Home – Batamiwala News

October 5, 2025

मराठवाड्यावर ओढवलेल्या संकटासाठी गौतमी पाटीलचा मदतीचा हात

मराठवाड्यात अतिवृष्टीने अक्षरशः हाहाकार माजवला. पुराने केलेल्या या कहरात शेतीमाल, हातासरशी आलेली पिकं इतकंच नाहीतर अनेकांचे संसार वाहून गेले. आणि कित्येकांची स्वप्न चिखलात गाडली गेली. या काळात बहुतांश कलाकार गप्प बसले, तर काहींनी मदतीचा हात पुढे सरसावला. दरम्यान, मराठमोळी अभिनेत्री आणि नृत्यांगना गौतमी पाटीललाही शेतकऱ्यांच्या वेदना पाहवल्या नाहीत. यावेळी गौतमीने पुढाकार घेत मदतीचा हात पुढे केला.

गौतमी पाटीलची शेतकऱ्यांसाठी संवेदनशील मदत

गौतमीने तिच्या व्यस्त शेड्यूलमधून वेळ काढत शेतकऱ्यांच्या पाठीशी उभं राहण्याचं धाडस केलं. यावेळी तिने शेतकऱ्यांप्रति कृतज्ञता दाखवत ५१ हजार रुपयांची मदत देऊ केली. ही मदत या संकटासाठी मोठी नसली तरी तिच्या डोळ्यांतील प्रामाणिकता केलेल्या मदतीच्या दुप्पट बोलली, असं म्हणणं वावगं ठरणार नाही.

नृत्याने थिरकवणारी गौतमी, माणुसकीने जिंकली मनं

गौतमी पाटीलने आजवर तिच्या नृत्याने साऱ्यांना थिरकायला भाग पाडले. संपूर्ण महाराष्ट्रात तिच्या नृत्याचा प्रचंड चाहतावर्ग आहे. तिचं नृत्य लोकांच्या डोळ्यांना मोहवणारं असतं, पण यावेळी तिच्यातील माणुसकी मनाला जिंकून गेली.

गौतमी पाटीलचं भावनिक वक्तव्य

याबाबत बोलताना गौतमी म्हणाली, “मी स्वतः मराठवाड्याची परिस्थिती बघितली आहे. शेतकऱ्यांची दुःख शब्दात मावणारी नाहीत. त्यामुळे मला असं वाटतं की, सर्वांनी एकत्र येऊन मदत करणं आवश्यक आहे.”
October 4, 2025

WIFF 2025 चा भव्य प्रारंभ आणि सिनेप्रेमींची उत्स्फूर्त उपस्थिती

२ ऑक्टोबरला सुरू झालेल्या वॉटरफ्रंट इंडी फिल्म फेस्टिव्हल (WIFF) ने सुरुवातीलाच प्रेक्षकांची मने जिंकली. २ ते ६ ऑक्टोबरदरम्यान पार पडणाऱ्या या फेस्टिव्हलमध्ये शॉर्ट फिल्म स्क्रिनिंग, मास्टरक्लासेस आणि पॅनेल डिस्कशन्सचे आयोजन करण्यात आले असून चित्रपटसृष्टीतील तज्ज्ञ, दिग्दर्शक आणि रसिकांनी मोठ्या संख्येने सहभाग घेतला.

कबीर खुराना क्युरेटेड शॉर्ट फिल्म विभागात नवोदितांना संधी

फेस्टिव्हलचा एक खास आकर्षण ठरला तो स्वतंत्र दिग्दर्शक कबीर खुराना यांचा शॉर्ट फिल्म विभाग. त्यांनी नवोदितांना मार्गदर्शन करत “WIFF हे स्वतंत्र फिल्ममेकरसाठी प्रेरणादायी आणि सशक्त व्यासपीठ आहे” असं मत व्यक्त केलं.

राजेश मापुस्करांचा मास्टरक्लास ठरला संस्मरणीय

दिग्दर्शक राजेश मापुस्कर यांनी ‘व्हेंटिलेटर’ लिहिण्यामागची गोष्ट उलगडताना सांगितलं, “हा चित्रपट लिहायला मला ४८ वर्ष लागली. जॉइंट फॅमिलीतील अनुभव, भावनिक संघर्ष आणि कुटुंबातील संवाद यातून ही कथा जन्माला आली.” त्यांच्या या वक्तव्याने उपस्थितांची मने जिंकली.

