तिसऱ्या आठवड्यातही बॉक्स ऑफिसवर दिमाखदार घोडदौड कायम

मराठी, हिंदी आणि हॉलिवूडमधील बहुचर्चित चित्रपट प्रदर्शित असतानाही ‘घबाडकुंड’ या रहस्य, थरार आणि भयपटाने प्रेक्षकांची पहिली पसंती मिळवत बॉक्स ऑफिसवर दमदार कामगिरी नोंदवली आहे. वेगळ्या आशयामुळे या चित्रपटाला सर्व स्तरांतील प्रेक्षकांकडून उत्स्फूर्त प्रतिसाद मिळत असून, अनेक चित्रपटगृहांमध्ये हाऊसफुलचे फलक झळकत आहेत.

मोठ्या स्पर्धेतही ‘घबाडकुंड’ची वेगळी छाप

‘राजा शिवाजी’, ‘तुंबाडची मंजुळा’, ‘देऊळ बंद २’ या मराठी चित्रपटांसोबतच बॉलिवूडमधील ‘कॉकटेल’, ‘में वापस आऊंगा’, ‘वेलकम टू द जंगल’ आणि हॉलिवूडमधील ‘द ओडिसी’, ‘स्पायडर-मॅन’ तसेच ‘ऑब्सेशन’ यांसारख्या मोठ्या चित्रपटांची स्पर्धा असतानाही **’घबाडकुंड’**ने स्वतःचे वेगळे स्थान निर्माण केले आहे. दमदार कथा आणि प्रभावी सादरीकरणाच्या जोरावर चित्रपटाने प्रेक्षकांची विशेष पसंती मिळवली आहे.

दुसऱ्या आठवड्याच्या अखेरीस ८.१० कोटींचा टप्पा

दुसऱ्या आठवड्याच्या अखेरीस **’घबाडकुंड’**ने बॉक्स ऑफिसवर तब्बल ८.१० कोटी रुपयांची कमाई करत यशाचा आणखी एक महत्त्वाचा टप्पा गाठला आहे. आता तिसऱ्या आठवड्यातही चित्रपटाची यशस्वी वाटचाल सुरू असून, प्रेक्षकांचा प्रतिसाद दिवसेंदिवस अधिक मजबूत होताना दिसत आहे.

प्रभावी कथानक आणि तांत्रिक बाजूचं कौतुक

चित्रपटातील प्रभावी लेखन, दिग्दर्शन, कलाकारांचा दमदार अभिनय, उत्कंठावर्धक संवाद, पार्श्वसंगीत, उत्कृष्ट छायांकन आणि तांत्रिक मांडणी या सर्वच बाबींचे प्रेक्षकांकडून भरभरून कौतुक होत आहे. त्यामुळे सोशल मीडियावरही **’घबाडकुंड’**ची जोरदार चर्चा रंगली असून, सकारात्मक प्रतिक्रिया आणि वर्ड ऑफ माऊथमुळे नव्या प्रेक्षकांची उत्सुकता सातत्याने वाढत आहे.

वाढले शो, आगाऊ बुकिंगलाही प्रतिसाद

पहिल्या आठवड्यापासून मिळालेल्या सकारात्मक प्रतिसादानंतर अनेक चित्रपटगृहांमध्ये चित्रपटाचे शो वाढवण्यात आले आहेत. कुटुंबासह, मित्रमंडळींसोबत आणि ग्रुप बुकिंगद्वारे मोठ्या संख्येने प्रेक्षक चित्रपटगृहांकडे वळत आहेत. विविध तिकीट बुकिंग प्लॅटफॉर्मवरही चित्रपटाला उत्कृष्ट रेटिंग मिळत असून, यशाची ही घोडदौड कायम राहण्याची चिन्हे दिसत आहेत.

मराठी चित्रपटांवरील प्रेक्षकांचा वाढता विश्वास

‘आयकॉन द स्टाईल’ प्रस्तुत, निर्माते डॉ. रसिक कदम आणि दिग्दर्शक प्रीतम एस. के. पाटील यांचा ‘घबाडकुंड’ हा चित्रपट आजही प्रेक्षकांच्या पसंतीस उतरत आहे. रहस्य, थरार आणि भयाचा वेगळा अनुभव देणाऱ्या या चित्रपटाला मिळणारा प्रतिसाद हा केवळ एका चित्रपटाच्या यशापुरता मर्यादित नसून, दर्जेदार मराठी चित्रपटांवर प्रेक्षकांचा वाढता विश्वास अधोरेखित करणारा आहे. तिसऱ्या आठवड्यातही **’घबाडकुंड’**ची यशस्वी घोडदौड कायम राहील, असा विश्वास चित्रपटाच्या संपूर्ण टीमने व्यक्त केला आहे.

