झी मराठीची नवीन मालिका ‘शिवा’ लोकां मध्ये चर्चचा विषय बनलीआहे. शिवाचा लुक असो किंवा बिनधास्त स्वभाव लोकांना सगळंच आकर्षित करत आहे. तर आम्ही अभिनेत्री पूर्वा कौशिक हिच्याशी गप्पा मारल्या आणि तिच्या भूमिकेबद्दल जाणून घेण्याचा प्रयत्न केला. पूर्वाचे अभिनय क्षेत्रात कसे आणि कधी पदार्पण झाले हे व्यक्त करताना सांगितले, “मी CHM कॉलेज उल्हासनगरला शिकत असल्यापासूनच एकांकिका करत असल्यामुळे, राज्य नाट्य, कमर्शिअल नाटकं केली आणि त्यानंतर छोट्या पडद्यावर आले. थिएटर केल्यामुळे खूप गोष्टी वेगळ्याने जाणवल्या. मकरंद देशपांडे ह्यांच्या अंश ह्या थिएटर मध्ये मी काम करत होते. ह्यामध्ये सरांची ३ नाटकं मी केली . मी भरतनाट्यम मध्ये प्रशिक्षण घेतले आहे. शास्त्रीय नृत्यामध्ये मध्ये माझा डिप्लोमा झाला आहे. मला वाचनाची ही खूप आवड आहे. मी पहिल्यांदा २०१० ला एक ऑडिशन दिली होती आणि मला ते काम माझ्या एका एकांकिकेमुळेच मिळालं होत. पण काही कारणास्तव ते प्रोजेक्ट मी करू शकले नाही. माझा पहिला शो ज्याच्यासाठी मी कॅमेरा फेस केला तो होता झी युवा चा ‘फ्रेशर’. शिवाची भूमिका माझ्यापर्यंत काही अशी आली. मी काही महिन्यापासून कामाच्या शोधात होते आणि काम शोधत असताना ठरवले होते की नायिकेची भूमिका साकारायची. एक दिवस अचानक मला माझ्या सोशल मीडिया वर ‘जगदंब प्रोडक्शन ‘ मधून मेसेज आला की ‘तू ऑडिशनला येऊ शकशील का?’ तेव्हा मी पहिला प्रश्न हाच विचारला नायिकेची भूमिका आहे का?’ हो म्हटल्यानंतर तिथून गोष्टी घडत गेल्या आणि माझा ‘शिवा’ चा प्रवास सुरु झाला आम्ही खूप वर्कशॉप्स केले. त्यानंतर बरेच लुक टेस्टस केले अंदाजे २५ तरी कपडे ट्राय केले होत पण जेव्हा प्रोमो पाहिला तेव्हा सगळी मेहनत स्क्रीनवर पाहून मन संतुष्ट झालं. ह्या भूमिकेसाठी मी बाईक ही शिकली. माझ्याकडे ऍक्टिवा आहे पण बाईक चालवायला मी वर्कशॉप मध्ये शिकले. आता मी आर.एक्स १०० बाईक चालवते जे तुम्हाला प्रोमो मध्ये आणि मालिके मध्येही पाहायला मिळेल. जेव्हा माझी निवड झाली आणि वर्कशॉप सुरु झाले तेव्हा मी कोणालाच सांगितले नव्हतं. पहिला प्रोमो जेव्हा माझ्या कुटुंबाने आणि इंडस्ट्रीच्या मित्रानी पाहिला तेव्हा ते प्रचंड खुश झाले. खूप छान प्रतिसाद मिळाला मला प्रोमो पाहून.

‘शिवा’ सर्वाना भेटीला येतेय १२ फेब्रुवारी पासून सोमवार ते शनिवार रात्री ९:०० वाजता फक्त झी मराठीवर .