सुचित्रा कृष्णमूर्तींची निर्भीड मते आणि दिग्गजांची चर्चा

अभिनेत्री आणि साहित्यिक सुचित्रा कृष्णमूर्ती यांनी “नेपोटिझमवरील चर्चा हास्यास्पद असून ती आज लोभी संस्कृती बनली आहे” असं ठाम मत मांडलं. दरम्यान, दिग्दर्शक हंसल मेहता, तुषार हीरानंदानी, रोहन सिप्पी आणि विशाल फुरिया यांच्या चर्चेत ओटीटी प्लॅटफॉर्मवरील बदल आणि स्वतंत्र चित्रपटांच्या संधींबद्दल सखोल चर्चा झाली.

‘श्यामची आई’च्या स्क्रिनिंगने फेस्टिव्हलचा पहिला दिवस उजळला

राष्ट्रीय पुरस्कार विजेता सुजय डहाके यांच्या ‘श्यामची आई’ चित्रपटाच्या स्क्रिनिंगने फेस्टिव्हलच्या पहिल्या दिवसाला खास स्वर दिला. या सर्व कार्यक्रमांमुळे वॉटरफ्रंट इंडी फिल्म फेस्टिव्हल सिनेप्रेमींसाठी ज्ञान, प्रेरणा आणि आनंदाचं केंद्र बनला आहे.
October 3, 2025

सर्जनशीलतेला वाव देण्यासाठी ‘अभिजात मराठी’ ओटीटी प्लॅटफॉर्म महत्त्वाचा : मुख्यमंत्री देवेंद्र फडणवीस

‘अभिजात मराठी’ ओटीटी प्लॅटफॉर्मचा लोकार्पण सोहळा संपन्न

मराठी भाषेचं सामर्थ्य, तिचं जतन, प्रचार आणि प्रसार करण्याच्या उद्देशाने वेगवेगळ्या संकल्पना राबवल्या जात आहेत. तंत्रज्ञानाचा हात धरून मराठी ही ज्ञानार्जन आणि अर्थाजनाची भाषा व्हावी या हेतूने सुमन एंटरटेनमेंटने ‘अभिजात मराठी’ या ओटीटी प्लॅटफॉर्मची मुहूर्तमेढ रोवली. ‘अभिजात मराठी’ या ॲपचा लोकार्पण सोहळा नुकताच महाराष्ट्र राज्याचे मुख्यमंत्री देवेंद्र फडणवीस आणि राज्याचे मराठी भाषा मंत्री उदय सामंत यांच्या हस्ते संपन्न झाला.

मुख्यमंत्र्यांनी व्यक्त केला विश्वास

‘अभिजात मराठी’ सारखा ओटीटी प्लॅटफॉर्म आज काळाची गरज असल्याचे मुख्यमंत्री देवेंद्र फडणवीस यांनी सांगितले. ‘अभिजात मराठी’च्या संपूर्ण टीमचं अभिनंदन करताना त्यांनी या ॲपमुळे मराठीच्या संवर्धनासाठी मोठी मदत होईल असे नमूद केले. मराठीतून आपल्या सर्जनशीलतेला वाव देण्यासाठी हा ओटीटी प्लॅटफॉर्म आजच्या घडीला अतिशय महत्त्वाचा आहे असा विश्वास त्यांनी व्यक्त केला.

मराठी साहित्य आणि संस्कृतीचा प्रसार

मनोरंजन, राजकीय आणि सामाजिक विषयांबरोबरच मराठी साहित्य आणि संस्कृती सर्वदूर पोहोचवणं हा ‘अभिजात मराठी’चा उद्देश आहे. असंख्य चांगल्या गोष्टी प्रेक्षकांपर्यंत पोहोचवण्याचं काम करणाऱ्या या उपक्रमाचे कौतुक मराठी भाषा मंत्री उदय सामंत यांनीही केले.

ॲपची वैशिष्ट्ये आणि उद्देश

या ॲपची निर्मिती करण्यामागचा मुख्य हेतू म्हणजे आपली मराठी भाषा आणि संस्कृती टिकवणं हा आहे. ‘अभिजात मराठी’ ॲपवर मराठी सिनेमा, नॉन-फिक्शन शो, वेबसिरीज, आंतरराष्ट्रीय डब कंटेंट अशा विविध प्रकारच्या मनोरंजनाची मेजवानी प्रेक्षकांना अनुभवता येणार आहे. हा ॲप मोफत असून कोणीही सहजरीत्या डाऊनलोड करू शकतो.

