Home – Batamiwala News

August 26, 2025

‘वेल डन आई’ चित्रपटाचे आकर्षक पोस्टर प्रदर्शित

आईच्या नात्याला केंद्रस्थानी ठेवून बनवलेला ‘वेल डन आई’ हा आगामी मराठी चित्रपट आता आणखी चर्चेत आला आहे. या विनोदी चित्रपटाचे आकर्षक पोस्टर नुकतेच प्रदर्शित झाले असून, १४ नोव्हेंबरला हा चित्रपट संपूर्ण महाराष्ट्रात प्रदर्शित होणार आहे. आईची ममता आणि कणखरपणा दाखवणारी कथा या चित्रपटातून प्रेक्षकांच्या भेटीस येणार आहे.

दीपाली प्रोडक्शनची प्रस्तुती आणि दमदार निर्मितीमूल्यं

‘वेल डन आई’ चित्रपटाची प्रस्तुती दीपाली प्रोडक्शनने केली असून, निर्माते सुधीर पाटील आहेत. लेखन आणि दिग्दर्शन शंकर अर्चना बापू धुलगुडे यांनी केले आहे. कथा, पटकथा आणि संवाद संदीप गचांडे आणि शंकर धुलगुडे यांनी लिहिले आहेत. दर्जेदार निर्मितीमूल्यांच्या आधारे तयार झालेल्या या चित्रपटाची झलक पोस्टरमधून स्पष्ट दिसते.

विशाखा सुभेदारच्या भूमिकेने वाढवली उत्सुकता

कॉमेडी क्वीन म्हणून लोकप्रिय असलेल्या विशाखा सुभेदार या चित्रपटात आईची मुख्य भूमिका साकारणार आहेत. पोस्टरमध्ये आईच्या भूमिकेत एन्जॉय करणारी तिची मुद्रा रसिकांचे लक्ष वेधून घेते. तिच्यासोबत विजय निकम, जयवंत वाडकर, आयुष पाटील, सिमरन खेडकर, बीना सिद्धार्थ, तन्वी धुरी, विपुल खंडाळे आदी कलाकार दिसणार आहेत. मध्यमवर्गीय आईच्या भूमिकेत विशाखा प्रेक्षकांना भावनिक आणि विनोदी दोन्ही अनुभव देणार आहे.

दिग्दर्शक शंकर धुलगुडे यांचे मनोगत

दिग्दर्शक शंकर अर्चना बापू धुलगुडे म्हणाले, “‘वेल डन आई’मधील आई रसिकांना आजवर कधीही पाहायला मिळालेली नाही. ही पटकथा प्रेक्षकांना अखेरपर्यंत खिळवून ठेवणारी आहे आणि यातील आई परिपूर्ण मनोरंजन करणारी आहे. आमच्या टीमने गीत-संगीत, कथा आणि निर्मितीमूल्यांचा सुरेख संगम साधत प्रेक्षकांसमोर मनोरंजनाचे परिपूर्ण पॅकेज आणले आहे.”

संगीत, तांत्रिक बाजू आणि वितरण

गीतकार संदीप गचांडे यांच्या गीतांना संगीतकार निशाद गोलांबरे यांनी संगीत दिले आहे. छायांकन रंजीत साहू यांनी केले असून, संकलन निलेश गावंड यांचे आहे. कार्यकारी निर्माता राज्यपाल सिंह, प्रोडक्शन हेड काफिल अन्सारी आहेत. ऍग्नेल रोमन यांनी पार्श्वसंगीत दिले आहे, तर देवेंद्र तावडे यांनी कलादिग्दर्शन केले आहे. चिनी चेतन यांनी नृत्य दिग्दर्शन केले असून, मयुरी बस्तावडेकर, प्रतिभा गायकवाड आणि माधव म्हापणकर यांनी अनुक्रमे केशभूषा, वेशभूषा आणि रंगभूषा सांभाळली आहे.

१४ नोव्हेंबरला होणार प्रदर्शित

संपूर्ण महाराष्ट्रात १४ नोव्हेंबर २०२५ रोजी ‘वेल डन आई’ हा विनोदी आणि हृदयस्पर्शी चित्रपट प्रदर्शित होणार आहे. मध्यमवर्गीय कुटुंबातील आईची ताकद आणि तिचं प्रेम या चित्रपटातून अनुभवायला मिळणार आहे.
August 26, 2025

‘अभंग तुकाराम’ चित्रपटात जगद्गुरू संत तुकाराम महाराजांच्या भूमिकेत योगेश सोमण

‘ज्ञानोबा माऊली-तुकाराम’ असा अखंड नामघोष, टाळ-मृदंगाच्या तालावर होणारा विठूनामाचा गजर… अशा भक्तिमय वातावरणात श्री क्षेत्र देहू येथे ‘अभंग तुकाराम’ चित्रपटाच्या कलाकारांनी संत तुकाराम महाराजांचे सगुण साकार रूप उभे केले. ज्येष्ठ अभिनेते योगेश सोमण यांनी डोक्यावर वारकरी पगडी, कपाळावर टिळा, गळ्यात माळा आणि हातात चिपळ्या घेऊन संत तुकाराम महाराजांची भूमिका साकारली आहे. त्यांच्या पत्नी आवलीच्या भूमिकेत अभिनेत्री स्मिता शेवाळे दिसणार आहे.