चित्रपटसृष्टी, उद्योग, समाजकारण आणि राजकीय क्षेत्रातील दिग्गजांची उपस्थिती

तरुणाईचा संघर्ष, शिक्षण व्यवस्थेतील वास्तव आणि सकारात्मक सामाजिक परिवर्तनाचा संदेश देणारा आगामी मराठी चित्रपट ‘आऊट ऑफ सिलॅबस – पुस्तकांच्या पलीकडे’ याचा भव्य विशेष प्रीमियर शो नुकताच दिमाखात पार पडला. या सोहळ्याकडे चित्रपटसृष्टीसह सामाजिक, राजकीय, सांस्कृतिक आणि उद्योग क्षेत्राचे विशेष लक्ष लागले होते. चित्रपटाची संपूर्ण टीम तसेच विविध क्षेत्रांतील मान्यवरांनी उपस्थित राहून चित्रपटाला शुभेच्छा दिल्या.

प्रेरणादायी आशय असलेला चित्रपट

Adu-Tishu Production & Music प्रस्तुत या चित्रपटाची निर्मिती प्रसिद्ध सामाजिक कार्यकर्ते आणि चित्रपट निर्माते डॉ. सुगत ग्यानेश्वर वाघमारे यांनी केली असून, आमदार डॉ. संजय कुटे हे चित्रपटाचे सहनिर्माते आहेत. चित्रपटाचे दिग्दर्शन नवीन देशबोनिया यांनी केले असून, कथा आणि लेखन अनिकेत रामचंद्र कोरडे यांचे आहे. संकलनाची जबाबदारी अनिल विठ्ठल थोरात यांनी सांभाळली आहे.

पुस्तकांच्या चौकटीपलीकडे जाऊन आयुष्याकडे पाहण्याचा नवा दृष्टिकोन देणारा हा चित्रपट तरुण पिढीला प्रेरणा देणारा ठरेल, असा विश्वास निर्मात्यांनी व्यक्त केला आहे.

कलाकारांनी शेअर केले चित्रीकरणाचे अनुभव

या खास प्रीमियर सोहळ्याला चित्रपटातील अजिंक्य राऊत, अद्वयी वाघमारे, शेषपाल गनवीर, अभिजित रामचंद्र आणि सानिका थोरसकर हे कलाकार उपस्थित होते. यावेळी त्यांनी प्रेक्षकांशी संवाद साधत चित्रपटाच्या निर्मितीमागील अनुभव आणि आठवणी शेअर केल्या.

विविध क्षेत्रांतील मान्यवरांची उपस्थिती

या विशेष सोहळ्याला National Stock Exchangeचे Managing Director आणि CEO आशिष चौहान यांची विशेष उपस्थिती लाभली. तसेच आमदार डॉ. संजय कुटे (जळगाव जामोद), रणधीर सावरकर (अकोला पूर्व), हरीश पिंपळे (मूर्तीजापूर), नारायण कुचे (बदनापूर), किसन वानखडे (उमरखेड), वसंत खंडेलवाल (विधान परिषद सदस्य), हेमंत पाटील (नांदेड) आणि श्वेता महाले (चिखली) यांच्यासह चित्रपटसृष्टी, राजकारण, समाजकारण, उद्योग आणि विविध क्षेत्रांतील अनेक मान्यवर या सोहळ्याला उपस्थित होते. त्यामुळे हा प्रीमियर एक भव्य, दिमाखदार आणि संस्मरणीय सोहळा ठरला.

प्रदर्शनापूर्वीच चित्रपटाची जोरदार चर्चा

समाजाभिमुख आशय, प्रेरणादायी कथा आणि तरुणांना नवी दिशा देणारा संदेश यामुळे ‘आऊट ऑफ सिलॅबस – पुस्तकांच्या पलीकडे’ हा चित्रपट प्रदर्शनापूर्वीच चर्चेचा विषय ठरला आहे. प्रीमियरला मिळालेला उत्स्फूर्त प्रतिसाद आणि मान्यवरांची उपस्थिती यामुळे चित्रपटाबद्दल प्रेक्षकांमध्ये मोठी उत्सुकता निर्माण झाली आहे. तरुणाईसह सर्व वयोगटातील प्रेक्षकांच्या मनात हा चित्रपट नक्कीच स्थान निर्माण करेल, असा विश्वास चित्रपटाच्या संपूर्ण टीमने व्यक्त केला.

