‘ब्राह्मण सेवा मंडळा’चा शतकमहोत्सवी गणेशोत्सव

‘ब्राह्मण सेवा मंडळा’चा शतकमहोत्सवी श्री गणेशोत्सव २०२५ हा भक्तिभावासोबतच सामाजिक भान आणि राष्ट्रभक्तीचा संदेश देणारा ठरणार आहे. या विशेष पर्वात माजी लेफ्टनंट जनरल विनायक पाटणकर (नि.) आणि माजी लेफ्टनंट जनरल सुदर्शन श्रीकांत हसबनीस (नि.) यांची प्रकट मुलाखत आयोजित करण्यात आली आहे. ज्येष्ठ पत्रकार व लेखक डॉ. उदय निरगुडकर या दोन्ही मान्यवरांना बोलतं करणार आहेत.

‘ऑपरेशन सिंदूर – नव्या भारताचा सामर्थ्याविष्कार’ या विषयावर विशेष संवाद

ही रोचक मुलाखत दि. ३० ऑगस्ट २०२५ रोजी रात्री ८ वाजता, ब्राह्मण सेवा मंडळ, भवानी शंकर रोड, दादर (प), मुंबई येथे होणार आहे. कार्यक्रम सर्वांसाठी विनामूल्य असून अधिकाधिक नागरिकांनी उपस्थित राहावे, असे आवाहन आयोजक मंडळाने केले आहे.

ले. ज. विनायक पाटणकर (नि.) यांचा लष्करी प्रवास

जवळपास चार दशके भारतीय सेनेत कार्यरत असताना त्यांनी काश्मीर, ईशान्य भारत, आर्मी एव्हिएशन आणि दिल्ली मुख्यालय येथे महत्त्वपूर्ण जबाबदाऱ्या पार पाडल्या. उत्तम युद्ध सेवा पदक आणि विशिष्ट सेवा पदक या सन्मानांनी त्यांना गौरविण्यात आले आहे. निवृत्तीनंतरही ते औरंगाबाद येथील सैनिकी सेवापूर्व शिक्षण संस्था तसेच सरहद आणि असीम या संस्थांद्वारे राष्ट्रीय एकात्मतेसाठी कार्यरत आहेत.

ले. ज. सुदर्शन श्रीकांत हसबनीस (नि.) यांची कारकीर्द

जानेवारी २०२० मध्ये डेप्युटी चीफ ऑफ आर्मी स्टाफ या पदावरून निवृत्त झालेले हसबनीस यांनी कारगिल युद्धातील ऑपरेशन विजय, ऑपरेशन पराक्रम तसेच जम्मू-काश्मीरमधील दहशतवादविरोधी कारवायांमध्ये उल्लेखनीय कामगिरी केली आहे. परम विशिष्ट सेवा पदक (PVSM) आणि विशिष्ट सेवा पदक (VSM) यांनी ते सन्मानित झाले असून सध्या ते पर्यावरण संरक्षणासाठी काम करणाऱ्या विविध संस्थांशी जोडलेले आहेत.

डॉ. उदय निरगुडकर यांचे बहुआयामी व्यक्तिमत्त्व

पत्रकारिता, व्यवस्थापन आणि सामाजिक क्षेत्रात भरीव कामगिरी करणारे डॉ. उदय निरगुडकर यांनी पुणे विद्यापीठातून मार्केटिंग मॅनेजमेंट विषयात डॉक्टरेट मिळवली आहे. टाटा, गोदरेज यांसारख्या आघाडीच्या कंपन्यांमध्ये वरिष्ठ पदांवर त्यांनी काम केले आहे. लोकल ते ग्लोबल, All About Winning Indian Elections यांसारखी पुस्तके तसेच C.E.O. ही कादंबरी त्यांनी लिहिली आहे. राष्ट्रभक्ती जपणारे उपक्रम राबविण्यात त्यांचा सातत्याने सहभाग असतो.

तेजश्री प्रधानची खास आठवण

‘वीण दोघातली ही तुटेना’ मालिकेतील स्वानंदी म्हणजेच अभिनेत्री तेजश्री प्रधान हिने ह्यावर्षीचा गणेशोत्सव कसा आणि कुठे साजरा करणार याबद्दल सांगितले. “आमच्या घरचा गणपती हा फिरता असतो. या वर्षी माझ्या सख्या काकाच्या घरी म्हणजे गोरेगावला गणपती आहे आणि आम्ही सर्व तिकडे गणेशोत्सव साजरा करणार आहोत. माझ्या जन्मापासून गणपती स्थापना प्रधानांच्या घरी होत आली आहे. गणेशोत्सवात मला सर्वात जास्त मोदक आवडतात. डायट असो वा काही असो, मोदक खाणं टाळणं माझ्यासाठी खूप अवघड आहे. मी उपाशी राहीन पण मोदक नक्की खाईन. बालपणीच्या खास आठवणी आहेत जिथे मी सोसायटी कार्यक्रमात सहभागी होऊन माझ्या कला सादर केल्या आहेत. बाप्पाच्या समोर केलेली ती कला त्यांच्या आशिर्वादानेच मला आज इथवर घेऊन आली आहे.”

शिवानी सोनारचा पहिला गणेशोत्सव

‘तारिणी’ मालिकेतील तारिणी म्हणजेच अभिनेत्री शिवानी सोनार ह्या वर्षी लग्नानंतरचा पहिला गणेशोत्सव साजरा करणार आहे. शूटिंग संपवून ती पुण्याला माहेरी पोहोचली आहे. शिवानीने उत्साह व्यक्त करताना सांगितले— “३६५ दिवसांपैकी गणपती उत्सवाचे १० दिवस माझ्यासाठी खूप खास असतात. या वर्षीचा गणेशोत्सव माझ्यासाठी अधिक खास आहे, कारण लग्नानंतरचा हा पहिला उत्सव आहे. माझ्या माहेरी १० दिवसांचा गणपती असतो, पण माझ्या सासरी इतके वर्ष दीड दिवसाचा गणपती होत असे. यावर्षापासून माझ्या सासूबाईंनी ५ दिवसांचा गणपती ठेवण्याचा निर्णय घेतला आहे. त्यामुळे माहेरी आणि सासरी दोन्हीकडे गणपती असणार असल्याने थोडी तारांबळ उडणार आहे. तरीही बाप्पाच्या आशिर्वादाने कधी काम थांबलं नाही. मी दरवर्षी मानाच्या पाच गणपतीचे दर्शन घेतेच आणि बाप्पाची आरास करण्याचा मला प्रचंड आनंद मिळतो. गणेशोत्सवातलं ते वातावरण खूपच सुंदर असतं.”

झी मराठीवरील मालिकांची वेळ

तेव्हा बघायला विसरू नका ‘वीण दोघातली ही तुटेना’ सोम–शनि संध्या ७:३० वा. आणि ‘तारिणी’ सोम–शुक्र ९:३० वा. सदैव तुमच्या झी मराठीवर.