संत तुकारामांच्या अभंगांचा सजीव अनुभव रुपेरी पडद्यावर

संतश्रेष्ठ तुकाराम महाराजांच्या अभंगवाणीने जीवनाचे तत्त्वज्ञान मांडले आणि मानवी जीवनाला परिपूर्णता दिली. हा सुखसंवाद आता रुपेरी पडद्यावरून प्रेक्षकांसमोर येणार आहे. दिग्पाल लांजेकर दिग्दर्शित ‘अभंग तुकाराम’ चित्रपट ७ नोव्हेंबर रोजी प्रदर्शित होणार आहे.

पॅनोरमा स्टुडिओजची साथ

या चित्रपटाचे प्रस्तुतकर्ते पॅनोरमा स्टुडिओज असून, निर्माते कुमार मंगत पाठक आणि अभिषेक पाठक आहेत. सहनिर्माते मुरलीधर छतवानी आणि रवींद्र औटी आहेत. पॅनोरमा स्टुडिओजचे चेअरमन कुमार मंगत पाठक म्हणाले, “लोकसाहित्य, लोकसंगीत आणि लोकजीवन प्रादेशिक सिनेमांमध्ये उतरल्याने प्रेक्षकांना ते अधिक जवळचे वाटतात. चांगल्या संकल्पनेसोबत आम्ही नेहमीच उभे राहतो.” तर सीईओ मुरलीधर छतवानी यांनी सांगितले, “दर्जेदार संहिता आणि उत्तम कलाकार यामुळे या चित्रपटाला आम्ही ठाम साथ देत आहोत.”

दिग्दर्शक दिग्पाल लांजेकर यांचे विचार

दिग्दर्शक दिग्पाल लांजेकर म्हणाले, “तुकारामांच्या अभंगांमध्ये अध्यात्मिकतेचा साक्षात्कार आणि जीवनाची अर्थपूर्णता याचे सुंदर सार दडलेले आहे. हे तत्वज्ञान नवीन पिढीपर्यंत पोहोचवण्याचा आमचा प्रयत्न आहे आणि पॅनोरमा स्टुडिओजची भक्कम साथ आमच्यासोबत आहे.”

कथा, पटकथा आणि संगीताचा त्रिवेणी संगम

चित्रपटाची कथा व संवाद प्रसिद्ध लेखक योगेश सोमण यांचे असून, पटकथा व दिग्दर्शन दिग्पाल लांजेकर यांचे आहे. वारकरी संगीत हा या चित्रपटाचा आत्मा असून, तब्बल दहा अभंगांचा समावेश करण्यात आला आहे. प्रसिद्ध गायक-संगीतकार अवधूत गांधी यांनी संगीत दिग्दर्शन केले असून, मृणाल कुलकर्णी, समीर धर्माधिकारी, अजय पुरकर, विराजस कुलकर्णी, अभिजीत श्वेतचंद्र, नुपूर दैठणकर यांच्यासह अनेक कलाकार या चित्रपटात झळकणार आहेत.

तांत्रिक टीमची साथ

छायांकन संदीप शिंदे यांनी केले असून, संकलन सागर शिंदे व विनय शिंदे यांचे आहे. रंगभूषा अतुल मस्के तर वेशभूषा सौरभ कांबळे यांनी केली आहे. पार्श्वसंगीत मयूर राऊत, ध्वनी आरेखन निखिल लांजेकर व हिमांशू आंबेकर, साहसदृश्ये बब्बू खन्ना, नृत्यदिग्दर्शन सुमित साळुंखे तर कलादिग्दर्शन प्रतीक रेडीज आणि संजय करोले यांनी सांभाळले आहे.

७ नोव्हेंबरला प्रेक्षकांच्या भेटीला

‘अभंग तुकाराम’ या चित्रपटाद्वारे संत तुकाराम महाराजांच्या अभंगांचा, भक्तीचा आणि तत्वज्ञानाचा सजीव अनुभव रुपेरी पडद्यावर आणला जाणार आहे. हा भक्तिरसाचा सोहळा ७ नोव्हेंबर रोजी संपूर्ण महाराष्ट्रात प्रदर्शित होणार आहे.
August 26, 2025

तेजश्री प्रधान आणि शिवानी सोनारने व्यक्त केला गणपती आगमनाचा उत्साह !