१९७१ आणि २०२६ मधील दोन प्रेमकहाण्यांचा भावस्पर्शी प्रवास १० जुलैपासून मोठ्या पडद्यावर

आजवर अनेक प्रेमकथा पडद्यावर आल्या, मात्र ‘तुला पाहता’ हा चित्रपट एका नव्हे तर दोन वेगवेगळ्या काळातील प्रेमकहाण्या एकाच कथेतून उलगडणार आहे. १९७१ आणि २०२६ या दोन कालखंडांतील दोन प्रेमप्रवास प्रेक्षकांना या चित्रपटातून अनुभवायला मिळणार आहेत. नुकताच या चित्रपटाचा ट्रेलर मुंबईमध्ये सुप्रसिद्ध अभिनेते मुश्ताफ खान यांच्या हस्ते मोठ्या दिमाखात प्रदर्शित करण्यात आला. या सोहळ्याला सिनेपोलिसचे हेड ऑफ डिपार्टमेंट – प्रोग्रामिंग अँड डिस्ट्रिब्युशन मयांक श्रॉफ, अभिनेते सुशांत शेलार आणि चित्रपटाची संपूर्ण टीम उपस्थित होती.

१० जुलैला मराठी आणि हिंदी भाषेत जागतिक प्रदर्शित

ब्रेव्ह व्हील प्रॉडक्शन्सच्या मयुरा प्रधान यांनी या चित्रपटाची निर्मिती केली असून लेखन आणि दिग्दर्शनाची जबाबदारीही त्यांनीच सांभाळली आहे. पहिल्याच चित्रपटात निर्माती, लेखिका आणि दिग्दर्शिका अशा तिहेरी भूमिकेत त्यांनी काम केले आहे. १० जुलै रोजी हा चित्रपट मराठी आणि हिंदी भाषांमध्ये जगभर प्रदर्शित होणार आहे.

तगडी तांत्रिक बाजू आणि दमदार कलाकारांची फळी

चित्रपटाचे छायांकन पुष्कर झोटिंग, ध्वनिआरेखन रोहित प्रधान, संगीत दिग्दर्शन रोहन प्रधान आणि रोहन गोखले, तर नृत्य दिग्दर्शन दीपाली विचारे यांनी केले आहे.

चित्रपटात ज्येष्ठ अभिनेते सतीश पुळेकर, ज्येष्ठ अभिनेत्री इला भाटे यांच्यासह नचिकेत लेले, मानसी पाटील, निशिगंधा वाड, आनंद काळे, दीपाली विचारे, पल्लवी अजय, स्वप्नील परजाणे आणि आकाश शिंदे यांच्या प्रमुख भूमिका आहेत. नव्या आणि अनुभवी कलाकारांच्या अभिनयाचा सुरेख संगम या चित्रपटात पाहायला मिळणार आहे.

‘चित्रपटाचा ट्रेलर मनाला भावणारा’ – मुश्ताफ खान

ट्रेलर लाँच सोहळ्यात बोलताना अभिनेते मुश्ताफ खान म्हणाले, “‘तुला पाहता’ हे चित्रपटाचं शीर्षक मला खूप आवडलं. चित्रपटाचा ट्रेलर अतिशय सुंदर आणि मनाला भावणारा आहे. या चित्रपटाला माझ्याकडून मनःपूर्वक शुभेच्छा.”

दोन काळ… दोन प्रेमकथा… एक भावनिक प्रवास

चित्रपटाच्या कथानकात ऐन तारुण्यात प्रेमात आकंठ बुडालेला एक तरुण अचानक आपल्या प्रेयसीच्या आयुष्यातून निघून जातो. अनेक वर्षांनंतर तो निवृत्त लष्करी अधिकारी म्हणून पुन्हा तिच्यासमोर उभा राहतो. त्याच्या अचानक परतण्याने तिच्या आयुष्यात कोणते भावनिक वादळ निर्माण होते, याची हळवी कहाणी या चित्रपटात पाहायला मिळणार आहे.

याचबरोबर २०२६ मधील एका तरुण जोडप्याची आधुनिक प्रेमकथाही चित्रपटात समांतरपणे उलगडते. प्रेम, नातेसंबंध, एकत्र कुटुंब व्यवस्था, आठवणी आणि आयुष्याचे बदलते प्रवाह अशा अनेक भावनिक पैलूंना स्पर्श करणारा हा चित्रपट प्रेक्षकांना एक वेगळा अनुभव देणार आहे.

