Home – Batamiwala News

September 4, 2025

चित्रनगरीच्या `बाप्पा’च्या मंडपात मराठी कलाकारांचा सन्मान!

दादासाहेब फाळके चित्रनगरीत रंगला चित्रसंवाद

मुंबई, ता. ३ : दादासाहेब फाळके चित्रनगरीची परंपरा असलेल्या गणेशोत्सवात आयोजित केलेल्या चित्रसंवाद कार्यक्रमात व्यवस्थापकीय संचालक स्वाती म्हसे पाटील यांच्या हस्ते मराठी कलाकार व माध्यमकर्मींचा सन्मान करण्यात आला. हा कार्यक्रम चित्रनगरीच्या `बाप्पा’च्या मंडपात मोठ्या उत्साहात पार पडला.

गणेशोत्सवाला राज्य महोत्सवाचा दर्जा
यंदाच्या गणेशोत्सवाला राज्य महोत्सवाचा दर्जा दिल्याने राज्यभरात गणपती महोत्सव मोठ्या उत्साहात साजरा होत आहे. चित्रनगरीत `चित्रनगरीच्या राजा’ची प्राणप्रतिष्ठापना करून विविध सांस्कृतिक कार्यक्रमांची रेलचेल सुरू आहे. त्याचाच भाग म्हणून चित्रसंवाद या अनोख्या कार्यक्रमाचे आयोजन करण्यात आले.

कलाकार व मान्यवरांची उपस्थिती
या कार्यक्रमाला सिनेक्षेत्रातील अभिनेता सुशांत शेलार, प्रमोद पवार, संदीप पाठक, महेश लिमये, दिग्दर्शक दीपक पाटील, गायक रोहित राऊत, अभिनेत्री मेघा धाडे, श्रेया बुगडे, भार्गवी चिरमुले, तेजस्विनी लोणारे, अक्षया गुरव, दैवता पाटील, निवेदिका मानसी सोनटक्के, तसेच घरत गणपती चित्रपटाचे दिग्दर्शक नवज्योत बांदिवडेकर आणि कलाकार उपस्थित होते.

माध्यमकर्मी आणि संस्थांचा सन्मान
कलाकारांसोबतच सिने समीक्षक डॉ. संतोष पाठारे, ज्येष्ठ पत्रकार शीतल करदेकर, संपादक सचिन परब, नीला टेलिफिल्मचे असिद मोदी, विस्लिंग वूडसचे चैतन्य चिंचलीकर, फ्राइम फोकसचे सुनील धैया, बॉलिवूड पार्कचे संतोष मिजगर, निर्माता महामंडळाचे बाळासाहेब गोरे, देवेंद्र मोरे, कलादिग्दर्शक डॉ. सुमीत पाटील यांचा सन्मान करण्यात आला.

चित्रनगरी व्यवस्थापनाची उपस्थिती
या सोहळ्यात चित्रनगरीचे सह व्यवस्थापकीय संचालक प्रशांत साजणीकर यांच्यासह विविध विभाग प्रमुख उपस्थित होते. कलाकार, माध्यमकर्मी आणि संस्थांचा सन्मान करून या शताब्दी वर्षीचा गणेशोत्सव अधिक संस्मरणीय ठरला.
September 3, 2025

‘सकाळ तर होऊ द्या’ चित्रपटाचा काव्यमय टिझर प्रदर्शित

नेत्रसुखद दृश्ये आणि काव्यमय संवादांचा संगम
मातब्बर कलाकारांचा अभिनय, सुमधूर संगीत आणि दर्जेदार सादरीकरणाने सजलेला ‘सकाळ तर होऊ द्या’ हा मराठी चित्रपट प्रेक्षकांच्या भेटीला सज्ज आहे. ‘नाच मोरा…’ या गाण्याने रसिकांना भुरळ घातल्यानंतर आता या बहुचर्चित चित्रपटाचा टिझर प्रदर्शित झाला आहे. सोशल मीडियावर टिझरला प्रचंड प्रतिसाद मिळत असून, नेत्रसुखद दृश्यांना काव्यमय संवादांची किनार जोडलेला हा टिझर प्रेक्षकांचे लक्ष वेधण्यात यशस्वी ठरत आहे.