९ तारखेपासून प्रेक्षकांना चित्रपटांचा आनंद

येणाऱ्या ९ तारखेपासून या ॲपवर चित्रपटांचा आस्वाद घेता येईल. सध्या अनेक मराठी कलाकृतींना प्रमुख ओटीटी प्लॅटफॉर्मवर कमी प्राधान्य दिलं जातं. अशा परिस्थितीत ‘अभिजात मराठी’ हे त्यावर एक हक्काचं आणि प्रभावी उत्तर ठरणार आहे.
October 2, 2025

दसऱ्याच्या शुभमुहूर्तावर ‘आली मोठी शहाणी’ चित्रपटाची घोषणा

हृता दुर्गुळे- सारंग साठ्ये पहिल्यांदाच झळकणार एकत्र

मराठी चित्रपटसृष्टीत सतत नवनवीन प्रयोग होत आहेत. दमदार कथा, हटके विषय आणि फ्रेश जोड्या यामुळे प्रेक्षकांची उत्सुकता कायमच वाढत असते. याच पार्श्वभूमीवर दसऱ्याच्या शुभमुहूर्तावर एका खास चित्रपटाची घोषणा करण्यात आली आहे. ‘आली मोठी शहाणी’ या चित्रपटातून प्रेक्षकांना एक आगळीवेगळी ऑनस्क्रीन जोडी पाहायला मिळणार आहे. नोव्हेंबरमध्ये या चित्रपटाचे चित्रीकरण सुरू होणार असून या चित्रपटात पहिल्यांदाच हृता दुर्गुळे आणि सारंग साठ्ये एकत्र झळकणार आहेत. त्यांच्या ताज्या केमिस्ट्रीकडे सगळ्यांचेच लक्ष लागले आहे.

दिग्दर्शक आनंद दिलीप गोखले यांचा नवा प्रयोग

‘हॅशटॅग तदेव लग्नम्’ या चित्रपटातून सुबोध भावे आणि तेजश्री प्रधान यांची जोडी प्रेक्षकांसमोर घेऊन येणारे दिग्दर्शक आनंद दिलीप गोखले यावेळी या नव्या जोडीला घेऊन येत आहेत.

दिग्दर्शक आनंद दिलीप गोखले म्हणाले, “लवकरच प्रेक्षकांसाठी एक मनोरंजक चित्रपट घेऊन येत आहोत. या चित्रपटाची कथा लवकरच समोर येईल, इतकं नक्की की, हृता आणि सारंग यांच्या जोडीला प्रेक्षक भरभरून प्रेम देतील, याची मला खात्री आहे.”

फाईन ब्रू प्रॉडक्शन्स आणि ट्रू होप फिल्म वर्क्सची निर्मिती

फाईन ब्रू प्रॉडक्शन्स प्रस्तुत व ट्रू होप फिल्म वर्क्स यांच्या सहयोगाने प्रेक्षकांच्या भेटीला येणाऱ्या या चित्रपटाचे लेखन व दिग्दर्शन आनंद दिलीप गोखले यांनी केले असून ईशा मूठे, श्रुती साठे व जयकुमार मुनोत हे या चित्रपटाचे निर्माते आहेत.
October 2, 2025

‘कढीपत्ता’ चित्रपटाचा चटकदार टिझर प्रदर्शित – ७ नोव्हेंबरला संपूर्ण महाराष्ट्रात प्रेक्षकांच्या भेटीला

टिझरने वाढवली प्रेक्षकांची उत्सुकता
भारतीय खाद्यसंस्कृतीमध्ये अनन्यसाधारण महत्त्व असलेल्या *‘कढीपत्त्या’*चा सुगंध आता मराठी सिनेसृष्टीपासून रसिकांपर्यंत पोहोचला आहे. ‘कढीपत्ता’ शीर्षक असलेला आगामी मराठी चित्रपट नायक-नायिकेच्या नव्या जोडीपासून अनोख्या शीर्षकापर्यंतच्या वैशिष्ट्यांमुळे चर्चेत आला आहे. घोषणेनंतर पोस्टर्सद्वारे सादर झालेला फर्स्ट लूक आणि आता प्रदर्शित झालेला टिझर प्रेक्षकांची उत्सुकता अधिकच वाढवतो आहे. नेटकऱ्यांच्या प्रतिक्रियेनुसार टिझर शीर्षकाप्रमाणेच चटकदार ठरला असून, अल्पावधीतच चर्चेचा विषय बनला आहे. चित्रपट ७ नोव्हेंबरला प्रदर्शित होणार आहे.