टीझर आणि गाण्यांनंतर ट्रेलरलाही उत्स्फूर्त प्रतिसाद

चित्रपटाच्या टीझरला आणि गाण्यांना सोशल मीडियावर प्रेक्षकांचा भरभरून प्रतिसाद मिळाला होता. आता ट्रेलर प्रदर्शित झाल्यानंतर चित्रपटाविषयीची उत्सुकता आणखी वाढली आहे. संवेदनशील लेखन, मनाला भिडणारं संगीत, प्रभावी अभिनय आणि भावनिक कथानकामुळे ‘तुला पाहता’ हा चित्रपट प्रेक्षकांच्या मनात विशेष स्थान निर्माण करेल, असा विश्वास चित्रपटाच्या टीमने व्यक्त केला आहे.

१० जुलैपासून मराठी आणि हिंदी भाषांमध्ये जगभर प्रदर्शित होणारा ‘तुला पाहता’ हा चित्रपट प्रेक्षकांना प्रेम, नाती आणि आठवणींचा एक सुंदर भावविश्व अनुभवायला देणार आहे.

समर-स्वानंदीच्या प्रेमाला मिळणार नवं वळण, तर ‘सनई चौघडे’मध्ये संकटाची चाहूल

पावसाळ्याच्या आगमनासोबत महाराष्ट्रात सण-उत्सवांची चाहूल लागते. त्यातील सर्वात महत्त्वाचा सण म्हणजे वटपौर्णिमा. विवाहित महिला पतीच्या दीर्घायुष्य, उत्तम आरोग्य आणि सुखी संसारासाठी वडाच्या झाडाची पूजा करतात. यंदा झी मराठीवरील ‘वीण दोघांतली ही तुटेना’ आणि ‘सनई चौघडे’ या मालिकांमध्येही वटपौर्णिमेचा सोहळा विशेष पद्धतीने रंगणार असून, प्रेम, भावना आणि अनपेक्षित घडामोडींची मेजवानी प्रेक्षकांना पाहायला मिळणार आहे.

समर करणार प्रेमाची कबुली?

‘वीण दोघांतली ही तुटेना’ मालिकेत समर आणि स्वानंदीच्या नात्यात आता नवं वळण येणार आहे. समर स्वानंदीला मोकळ्या माळरानावर फिरायला घेऊन जातो आणि त्यानंतर एका प्लांट नर्सरीमध्ये तिच्यासाठी खास सरप्राईज ठेवतो. सुंदर फुलं आणि रोपांच्या मदतीने त्याने ‘I Love You’ असा संदेश तयार केलेला असतो. आपल्या मनातील भावना व्यक्त करत समर स्वानंदीच्या उत्तराची आतुरतेने वाट पाहत असतो.

दोघे मिळून वृक्षारोपणही करतात. मात्र स्वानंदीने अद्याप प्रेमाची कबुली दिलेली नसल्यामुळे समर तिला म्हणतो, “जर आपल्या नात्यात तसं काही नसेल, तर वटपौर्णिमेची पूजा करू नका.” त्यामुळे वटपौर्णिमेच्या दिवशी समर येणार की नाही, याची चिंता स्वानंदीला सतावत असते. पण तिला एक सुखद धक्का बसतो. समर आधीच वडाच्या झाडाजवळ उपस्थित राहून इतर महिलांसोबत पूजा करत असतो. या क्षणानंतर स्वानंदी आपल्या प्रेमाची कबुली देणार का? दोघांच्या नात्याची नवी सुरुवात होणार का? याची उत्सुकता आता शिगेला पोहोचली आहे.

पावसात शूटिंगचा अविस्मरणीय अनुभव – तेजश्री प्रधान

या विशेष भागाच्या चित्रीकरणाविषयी अभिनेत्री तेजश्री प्रधान म्हणाली, “प्रेक्षक ज्या प्रसंगाची आतुरतेने वाट पाहत होते, त्याच वेळी मुंबईत पहिला पाऊसही आला. त्यामुळे वटपौर्णिमेचा प्रसंग शूट करताना वातावरण अधिकच सुंदर झालं. गेले काही महिने प्रचंड उष्णतेत शूटिंग सुरू होतं. त्यामुळे पावसाचा गारवा कलाकारांसोबतच तंत्रज्ञांसाठीही खूप दिलासादायक होता.”

ती पुढे म्हणाली, “पावसात शूटिंग करताना चिखल, साड्या, इलेक्ट्रिकल उपकरणं अशा अनेक अडचणी असतात. पण यावेळी प्रत्येकजण पावसाचा आनंद घेत काम करत होता. समर आणि स्वानंदीच्या नात्याचा हा महत्त्वाचा टप्पा प्रेक्षकांच्या मनालाही नक्कीच भिडेल.”