सुबोध भावेचा प्रभावी संवाद आणि मानसी नाईकची एन्ट्री
श्रेय पिक्चर कंपनी प्रस्तुत आणि नम्रता सिन्हा निर्मित या चित्रपटाचे दिग्दर्शन आलोक जैन यांनी केले आहे. सुबोध भावेच्या व्यक्तिरेखेच्या मुखातून उमटणारा “जन्म आपल्या हातात नसतं, असतं ते फक्त जगणं…” हा संवाद टिझरची सुरुवात करतो आणि जीवनाकडे पाहण्याची वेगळी दृष्टी मांडतो. त्याचदरम्यान मानसी नाईकची एन्ट्री होते आणि तिच्या संवादातून नायकाला सकारात्मकतेने जगण्याची प्रेरणा मिळते. उत्कंठावर्धक शेवटामुळे टिझर अधिक प्रभावी ठरतो. सुबोध-मानसीची केमिस्ट्री, सुबोधचा नवा लुक आणि मानसीचे ग्लॅमर यामुळे प्रेक्षकांची उत्सुकता आणखी वाढली आहे.

संगीत, संवाद आणि तांत्रिक बाजू
या चित्रपटाचे संगीत गायक-संगीतकार रोहित राऊत यांनी दिले असून, गीतकार अभिषेक खणकर यांच्या रचना हिमेश रेशमिया मेलोडीज या लेबलखाली संगीतप्रेमींना सादर होत आहेत. ओंकार बर्वे आणि अंकुश मारोडे यांनी संवादलेखन केले आहे, तर छायांकन सुनील पटेल यांनी केले आहे. चित्रपटाचे वितरण सिनेपोलीस करणार आहे.

१० ऑक्टोबरला प्रेक्षकांसमोर काव्यमय अनुभव
या टिझरमुळे प्रेक्षकांची उत्सुकता शिगेला पोहोचली असून, चित्रपटाच्या प्रदर्शनाची आतुरता अधिक वाढली आहे. ‘सकाळ तर होऊ द्या’ १० ऑक्टोबर रोजी संपूर्ण महाराष्ट्रात प्रदर्शित होणार आहे. हा चित्रपट केवळ कथानक नाही तर भावनांचा प्रवास, जीवनाकडे बघण्याची नवी दृष्टी आणि पडद्यावर घडणारा काव्यमय अनुभव प्रेक्षकांना देईल, असा विश्वास अधिक दृढ झाला आहे.
September 3, 2025

झी मराठी अवॉर्ड्स २०२५ – “सोहळा स्वप्नांचा, उत्सव नात्यांचा!”

गणपती बाप्पाच्या आशीर्वादाने मतदान प्रक्रियेचा शुभारंभ
महाराष्ट्रातील प्रत्येक घराचा अविभाज्य भाग बनलेली झी मराठी घेऊन आली आहे वर्षातील सर्वात बहुप्रतीक्षित सोहळा ‘झी मराठी अवॉर्ड्स २०२५!’ या वर्षाची थीम आहे “सोहळा स्वप्नांचा, उत्सव नात्यांचा!”, ज्यात प्रेक्षक आणि कलाकार यांचं खास नातं साजरं होणार आहे. या भव्य सोहळ्याच्या मतदान प्रक्रियेचा शुभारंभ गणपती बाप्पाच्या चरणी, ढोल-ताशाच्या गजरात भक्तिभावपूर्ण वातावरणात करण्यात आला.

लाडक्या कलाकारांच्या उपस्थितीत पारंपरिक आरती

झी मराठीवरील लोकप्रिय मालिकांमधील कलाकारांनी या शुभारंभाला हजेरी लावली. जयंत-वेंकी (लक्ष्मी निवास), कमळी-ऋषी (कमळी), अंबिका-अथर्व (तुला जपणार आहे) यांनी गणरायाची आरती करून आपल्या मालिकेला आणि सहकलाकारांना विजयी करण्यासाठी आशीर्वाद घेतले. पारंपरिक सजावट, मंगल वातावरण आणि कलाकारांची उपस्थिती या सर्वामुळे सोहळ्याची शोभा वाढली.

प्रेक्षकांना मतदानाचे आवाहन
कलाकारांनी प्रेक्षकांशी संवाद साधत आपल्या आवडत्या कलाकारांना आणि मालिकांना मतदान करण्याचं आवाहन केलं. त्यांनी नमूद केलं की ही केवळ स्पर्धा नाही, तर प्रेक्षक आणि कलाकार यांच्यातील प्रेमाचं आणि विश्वासाचं सुंदर प्रतिबिंब आहे. संपूर्ण महाराष्ट्रभर मतपत्रिकेद्वारे मतदान होणार असून, झी५ अॅपवरही प्रेक्षकांना आपलं मत नोंदवता येईल.