निखिल वाघ यांना डिजिटल मिडिया संपादक पत्रकार संघटना महाराष्ट्र, मुंबई यांच्या वतीने महागौरव 2024 हा पुरस्कार सोमवार दिनांक 29 जानेवारीला कोल्हापुरातील कणेरी मठ येथे आयोजित सोहळ्यात महाराष्ट्राचे उपमुख्यमंत्री अजित पवार यांच्या हस्ते प्रदान करण्यात आला.
जनसंपर्क आणि पत्रकारितेतील योगदानाची दखल घेऊन हा विशेष पुरस्कार देऊन सन्मानित करण्यात आलं. यावेळी व्यासपीठावर प्रसिद्ध अभिनेते गिरीश कुलकर्णी आणि ज्येष्ठ संपादक राजा माने उपस्थित होते. श्री निखिल वाघ यांनी 2011 मध्ये गोवा शिपयार्ड लिमिटेड (GSL) चे PRO- जनसंपर्क अधिकारी म्हणून पदभार स्वीकारला होता. याआधी, त्यांना प्रतिष्ठित नॅशनल मीडिया हाऊसमध्ये विविध पदांवर काम करण्याचा 07 वर्षांचा अनुभव होता. अशा प्रकारे, त्यांना 19 वर्षांचा मोठा अनुभव आहे आणि ते सध्या गोवा शिपयार्ड लिमिटेडमध्ये आहेत, जी सरकारी सार्वजनिक क्षेत्रातील कंपनी आहे. अलीकडेच निखिल वाघ यांना भारतीय जनसंपर्क परिषदेकडून प्रतिष्ठित ‘प्रॉमिसिंग पीआर पर्सन ऑफ द इयर’ चाणक्य पुरस्कार २०२३ मिळाला.

श्री. निखिल वाघ यांनी डॉ. बाबासाहेब आंबेडकर मराठवाडा विद्यापीठ, छत्रपती संभाजीनगर, महाराष्ट्र येथून जनसंवाद आणि पत्रकारिता या विषयात मास्टर ऑफ आर्ट्स पूर्ण केले आहेत; डॉ. बाबासाहेब आंबेडकर मराठवाडा विद्यापीठ, छत्रपती संभाजीनगर, महाराष्ट्र येथून जनसंवाद आणि पत्रकारिता या विषयात कला शाखेची पदवी आणि शिवाजी विद्यापीठ, कोल्हापूर महाराष्ट्र येथून वाणिज्य शाखेची पदवी प्राप्त केली. श्री वाघ यांनी 2004-2007 मध्ये छत्रपती संभाजीनगर येथे दैनिक लोकमत महाराष्ट्र मधून सिटी रिपोर्टर म्हणून आपल्या पत्रकारितेच्या करिअरला सुरुवात केली. प्रिंट मीडियामधील अनुभवानंतर त्यांनी एबीपी माझा मुंबई (पूर्वी स्टार माझा म्हणून ओळखले जाणारे) मध्ये 2007-2011 पासून इलेक्ट्रॉनिक मीडियामध्ये संपादकीय विभागात सहयोगी निर्माता म्हणून काम केले.

पुढे, दै. लोकमत आणि एबीपी माझा सारख्या मुख्य प्रवाहातील प्रिंट आणि इलेक्ट्रॉनिक मीडियामधील प्रतिष्ठित कंपन्यांमध्ये काम करण्याचा विपुल अनुभव घेतल्यानंतर, 2011 मध्ये ते GSL- Goa Shipyard Limited मध्ये सामील झाले. गोवा शिपयार्ड लिमिटेड ही भारत सरकारमधील संरक्षण मंत्रालयाच्या अधिनस्त कंपनी आहे. GSL मधील 12 वर्षांच्या दीर्घ करिअरमध्ये, त्यांनी PR विभागात महत्त्वाची भूमिका बजावली आहे आणि संस्थेची प्रतिमा निर्माण करणे आणि संस्थेची प्रतिष्ठा वाढवणे, विविध संप्रेषण धोरणे यांच्याशी संबंध निर्माण करणे आणि टिकवून ठेवणे या क्षेत्रात महत्त्वपूर्ण योगदान दिले आहे.