‘सनई चौघडे’मध्ये वटपौर्णिमेसोबत संकटाची चाहूल

दुसरीकडे ‘सनई चौघडे’ मालिकेतही वटपौर्णिमेचा उत्सव आनंदात साजरा होताना दिसणार आहे. मात्र मालिकेच्या परंपरेप्रमाणे सणासुदीच्या वातावरणात एक मोठं संकटही येणार आहे. जय खानोलकर अडचणीत सापडणार असून, शर्वरी त्याला त्या संकटातून कशी बाहेर काढते, हे पाहणं रंजक ठरणार आहे.

पावसाळ्यात शूटिंग म्हणजे मोठं आव्हान – जुई गोगरी

आसावरीची भूमिका साकारणारी जुई गोगरी म्हणाली, “पावसाळ्यात शूटिंग करणं खरंच खूप आव्हानात्मक असतं. वसईहून ठाण्याला सेटवर पोहोचण्यासाठी ट्रेन, कॅब आणि वाहतुकीच्या अनेक अडचणींचा सामना करावा लागतो. तरीही पावसात शूटिंग करण्याची एक वेगळीच मजा असते.”

ती पुढे म्हणाली, “पावसात रोमँटिक प्रसंग खूप सुंदर दिसतात, पण त्यामागे संपूर्ण टीमचे मोठे कष्ट असतात. मेकअप, केस, साड्या, इलेक्ट्रिकल उपकरणं आणि सततचा पाऊस यामध्ये प्रत्येक गोष्ट सांभाळावी लागते. आमच्या संपूर्ण टीमने एकमेकांची खूप काळजी घेतली. त्यामुळे हा अनुभव कायम लक्षात राहील.”

प्रेम, भावना आणि परंपरेचा सुंदर संगम

समर-स्वानंदी आणि आसावरी-गौतम यांच्या नात्यातील प्रेमळ क्षण, वटपौर्णिमेचा पारंपरिक सोहळा आणि पावसाळ्याची मनमोहक पार्श्वभूमी यामुळे झी मराठीवरील हे विशेष भाग प्रेक्षकांसाठी खास ठरणार आहेत.

पाहायला विसरू नका ‘वीण दोघांतली ही तुटेना’ दररोज सायंकाळी ७.३० वाजता आणि ‘सनई चौघडे’ रात्री ८.३० वाजता, फक्त झी मराठीवर.

२४ जूनपासून मराठी ZEE5वर होणार प्रदर्शित

प्रेम, महत्त्वाकांक्षा, सत्तासंबंध आणि आत्मसन्मान यांचा वेध घेणारी ‘प्रेमाला कंडिशन्स अप्लाय’ ही नवी ओरिजिनल वेब सीरिज प्रेक्षकांच्या भेटीला येत आहे. मराठी ZEE5ने या सीरिजची घोषणा केली असून अभिनेता सिद्धार्थ मेनन आणि जान्हवी उदय प्रमुख भूमिकांमध्ये झळकणार आहेत. दिग्दर्शक गौरव पत्की यांनी दिग्दर्शित केलेली ही सीरिज २४ जून २०२६ रोजी मराठी ZEE5वर प्रदर्शित होणार आहे.

कॉर्पोरेट जगतात फुलणाऱ्या प्रेमाची कथा

‘प्रेमाला कंडिशन्स अप्लाय’ ही कथा अनन्या आणि ऋषी या दोन महत्त्वाकांक्षी तरुण प्रोफेशनल्सभोवती फिरते. कामाच्या ठिकाणी झालेली ओळख हळूहळू मैत्रीत आणि त्यानंतर प्रेमात बदलते. समान स्वप्ने, एकमेकांविषयीचे आकर्षण आणि भावनिक जवळीक यामुळे ते प्रेमात पडतात. मात्र, ज्या कॉर्पोरेट वातावरणात व्यावसायिक मर्यादा आणि पदानुक्रम महत्त्वाचा असतो, तिथे हे नातं टिकवणं त्यांच्यासाठी मोठं आव्हान ठरतं.

कॉफी ब्रेकपासून भावनिक नात्यापर्यंतचा प्रवास

कुणाच्याही नकळत एकमेकांकडे पाहणे, कॉफी ब्रेकमधील खास क्षण, ऑफिसमधील लांबणाऱ्या गप्पा आणि रात्री उशिरापर्यंत चालणारे फोन कॉल्स यामुळे अनन्या आणि ऋषी यांच्यात एक खास नातं निर्माण होतं. मात्र दिवसेंदिवस हे प्रेम लपवणं कठीण होत जातं. कामाच्या ठिकाणच्या अपेक्षा, वैयक्तिक महत्त्वाकांक्षा आणि व्यावसायिक जबाबदाऱ्या त्यांच्या नात्याची कठोर परीक्षा घेतात.

