्थात्मक रूप

झी आणि झी5चे चीफ मार्केटिंग ऑफिसर कार्तिक महादेव यांनी या उपक्रमामागील दृष्टी स्पष्ट करताना सांगितले की, भारतातील वैविध्यपूर्ण कथाकथन परंपरेला राष्ट्रीय स्तरावर संस्थात्मक व्यासपीठ उपलब्ध करून देणे ही काळाची गरज आहे. झी शॉर्ट फिल्म कॉन्टेस्ट ही केवळ स्पर्धा नसून भविष्यातील भारतीय चित्रपटकार घडवण्याच्या दृष्टीने उचललेले धोरणात्मक पाऊल आहे.

---

दिग्दर्शकांचा नव्या पिढीला संदेश

अनुराग कश्यप यांनी नवोदितांना प्रोत्साहन देताना शॉर्ट फिल्ममुळेच आपल्या करिअरला दिशा मिळाल्याचे सांगितले. सृजित मुखर्जी यांनी मनाशी जोडलेली कथा सांगण्याचा सल्ला दिला, तर लिजो जोस पेलिसेरी यांनी स्वतःवर विश्वास ठेवून मोठी झेप घेण्याचे आवाहन केले. नाग अश्विन यांनी कथांच्या सामर्थ्यावर भर दिला. हेमंत राव यांनी मनात सतत घोळणारी कथा सादर करण्यास प्रोत्साहित केले. रवि जाधव यांनी प्रतिभा आणि दृष्टीकोन यांचे महत्त्व अधोरेखित केले, तर समुथिरकणी यांनी नवोदितांना सुवर्णसंधीचा लाभ घ्यावा असे आवाहन केले.

---

भारतीय मनोरंजनाच्या भविष्यासाठी महत्त्वाचा टप्पा

संस्कृतीशी जोडलेली व्यापकता, विश्वासार्हता आणि नवोन्मेष यांच्या बळावर ‘Z’ची वाटचाल सुरू असून झी शॉर्ट फिल्म कॉन्टेस्ट हा उपक्रम भारतीय मनोरंजन क्षेत्रातील पुढील पिढीतील चित्रपटकार घडवण्यासाठी एक महत्त्वाचा मैलाचा दगड ठरणार आहे. हा उपक्रम केवळ नव्या आवाजांचा शोध घेणार नाही, तर त्यांना संरचित आणि स्पष्ट मार्गही उपलब्ध करून देणार आहे.

मुंबई, दिनांक — अहमदाबादमधील दोन यशस्वी शो नंतर, यूफोरिया Chp. पार्थ यांनी मुंबईत आपला पहिला प्रयोग सादर केला. आधुनिक तंत्रज्ञान, आध्यात्मिक आशय आणि भव्य दृश्य मांडणी यांचा संगम साधणारा हा कार्यक्रम केवळ एक कॉन्सर्ट नसून एक अनुभव म्हणून समोर आला.

जगातील पहिला हेक्झामर्सिव™️ व्हिज्युअल-कॉन्सर्ट अनुभव

या कार्यक्रमात जगातील पहिला हेक्झामर्सिव™️ व्हिज्युअल-कॉन्सर्ट अनुभव सादर करण्यात आला. सहा-स्क्रीनच्या षटकोनी रचनेवर आधारित हा फॉर्मॅट सुमारे 360 अंशांचा दृश्य विस्तार निर्माण करतो. प्रेक्षक केवळ स्टेजसमोर बसलेले नसून त्या अनुभवाच्या केंद्रस्थानी असल्याची जाणीव या मांडणीमुळे होते.

हृतुल यांच्या संकल्पनेतून साकारलेले स्टोरीटेलिंग

हृतुल यांच्या संकल्पना आणि दिग्दर्शनातून साकारलेल्या या शोने पारंपरिक सादरीकरणाच्या चौकटी मोडून काढल्या. कथा, संगीत, प्रकाशयोजना आणि डिजिटल व्हिज्युअल्स यांचा एकात्म अनुभव तयार करत या निर्मितीने एक वेगळे स्टोरीटेलिंग फॉर्मॅट प्रेक्षकांसमोर ठेवले. दृश्य आणि ध्वनी यांच्या संयोजनातून प्रेक्षकांना कथानकाच्या भावविश्वात नेण्याचा प्रयत्न स्पष्टपणे जाणवला.