संस्कृती, नाती आणि भावनांचा उत्सव
‘झी मराठी अवॉर्ड्स २०२५’ हा केवळ एक अवॉर्ड शो नसून महाराष्ट्राच्या समृद्ध संस्कृतीचा, कुटुंबातील नात्यांचा आणि प्रेक्षकांच्या भावनांचा एक भव्य उत्सव आहे. प्रेक्षकांना आपल्या मतांद्वारे आपल्या लाडक्या कलाकारांचा सन्मान करण्याची संधी मिळणार आहे.

तेव्हा पाहायला विसरू नका ‘झी मराठी अवॉर्ड्स २०२५’ – लवकरच सदैव तुमच्या झी मराठीवर.
September 3, 2025

सूर्याच्या आयुष्यात नात्यांचं मोठं संकट!

“लाखात एक आमचा दादा” मालिकेत गाजत असलेल्या शालन निंबाळकर खून प्रकरणातील न्यायालयीन लढाईला अधिकृत सुरुवात झाली आहे आणि पहिल्याच दिवशी खटल्याला नवे वळण मिळालं आहे. पीडित पक्षाच्या वतीने काम पाहणाऱ्या प्रसिद्ध वकिल कालिंदी धर्माधिकारी यांच्या प्रभावी युक्तिवादामुळे आरोपी जालिंदर सरनाईकची बाजू कमकुवत झाली असून त्याला अटक अवस्थेतच ठेवण्याचे आदेश देण्यात आले आहेत. न्यायालयाने पोलिसांना स्पॉट पंचनामा आणि चार्जशीट तातडीने दाखल करण्याचे निर्देश दिले आहेत. जालिंदरच्या जामिन अर्जावर सुनावणीदरम्यान, त्याने पुराव्यांशी छेडछाड करण्याची शक्यता लक्षात घेऊन न्यायालयाने त्याचा जामीन अर्ज फेटाळला आहे.

जालिंदरवर वाढतं संकट
जालिंदर चारही बाजूंनी अडकलेला दिसत असताना, पीडित शालनची मैत्रीण आशा तुरुंगात भेट देऊन त्याला थेट इशारा देते. त्यामुळे त्याच्यावर आणखी दबाव वाढतो आणि पुढील कारवाईत अनेक नवे खुलासे होण्याची शक्यता निर्माण होते.

स्पॉट पंचनाम्यात उलगडलेला पुरावा
स्पॉट पंचनाम्याच्या वेळी पोलिसांनी जालिंदर, मालन, सूर्या आणि तुळजाला घटनास्थळी बोलावले. या वेळी मालनने संपूर्ण घटना पोलिसांसमोर मांडली. त्याच वेळी जालिंदरच्या परफ्यूमच्या बाटलीचा महत्त्वाचा पुरावा सापडतो. पंचनाम्यादरम्यान जालिंदर सतत मालनकडे पाहत असल्याचे लक्षात येताच, सूर्या आणि तुळजाला तिच्या सुरक्षेची चिंता वाटते आणि ते तिला आपल्या घरी नेतात.

मालन-तुळजाची भावनिक भेट
मालन आणि तुळजाच्या भावनिक भेटीने वातावरण भारावून जाते. याचदरम्यान शशिकांत सरनाईक प्रसादला ठार मारण्याची योजना आखतो, परंतु नर्मदाच्या मदतीने प्रसाद पळून जाण्यात यशस्वी होतो. मात्र पळताना त्याचा अपघात होतो. सुदैवाने राजू वेळेवर पोहोचतो आणि प्रसादचे प्राण वाचवतो.

नात्यांचा आणि न्यायाचा संघर्ष
हा खटला आता केवळ एका खुनाचा नसून, अनेक वर्षांपासून दडपून ठेवलेल्या सत्यांचा, गुंतागुंतीच्या नात्यांचा आणि न्यायासाठी सुरू असलेल्या संघर्षाचा झाला आहे. पुढे या कहाणीला कोणते वळण मिळणार, याची प्रेक्षकांमध्ये प्रचंड उत्सुकता आहे.