तेजश्री प्रधानची खास आठवण

‘वीण दोघातली ही तुटेना’ मालिकेतील स्वानंदी म्हणजेच अभिनेत्री तेजश्री प्रधान हिने ह्यावर्षीचा गणेशोत्सव कसा आणि कुठे साजरा करणार याबद्दल सांगितले. “आमच्या घरचा गणपती हा फिरता असतो. या वर्षी माझ्या सख्या काकाच्या घरी म्हणजे गोरेगावला गणपती आहे आणि आम्ही सर्व तिकडे गणेशोत्सव साजरा करणार आहोत. माझ्या जन्मापासून गणपती स्थापना प्रधानांच्या घरी होत आली आहे. गणेशोत्सवात मला सर्वात जास्त मोदक आवडतात. डायट असो वा काही असो, मोदक खाणं टाळणं माझ्यासाठी खूप अवघड आहे. मी उपाशी राहीन पण मोदक नक्की खाईन. बालपणीच्या खास आठवणी आहेत जिथे मी सोसायटी कार्यक्रमात सहभागी होऊन माझ्या कला सादर केल्या आहेत. बाप्पाच्या समोर केलेली ती कला त्यांच्या आशिर्वादानेच मला आज इथवर घेऊन आली आहे.”

शिवानी सोनारचा पहिला गणेशोत्सव

‘तारिणी’ मालिकेतील तारिणी म्हणजेच अभिनेत्री शिवानी सोनार ह्या वर्षी लग्नानंतरचा पहिला गणेशोत्सव साजरा करणार आहे. शूटिंग संपवून ती पुण्याला माहेरी पोहोचली आहे. शिवानीने उत्साह व्यक्त करताना सांगितले— “३६५ दिवसांपैकी गणपती उत्सवाचे १० दिवस माझ्यासाठी खूप खास असतात. या वर्षीचा गणेशोत्सव माझ्यासाठी अधिक खास आहे, कारण लग्नानंतरचा हा पहिला उत्सव आहे. माझ्या माहेरी १० दिवसांचा गणपती असतो, पण माझ्या सासरी इतके वर्ष दीड दिवसाचा गणपती होत असे. यावर्षापासून माझ्या सासूबाईंनी ५ दिवसांचा गणपती ठेवण्याचा निर्णय घेतला आहे. त्यामुळे माहेरी आणि सासरी दोन्हीकडे गणपती असणार असल्याने थोडी तारांबळ उडणार आहे. तरीही बाप्पाच्या आशिर्वादाने कधी काम थांबलं नाही. मी दरवर्षी मानाच्या पाच गणपतीचे दर्शन घेतेच आणि बाप्पाची आरास करण्याचा मला प्रचंड आनंद मिळतो. गणेशोत्सवातलं ते वातावरण खूपच सुंदर असतं.”

झी मराठीवरील मालिकांची वेळ

तेव्हा बघायला विसरू नका ‘वीण दोघातली ही तुटेना’ सोम–शनि संध्या ७:३० वा. आणि ‘तारिणी’ सोम–शुक्र ९:३० वा. सदैव तुमच्या झी मराठीवर.
August 26, 2025

श्रेय पिक्चर कंपनी प्रस्तुत ‘सकाळ तर होऊ द्या’ मधील ‘नाच मोरा…’ गाणे प्रदर्शित

श्रेय पिक्चर कंपनी प्रस्तुत आणि नम्रता सिन्हा निर्मित बहुप्रतिक्षित मराठी चित्रपट ‘सकाळ तर होऊ द्या’ मधील पहिले गाणे ‘नाच मोरा…’ प्रदर्शित झाले आहे. हिमेश रेशमिया मेलोडीजच्या लेबलखाली सादर झालेले हे गाणे प्रेक्षकांची पावले थिरकवेल, यात शंका नाही. मराठी सिनेसृष्टीत संगीत प्रस्तुतकर्ता म्हणून पदार्पण करणाऱ्या हिमेश रेशमिया यांच्यासाठी हा एक विशेष टप्पा असून, या चित्रपटाबाबतची उत्सुकता त्यांनी सोशल मीडियावर व्यक्त केली आहे.

सुबोध भावेचा हटके लूक आणि मानसी नाईकचा लयबद्ध ठेका

या गाण्यातील सुबोध भावेचा हटके लूक विशेष चर्चेत आला आहे. लांब केस आणि वाढलेली दाढी अशा लुकमध्ये तो प्रेक्षकांचे लक्ष वेधून घेत आहे. गुलाबी साडीतील मानसी नाईकच्या लयबद्ध ठेक्यासह साकारलेली सुबोध-मानसीची केमिस्ट्री हे गाण्याचे मुख्य आकर्षण ठरते. मध्य प्रदेशातील नयनरम्य लोकेशन्सवर चित्रित या गाण्याचे नृत्यदिग्दर्शन बॉलिब्रदर्सचे फिरोज खान यांनी केले आहे.