निर्मिती आणि दिग्दर्शनाची जबाबदारी
*‘कढीपत्ता’*ची प्रस्तुती युवान प्रोडक्शनची असून, निर्मिती स्वप्नील युवराज मराठे यांनी केली आहे. कथा आणि दिग्दर्शनाची धुरा विश्वा यांनी सांभाळली आहे. एका अनोख्या प्रेमकथेची झलक टिझरमध्ये दिसते. विशेष म्हणजे टिझर एका खुमासदार उखाण्याने सुरू होतो. नायक म्हणतो – “स्वर्गात बांधल्या जातात लग्नाच्या गाठी, मीराचं नाव घेतो आज उखाण्यासाठी”, त्याला साथ देत नायिकाही उखाणा घेते – “स्वर्गाच्या साक्षीने देते मी लग्नाचं वचन, ललितच आहे माझा जानेजिगर जानेमन.” मात्र, टिझरच्या अखेरीस हे प्रेमप्रकरण घटस्फोटापर्यंत येतं, यामागील कारण जाणून घेण्याची उत्सुकता प्रेक्षकांच्या मनात निर्माण झाली आहे.

मुख्य कलाकारांची फ्रेश जोडी
या चित्रपटाचा नायक आहे अभिनेता भूषण पाटील, तर दाक्षिणात्य सिनेसृष्टीत यशस्वी झालेली अभिनेत्री रिद्धी कुमार *‘कढीपत्ता’*मधून मराठी चित्रपटसृष्टीत पदार्पण करत आहे. या निमित्ताने प्रेक्षकांना एका फ्रेश जोडीची अनोखी केमिस्ट्री अनुभवायला मिळणार आहे. आजच्या काळातील जोडप्यांच्या विचारसरणी, भावविश्व, मानसिकता, आवडी-निवडी आणि नात्यांविषयीच्या अपेक्षा या सर्व पैलूंचे चित्रण या चित्रपटात करण्यात आले आहे. त्यामुळे ही कथा सर्व वयोगटातील प्रेक्षकांना भावेल असा विश्वास व्यक्त केला जात आहे.

अनुभवी सहकलाकारांची फौज
भूषण आणि रिद्धी व्यतिरिक्त संजय मोने, शुभांगी गोखले, अक्षय टंकसाळे, गार्गी फुले, गौरी सुखटणकर, सानिका काशीकर आणि निशा माने यांच्या महत्त्वाच्या भूमिका आहेत. पाहुण्या कलाकारांमध्ये आनंद इंगळे, आनंदा कारेकर आणि चेतना भट विशेष लक्ष वेधून घेणार आहेत.

तांत्रिक बाबी आणि संगीत
चित्रपटाचं छायांकन अनिकेत खंडागळे यांनी केलं असून, वितरक सिनेपोलीस आहेत. संगीतप्रेमींसाठी चित्रपटातील गीते हिमेश रेशमिया मेलोडीज लेबलखाली प्रदर्शित होणार आहेत. गीतकार मंदार चोळकर, मुकुंद भालेराव आणि विनू सांगवान यांच्या लेखणीतून उतरलेली गाणी संगीतकार पद्मनाभ गायकवाड आणि आशिष खांडल यांनी संगीतबद्ध केली आहेत. तन्मय भिडे यांनी पार्श्वसंगीत दिलं आहे. ऋषीराज जोशी यांनी संकलन केलं असून, वेशभूषा पल्लवी पाटील आणि गार्गी पाटील यांनी केली आहे. रंगभूषा किरण सावंत यांनी केली आहे.

प्रेक्षकांची आतुरता वाढवणारा टिझर
‘कढीपत्ता’चा टिझर सुरुवातीपासून शेवटपर्यंत प्रेक्षकांच्या कुतूहलाला चालना देतो. सुरुवात आणि शेवट यांच्या दरम्यान नेमकं काय घडलं, ज्यामुळे प्रेमकथा घटस्फोटापर्यंत पोहोचली, हा प्रश्न सतत सतावतो. त्यामुळे चित्रपटाच्या रिलीजपर्यंत प्रेक्षकांची उत्सुकता शिगेला पोहोचेल, याची खात्री निर्माण झाली आहे.
October 2, 2025

शिवराज अष्टकातील सहावे चित्रपुष्प – ‘रणपति शिवराय’- स्वारी आग्रा १९ फेब्रुवारीला प्रेक्षकांच्या भेटीला