कोणत्याही भूमिकेला योग्य न्याय देण्याचे कसब अंगी असलेले अभिनेते रवी काळे यांनी मराठी, हिंदीसह, तामिळ, तेलगू चित्रपटसृष्टीतही आपल्या अभिनयाचा ठसा उमटवत स्वत:ची वेगळी ओळख निर्माण केली आहे. रवी काळे यांनी आजवरच्या आपल्या वेगवेगळ्या भूमिकांमधून ते सिद्ध केलंय. दिग्पाल लांजेकर दिग्दर्शित ‘शिवरायांचा छावा’ या चित्रपटातही ते आता स्वराज्याच्या गुप्तचर यंत्रणेचे प्रमुख बहिर्जी नाईक यांची दमदार भूमिका साकारणार आहेत. या चित्रपटाच्या निमित्ताने रवी काळे प्रथमच ऐतिहासिक व्यक्तिरेखा साकारताना दिसणार आहेत. ए.ए.फिल्म्स आणि एव्हरेस्ट एंटरटटेंमेंट प्रस्तुत ‘शिवरायांचा छावा’ १६ फेब्रुवारीला चित्रपटगृहात दाखल होणार आहे.

आजवर विविधांगी भूमिका साकारणारे रवी काळे आता ऐतिहासिक भूमिकेत दिसणार असल्याने प्रेक्षकांची उत्सुकता नक्कीच वाढली आहे. आपल्या या भूमिकेबद्दल बोलताना रवी काळे सांगतात की, ‘कोणत्याही कलाकारासाठी वेगवेगळ्या प्रकारच्या भूमिका साकारायला मिळणे हे एक आव्हान असते आणि कलाकारालाही ते आव्हान स्वीकारायला आवडते. बहिर्जी नाईक यांची भूमिका करायला मिळणे हे मी माझे भाग्य समजतो. मला ‘शिवरायांचा छावा’ या चित्रपटात तशी संधी मिळाली ही नक्कीच आनंदाची बाब आहे.

मल्हार पिक्चर्स कं.चे वैभव भोर, किशोर पाटकर, मधू यांनी ‘शिवरायांचा छावा’ या ऐतिहासिक चित्रपटाची निर्मिती केली आहे. तर सह-निर्मिती भावेश रजनीकांत पंचमतीया यांनी केली आहे. संभाजी महाराजांच्या धगधगत्या अजेय पराक्रमाची कथा दिग्पाल लांजेकरांनी लिहिली असून पटकथा-संवाद आणि गाणी देखील त्यांचीच आहेत. गाण्यांना साजेसं संगीत युवा संगीतकार देवदत्त मनीषा बाजी यांनी दिलं आहे. पार्श्वसंगीत अमर मोहिले यांचे आहे.

कवयित्री विमल लिमये यांची ‘घर असावे घरासारखे, नकोत नुसत्या भिंती, तिथे असावा प्रेम जिव्हाळा, नकोत नुसती नाती,’ ही कविता सर्वांच्याच परिचयाची आहे. या कवितेतील ओळींचा नव्याने विचार करायला लावणारी आणि नात्यांचं महत्त्व पटवून देणारी नवी मालिका स्टार प्रवाहच्या परिवारात दाखल होतेय. मालिकेचं नाव आहे घरोघरी मातीच्या चुली. मालिकेच्या नावातच मालिकेची खरी गोष्ट दडलेली आहे. घर म्हण्टलं तर छोट्या मोठ्या कुरबुरी या आल्याच. मात्र घराला खऱ्या अर्थाने घरपण मिळतं ते घरातल्या आपल्या माणसांमुळे. याच आपल्या माणसांची गोष्ट म्हणजे घरोघरी मातीच्या चुली.

