संभाजीनगर (प्रतिनिधी): ‘मिशन अयोध्या’, प्रभू श्रीरामांच्या विचारांवर आधारित मराठी चित्रपटाचा भव्य ट्रेलर लाँच सोहळा छत्रपती संभाजीनगर येथे ७ जानेवारी रोजी संपन्न झाला. महंत रामगिरी महाराजांच्या प्रमुख उपस्थितीत, या कार्यक्रमाला हजारोंच्या संख्येने रसिक प्रेक्षक आणि रामभक्तांनी हजेरी लावली होती. चित्रपट २४ जानेवारी २०२५ रोजी चित्रपटगृहात प्रदर्शित होणार आहे.

शहरात मोठी उत्सुकता

संपूर्ण संभाजीनगर शहर ‘मिशन अयोध्या’मय झाले होते. शहरातील प्रत्येक मुख्य रस्त्यावर आणि चौकांमध्ये चित्रपटाचे पोस्टर आणि बॅनर्स झळकत होते. ट्रेलर लाँचसाठी वारीप्रमाणे ज्ञानोबा-तुकाराम माऊलींचा गजर, टाळ-मृदुंगाचा ताल, आणि ‘जय श्रीराम’चा जयघोष वातावरणात रंग भरत होता.

महंत रामगिरी महाराजांची प्रशंसा

महंत रामगिरी महाराज म्हणाले, “हिंदू धर्मातील साधुसंतांचे चित्रण पूर्वी चुकीच्या पद्धतीने दाखवले गेले आहे. मात्र, ‘मिशन अयोध्या’ हा चित्रपट सकारात्मकतेचे दर्शन घडवतो, यासाठी निर्मात्यांचे कौतुक करावे लागेल.”

कथा: एका शिक्षकाची असामान्य प्रेरणा

‘मिशन अयोध्या’ चित्रपटाची कथा एका इतिहास विषयाच्या शिक्षकाची आहे, जो छत्रपती शिवाजी महाराज आणि संभाजी महाराजांना आपला आदर्श मानतो. अजित देशमुख नावाचा शिक्षक प्रभू श्रीरामांच्या विचारांनी प्रेरित होऊन रामराज्याच्या स्थापनेसाठी मिशन राबवतो. मंदिर उभारले गेले, पण श्रीरामाचे विचार आणि आदर्श पुढच्या पिढींपर्यंत कसे पोहोचतील, याचा विचार या चित्रपटात मांडला आहे.

भव्य निर्मितीमूल्य

चित्रपटाचे निर्माते कृष्णा शिंदे आणि योगिता शिंदे, तर दिग्दर्शनाची जबाबदारी समीर सुर्वे यांनी सांभाळली आहे. कथा कृष्णा शिंदे यांनी लिहिली असून संवाद समीर सुर्वे यांनी रचले आहेत. ट्रेलर लाँचच्या वेळी संपूर्ण कलाकार व तंत्रज्ञ उपस्थित होते, ज्यांनी चित्रपटाबद्दल आपल्या भावना व्यक्त केल्या.

२४ जानेवारीला ‘मिशन अयोध्या’ची सुरुवात

‘मिशन अयोध्या’ हा चित्रपट केवळ मनोरंजनासाठी नसून विचारांसाठी आहे. भारताचा इतिहास, संस्कृती, आणि आध्यात्मिकतेचा संगम अनुभवण्यासाठी हा चित्रपट प्रेक्षकांनी थेट चित्रपटगृहात जाऊन पाहावा, असे आवाहन निर्माते आणि कलाकारांनी केले आहे.

अधिक माहितीसाठी भेट द्या: Batamiwala.com