अहमदाबादमधील यशानंतर मुंबईतील दमदार पदार्पण

अहमदाबादमध्ये मिळालेल्या उत्स्फूर्त प्रतिसादावर आधारित हा मुंबईतील पदार्पण सोहळा अधिक भव्य स्वरूपात सादर झाला. तेथील कार्यक्रमाने स्थळाला ध्वनी आणि प्रकाशाच्या गतिमान कॅनव्हासमध्ये रूपांतरित केले होते. त्या अनुभवाची झलक मुंबईत आणखी परिपूर्णतेने साकार झाली.

सहा स्क्रीनची गतिमान मांडणी आणि 360 अंशांचा अनुभव

मुंबईतील प्रयोगात सहा भव्य स्क्रीन कथेनुसार हालचाल करत, विभाजित होत आणि पुन्हा एकत्र येत राहिल्या. या सतत बदलणाऱ्या दृश्यरचनेमुळे प्रेक्षकांनी कथा समोरून पाहण्याऐवजी स्वतःला त्या कथेमध्येच अनुभवले. पारंपरिक मंचावरील सादरीकरणापेक्षा ही मांडणी अधिक सहभागी आणि immersive ठरली.

यूफोरिया हा केवळ एक शो नसून झिलेनियल पिढीसाठी आध्यात्मिक आशय आणि आधुनिक तंत्रज्ञानाचा संगम साधणारे एक नवे एंटरटेनमेंट मूव्हमेंट म्हणून आकार घेत आहे.

मराठी माध्यमाच्या अस्मितेला ठाम आवाज देणाऱ्या क्रांतिज्योती विद्यालय – मराठी माध्यम या चित्रपटाने बॉक्स ऑफिसवर २७ कोटींहून अधिक कमाई करत अभिमानास्पद यश संपादन केले आहे. या चित्रपटाने चित्रपटगृहात ५० यशस्वी दिवस पूर्ण करत अर्धशतक गाठले असून, हा टप्पा साजरा करतानाच शिवजयंतीही मोठ्या उत्साहात साजरी करण्यात आली. त्यामुळे हा सोहळा अक्षरशः दुहेरी जल्लोषात रंगला.

मुंबईत जल्लोषमय सेलिब्रेशन; ढोल-ताशा, लेझीम आणि बालशिवरायांचे आगमन

मुंबईतील एका चित्रपटगृहात हा सोहळा दणक्यात पार पडला. ढोल-ताशांच्या गजरात आणि लेझीमच्या तालावर वातावरण भारावून गेले. घोड्यावरून ‘बालशिवरायां’चे आगमन होताच उपस्थितांमध्ये उत्साहाची लाट उसळली. शिवगर्जना ऐकताना प्रेक्षक स्तब्ध झाले आणि पुढच्याच क्षणी टाळ्यांचा कडकडाट झाला. घोषणांचा नाद आणि मराठी अस्मितेचा अभिमान यामुळे संपूर्ण परिसर दुमदुमून गेला. यावेळी चित्रपटाच्या टीमने छत्रपती शिवाजी महाराजांना मानवंदना देत विद्यार्थ्यांसह हा विशेष सोहळा साजरा केला.

प्रेक्षकांसोबत चित्रपट पाहण्याचा भावनिक क्षण

चित्रपटाच्या टीमने प्रेक्षकांसोबत बसून चित्रपट पाहिला. पडद्यावर चालणाऱ्या प्रत्येक प्रसंगाला उत्स्फूर्त टाळ्या, शिट्ट्या आणि भावनिक प्रतिक्रिया उमटत होत्या. अनेकांनी आपल्या शाळेच्या आठवणींना उजाळा दिला, तर नव्या पिढीतील विद्यार्थ्यांनीही चित्रपटाशी मनापासून नाते जोडले. प्रेक्षकांच्या थेट प्रतिक्रिया जाणून घेण्याचा क्षण टीमसाठी अत्यंत समाधानकारक ठरला.

दिग्दर्शक हेमंत ढोमे यांची भावना

दिग्दर्शक हेमंत ढोमे म्हणाले, “आजचा दिवस खूप खास आहे. एका बाजूला चित्रपटाचे ५० दिवस पूर्ण झाले आणि त्याच वेळी आपण शिवजयंती साजरी करत आहोत. मराठी शाळांच्या अस्तित्वासाठी असलेला हा चित्रपट आणि शिवरायांचा प्रेरणादायी वारसा यांचा सुंदर संगम आज अनुभवायला मिळाला. प्रेक्षकांसोबत चित्रपट पाहण्याचं समाधान शब्दांत मांडणं कठीण आहे. उद्यापासून शोजही वाढत आहेत, हे सर्व प्रेक्षकांच्या प्रेमामुळे शक्य झाले.”