रोमान्ससोबत वास्तवाचाही वेध

वेगवान कॉर्पोरेट जीवनशैली, आधुनिक आयुष्यातील ताणतणाव आणि नात्यांमधील गुंतागुंत यांची वास्तववादी मांडणी या सीरिजमध्ये करण्यात आली आहे. प्रेमातील रोमांच, भावनिक असुरक्षितता, आत्मशोध आणि वैयक्तिक आनंदासाठी घ्यावे लागणारे कठोर निर्णय या सर्व गोष्टी कथानकाचा भाग आहेत. प्रेमासाठी मोजावी लागणारी किंमत स्वीकारण्यास अनन्या आणि ऋषी तयार आहेत का, हा प्रश्न सीरिजमध्ये उलगडत जातो.

ही प्रेमकथा वेगळी का आहे?

‘प्रेमाला कंडिशन्स अप्लाय’ ही केवळ प्रेमकथा नाही, तर दोन व्यक्तींच्या आयुष्यातील भावनिक आणि व्यावसायिक संघर्षाची कथा आहे. अनन्या आणि ऋषी यांच्यातील सहज, नैसर्गिक आणि हळूहळू फुलणारी केमिस्ट्री ही या सीरिजची सर्वात मोठी जमेची बाजू आहे. प्रेम आणि करिअर यांच्यातील संघर्ष, आत्मसन्मान आणि वैयक्तिक मूल्ये यांच्यात समतोल साधण्याचा प्रयत्न या कथेला वेगळेपण देतो.

‘आजच्या पिढीशी जोडणारी कथा’ – हेमा व्ही. आर.

झी मराठीच्या चीफ चॅनल ऑफिसर आणि मराठी ZEE5च्या बिझनेस हेड हेमा व्ही. आर. म्हणाल्या, “आजच्या व्यावसायिक जगाशी जवळून जोडलेली आणि वास्तववादी वाटणारी प्रेमकथा पडद्यावर आणण्याचा आमचा प्रयत्न आहे. ही सीरिज केवळ प्रेमकथेपुरती मर्यादित राहत नाही, तर महत्त्वाकांक्षा, कामाच्या ठिकाणच्या मर्यादा आणि वैयक्तिक मूल्ये यांच्यातील संघर्षाचाही वेध घेते. अनेक तरुण व्यावसायिक त्यांच्या आयुष्यात ज्या द्विधा मनःस्थितीचा सामना करतात, त्याचे प्रतिबिंब या कथेत दिसेल.”

‘प्रेम आणि करिअरचा समतोल साधण्याची कथा’ – गौरव पत्की

दिग्दर्शक गौरव पत्की म्हणाले, “अनन्या आणि ऋषी यांची गोष्ट ही प्रेम आणि करिअर यांच्यात समतोल साधण्याचा प्रयत्न करणाऱ्या तरुण पिढीची कथा आहे. वेगवान कार्यसंस्कृती, शहरी जीवनातील गुंतागुंत आणि विशीतील अनिश्चितता यांचा सामना करत स्वतःचा मार्ग शोधणाऱ्या या जोडप्याची ही हृदयस्पर्शी कहाणी आहे. ही सीरिज प्रेमाच्या अपूर्ण, तरीही सुंदर रूपांचा गौरव करते.”

भूमिकांबद्दल काय म्हणाले सिद्धार्थ आणि जान्हवी?

ऋषीची भूमिका साकारणारा सिद्धार्थ मेनन म्हणाला, “ही नेहमीची प्रेमकथा नाही. व्यावसायिक मर्यादा आणि वैयक्तिक भावना यांच्यातील संघर्ष अनुभवण्याची संधी या भूमिकेमुळे मिळाली. आजच्या कार्यसंस्कृतीशी जोडलेली ही कथा प्रेक्षकांना नक्कीच आपलीशी वाटेल.”

तर अनन्याची भूमिका साकारणारी जान्हवी उदय म्हणाली, “करिअरमधील महत्त्वाकांक्षा, भावना आणि वैयक्तिक मर्यादा यांचा समतोल साधण्याचा प्रयत्न करणाऱ्या अनेक तरुणांची ही कथा आहे. अनेक आव्हानांचा सामना करत असतानाही प्रेमात असलेली दोन माणसं एकमेकांसाठी कशी विकसित होत जातात, हे या कथेत सुंदरपणे दाखवण्यात आलं आहे.”

२४ जूनपासून पाहा ‘प्रेमाला कंडिशन्स अप्लाय’

एक वेगळी प्रेमकथा, ताज्या दमाची जोडी, कॉर्पोरेट जगतातील वास्तव आणि भावनिक गुंतागुंत यांचा सुरेख मिलाफ असलेली ‘प्रेमाला कंडिशन्स अप्लाय’ ही वेब सीरिज २४ जून २०२६ पासून मराठी ZEE5वर प्रेक्षकांच्या भेटीला येत आहे.