गीतकार, संगीतकार आणि गायकांचा संगम

या गाण्याचे गीत अभिषेक खणकर यांनी लिहिले असून, संगीतकार रोहित राऊत (इंडियन आयडल ११ चे रनर-अप) यांनी संगीत दिले आहे. गायिका जुईली जोगळेकर हिने आपल्या सुमधुर आवाजाने या गाण्याला अधिक उठावदार बनवले आहे.

चित्रपटाची वैशिष्ट्ये आणि तांत्रिक टीम

शीर्षक जाहीर झाल्यापासूनच चर्चेत असलेल्या ‘सकाळ तर होऊ द्या’ या चित्रपटातील वैशिष्ट्ये एकामागून एक उलगडत आहेत आणि ‘नाच मोरा…’ हे गाणे त्यातील पहिले आकर्षक पाऊल ठरते. वेगळ्या आशयावर आधारित असलेला हा चित्रपट मराठी प्रेक्षकांना नवा अनुभव देणार आहे. दिग्दर्शन आलोक जैन यांचे असून, संवादलेखन ओंकार बर्वे आणि अंकुश मारोडे यांनी केले आहे. छायांकनाची जबाबदारी सुनील पटेल यांनी सांभाळली आहे.

प्रदर्शनाची तारीख

संपूर्ण महाराष्ट्रात १० ऑक्टोबर २०२५ रोजी प्रदर्शित होणारा हा चित्रपट सिनेपोलीस वितरित करणार आहे.
August 25, 2025

‘कढीपत्ता’मध्ये रिद्धी कुमार बनली भूषण पाटीलची नायिका

पहिले पोस्टर प्रदर्शित झाल्यापासूनच प्रेक्षकांच्या आणि सिनेसृष्टीच्या उत्सुकतेचा विषय ठरलेला ‘कढीपत्ता’ हा आगामी मराठी चित्रपट आता आणखी चर्चेत आला आहे. नव्या पोस्टरद्वारे या चित्रपटाची नायिका रिद्धी कुमार असल्याचे उघड झाले असून, ७ नोव्हेंबरला हा चित्रपट संपूर्ण महाराष्ट्रात प्रदर्शित होणार आहे.

निर्मिती आणि दिग्दर्शनाची नवी जोडी

युवान प्रोडक्शन प्रस्तुत या चित्रपटाची निर्मिती स्वप्नील युवराज मराठे यांनी केली असून, कथा व दिग्दर्शन विश्वा यांनी केले आहे. निर्माते आणि दिग्दर्शक या दोघांचा हा पहिलाच चित्रपट आहे. पदार्पणातच एक अनोखी प्रेमकथा प्रेक्षकांसमोर आणण्याचे आव्हान विश्वा यांनी स्वीकारले आहे. पहिले पोस्टर नायिकेचा चेहरा न दाखवल्यामुळे चर्चेचा विषय ठरले होते. दुसऱ्या पोस्टरमध्ये भूषण पाटीलसोबत रिद्धी कुमारचा लूक उलगडला आहे.

भूषण पाटील आणि रिद्धी कुमारची नवी जोडी

चित्रपटात भूषण पाटील मुख्य भूमिकेत असून, त्याच्या जोडीला रिद्धी कुमार दिसणार आहे. पोस्टरमध्ये या दोघांची फ्रेश केमिस्ट्री स्पष्ट दिसते. रिद्धी कुमारचा हा पहिलाच मराठी चित्रपट आहे. यापूर्वी तिने काही वेबसिरीज आणि दाक्षिणात्य चित्रपटांत काम केले असून, प्रभासच्या ‘राधे श्याम’ आणि ‘द राजासाब’ यामध्ये ती झळकली आहे.

रिद्धी कुमारची भूमिका आणि अनुभव

या चित्रपटाबाबत बोलताना रिद्धी कुमार म्हणाली, “मराठी चित्रपटांमध्ये गोष्टीला नेहमी प्राधान्य दिलं जातं. या चित्रपटात जरी मी नायिकेच्या रूपात झळकत असले तरी खरा हिरो ही गोष्ट आहे. माझी व्यक्तिरेखा स्वतंत्र विचारांची आणि आजच्या तरुणाईचं प्रतिनिधित्व करणारी आहे. दिग्दर्शक विश्वा यांचं व्हिजन स्पष्ट होतं, तर निर्माता स्वप्नील मराठे यांनी दर्जेदार कलाकृती साकारण्यासाठी पूर्ण साथ दिली.”

कलाकारांची ताकदवान फळी

या चित्रपटात भूषण पाटील आणि रिद्धी कुमार या नव्या जोडीसोबत संजय मोने, शुभांगी गोखले, अक्षय टंकसाळे, गार्गी फुले, गौरी सुखटणकर, सानिका काशीकर, निशा माने आदी सहकलाकार आहेत. तर आनंद इंगळे, आनंदा कारेकर आणि चेतना भट पाहुण्या भूमिकेत दिसतील.