तेव्हा बघायला विसरू नका ‘लाखात एक आमचा दादा’, दररोज संध्याकाळी ६:०० वा. फक्त झी मराठीवर.
September 2, 2025

अनुराग कश्यप यांचा “निशानची” चा ट्रेलर उद्या होणार प्रदर्शित

ट्रेलर लाँचसह सुरू होणार सिनेमॅटिक धमाका
अनुराग कश्यप आणि अ‍ॅमेझॉन MGM स्टुडिओज इंडिया यांच्या “निशानची” चित्रपटाचा ट्रेलर उद्या म्हणजेच ३ सप्टेंबर रोजी प्रदर्शित होणार आहे. या ट्रेलरमुळे खऱ्या अर्थाने सिनेमॅटिक धमाका सुरू होणार असून, आधीच प्रदर्शित झालेल्या टीझर आणि गाण्यांनी प्रेक्षकांची उत्सुकता शिगेला पोहोचवली आहे. दमदार डायलॉग्स, अ‍ॅक्शन आणि ड्रामाने भरलेला हा ट्रेलर मसाला एंटरटेनरची खरी झलक देणार आहे.

ऐश्वर्य ठाकरेची दुहेरी भूमिका आकर्षणाचा केंद्रबिंदू
या चित्रपटात प्रमुख भूमिकेत डेब्यूटंट ऐश्वर्य ठाकरे दुहेरी भूमिकेत झळकणार आहेत. तर वेदिका पिंटो, मोनिका पनवार, मोहम्मद झीशान अय्यूब आणि कुमुद मिश्रा यांच्यासारखे दमदार कलाकार कथेला अधिक ताकद आणि खोलपणा देणार आहेत. फ्रेश कास्टिंग आणि दमदार अभिनयामुळे “निशानची”ला आधीपासूनच विशेष ओळख मिळाली आहे.

गावाच्या पार्श्वभूमीवर आधारित रॉ आणि एनर्जेटिक कथा
“निशानची” ही दोन भावांच्या गुंतागुंतीच्या कहाणीवर आधारित आहे. वेगवेगळ्या वाटा निवडलेले हे दोन भाऊ आपल्या निर्णयांमुळे नशिब घडवतात. गावाच्या पार्श्वभूमीवर उभी असलेली ही कथा रॉ, एनर्जेटिक आणि देसी फ्लेवरने भरलेली आहे, जी फक्त थिएटरमधील अनुभवातूनच खरी खुलून दिसणार आहे.

अनुराग कश्यपची दमदार स्टोरीटेलिंग शैली
दिग्दर्शक अनुराग कश्यप हे त्यांच्या बोल्ड आणि प्रभावी स्टोरीटेलिंगसाठी ओळखले जातात. “निशानची”चं कथालेखन प्रसून मिश्रा, रंजन चंदेल आणि अनुराग कश्यप यांनी एकत्र केलं आहे. प्रेक्षकांना यात अ‍ॅक्शन, ह्यूमर आणि ड्रामाचा अफलातून मिलाफ पाहायला मिळणार आहे.

१९ सप्टेंबरला थिएटरमध्ये प्रदर्शित होणार “निशानची”
अजय राय आणि रंजन सिंग यांच्या “जार पिक्चर्स” या प्रोडक्शन हाउसच्या बॅनरखाली, “फ्लिप फिल्म्स”सोबतच्या असोसिएशनमध्ये हा चित्रपट तयार करण्यात आला आहे. उत्सुकता वाढवणारा हा मसाला एंटरटेनर येत्या १९ सप्टेंबर २०२५ रोजी संपूर्ण भारतभरातील थिएटरमध्ये प्रदर्शित होणार आहे.
September 2, 2025

‘पण या इगो चं’ मधून नात्यातील अहंकारावर भाष्य

‘बिन लग्नाची गोष्ट’ चित्रपटाची उत्सुकता वाढवणारं गाणं
नात्यांची नवी परिभाषा सांगणारा ‘बिन लग्नाची गोष्ट’ हा चित्रपट सध्या चर्चेत आहे. या चित्रपटातील नवं गाणं ‘पण या इगो चं’ नुकतंच प्रदर्शित झालं असून, यामुळे प्रेक्षकांची उत्सुकता अधिकच वाढली आहे. नात्यातील प्रेम, आपुलकी, जिव्हाळा आणि त्यासोबत कधी कधी डोकावणारा अहंकार या गाण्यातून प्रभावीपणे व्यक्त झाला आहे. वैभव जोशी यांच्या अर्थपूर्ण शब्दांना संगीतकार निनाद सोलापूरकर यांनी जबरदस्त संगीत दिलं आहे. विशेष म्हणजे, प्रिया बापट आणि ज्येष्ठ अभिनेत्री भारती आचरेकर यांनी हे गाणं एकत्र गायलं आहे. भारती आचरेकर यांनी पहिल्यांदाच चित्रपटासाठी गायन केलं असून त्यांच्या आवाजामुळे गाण्याला वेगळीच ताकद मिळाली आहे.

