सध्या गावातील अनेक तरुण शिक्षण आणि नोकरीच्या निमित्ताने शहराकडे वळताना दिसतात. यामुळे अनेक गावांमध्ये फक्त वयस्कर लोक शिल्लक राहतात आणि गावांमध्ये प्रगतीचा अभाव जाणवतो. शहरं झपाट्याने प्रगत होत असताना, गावं मात्र ओसाड होताना दिसत आहेत. याच गंभीर विषयावर भाष्य करणारा ‘गाव बोलावतो’ हा चित्रपट ७ मार्च रोजी प्रदर्शित होणार आहे. या चित्रपटाच्या मोशन पोस्टरचे अनावरण आज (ता. २१) करण्यात आले.

गावाचं मन आणि तरुणाईचा संघर्ष

गावातील मुलं शिक्षण किंवा नोकरीच्या निमित्ताने शहराकडे वळल्यानंतर तिकडचीच होतात. त्यांचे आई-वडील मात्र गावातच राहून कष्ट करत राहतात. गावाकडे येऊन शेतीकडे लक्ष द्यावं, असं प्रत्येक आई-वडिलांना वाटतं. मात्र, शहराच्या झगमगाटात हरवलेली तरुणाई गावाचं मन जाणून घेण्यात अपयशी ठरते. या कथानकातून ‘गाव बोलावतो’ ग्रामीण भागातील प्रश्न आणि समस्यांवर भाष्य करतो.

प्रमुख कलाकार आणि कथानक

चित्रपटात भूषण प्रधान, माधव अभ्यंकर, गौरी नलावडे, श्रीकांत यादव, आणि किरण शरद या कलाकारांच्या दमदार भूमिका पाहायला मिळणार आहेत. ग्रामीण जीवनातील संघर्ष आणि गावाकडच्या प्रगतीसाठी होणाऱ्या प्रयत्नांची ही गोष्ट प्रेक्षकांना भावणारी ठरेल.

दिग्दर्शक आणि निर्मिती

संस्कार वाहिनी प्रोडक्शन आणि फिल्मिटेरियन मीडिया वर्क्स निर्मित या चित्रपटाचे दिग्दर्शन विनोद माणिकराव यांनी केले आहे. निर्माते प्रशांत मधुकर नरोडे आणि शंतनू श्रीकांत भाके असून, सहनिर्माते म्हणून अमित मालवीय, प्रवीण इंदू, गणेश इंगोले, सुधीर इंगळे, तुषार खेरडे, दिनेश राउत यांचे योगदान आहे.

प्रदर्शनाची तारीख

ग्रामीण आणि शहरी जीवनातील तणाव उलगडणारा ‘गाव बोलावतो’ चित्रपट ७ मार्च २०२५ पासून महाराष्ट्रभर प्रदर्शित होणार आहे.