संगीत, तांत्रिक टीम आणि प्रदर्शित तारीख

गीतकार मंदार चोळकर, मुकुंद भालेराव आणि विनू सांगवान यांच्या गीतांना संगीतकार पद्मनाभ गायकवाड आणि आशिष खांडल यांनी रोहित राऊत, पद्मनाभ गायकवाड, अनन्या वाडकर, साज भट्ट आणि प्रियांशी श्रीवास्तवा यांच्या आवाजात सुरांचा साज चढवला आहे. छायांकन अनिकेत खंडागळे यांनी केले असून, संकलन ऋषीराज जोशी यांनी केले आहे. रंगभूषा किरण सावंत आणि वेशभूषा पल्लवी पाटील व गार्गी पाटील यांनी सांभाळली आहे. वितरणाची जबाबदारी सिनेपोलीसवर असून, कार्यकारी निर्माता विशाल चव्हाण तर प्रोजेक्ट हेड संयुक्ता सुभाष आहेत.

७ नोव्हेंबरला होणार प्रदर्शित

अनोख्या प्रेमकथेवर आधारित ‘कढीपत्ता’ चित्रपट ७ नोव्हेंबर २०२५ रोजी संपूर्ण महाराष्ट्रात प्रदर्शित होणार असून, प्रेक्षकांना एका नवीन जोडीसोबत ताजेतवाने सिनेमॅटिक अनुभव देणार आहे.
August 25, 2025

मुख्यमंत्री देवेंद्र फडणवीस यांच्या हस्ते ‘अरण्य’ चित्रपटाचे पोस्टर अनावरण

महाराष्ट्राचे मुख्यमंत्री देवेंद्र फडणवीस यांच्या हस्ते नुकतेच ‘अरण्य’ या मराठी चित्रपटाचे पोस्टर अनावरण करण्यात आले. अमोल दिगांबर करंबे लिखित व दिग्दर्शित हा चित्रपट सामाजिक वास्तवावर प्रकाश टाकणारी प्रभावी कहाणी प्रेक्षकांसमोर आणणार आहे. ‘अरण्य’ हा चित्रपट १९ सप्टेंबर रोजी प्रेक्षकांच्या भेटीला चित्रपटगृहांत झळकणार आहे.

मानवी नात्यांचा हृदयस्पर्शी प्रवास

सामान्य कुटुंबातील एका बापाची आणि त्याच्या मुलीच्या नात्यावर आधारित या चित्रपटात एका नक्षलवाद्याच्या जीवनातील मानवी पैलू उलगडण्यात आले आहेत. आपल्या लहान मुलीसोबतचे नाते जपत हिंसेऐवजी वेगळा मार्ग शोधणाऱ्या या व्यक्तिरेखेची कथा प्रेक्षकांना विचार करायला लावणारी ठरणार आहे.

निर्मिती आणि कलाकारांची ताकदवान फळी

एस. एस. स्टुडिओ निर्मित आणि एक्सपो प्रेसेंट प्रस्तुत या चित्रपटाची निर्मिती शरद पाटील आणि अंजली पाटील यांनी केली आहे. ‘तुझ्यात जीव रंगला’ फेम हार्दिक जोशी प्रमुख भूमिकेत झळकणार असून, त्यांच्या सोबत हिृतीका पाटील, वीणा जगताप, विजय निकम, सुरेश विश्वकर्मा, अमोल खापरे आणि चेतन चावडा यांच्याही महत्त्वाच्या भूमिका आहेत. आदिवासी लोककलेवर आधारित संगीत हा चित्रपटाचा विशेष आकर्षण ठरणार असून, प्रेक्षकांना अस्सलपणासोबत सिनेमॅटिक अनुभव मिळेल.

मुख्यमंत्री देवेंद्र फडणवीस यांचे मनोगत

या प्रसंगी मुख्यमंत्री देवेंद्र फडणवीस म्हणाले, “सिनेमात परिवर्तनाची कथा सांगण्याची ताकद आहे. ‘अरण्य’ हा अशा लोकांचा प्रवास दाखवतो, ज्यांनी हिंसेऐवजी शिक्षण आणि शांततेचा मार्ग स्वीकारला. हा चित्रपट प्रेक्षकांवर नक्कीच प्रभाव टाकेल, असा मला विश्वास आहे. तसेच ‘एक तिकीट, एक वृक्ष’ ही यांची संकल्पना मला विशेष भावली.”

दिग्दर्शक अमोल दिगांबर करंबे यांचे मत

चित्रपटाचे दिग्दर्शक अमोल दिगांबर करंबे म्हणाले, “मुख्यमंत्री फडणवीस यांच्या हस्ते ‘अरण्य’चे पोस्टर अनावरण होणे हा आमच्या टीमसाठी अभिमानाचा क्षण आहे. हा चित्रपट महाराष्ट्राच्या मुख्य प्रवाहातील सिनेमापर्यंत पोहोचवण्याचा आमचा प्रामाणिक प्रयत्न आहे.”