नात्यांमधील कोमल सत्य उलगडणारं गीत
गाण्यातून निवेदिता सराफ आणि प्रिया बापट यांच्या नात्यातील तणाव, मौन आणि त्यातून निर्माण झालेल्या अहंकाराचं प्रभावी चित्रण दिसतं. प्रत्येक नात्यात प्रेम असतं, परंतु कधी कधी त्यापेक्षा ‘इगो’ला अधिक जागा मिळते. नात्यात प्रेम मोठं की अहंकार – हा प्रश्न या गाण्यातून अधोरेखित होतो. प्रवासाचा शेवट नेमका कुठे होईल हे मात्र चित्रपट पाहिल्यावरच समोर येणार आहे.

दिग्दर्शक आदित्य इंगळे यांचे मत
दिग्दर्शक आदित्य इंगळे म्हणाले, “‘पण या इगो चं’ हे गाणं आजच्या नात्यांवर वास्तवदर्शी भाष्य आहे. नात्यात प्रेम आणि आपुलकीसोबत थोडा इगो, हट्ट आणि नोकझोक असतेच. प्रिया बापट आणि भारती आचरेकर यांच्या आवाजामुळे या भावना अधिक जिवंत झाल्या आहेत. संगीतकार निनाद सोलापूरकर यांनी दिलेल्या संगीतामुळे गाण्याला सुंदर सहजता मिळाली आहे. प्रेक्षकांना स्वतःची आणि आपल्या नात्यांची आठवण नक्कीच येईल आणि हीच या गाण्याची खरी ताकद आहे.”

निर्माते नितीन वैद्य यांचा विश्वास
निर्माते नितीन वैद्य यांनी सांगितले, “‘बिन लग्नाची गोष्ट’ हा चित्रपट प्रत्येक कुटुंबात, प्रत्येक नात्यात घडणाऱ्या भावनांना साकारतो. ‘पण या इगो चं’ या गाण्याद्वारे आम्ही प्रेक्षकांना नात्यातील नाजूक क्षणांशी जोडण्याचा प्रयत्न केला आहे. हे गाणं ऐकल्यानंतर प्रेक्षकांना स्वतःच्या नात्यांचा वेध घ्यावासा वाटेल, असा आम्हाला विश्वास आहे.”

चित्रपटाची माहिती
गॉडगिफ्ट एंटरटेनमेंट प्रा. लि. आणि एस. एन. प्रॉडक्शन्स निर्मित ‘बिन लग्नाची गोष्ट’ हा चित्रपट १२ सप्टेंबर रोजी प्रदर्शित होत आहे. कथा समीर कुलकर्णी यांची असून दिग्दर्शन आदित्य इंगळे यांनी केले आहे. प्रिया बापट, उमेश कामत, निवेदिता सराफ, गिरीश ओक, सुकन्या मोने आणि संजय मोने यांच्या दमदार अभिनयाने सजलेला हा चित्रपट नात्यांचा आरसा ठरणार आहे.
September 1, 2025

ऋतू बदलतात, प्रेम टिकून राहतं – ‘ऋतुचक्र’ प्रेमगीत प्रदर्शित

प्रेम आणि ऋतूंची सांगड
प्रत्येक ऋतूतला निसर्ग वेगळा भासतो आणि माणसाच्या जीवनातील चढ-उतारांना प्रतिबिंबित करतो. या प्रवासात जर आपल्या जवळचं व्यक्ती सोबत असेल तर आयुष्य अधिक आनंदी होतं. अशाच भावनांना शब्दबद्ध आणि स्वरबद्ध करणारे ‘ऋतुचक्र’ हे प्रेमगीत नुकतेच प्रदर्शित झाले आहे.

गीतकार आणि संगीतकारांचा दृष्टिकोन
प्रसिद्ध गीतकार गुरु ठाकूर यांनी हे गीत लिहिलं असून, संगीतकार ए. व्ही. प्रफुल्लचंद्र यांनी त्याला सुमधुर चाली दिल्या आहेत. गुरु ठाकूर सांगतात की, प्रेम ही स्थिर भावना नसून ती परिस्थितीनुसार बदलते. या गाण्यातून त्या बदलत्या भावनांना शब्द मिळाले आहेत. ए. व्ही. प्रफुल्लचंद्र यांच्या मते, या गाण्याच्या स्वररचनेत कोकणातील निसर्गाची गोडी आणि प्रेमाची कोमलता गुंफली गेली आहे.