संगीताचा वारसा घरातूनच मिळाला

झी मराठीवरील ‘सावळ्याची जणू सावली’ या मालिकेतील ‘सावली’ हे पात्र गेल्या दोन वर्षांपासून प्रेक्षकांच्या मनावर अधिराज्य गाजवत आहे. तिचा मधुर आवाज, संघर्षमय प्रवास आणि भावनिक कथा यामुळे सावलीची वेगळी ओळख निर्माण झाली आहे. जागतिक संगीत दिनानिमित्त सावलीची भूमिका साकारणारी अभिनेत्री प्राप्ती रेडकर हिने संगीताशी असलेल्या आपल्या नात्याविषयी आणि या भूमिकेमुळे मिळालेल्या अनुभवांविषयी मनमोकळेपणाने संवाद साधला.

प्राप्ती सांगते, “माझे बाबा प्रवीण रेडकर हे गायक आहेत. ते लाईव्ह शोज करतात. त्यामुळे संगीत आणि गायनाची आवड मला लहानपणापासूनच होती. गावी असताना बाबा आणि काकांसोबत भजनाला जायचे, तिथे गाणी गायचे आणि आजही गाते. मात्र अभिनय क्षेत्रात आल्यामुळे गायनाकडे तितकं लक्ष देता आलं नाही.”

‘सावली’मुळे संगीताच्या आणखी जवळ गेले

सावली या व्यक्तिरेखेने प्राप्तीला संगीताशी पुन्हा नव्याने जोडले. याबद्दल बोलताना ती म्हणाली, “सावली साकारताना मी संगीताच्या आणखी जवळ गेले आहे. कारण मालिकेत सावलीला जो आवाज दिला आहे तो गायिका केतकी माटेगावकरचा आहे आणि ती माझ्या आवडत्या गायिकांपैकी एक आहे. त्यामुळे या पात्राशी आणि तिच्या संगीतप्रवासाशी मी अधिक भावनिकरित्या जोडली गेले.”

‘माझे माहेर पंढरी २.०’ गाणं ठरलं खास

मालिकेतील ‘माझे माहेर पंढरी २.०’ हे गाणं सावलीच्या आयुष्यातील महत्त्वाच्या टप्प्यावर दाखवण्यात आलं आहे. सारंग आणि मेहेंदळे कुटुंबाला अनेक दिवसांपासून ऐकू येणारा आवाज ताराचा नसून सावलीचाच आहे, हे सत्य उघड होतं. या प्रसंगाचं चित्रीकरण करताना आलेल्या भावनिक अनुभवांविषयी प्राप्ती म्हणाली, “हे गाणं शूट करताना मी खरोखर रडत होते. सावलीने इतकं सहन केलं आणि आता तिला प्रेम करणारा नवरा मिळाला, ज्याने तिला तिची खरी ओळख आणि हक्काचं कौतुक मिळवून दिलं. त्या सर्व भावना अनुभवताना मला प्राप्ती म्हणूनही खूप वाईट वाटत होतं. हे गाणं माझ्या मनाच्या खूप जवळचं आहे.”

‘संगीत म्हणजे आयुष्याची थेरपी’

जागतिक संगीत दिनाच्या निमित्ताने प्रेक्षकांना शुभेच्छा देताना प्राप्ती म्हणाली, “संगीत म्हणजे एक प्रकारची थेरपी आहे. ते माणसाच्या आयुष्यात सकारात्मक बदल घडवू शकतं. मी खूप आनंदी असताना गाणी ऐकते, उदास असताना किंवा राग आला तरी संगीताचीच साथ घेते. प्रत्येक मूडमध्ये संगीत माझ्यासोबत असतं आणि मी त्याच्याशी रिलेट करू शकते.”

दोन वर्षांनंतरही प्रेक्षकांचं प्रेम कायम

‘सावळ्याची जणू सावली’ या मालिकेला दोन वर्षांचा कालावधी पूर्ण झाला असला तरी प्रेक्षकांचं प्रेम आजही तितकंच कायम आहे. याबद्दल कृतज्ञता व्यक्त करत प्राप्ती म्हणाली, “मालिकेला दोन वर्षं झाली आहेत, पण प्रेक्षकांचं प्रेम आजही पहिल्या दिवसाइतकंच आहे. हे प्रेम असंच कायम राहू द्या आणि सावलीवर असाच भरभरून आशीर्वाद ठेवा.”

तेव्हा पाहायला विसरू नका ‘सावळ्याची जणू सावली’, दररोज दुपारी १ वाजता, फक्त झी मराठीवर.