१९ सप्टेंबरला प्रेक्षकांच्या भेटीला

सामाजिक वास्तवावर आधारित आणि भावनिक नातेसंबंध उलगडणारा ‘अरण्य’ चित्रपट येत्या १९ सप्टेंबर रोजी प्रेक्षकांच्या भेटीला येणार असून, तो सिनेमागृहांमध्ये परिवर्तनाचा संदेश देणारा ठरेल, अशी अपेक्षा व्यक्त होत आहे.
August 25, 2025

प्राईम व्हिडिओवर ‘सॉन्ग्स ऑफ पॅराडाईज’चा हृदयस्पर्शी ट्रेलर प्रदर्शित

प्राईम व्हिडिओने ‘सॉन्ग्स ऑफ पॅराडाईज’ या चित्रपटाचा ट्रेलर प्रदर्शित केला आहे. ही फिल्म स्वप्नं, धैर्य आणि संघर्षाची प्रेरणादायी झलक घेऊन आली असून, एक्सेल एंटरटेनमेंटच्या बॅनरखाली निर्मित आहे. दिग्दर्शक दानिश रेंजू यांनी या चित्रपटाचे लेखन-दिग्दर्शन केले असून निर्मिती शफत काझी आणि दानिश रेंजू यांनी केली आहे.

राज बेगम यांच्या जीवनावर आधारित कथा

‘सॉन्ग्स ऑफ पॅराडाईज’ ही कहाणी काश्मीरच्या पहिल्या महिला पार्श्वगायिका, पद्मश्री पुरस्कार विजेत्या राज बेगम यांच्या जीवनावर आधारित आहे. त्यांच्या संघर्षमय संगीतप्रवासाला वाहिलेली ही एक आदरांजली आहे. या चित्रपटाच्या लेखनात निरंजन अयंगार आणि सुनयना कचरू यांनीही योगदान दिले आहे. चित्रपटाची निर्मिती एक्सेल एंटरटेनमेंट, अ‍ॅपल ट्री पिक्चर्स आणि रेंजू फिल्म्स यांनी संयुक्तपणे केली आहे.

कलाकारांचा प्रभावी अभिनय

या चित्रपटात सबा आझाद, सोनी रझदान, झैन खान दुर्रानी, शीबा चड्ढा, तारुक रैना, शिशिर शर्मा आणि लिलेट दुबे यांसारखे दिग्गज कलाकार झळकणार आहेत. सबा आझाद तरुण नूर बेगमची भूमिका साकारत असून सोनी रझदान वृद्ध नूर बेगमच्या भूमिकेत दिसणार आहेत. अभय सोपोरी यांच्या संगीतात आणि मस्रत उन्न निसा यांच्या गायकीत या चित्रपटाला एक वेगळीच उंची लाभली आहे.

धैर्य आणि स्वातंत्र्याची प्रेरणादायी कहाणी

ट्रेलरमध्ये नूर बेगमच्या संघर्षमय प्रवासाची झलक दाखवली असून सामाजिक बंधनांना तोडून स्वतःच्या स्वप्नांसाठी लढणाऱ्या प्रतिभावान गायिकेची ही कथा आहे. चित्रपटातून काश्मीरच्या समृद्ध संगीत परंपरेचं भावस्पर्शी दर्शन घडतं. सबा आझाद म्हणते, “राज बेगम यांच्यासारख्या दिग्गज गायिकेची भूमिका करणं ही वेगळीच अनुभूती आहे. ही कथा महिलांच्या धैर्याची आणि स्वातंत्र्याची आहे.”

सोनी रझदानही म्हणाल्या, “ही कथा मी स्क्रिप्ट वाचताच मनाला भिडली. ‘सॉन्ग्स ऑफ पॅराडाईज’ काश्मीरच्या संगीत परंपरेला आदरांजली आहे आणि राज बेगम यांच्या असामान्य जीवनाची खरी ओळख प्रेक्षकांपर्यंत पोहोचवते.”

प्रीमियरची तारीख

‘सॉन्ग्स ऑफ पॅराडाईज’ २९ ऑगस्ट २०२५ रोजी भारतासह जगभरातील २०० हून अधिक देशांमध्ये प्राईम व्हिडिओवर एक्सक्लुझिव्ह प्रीमियर होणार आहे.
August 25, 2025

‘वडापाव’मध्ये गोड कुटुंबाची तिखट लव्हस्टोरी

मराठी चित्रपटसृष्टीत कौटुंबिक कथांना नेहमीच प्रेक्षकांनी भरभरून दाद दिली आहे. अगदी तशीच रुचकर मेजवानी घेऊन ‘वडापाव’ हा चित्रपट लवकरच प्रेक्षकांच्या भेटीला येणार आहे. नुकताच प्रदर्शित झालेल्या धमाल टीझरवरून हा सिनेमा एक गोड कुटुंबाची तिखट लव्हस्टोरी असल्याचं स्पष्ट होतंय.

