महाराष्ट्राचा गौरवशाली ‘शिवइतिहास’ घडला तो सह्याद्रीच्या साक्षीने आणि कर्त्या व्यक्तींच्या असामान्य कर्तृत्वाने! त्यात कर्त्या स्त्रियांचादेखील महत्त्वाचा सहभाग होता. अशाच एका पराक्रमी महाराणी ताराराणींचा इतिहास आता मराठी रंगभूमीवर भव्य नाट्यरूपात उलगडणार आहे!

आपल्या कर्तबगारीने मराठ्यांचे नेतृत्व करणाऱ्या रणरागिणी ताराराणी यांच्या इतिहासावर आधारित नाटकाची निर्मिती श्री छत्रपती शिवाजी स्मारक मंडळ(ट्रस्ट) यांच्या सहयोगाने सरस्वती एज्युकेशन सोसायटीने केली आहे. युवराज पाटील लिखित आणि विजय राणे दिग्दर्शित हे नाटक येत्या १९ फेब्रुवारी रोजी, शिवजयंतीच्या मुहूर्तावर, श्री शिवाजी मंदिर नाट्यगृह, दादर येथे रंगभूमीवर सादर होणार आहे.

महाराणी ताराराणींचा पराक्रम नव्या पिढीपर्यंत पोहोचवण्याचा प्रयत्न

श्री छत्रपती शिवाजी स्मारक मंडळ(ट्रस्ट) आणि सरस्वती एज्युकेशन सोसायटीचे अध्यक्ष ब्रिगेडियर सुधीर सावंत सांगतात,
“ताराराणींचा इतिहास हा जनसामान्यांपासून दुर्लक्षित राहिला आहे. त्यांचा प्रचंड पराक्रम नव्या पिढीपर्यंत पोहोचावा, त्यातून प्रेरणा घ्यावी, हा आमचा हेतू आहे. मराठेशाहीचे स्थैर्य आणि छत्रपती ताराराणी यांनी समर्थपणे राखलेली मराठेशाहीची गादी यावर आधारित असलेल्या ‘रणरागिणी ताराराणी’ या नाटकात तब्बल ५० कलाकारांची फौज असणार आहे.”

नाटकाचे दिग्दर्शक आणि लेखक यांचे मत

दिग्दर्शक विजय राणे म्हणतात,
“नाटकात काम करायचं, या डेडिकेशनने प्रत्येक कलाकाराने आपली भूमिका प्रामाणिकपणे साकारली आहे. रंगमंचावर या नाटकाच्या निमित्ताने एक देखणा ऐतिहासिक प्रयोग प्रेक्षकांना अनुभवता येणार आहे.”

लेखक युवराज पाटील यांनी सांगितले,
“ऐतिहासिक संदर्भ घेत प्रेरणादायी लढा रसिकांसमोर आणण्याचा आमचा प्रयत्न असून, त्याला नाट्यरसिकांचा उत्तम प्रतिसाद लाभेल, याची खात्री आहे.”

ताराराणींच्या भूमिकेत तनीषा वर्दे – आणि जबरदस्त कलाकारांची फौज

‘रणरागिणी ताराराणी’ या नाटकात एकापेक्षा एक दमदार कलाकार आहेत –

तनीषा वर्दे (ताराराणी)

कृष्णा राजशेखर (येसूबाई)

सिद्धी घैसास (जानकी)

चेतन म्हस्के (शंभूराजे)

अरुण पंदरकर (राजाराम)

उमेश ठाकूर (संताजी/रामाजी/ मिरखान)

ऋषिकेश जोशी (धनाजी)

सुनील गोडसे (औरंगजेब)

मोहिका गद्रे (चेन्नमा/झीनत)

मुकुल देशमुख (जुल्फीकार)


८२ वर्षांची परंपरा असलेल्या श्री छत्रपती शिवाजी स्मारक मंडळ(ट्रस्ट)चा विशेष उपक्रम

श्री छत्रपती शिवाजी स्मारक मंडळ(ट्रस्ट) ही संस्था गेली ८२ वर्षे शैक्षणिक, सामाजिक, क्रीडा, सांस्कृतिक आणि आरोग्यविषयक क्षेत्रात कार्यरत आहे. दरवर्षी शिवजयंती मोठ्या उत्साहात साजरी केली जाते आणि यंदा ही जयंती ‘रणरागिणी ताराराणी’ या नाटकाच्या शुभारंभाच्या प्रयोगाने विशेष ठरणार आहे.

१९ फेब्रुवारी रोजी शिवजयंतीच्या मुहूर्तावर
📍 श्री शिवाजी मंदिर नाट्यगृह, दादर
🕞 दुपारी ३.३० वा.

मराठेशाहीच्या या महान सम्राज्ञीचा इतिहास नक्की पाहा आणि अनुभवा! रंगभूमीवर भव्य ऐतिहासिक गाथेचा साक्षीदार व्हा!