रंगभूमीपासून पडद्यापर्यंतचा प्रवास

मराठी चित्रपटसृष्टीमध्ये सातत्याने नवे चेहरे दाखल होत असतात. काही कलाकार आपल्या पहिल्याच भूमिकेतून प्रेक्षकांचे लक्ष वेधून घेतात, तर काही आपल्या अभिनयाच्या जोरावर वेगळी ओळख निर्माण करतात. या नव्या पिढीतील आश्वासक कलाकारांपैकी अभिनेता ऋषी मनोहर हे नाव विशेषत्वाने पुढे येताना दिसत आहे. रंगभूमीवर अभिनयाची भक्कम पायाभरणी करत ऋषीने विविध माध्यमांमधून स्वतःची वेगळी छाप पाडली आहे.

सहज अभिनयातून निर्माण केली स्वतंत्र ओळख

‘दादा, एक गुड न्यूज आहे’ या नाटकातून तसेच ‘पेट पुराण’ या लोकप्रिय वेबसिरीजमधून ऋषी मनोहर यांनी आपल्या अभिनयाची झलक प्रेक्षकांना दाखवली. सहज अभिनय, प्रभावी स्क्रीन प्रेझेन्स आणि साकारलेल्या पात्रांमध्ये पूर्णपणे समरस होण्याची क्षमता ही त्यांची जमेची बाजू मानली जाते. त्यामुळे अल्पावधीतच त्यांनी प्रेक्षकांचे आणि उद्योगातील जाणकारांचे लक्ष वेधून घेतले आहे.

नायकाला साजेसं व्यक्तिमत्त्व आणि अभिनयाची खोली

आजच्या स्पर्धात्मक मनोरंजनविश्वात अभिनयातील वैविध्य आणि नायकाला साजेसं व्यक्तिमत्त्व या दोन्ही गुणांचा संगम क्वचितच पाहायला मिळतो. ऋषी मनोहर यांच्यामध्ये हे दोन्ही गुण प्रकर्षाने जाणवतात. प्रत्येक भूमिकेकडे गांभीर्याने पाहण्याची त्यांची वृत्ती आणि सातत्याने स्वतःला अधिक समृद्ध करण्याचा प्रयत्न यामुळे मराठी चित्रपटसृष्टीत त्यांच्याकडे एका आश्वासक अभिनेत्याच्या नजरेने पाहिले जात आहे.

‘कप बशी’ ठरू शकतो कारकिर्दीतील महत्त्वाचा टप्पा

येत्या १९ जून रोजी प्रदर्शित होणारा ‘कप बशी’ हा चित्रपट ऋषी मनोहर यांच्या कारकिर्दीतील महत्त्वाचा टप्पा ठरण्याची शक्यता व्यक्त केली जात आहे. या चित्रपटातून प्रेक्षकांना त्यांच्या अभिनयाची आणखी एक नवी बाजू पाहायला मिळणार आहे. नव्या दमदार कलाकारांच्या शोधात असलेल्या मराठी चित्रपटसृष्टीमध्ये ऋषी मनोहर हे नाव अधिक ठळकपणे समोर येत आहे.

भूमिकांमधून स्वतःला नव्याने शोधण्याचा प्रयत्न

आपल्या अभिनय प्रवासाबद्दल बोलताना ऋषी मनोहर म्हणतात, “प्रत्येक भूमिका माझ्यासाठी केवळ एक व्यक्तिरेखा नसते, तर स्वतःला नव्याने शोधण्याची संधी असते. अभिनेता म्हणून प्रत्येक वेळी काहीतरी वेगळं, अधिक प्रामाणिक आणि अधिक परिणामकारक साकारण्याचा माझा प्रयत्न असतो. ‘कप बशी’मधील भूमिका माझ्यासाठी विशेष ठरली आहे. या भूमिकेतून प्रेक्षकांना माझ्या अभिनयाची एक नवी बाजू अनुभवायला मिळेल आणि त्या प्रवासाशी ते मनापासून जोडले जातील, अशी आशा आहे.”

उद्याचा दमदार चेहरा म्हणून ऋषीकडे लक्ष

रंगभूमीवर घडलेला आणि अभिनयातील प्रामाणिकपणा जपणारा ऋषी मनोहर हा चेहरा मराठी चित्रपटसृष्टीच्या नव्या पिढीतील महत्त्वाचा अभिनेता म्हणून उदयास येत आहे. आगामी काळात त्याच्या अभिनयाचा प्रवास आणखी उंची गाठेल, अशी अपेक्षा रसिक प्रेक्षक व्यक्त करत आहेत.