शिवराज अष्टक संकल्पना आणि आधीचे चित्रपट
छत्रपती शिवरायांचा तेजस्वी इतिहास पुढील पिढ्यांपर्यंत प्रभावीपणे पोहोचवण्याच्या उद्देशाने लेखक-दिग्दर्शक दिग्पाल लांजेकर यांनी ‘श्री शिवराज अष्टक’ ही संकल्पना आणली. महाराजांचा देदिप्यमान इतिहास आणि त्यातील ज्वलंत अध्याय रुपेरी पडद्यावर सादर झाले. यातील ‘फर्जंद’, ‘फत्तेशिकस्त’, ‘पावनखिंड’, ‘शेर शिवराज’ आणि ‘सुभेदार’ ही पाच चित्रपुष्प प्रेक्षकांच्या भेटीला आली आणि या सर्व चित्रपटांना रसिक प्रेक्षकांचं उदंड प्रेम आणि आशीर्वाद लाभले.

सहाव्या चित्रपटाची घोषणा
या संकल्पनेतील सहावे चित्रपुष्प नवीन वर्षात १९ फेब्रुवारी २०२६ ला प्रेक्षकांच्या भेटीला येणार आहे. या महत्त्वाकांक्षी चित्रपटाचं नाव आहे ‘रणपति शिवराय’- स्वारी आग्रा. लेखक-दिग्दर्शक दिग्पाल लांजेकर यांनी सोशल मीडियाद्वारे या भव्य चित्रपटाची घोषणा केली आहे.

आग्र्याहून सुटकेचा थरारक अध्याय
छत्रपती शिवाजी महाराजांनी अनेक बलाढ्य शत्रूंना आपल्या गनिमीकाव्याच्या जोरावर धूळ चारली. बुद्धिचातुर्य, धैर्य आणि गनिमी कावा अशा विविध गुणांनी त्यांनी लढवलेले डावपेच इतिहासात महत्त्वाचे ठरले. यापैकीच एक थरारक घटना म्हणजे शिवाजी महाराजांची आग्र्याहून सुटका. पॅनोरमा स्टुडिओज आणि मुगाफी निर्मित ‘रणपति शिवराय’- स्वारी आग्रा या चित्रपटातून हा ऐतिहासिक अध्याय दिग्दर्शक दिग्पाल लांजेकर प्रेक्षकांसमोर घेऊन येणार आहेत.

भव्य निर्मितीमागील टीम
या चित्रपटाचे निर्माते आहेत कुमार मंगत पाठक, अभिषेक पाठक, मुरलीधर छतवानी (पॅनोरमा स्टुडिओज) आणि विपुल अगरवाल, जेनील परमार (मुगाफी). सहनिर्माते रवींद्र औटी (पॅनोरमा स्टुडिओज) आणि तन्शा बत्रा (मुगाफी) आहेत.

भविष्यासाठी प्रेरणादायी वारसा
असामान्य दूरदृष्टी, असीम धैर्य, प्रबळ इच्छाशक्ती आणि प्रभावी व्यक्तिमत्वाच्या जोरावर सार्वभौम स्वराज्याची निर्मिती करणारे छत्रपती शिवाजी महाराज यांचे चरित्र कालातीत आहे. भावी पिढ्यांना आत्मविश्वास व प्रेरणा मिळावी या उद्देशाने *‘शिवराज अष्टका’*ची निर्मिती करण्यात आली आहे. या मालिकेतील चित्रपट भावी पिढ्यांसाठी नक्कीच मार्गदर्शक ठरतील असा विश्वास व्यक्त करण्यात आला आहे.
October 2, 2025

वेदांती दाणी दिग्दर्शित “लग्न आणि बरंच काही” – स्त्रियांनी स्त्रियांसाठी घडवलेला आगळावेगळा मराठी चित्रपट

मराठी चित्रपटसृष्टीत ऐतिहासिक टप्पा
मराठी चित्रपटसृष्टीत एक आगळावेगळा आणि ऐतिहासिक टप्पा गाठला जाणार आहे. वेदांती दाणी दिग्दर्शित, म्हाळसा एंटरटेन्मेंट आणि अव्यान आर्ट्स प्रस्तुत “लग्न आणि बरंच काही” हा नवा मराठी चित्रपट पूर्णपणे महिला शक्तीच्या बळावर साकार होणार आहे.

महिला क्रूची अनोखी ताकद
या चित्रपटाचे दिग्दर्शन, निर्मिती, संगीत, अभिनय तसेच प्रसार आणि प्रसिद्धीचे सर्व टप्पे स्त्रियांच्या कुशल हातांनी पार पाडले जाणार आहेत. प्रत्येक पायरीवर महिलांचाच ठसा असलेला हा आगळावेगळा चित्रपट खर्‍या अर्थाने “महिलांनी महिलांसाठी बनवलेला चित्रपट” ठरणार आहे.