प्रसाद ओक यांच्या अभिनयाची शतकपूर्ती

हा चित्रपट विशेष ठरण्याचं आणखी एक कारण म्हणजे प्रसाद ओक यांच्या अभिनय कारकिर्दीतील हा शंभरावा चित्रपट आहे. दिग्दर्शक आणि अभिनेता अशी दुहेरी भूमिका त्यांनी पहिल्यांदाच या चित्रपटात निभावली आहे. त्यामुळे हा प्रवास त्यांच्यासाठी अधिकच संस्मरणीय ठरणार आहे.

टीझरने वाढवली उत्सुकता

टीझर अत्यंत सुटसुटीत असून त्यात धमाल मनोरंजनासोबतच कौटुंबिक मूल्यांचा सुंदर संगम दाखवण्यात आला आहे. चित्रपटात प्रसाद ओक, अभिनय बेर्डे, गौरी नलावडे, रसिका वेंगुर्लेकर, शाल्व किंजवडेकर, रितिका श्रोत्री, समीर शिरवाडकर, सिद्धार्थ साळवी, अश्विनी देवळे-किन्हीकर आणि सविता प्रभुणे यांच्या प्रमुख भूमिका आहेत.

निर्मिती आणि तांत्रिक टीम

एबी इंटरनॅशनल फिल्म्स एलएलपी, मर्ज एक्सआर स्टुडिओ, व्हिक्टर मुव्हीज लिमिटेड आणि अमेय विनोद खोपकर एंटरटेनमेंट व मोहसीन खान प्रस्तुत, सिनेमॅटिक किडा बॅनर अंतर्गत या चित्रपटाची निर्मिती अमित बस्नेत, प्रजय कामत, स्वाती खोपकर आणि निनाद नंदकुमार बत्तीन यांनी केली आहे. सहनिर्माते तबरेझ एम. पटेल आणि सानीस खाकुरेल असून छायालेखन संजय मेमाणे यांनी केले आहे. कथा-संवाद सिद्धार्थ साळवी यांनी लिहिले आहेत.

दिग्दर्शक प्रसाद ओक यांचे मनोगत

दिग्दर्शक प्रसाद ओक म्हणाले, “‘वडापाव’ ही अशी गोष्ट आहे जी लहानांपासून मोठ्यांपर्यंत सगळ्यांना आवडेल. कुटुंब, नात्यांतील गोडवा-तिखटपणा आणि त्यातून मिळणारे भावनिक व विनोदी अनुभव यांचा हा मिलाफ प्रेक्षकांना नक्की भावेल.”

निर्मात्यांचे अनुभव आणि अपेक्षा

निर्माते अमेय खोपकर म्हणाले, “मराठी प्रेक्षक कौटुंबिक कथांवर नेहमी प्रेम करतात. ‘वडापाव’ त्यांच्या मनात नात्यांची खरी चव रुजवेल. टीझरवरूनच प्रेक्षकांच्या चेहऱ्यावर हास्य आलं, हेच आमचं यश आहे.”

निर्माते निनाद बत्तीन म्हणाले, “जसा वडापावचा आस्वाद तीन पिढ्या घेतात, तसाच आमचा चित्रपट ‘वडापाव’ तीन पिढ्यांची गोष्ट सांगतो. हा पूर्ण कुटुंबाने पाहावा, असा चित्रपट आहे.”

निर्माते अमित बस्नेत म्हणाले, “मी नेपाळचा असूनही मराठी संस्कृती, खाद्यपदार्थ, साहित्य, कला यांबद्दल मला कायम आकर्षण वाटतं. वडापाव हा खाद्यपदार्थ भावनांशी जोडलेला आहे. जीवनात आपुलकीसोबत थोडा तिखटपणा हवाच, नाहीतर नातं फिकं होतं. हाच समतोल आमच्या चित्रपटात आहे.”

कौटुंबिक सिनेमा देणार खास मेजवानी

‘वडापाव’ हा सिनेमा प्रेक्षकांना हसवणार, रडवणार आणि विचार करायला लावणार अशी खात्री चित्रपटाच्या टीमने व्यक्त केली आहे. ओळखीच्या, पण नव्या चवीच्या या कथेची मेजवानी प्रेक्षकांना मोठ्या पडद्यावर लवकरच मिळणार आहे.
August 25, 2025

सुप्रसिद्ध अभिनेता आदिनाथ कोठारेची मालिकाविश्वात दमदार एण्ट्री

सिनेमे आणि वेबसीरिजच्या माध्यमातून प्रेक्षकांच्या मनात घर करणारा सुप्रसिद्ध अभिनेता आणि निर्माता आदिनाथ कोठारे आता छोट्या पडद्यावर दमदार एण्ट्री घेण्यासाठी सज्ज झाला आहे. स्टार प्रवाहवरील ‘नशिबवान’ या मालिकेतून तो पहिल्यांदाच दैनंदिन मालिकेत दिसणार असून, रुद्रप्रताप घोरपडेच्या भूमिकेतून प्रेक्षकांच्या भेटीस येणार आहे.