गायक आणि दृश्य वैशिष्ट्ये
हे गीत गायक साहिल कुलकर्णी आणि स्वानंदी सरदेसाई यांनी सादर केले आहे. कोकणातील निसर्गरम्य स्थळांवर चित्रीत करण्यात आलेले हे गाणे प्रियदर्शिनी इंदलकर आणि सिद्धार्थ मेनन यांच्या जोडीवर चित्रित झाले आहे. दृश्यांमधून न पाहिलेले अद्भुत कोकण प्रेक्षकांना अनुभवायला मिळते.

चित्रपटाची पार्श्वभूमी
झी स्टुडिओज प्रस्तुत, ओशन फिल्म कंपनी आणि ओशन आर्ट हाऊस निर्मित ‘दशावतार’ या बहुचर्चित चित्रपटातील हे गीत असून, चित्रपटात दिलीप प्रभावळकर, महेश मांजरेकर, भरत जाधव आणि विजय केंकरे यांसारख्या दिग्गज कलाकारांच्या भूमिका आहेत. हा चित्रपट १२ सप्टेंबर २०२५ रोजी प्रेक्षकांच्या भेटीला येणार आहे.
September 1, 2025

अभिनेता संकर्षण कऱ्हाडे आणि अभिनेत्री स्पृहा जोशी आज ब्राह्मण सेवा मंडळाच्या शतकमहोत्सवी श्री गणेशोत्सवात

शतकभराची परंपरा जपणारा उत्सव
ब्राह्मण सेवा मंडळ, दादर (प) येथे १९२५ साली सुरू झालेला सार्वजनिक गणेशोत्सव शंभर वर्षांची परंपरा जपत दरवर्षी भक्तिभाव, सांस्कृतिक उपक्रम आणि सामाजिक जाणीव यांचा संगम घडवतो. भवानी शंकर रोडवरील या गणेशोत्सवात नाट्य, संगीत, व्याख्याने, कीर्तन, कविसंमेलने आणि विविध कलामैफिलींचे आयोजन केले जाते. प्रबोधन, ज्ञानवर्धन व मनोरंजन यांचा समतोल साधणारा हा गणेशोत्सव यावर्षी शतकमहोत्सवी वर्ष साजरा करीत असून सर्व कार्यक्रम रसिकांसाठी विनामूल्य खुले आहेत.

‘संकर्षण via स्पृहा’ या आगळ्या कार्यक्रमाची रंगत
शृंखलेतील एक आगळावेगळा कार्यक्रम म्हणजे ‘संकर्षण via स्पृहा’. आज १ सप्टेंबर २०२५ रोजी रात्री ८ वाजता अभिनेता संकर्षण कऱ्हाडे आणि अभिनेत्री स्पृहा जोशी हा विशेष कार्यक्रम सादर करतील. कवितांपासून गाणी, किस्से, आठवणी आणि गप्पा यांची रंगतदार मैफिल दादरमधील गणेशभक्त रसिकांना अनुभवायला मिळणार आहे. त्यांच्यासोबत सहकलाकार म्हणून विनय चौलकऱे आणि गांधीर जोग यांचीही साथ असणार आहे.

माणिक वर्मा जन्मशताब्दी निमित्त विशेष कार्यक्रम

याच शृंखलेत दि. ३ सप्टेंबर २०२५ रोजी रात्री ८ वाजता पद्मश्री माणिक वर्मा जन्मशताब्दी निमित्ताने ‘हसले मनी चांदणे’ हा कार्यक्रम सादर होईल. माणिक वर्मा यांच्या सुमधुर गीतांवर आधारित या कार्यक्रमासाठी त्यांची कन्या वंदना गुप्ते, राणी वर्मा आणि इतर सदस्य उपस्थित राहणार आहेत. हा कार्यक्रम देखील गणेशोत्सवात रसिकांसाठी खास आकर्षण ठरणार आहे.
September 1, 2025

भारताकडून जगाकडे: जिओ स्टुडिओज् १६ व्या शिकागो साउथ एशियन फिल्म फेस्टिव्हलमध्ये सादर करणार तीन वेगळ्या धाटणीचे चित्रपट

