मुंबई, १३ फेब्रुवारी २०२५: “पैसे कमावण्यासाठी गाव सोडून शहरातच जावं लागतं… हे अगदी चुकीचं आहे!” या ठाम विचारावर भाष्य करणारा गाव बोलावतो हा चित्रपट ७ मार्च रोजी प्रदर्शित होतोय. नुकताच या चित्रपटाचा टिझर रिलीज करण्यात आला असून, त्याने प्रेक्षकांच्या मनात कुतूहल निर्माण केलं आहे. भूषण प्रधान, गौरी नलावडे, माधव अभ्यंकर यांच्या प्रमुख भूमिका असलेल्या या चित्रपटातून गाव-खेड्यांच्या भविष्यासाठी तरुण पिढीने घेतलेली जबाबदारी आणि त्यांची संघर्षमय कथा उलगडणार आहे.

गावाकडून शहराकडे आणि पुन्हा गावाच्या हाकेला ओ देणारी कहाणी!

गाव बोलावतो हा केवळ एका शेतकऱ्याच्या संघर्षाची कथा नाही, तर संपूर्ण गावाचं भविष्य घडवण्याचा प्रयत्न करणाऱ्या एका तरुणाची प्रेरणादायी गोष्ट आहे.

चित्रपटात शेतीवर निस्सीम प्रेम करणारे वडील, आपल्या आयुष्याचं ध्येय पैशांमध्ये मोजणारा त्यांचा मुलगा, आणि अखेरीस गावाला आपल्या अस्तित्वाची गरज आहे, हे प्रत्येक्ष अनुभवून परतलेला तोच मुलगा अशी भावनिक मांडणी पाहायला मिळेल.

गावांच्या ओसाड पडणाऱ्या वास्तवावर टोकदार भाष्य

आजच्या तरुणाईने नोकरी-उद्योगाच्या मागे धावत गाव सोडल्यामुळे एकीकडे शहरं वेगाने वाढत आहेत, तर दुसरीकडे गावं ओस पडत आहेत. गावाच्या विकासासाठी झटणाऱ्या काहींना समाजातीलच काही मंडळी अडथळा आणतात. मात्र, जर तरुण पिढीने ठरवलं, तर गावांच्या प्रगतीला कोणीही थांबवू शकत नाही – हा चित्रपटाचा मुख्य आशय आहे.

तगडी स्टारकास्ट आणि ग्रामीण जीवनाचा अस्सल अनुभव

भूषण प्रधान, माधव अभ्यंकर, गौरी नलावडे यांच्या दमदार अभिनयासोबतच श्रीकांत यादव, राजेश भोसले, अरविंद परब, किरण शरद यांसारखे अनुभवी कलाकार चित्रपटात महत्त्वाच्या भूमिकांमध्ये दिसणार आहेत.

चित्रपटात शेती, जोडधंदे, गावचं राजकारण, प्रेम, समर्पण, त्याग आणि गावासाठी लढणाऱ्या माणसाच्या भावना यांचा एक सुंदर मिलाफ पाहायला मिळणार आहे.

संस्कार वाहिनी प्रोडक्शन आणि फिल्मिटेरियन मीडिया वर्क्सची निर्मिती

गाव बोलावतो या चित्रपटाचे दिग्दर्शन विनोद माणिकराव यांनी केले असून, निर्मिती प्रशांत मधुकर नरोडे आणि शंतनू श्रीकांत भाके यांनी केली आहे. तसेच, व्हिज्युअल बर्ड्स इन्स्टिट्यूट अँड स्टुडिओ, अमित मालवीय, प्रवीण इंदू, गणेश इंगोले, सुधीर इंगळे, तुषार खेरडे, दिनेश राऊत हे चित्रपटाचे सहनिर्माते आहेत.

७ मार्चपासून संपूर्ण महाराष्ट्रभर होणार प्रदर्शित!

गाव, माती, माणसं, आणि त्यांचं गावासाठीचं निःस्वार्थ प्रेम या सगळ्यांना एकत्र गुंफणारा गाव बोलावतो हा चित्रपट प्रत्येकाने पाहावा, असा संदेश देतो. ७ मार्च २०२५ पासून संपूर्ण महाराष्ट्रात हा चित्रपट प्रदर्शित होणार आहे.

गाव बदलायला हवं, पण त्यासाठी गावातच राहणंही तितकंच गरजेचं आहे – याची जाणीव करून देणारा ‘गाव बोलावतो’ नक्की पाहा!