रुद्रप्रताप घोरपडेची व्यक्तिरेखा

रुद्रप्रताप हा नागेश्वर घोरपडेचा एकुलता एक मुलगा आहे. दिसायला रुबाबदार, जणू एखादा राजकुमारच. स्वभावाने मात्र साधा, मनमिळावू आणि सर्वांची मदत करणारा. वडील नागेश्वर जिथे कडक आणि बिझनेसला प्राधान्य देणारे आहेत, तिथे रुद्रप्रतापने मात्र गावात राहून लोकांच्या सेवेसाठी आपलं आयुष्य अर्पण करण्याचा निर्णय घेतला आहे.

आदिनाथ कोठारेसाठी ड्रीमरोल

या भूमिकेविषयी बोलताना आदिनाथ म्हणाला, “ही माझी पहिली दैनंदिन मालिका आहे. गेली अनेक वर्ष मालिका करण्याचा विचार होता, आणि नशिबाने ‘नशिबवान’ मालिकेच्या निमित्ताने हा योग जुळून आला. टीव्ही हे प्रत्येकाचं आवडतं माध्यम आहे, मालिकेमुळे तुम्ही घराघरात पोहोचता, कुटुंबाचा भाग होता. ‘नशिबवान’ची कथा खूप सुंदर आहे आणि रुद्रप्रताप या व्यक्तिरेखेत अनेक पदर आहेत, जे हळूहळू उलगडतील.”

स्टार प्रवाहसोबतचे नातं

आदिनाथने पुढे सांगितले की, “स्टार प्रवाहसोबतचं माझं नातं खूप जुनं आहे. निर्माता म्हणून कोठारे व्हिजनची पहिली मालिका स्टार प्रवाहवरच आली होती. त्यानंतर अनेक सुपरहिट प्रोजेक्ट्स आम्ही सोबत केले. आता पुन्हा एकदा नवा प्रवास महाराष्ट्राच्या नंबर वन वाहिनीसोबत सुरू होतोय याचा अतिशय आनंद आहे.”

प्रसारणाची वेळ आणि अपेक्षा

‘नशिबवान’ मालिकेत दिग्गज कलाकारांची फौज असून गणेशोत्सवाच्या उत्साही वातावरणात प्रेक्षकांसाठी ही एक खास भेट ठरणार आहे. आदिनाथला खात्री आहे की बाप्पाच्या आशीर्वादाने ही मालिका देखील प्रेक्षकांच्या मनात नक्की घर करेल. ‘नशिबवान’ १५ सप्टेंबरपासून रात्री ९ वाजता फक्त स्टार प्रवाहवर प्रसारित होणार आहे.
August 24, 2025

The Chase Begins: Ek Chatur Naar Trailer to Be Unveiled Tomorrow

Divya Khossla is all set to take the spotlight with her much-awaited film Ek Chatur Naar. Building excitement, the actress revealed a striking new poster of the film on Instagram today, while also announcing that the official trailer will drop tomorrow.

Divya Khossla’s Big Reveal on Social Media

Sharing the poster, Divya wrote, “Kal, har nazar rukegi… aur rukegi sirf Chatur pe. #EkChaturNaar Trailer Premiering Tomorrow. Hosiyari Shuru In Cinemas from 12th Sept.” The cryptic yet intriguing caption has already set social media abuzz, with fans eagerly awaiting the teaser of what promises to be a rollercoaster ride.

Poster Teases Mind Games and Twists

The newly released poster showcases a tense face-off between Divya Khossla and Neil Nitin Mukesh. The intensity hints at a narrative packed with clever mind games, suspense, and unexpected turns. The film’s tagline, “Hoshiyari Shuru,” further fuels anticipation for a unique comedy-thriller that blends wit and drama in equal measure.

A Promising Mix of Humour and Suspense

With its clever cocktail of sharp humour, thrilling suspense, and unexpected drama, Ek Chatur Naar is shaping up to be one of the most exciting entertainers of 2025. The trailer is expected to give audiences a deeper glimpse into the playful yet high-stakes world the film is set to unravel.

Production and Release Details

Presented by T-Series and produced under the Merry Go Round Studios banner, Ek Chatur Naar is directed by Umesh Shukla and produced by Umesh Shukla, Ashish Wagh, and Zeeshan Ahmad. Starring Divya Khossla and Neil Nitin Mukesh, the film is scheduled to release in cinemas on 12th September 2025.