जागतिक मंचावर जिओ स्टुडिओज्‌चा ठसा
भारताची आघाडीची कंटेंट पॉवरहाऊस कंपनी जिओ स्टुडिओज् आता जागतिक पातळीवर आपली छाप उमटवत आहे. प्रतिष्ठित १६ व्या शिकागो साउथ एशियन फिल्म फेस्टिव्हल (CSAFF) मध्ये जिओ स्टुडिओज् निर्मित तीन चित्रपटांची अधिकृत निवड झाली आहे. यात घमासान, साली मोहब्बत आणि बन टिक्की या चित्रपटांचा समावेश असून, हे चित्रपट “भारताकडून जगाकडे” या विशेष विभागात प्रदर्शित होणार आहेत.

विशेष विभागातील भारतीय चित्रपट
या विभागात भारताच्या ग्रामीण जीवनातील मुळे, शहरी जीवनातील गुंतागुंत, संस्कृती, जिद्द आणि बदलणारी ओळख यांचा परामर्श देणाऱ्या तीन भिन्न शैलींच्या कथा आहेत. हा महोत्सव १८ ते २१ सप्टेंबर २०२५ दरम्यान होणार असून, जिओ स्टुडिओजचे चित्रपट प्रमुख स्लॉट्समध्ये प्रेक्षकांच्या भेटीला येतील.

साली मोहब्बत – ओपनिंग नाईट फिल्म (१९ सप्टेंबर)
टिस्का चोप्राच्या दिग्दर्शनातील हा पहिला चित्रपट असून, ग्रामीण व शहरी भारताच्या बदलत्या सीमारेषांवर आधारित आहे. घरगुती हिंसा आणि विश्वासघाताच्या पार्श्वभूमीवर एका महिलेचा संघर्ष आणि स्वतःची ओळख पुन्हा मिळवण्याची कहाणी यात मांडली आहे. यात राधिका आपटे, अंशुमान पुष्कर, दिब्येंदु गांगुली आणि अनुराग कश्यप यांच्या प्रमुख भूमिका आहेत. ज्योती देशपांडे निर्मित या चित्रपटाची सहनिर्मिती मनीष मल्होत्राने केली असून, हा त्यांचा निर्माता म्हणून पहिलाच चित्रपट आहे.

घमासान – सेंटरपीस फिल्म (२० सप्टेंबर)
दिग्दर्शक तिग्मांशु धूलिया यांनी दिग्दर्शित केलेला हा ग्रामीण थ्रिलर भारताच्या हृदयस्थानी घेऊन जातो. एका तरुणाच्या त्याच्या राष्ट्र मूळाशी आणि भूतकाळाशी सुरू असलेल्या संघर्षाची ही कथा आहे. यात प्रतीक गांधी, अरशद वारसी आणि ईशिता दत्ता महत्त्वाच्या भूमिकेत आहेत. चित्रपटाचे निर्माते ज्योती देशपांडे, पियूष सिंह, अश्विनी चौधरी, अभयानंद सिंह आणि सौरभ गुप्ता आहेत.

बन टिक्की – मार्की फिल्म (२१ सप्टेंबर)
शहरी भारतातील भावस्पर्शी कथा मांडणारा हा चित्रपट एका लहान मुलाच्या आणि त्याच्या आजूबाजूच्या ओळखीच्या लोकांच्या भावनांवर आधारित आहे. धैर्य, कोमलता आणि जीवनातील प्रश्नांचा आलेख या कथेतून मांडला गेला आहे. यात शबाना आझमी, ज़ीनत अमान, अभय देओल, नुसरत भरुचा आणि रोहान सिंग यांच्या प्रमुख भूमिका आहेत. चित्रपटाचे निर्माते ज्योती देशपांडे, दिनेश मल्होत्रा, मरिज्के डीसूझा आणि मनीष मल्होत्रा असून, हा दिग्दर्शक फराझ आरिफ अन्सारी यांचा पहिला फीचर फिल्म आहे.