जाहिरात विजयादशमीच्या मुहूर्तावर
या चित्रपटाची घोषणा विजयादशमीच्या शुभमुहूर्तावर करण्यात येईल. विशेष म्हणजे, हा चित्रपट संपूर्ण महिला क्रूसह तयार होणार आहे, जे मराठी चित्रपटसृष्टीसाठी अभिमानास्पद पाऊल ठरेल.

स्त्रियांच्या जीवनप्रवासाचे दर्शन
महिलांच्या जीवनातील सूक्ष्म भावना, अनुभव, स्वप्नं आणि संघर्ष यांना चित्रपटाच्या माध्यमातून प्रभावीपणे मांडण्याचा प्रयत्न केला जाणार आहे. लग्नानंतरचं आयुष्य हे केवळ जबाबदाऱ्यांचं दार उघडत नाही, तर तो तिच्या जीवनप्रवासातील एक नवा अध्याय आणि नातेसंबंधांच्या नव्या ओळखींचा आरंभ ठरतो, हे “लग्न आणि बरंच काही” सिनेमाच्या माध्यमातून प्रेक्षकांना अनुभवता येणार आहे.

८ मार्च – महिला दिनी प्रदर्शित होणार
या चित्रपटाचा सर्वात खास क्षण म्हणजे तो ८ मार्च २०२६, म्हणजेच महिला दिन या विशेष दिवशी प्रदर्शित होणार आहे.

चित्रपटाची दमदार टीम
या चित्रपटाचे दिग्दर्शन वेदांती दाणी करणार असून, निर्मितीचा मान संजना सुरेश पै आणि अंजली यांच्याकडे आहे. कथा लेखन यशश्री मसुरकर, छायांकन स्मिता निर्मळ, संगीत दिग्दर्शन वैशाली सामंत, एडिटिंग भक्ती मायाळू, प्रोडक्शन डिझाईन मुग्धा कुलकर्णी, ब्युटी स्टायलिंग सुप्रिया शिंदे, पीआर प्रज्ञा सुमती शेट्टी, आणि डिजिटल मार्केटिंग अश्मीकी टिळेकर यांनी सांभाळले आहे.

अभिनयाची ताकद
अभिनयाच्या माध्यमातून या चित्रपटाला जीवंत रूप देणार आहेत प्रतिभावान अभिनेत्री पूजा सावंत आणि शर्मिला राजाराम शिंदे.

स्त्रीशक्तीचा उत्सव
मराठी चित्रपटसृष्टीत महिलांच्या सर्जनशीलतेचा आणि सामर्थ्याचा ठसा उमटवणारा “लग्न आणि बरंच काही” हा चित्रपट निश्चितच एक प्रेरणादायी सिनेमा ठरणार आहे. हा फक्त एक चित्रपट नसून स्त्रीशक्तीचा उत्सव, गौरव आणि मराठी चित्रपटसृष्टीला लाभलेली नवी उभारी आहे.
October 1, 2025

पॅन-इंडियन टॉलीवूड डेब्यूपूर्वी शिना चौहान ठरली मुंबई तेलुगु सांस्कृतिक संघटनेच्या फ्लोरा फेस्टिव्हलची मुख्य पाहुणी

हक्कांविषयी जनजागृतीसाठी १००० पुस्तके तरुण मुलींना भेट
अभिनेत्री शिना चौहान हिची ओळख माधुरी दीक्षितच्या द फेम गेम, काजोलच्या द ट्रायल आणि सिटी ऑफ ड्रीम्स मधील प्रभावी अभिनयातून झाली आहे. बहुमुखी भूमिकांसाठी प्रसिद्ध असलेल्या शिनाने आपल्या कलाकारीसोबतच युनायटेड नेशन्सच्या ह्युमन राईट्स अॅम्बेसेडर म्हणून सामाजिक जबाबदारीही समर्थपणे पार पाडली आहे. आशियाभरात २० कोटींहून अधिक लोकांपर्यंत तिच्या स्वातंत्र्य आणि समानतेसाठीच्या मोहिमा पोहोचल्या आहेत. आता ती जे.डी. चक्रवर्तीसोबतच्या “झत्स्य मरणम् ध्रुवम्” या पॅन-इंडियन टॉलीवूड चित्रपटात पोलिस इन्स्पेक्टरच्या दमदार भूमिकेत झळकणार आहे.