नव्या वर्षातल्या या नव्या मालिकेविषयी सांगताना स्टार प्रवाहचे बिझनेस हेड सतीश राजवाडे म्हणाले, ‘स्टार प्रवाह वाहिनी नेहमीच नातेसंबंधांबद्दल भाष्य करणाऱ्या मालिका सादर करत असते. रसिकांच्या अवती भवती होणाऱ्या गोष्टी मालिकेत दिसल्या की त्या आपल्याशा वाटतात. घरोघरी मातीच्या चुली ही म्हण आपल्या सगळ्यांना माहित आहे. व्यक्ती तितक्या प्रवृत्ती असं म्हणतात. कुटुंब म्हण्टलं की माणसं आली, भांड्याला भांडं लागणारच. पण म्हणून कोणी आपल्या माणसांना अंतर देत नाही. प्रत्येकाला सांभाळून आपण पुढे जातो. जो हिंमत ठेवतो, ज्याला माणसं जोडून ठेवता येतात तो जिंकतो. ही मालिका सुद्धा अशीच आहे नात्यांवर भाष्य करणारी. कोणत्याही परिस्थितीत दोष व्यक्तींचा नाही तर परिस्थितीचा असतो असं समजून घर टिकवणारी. तोडणं फार सोपं असतं, कठीण असतं ते जोडून ठेवणं.’

घरोघरी मातीच्या चुली मालिकेत जानकी हे महत्त्वाचं पात्र साकारणार आहे अभिनेत्री रेश्मा शिंदे. या नव्या भूमिकेविषयी सांगताना रेश्मा म्हणाली, ‘रंग माझा वेगळा मालिकेतल्या दीपावर प्रेक्षकांनी भरभरुन प्रेम केलं. रंग माझा वेगळा ही मालिका माझ्या आयुष्यातला टर्निंग पॉइंट होता. मालिका संपल्यानंतर माझ्या करिअरच्या पुढच्या टप्प्यात काय असेल याची प्रेक्षकांप्रमाणेच मलाही उत्सुकता होती. स्टार प्रवाहने पुन्हा एकदा माझ्यावर विश्वास ठेऊन जानकी साकारण्याची संधी दिली आहे. जानकी अत्यंत साधी, मनमिळावू, समंजस, लाघवी स्वभावाची आणि सर्वांनां समजून घेणारी आहे. तिचा एकत्र कुटुंब पद्धतीवर प्रचंड विश्वास आहे. त्यामुळे संपूर्ण कुटुंब नेहमी एकत्र असावं यासाठी तिची धडपड असते. मी स्वत: आजी-आजोबांच्या संस्कारात वाढले. सध्या करिअरच्या निमित्ताने म्हणा, किंवा स्वेच्छेने म्हणा विभक्त कुटुंब पहायला मिळतात. जर एकत्र कुटुंब पद्धत टिकवायची असेल तर आपली माणसं, आपली नाती जपणं ही काळाची गरज आहे. सुख-दु:खाच्या प्रसंगात हीच नाती आपली सोबत पुरवतात. म्हणूनच नात्यांची गोष्ट सांगणारी घरोघरी मातीच्या चुली ही मालिका मला खूप भावली. माझ्या स्टार प्रवाहच्या परिवारात पुन्हा येतेय याचा वेगळा आनंद आहे. अशी भावना रेश्माने व्यक्त केली.’

सविता प्रभुणे, प्रमोद पवार, उदय नेने, भक्ती देसाई, सुनील गोडसे, बालकलाकार आरोही सांबरे अशी दिग्गज कलाकार मंडळी या मालिकेतून भेटीला येणार आहेत. स्टार प्रवाह प्रस्तुत या मालिकेची निर्मिती सुचित्रा आदेश बांदेकर यांच्या सोहम प्रोडक्शन्सने केली असून राहुल लिंगायत मालिकेचं दिग्दर्शन करणार आहेत. तेव्हा पाहायला विसरु नका नवी मालिका घरोघरी मातीच्या चुली लवकरच फक्त स्टार प्रवाहवर.