हल्लीच “तुला जपणार आहे” मालिकेचा नवीन प्रोमो प्रदर्शित झाला आणि प्रोमो पाहून नेटिझन्समध्ये चर्चा रंगली की टेलिव्हिजनवर काही तरी वेगळं पहायला मिळणार आहे. प्रोमोमध्ये एका लहान मुलीला एक महिला पाण्यात ढकलते आणि तिची आई असहाय्यपणे बघत राहते. पण तिकडे एक तरुणी येते आणि विचार न करता पाण्यात उडी मारते व त्या लहान मुलीचा जीव वाचवते.

प्रोमोमागील मेहनत आणि तयारी

ही दृश्ये जितकी थरारक दिसतात, तितकीच चॅलेंजिंग होती. या प्रोमोमध्ये जीने त्या लहान मुलीचा जीव वाचवला, म्हणजेच मीराची भूमिका साकारत असलेल्या महिमा म्हात्रेने शूटचा किस्सा सांगितला.

“मालिकेचा तिसरा प्रोमो माझ्यासाठी खूप महत्त्वाचा होता कारण वेदा पाण्यात पडते हा सीन आम्ही साताऱ्यात शूट केला. जवळपास १३ – १४ फूट पाण्यात उडी मारून, श्वास रोखून ठेवून, त्यात चेहऱ्याचे हावभाव दाखवणं खूप कठीण होतं.

प्रचंड थंडी आणि दमछाक करणारा अनुभव

“जेव्हा आम्ही रिहर्सल केली, त्यावेळी माझ्या अंगावर ६ किलो वजन बांधल होतं. शूटच्या दिवशी मी ११-१२ तास पाण्यात होते. हिवाळा असल्यामुळे पाणी गारठलेलं होतं. जेव्हा शूट पूर्ण झालं, तेव्हा असं वाटलं जसं मी एक मोठं चॅलेंज पूर्ण केलं!

शूटच्या दुसऱ्या दिवशी मी आजारी पडले, पण तरीही मी पुन्हा सेटवर गेले. माझ्यात ते बळ कुठून आलं याची कल्पनाच नाही. आता जेव्हा हा प्रोमो पाहते, तेव्हा खूप आनंद होतो आणि मेहनतीचं चीज झाल्याचा प्रत्यय येतो.”

‘तुला जपणार आहे’ मालिकेची उत्कंठा वाढली

मायेची साद जेव्हा देवी ऐकते, तेंव्हा फक्त संरक्षणच नाही, तर चमत्कार घडतो. अशी ही कथा प्रत्येक आईच्या आपल्या बाळासाठी असलेल्या भावनांची आहे.

‘तुला जपणार आहे’ १७ फेब्रुवारीपासून दररोज रात्री १०.३० वा. फक्त झी मराठीवर.