मुंबईत भव्य फ्लोरा फेस्टिव्हलला उपस्थिती
अलीकडेच शिनाला मुंबई तेलुगु सांस्कृतिक संघटनेच्या फ्लोरा फेस्टिव्हलमध्ये मुख्य पाहुण्या म्हणून निमंत्रित करण्यात आले. या भव्य सोहळ्यात सुमारे ३,०००–३,५०० महिलांनी हजेरी लावली. रंगोली आणि फुलांच्या रचनेच्या स्पर्धांसह पारंपरिक उपक्रमांनी सजलेल्या या सोहळ्याचा उद्देश “बथुकम्मा” या तेलंगणातील फुलांच्या उत्सवाचे दर्शन घडवणे हा होता. बथुकम्मा म्हणजे हंगामी फुलांचा थरथरित, मंदिराच्या आकाराची सजावट, जी पृथ्वी, पाणी आणि मानव यांच्यातील नात्याचे प्रतीक मानली जाते.

समाजासाठी हृदयस्पर्शी gesture
हक्कांविषयी जनजागृती घडवून आणण्यासाठी शिनाने या सोहळ्यात १००० ह्युमन राईट्स पुस्तके तेलुगु तरुण मुलींना भेट दिली. या पुस्तिकांमुळे मुलींना आपल्या सुरक्षिततेसाठी व अधिकारांसाठी उभे राहण्याची जाणीव होईल, असा तिचा विश्वास आहे.

सोशल मीडियावर अनुभव व्यक्त
कार्यक्रमाचा व्हिडीओ शेअर करताना शिनाने लिहिले – “मुंबई तेलुगु कल्चरल असोसिएशनमध्ये ३,००० प्रेरणादायी महिलांसोबत आणि लहान मुलींमध्ये फ्लोरा फेस्टिव्हल साजरा करताना मला अतिशय आनंद झाला. त्यांच्या सोबत नाचले, हसले आणि माझा नवा साऊथ चित्रपटाचा टीझर शेअर केला. त्यांना काहीतरी अर्थपूर्ण द्यावं म्हणून मी हक्कांची पुस्तके भेट दिली.”

कलाकार आणि समाजकार्याचा उत्तम संगम
शिना चौहानच्या सहभागाने या सांस्कृतिक सोहळ्याला वेगळंच महत्त्व प्राप्त झालं. पडद्यावर मोहक भूमिका साकारणाऱ्या शिनाने सामाजिक क्षेत्रातही आपल्या उपक्रमांमधून लोकांना प्रेरणा दिली आहे. तिची ही उपस्थिती प्रेक्षकांशी असलेली जवळीक अधोरेखित करत समाजकल्याणासाठीच्या बांधिलकीलाही अधोरेखित करते.
September 30, 2025

‘सकाळ तर होऊ द्या’ चित्रपटाचा लक्षवेधी ट्रेलर प्रेक्षकांच्या भेटीला

१० ऑक्टोबरला होणार प्रदर्शित
सुबोध भावे आणि मानसी नाईक ही जोडी प्रथमच प्रेक्षकांसमोर आणणारा ‘सकाळ तर होऊ द्या’ हा चित्रपट फर्स्ट लुक रिलीज झाल्यापासूनच चर्चेत आहे. टीझरनंतर आता ट्रेलर प्रेक्षकांच्या भेटीला आला असून या चित्रपटाची उत्सुकता आणखी वाढली आहे. हा चित्रपट १० ऑक्टोबर रोजी संपूर्ण महाराष्ट्रात प्रदर्शित होणार आहे.

निर्मिती आणि दिग्दर्शनाची जुळवाजुळव
निर्मात्या नम्रता सिन्हा यांनी श्रेय पिक्चर कंपनी अंतर्गत ‘सकाळ तर होऊ द्या’ या चित्रपटाची निर्मिती केली असून समिट स्टुडिओज आणि मधु शर्मा हे प्रस्तुतकर्ते आहेत. हिंदी सिनेसृष्टीत कार्यरत असलेले दिग्दर्शक आलोक जैन यांनी या चित्रपटाद्वारे मराठी सिनेसृष्टीत पदार्पण केले आहे.

कथेतील अनोखा प्रवास
ट्रेलर पाहिल्यानंतर सुबोध भावे आणि मानसी नाईक यांच्या जोडीची केमिस्ट्री प्रेक्षकांना खुणावणार असल्याचे स्पष्ट होते. समाजापासून अलिप्त राहणाऱ्या नायकाची कथा यात आहे. त्याच्या आयुष्यात नियती नावाच्या नायिकेची एन्ट्री झाल्यानंतर विचार आणि भावनांचा प्रवास सुरू होतो. नायक तिला असे एक काम सांगतो जे ऐकून ती हादरते. तो असे का सांगतो, याचे कोडे उलगडणार आहे ते फक्त चित्रपट पाहिल्यावर.