CSAFFची ओळख आणि जिओ स्टुडिओची बांधिलकी
शिकागो साउथ एशियन फिल्म फेस्टिव्हल दक्षिण आशियाई चित्रपटसृष्टीतील कला आणि सर्जनशीलतेला जागतिक मंच मिळवून देण्यासाठी प्रसिद्ध आहे. विविध आवाजांना आणि अनोख्या कथांना आंतरराष्ट्रीय प्रेक्षकांपर्यंत पोहोचवण्याचे कार्य हा महोत्सव करत आला आहे. यंदा जिओ स्टुडिओजच्या सहभागामुळे भारतीय चित्रपटसृष्टीतील प्रतिभावान दिग्दर्शक आणि कलाकारांना आंतरराष्ट्रीय पातळीवर प्रकाशझोतात आणण्याची संधी मिळाली आहे.
September 1, 2025

‘फकिरीयत’मधील ‘चलो चले…’ संतोष जुवेकरचे गाणे प्रदर्शित

आध्यात्मिकतेची अनुभूती देणारं गाणं
‘फकिरीयत’ हा आगामी हिंदी चित्रपट संगीतप्रेमींसाठी आध्यात्मिक गीत-संगीताची अनोखी मेजवानी घेऊन येत आहे. या चित्रपटातील गाणी भक्तीभावाची ज्योत प्रज्ज्वलित करणारी ठरणार असल्याची झलक नुकत्याच प्रदर्शित झालेल्या ‘चलो चले हम बाबाजी के देस…’ या गाण्यात पाहायला मिळाली आहे. हा चित्रपट आध्यात्म, गुरूभक्ती, क्रियायोग आणि श्रद्धा यांची अनुभूती देत जीवनाला नवी दिशा देणार आहे.

चित्रपटाची निर्मिती आणि दिग्दर्शन
भद्रबाहू डिव्हाइन क्रिएशन्स एलएलपीच्या बॅनरखाली ‘फकिरीयत’ची निर्मिती झाली आहे. दिग्दर्शक संतोष मांजरेकर यांनी या चित्रपटाचे दिग्दर्शन केले असून, त्यांचा हा पहिलाच हिंदी चित्रपट आहे. अनुजा जानवलेकर लिखित ‘चिरुट जलती है’ आणि ‘अध्यात्म एक विद्रोह, एक क्रांती’ या पुस्तकांवर या चित्रपटाची कथा आधारित आहे. अनिल पवार यांनी पटकथा लिहिली असून, अनुजा जानवलेकर यांच्यासोबत संवादलेखनही केले आहे.

महावतार बाबाजींच्या महतीवर आधारीत कथा
गुरुमाई माँ रुद्रात्मिका यांच्या आध्यात्मिक प्रवासावर आधारित या चित्रपटात महावतार बाबाजींची महती आणि गुरुमाईंचा गुरुकार्याचा संघर्ष प्रभावीपणे मांडला आहे. ‘चलो चले हम बाबाजी के देस…’ हे गाणे उत्तराखंडच्या नयनरम्य लोकेशन्सवर चित्रित केले गेले आहे. गाण्यात भक्तगण पर्वतरांगांमधून मार्गक्रमण करत बाबाजींच्या भक्तिरसात तल्लीन झालेले दिसतात. या दृश्यांमध्ये अभिनेता संतोष जुवेकरही भावपूर्ण सहभाग घेताना दिसतो.

गाण्याची वैशिष्ट्ये
गीतकार समृद्धी पवार यांच्या शब्दांनी सजलेले हे गाणे मनाला भिडणारे आहे. संगीतकार प्रवीण कुंवर यांनी संगीतबद्ध केलेले हे गाणे मनोज मिश्रा आणि डॉ. नेहा राजपाल यांच्या आवाजात सादर झाले आहे. गाण्याचे दृश्य आणि संगीत मिळून प्रेक्षकांना आध्यात्मिक अनुभूती देतात.

कलाकार आणि तांत्रिक टीम
या चित्रपटात संतोष जुवेकरसोबत दीपा परब, उदय टिकेकर, संदेश जाधव, विनीत शर्मा, अक्षय वर्तक, नयन जाधव, अनीषा सबनीस यांच्याही भूमिका आहेत. डिओपी अजित रेड्डी यांनी छायांकन केले असून, संकलनाची जबाबदारी निलेश गावंड यांनी सांभाळली आहे. चित्रपटातील गीते आणि संगीत हे संत विचारांचा अनमोल नजराणा ठरणार आहेत.

प्रदर्शनाची तारीख
‘फकिरीयत’ हा चित्रपट १९ सप्टेंबर २०२५ रोजी प्रेक्षकांच्या भेटीला येणार असून, भक्ती आणि अध्यात्माचा संगम मोठ्या पडद्यावर अनुभवण्याची संधी प्रेक्षकांना मिळणार आहे.