आठव्या आठवड्यात वाढलेले शोज आणि चित्रपटगृहांची संख्या

आठव्या आठवड्यात पदार्पण करताना चित्रपटगृहांची संख्या शंभरच्या पुढे गेली असून शोजची संख्याही वाढत आहे. वाढत्या प्रतिसादामुळे चित्रपटाची यशस्वी घोडदौड अधिकच वेग घेत आहे.

कलाकारांची दमदार फळी आणि निर्मितीची धुरा

या चित्रपटात सचिन खेडेकर, अमेय वाघ, सिद्धार्थ चांदेकर, क्षिती जोग, कादंबरी कदम, हरीश दुधाडे, निर्मिती सावंत, पुष्कराज चिरपुटकर आणि प्राजक्ता कोळी यांच्या प्रमुख भूमिका आहेत. चलचित्र मंडळी निर्मित या चित्रपटाचे लेखन व दिग्दर्शन हेमंत ढोमे यांनी केले असून निर्मितीची धुरा क्षिती जोग यांनी सांभाळली आहे. सहनिर्माते म्हणून विराज गवस, उर्फी काझमी (क्रेझी फ्यू फिल्म्स) आणि अजिंक्य ढमाळ यांचा सहभाग आहे.

भारतामध्ये पाण्याची टंचाई, प्रदूषित नद्या आणि अनियमित पाणीपुरवठा ही गंभीर समस्या बनली आहे. या पार्श्वभूमीवर National Water Mission आणि Ministry of Jal Shakti यांच्या सहकार्याने ‘मिर्ची’ने ‘जल वाणी’ ही देशव्यापी जनजागृती मोहीम सुरू केली आहे. या मोहिमेचा उद्देश साधा आहे — पाण्याचा अपव्यय थांबवणे आणि प्रत्येक नागरिकाने दररोज लहान कृतींमधून पाणी संवर्धनात सहभागी होणे.

सेलिब्रिटींचा सहभाग आणि सामाजिक संदेश

या उपक्रमाला गायक मोहित चौहान, अभिनेत्री तापसी पन्नू आणि दिग्दर्शक अनुभव सिन्हा यांचा पाठिंबा लाभला आहे. मोहिमेअंतर्गत लोकांना नळ बंद ठेवणे, गळती रोखणे, आणि पाण्याचा जपून वापर करणे यासारख्या साध्या सवयी अंगीकारण्याचे आवाहन केले जात आहे. “प्रत्येक थेंब जपणे हीच खरी सुरुवात,” असे मत व्यक्त करत मोहिमेत सहभागी कलाकारांनी सामूहिक जबाबदारीवर भर दिला आहे.

दिल्लीतील ‘जल वॉरियर्स’ प्रयोग

दिल्लीमध्ये आरजे नवेद यांनी एक प्रयोग राबवला. गर्दीच्या ठिकाणी मुद्दाम एक नळ गळत ठेवण्यात आला. अनेकांनी दुर्लक्ष केले, परंतु काही सजग नागरिकांनी थांबून तो नळ बंद केला. या छोट्याशा कृतीसाठी त्यांना ‘जल वॉरियर्स’ म्हणून गौरवण्यात आले. या प्रयोगातून एक स्पष्ट संदेश मिळाला — बदलाची सुरुवात छोट्या कृतीतूनच होते.

पाण्याच्या संकटामागची वस्तुस्थिती

‘जल वाणी’ मोहिमेत सहभागी झालेल्या वॉटर वॉरियर्सनी स्पष्ट केले की, भारतातील पाण्याची समस्या ही अनेक वर्षांच्या अतिवापर, प्रदूषण आणि नैसर्गिक साधनांकडे दुर्लक्ष यामुळे निर्माण झाली आहे. ही केवळ संसाधनांची समस्या नाही, तर विचारसरणीची देखील आहे. शासन योजना आखू शकते; पण पाणी ही मर्यादित आणि सर्वांची समान संपत्ती आहे, याची जाणीव प्रत्येकाने ठेवणे आवश्यक आहे.

डिजिटल माध्यमांतून जनजागृतीचा प्रयत्न

आरजे आणि डिजिटल कंटेंटच्या माध्यमातून ही मोहीम विशेषतः शहरांतील आणि तरुणांपर्यंत पोहोचवली जात आहे. ‘जल वाणी’ उपक्रमातून National Water Mission आणि Ministry of Jal Shakti पाण्याकडे मौल्यवान संसाधन म्हणून पाहण्याची मानसिकता निर्माण करण्याचा प्रयत्न करत आहेत.

दररोजच्या छोट्या कृती — नळ बंद ठेवणे, पाणी वाया जाऊ न देणे, आणि संवर्धनाची सवय लावणे — हाच या मोहिमेचा मुख्य संदेश आहे.