संगीताची मोहिनी
‘नाच मोरा…’ आणि ‘जगू दे मला…’ ही गाणी ट्रेलरमध्ये ऐकायला मिळतात. या गाण्यांचा समावेश चित्रपटाला अधिक आकर्षक बनवतो. गीतकार अभिषेक खणकर यांच्या गीतांना गायक-संगीतकार रोहित राऊत यांनी संगीत दिले आहे. हिमेश रेशमिया मेलोडीज या लेबलखाली गाणी संगीतप्रेमींना उपलब्ध झाली आहेत.

तंत्रज्ञान आणि सर्जनशीलतेची सांगड
चित्रपटाचे संवादलेखन ओंकार बर्वे आणि अंकुश मारोडे यांनी केले आहे. छायांकन सुनील पटेल यांचे असून चित्रपटाचे वितरक सिनेपोलीस आहेत. ट्रेलरमधील सुबोध भावेचा वेगळा लुक आणि मानसी नाईकची भूमिका प्रेक्षकांच्या उत्सुकतेला नवीन उंचीवर नेत आहे.
September 30, 2025

इतिहास रचला गेला! झी मराठीच्या ‘कमळी’ने गाठले न्यूयॉर्कचे टाईम्स स्क्वेअर

न्यूयॉर्क टाईम्स स्क्वेअरवर झळकली पहिली मराठी मालिका
मराठी टेलिव्हिजनसाठी हा क्षण अभिमानाचा ठरला आहे, कारण झी मराठी वरील लोकप्रिय मालिका ‘कमळी’ चा कबड्डी विशेष प्रोमो थेट अमेरिकेतील न्यूयॉर्कच्या टाईम्स स्क्वेअरवर झळकला आहे. या निमित्ताने कमळी ही टाईम्स स्क्वेअरवर झळकणारी पहिली मराठी मालिका ठरली असून, महाराष्ट्रातील पारंपरिक खेळ कबड्डी आणि मराठी संस्कृती यांचा जागतिक व्यासपीठावर गौरव झाला आहे. कबड्डी हा महाराष्ट्राचा अभिमानास्पद खेळ असून ताकद, चातुर्य आणि संघभावना दर्शवणारा हा खेळ ‘कमळी’ मालिकेत प्रभावीपणे दाखवण्यात आला आहे. या विशेष भागात टीम कमळी (विजया बाबर) आणि टीम अनिका (केतकी कुलकर्णी) यांच्यातील थरारक सामना प्रेक्षकांना पाहायला मिळणार आहे.

विजया बाबरची भावना
या ऐतिहासिक क्षणाबद्दल कमळीची भूमिका साकारणारी अभिनेत्री विजया बाबर म्हणाली – “‘कमळी’ माझ्यासाठी केवळ एक भूमिका नाही, तर ती माझ्या आयुष्यातील एक प्रेरणादायी प्रवास आहे. एका सामान्य गावाकडच्या मुलीची स्वप्नं, तिचा संघर्ष, आणि जिद्दीनं पुढं जाण्याची तयारी हे सगळं मी कमळीच्या माध्यमातून अनुभवत आहे. आज ही कथा थेट न्यूयॉर्कच्या टाईम्स स्क्वेअरवर झळकते आहे, ह्याची मी स्वप्नातही कल्पना केली नव्हती. ही केवळ माझी नाही, तर हजारो मराठी मुलींची गोष्ट आहे, जी आता जगभर पोहोचते आहे. झी मराठी आणि संपूर्ण टीमचे मनापासून आभार, ज्यांनी कमळीला एवढं मोठं व्यासपीठ दिलं. आज खरंच वाटतंय जग जिंकण्याची सुरुवात आपल्या मातीपासून होते.”

मराठी अस्मितेचा जागतिक गौरव
ही संपूर्ण मोहीम म्हणजे संस्कृती, खेळ आणि परंपरेचा सुरेख संगम आहे. कमळी चा प्रोमो टाईम्स स्क्वेअरवर झळकणं हा मराठी अस्मितेचा जगभर झालेला सन्मान मानला जात आहे.

‘कमळी’चा आनंद प्रेक्षकांपर्यंत
तेव्हा बघायला विसरू नका ‘कमळी’ दररोज रात्री ९ वा. फक्त तुमच्या झी मराठीवर.