मराठी चित्रपटसृष्टीतील गुणी अभिनेता पुष्कर जोग नेहमीच वेगवेगळ्या विषयांचे चित्रपट प्रेक्षकांसमोर आणतो. काही दिवसांपूर्वी त्याच्या आगामी चित्रपटाचे ‘हार्दिक शुभेच्छा… पण त्याचं काय?’ पोस्टर प्रदर्शित झाले आणि त्याने प्रेक्षकांची उत्सुकता वाढवली. आता व्हॅलेंटाईन डेच्या निमित्ताने या चित्रपटातील ‘ओ बावरी’ हे प्रेमगीत प्रदर्शित झाले आहे.

सोनू निगमचा सुमधुर आवाज आणि रोहन-रोहनचे संगीत

हे रोमँटिक गाणे मंदार चोळकर यांनी लिहिले असून, भारतीय संगीतविश्वातील अजरामर गायक सोनू निगम यांनी ते आपल्या सुरेल आवाजात गायले आहे. गाण्याला रोहन-रोहन यांच्या मधुर संगीताची जोड मिळाल्याने ते अधिकच भावपूर्ण झाले आहे.

फुलांनी सजलेला मिरॅकल गार्डन आणि भव्य डेझर्ट शूटिंग लोकेशन्स

या गाण्याच्या सौंदर्यात भर टाकणारे त्याचे लोकेशन्स आहेत. दुबईच्या प्रसिद्ध ‘मिरॅकल गार्डन’ आणि भव्य वाळवंटातील सुंदर क्षण यात टिपले गेले आहेत. यामुळे गाण्याला भव्यता आणि एक अद्वितीय रोमँटिक फील मिळाली आहे.

फुलांनी सजलेला मिरॅकल गार्डन आणि भव्य डेझर्ट शूटिंग लोकेशन्सया गाण्यात अभिनेता पुष्कर जोग आणि अभिनेत्री हेमल इंगळे यांची केमिस्ट्री प्रेक्षकांना पहायला मिळेल. त्यांच्या नाजूक प्रेमभावना, मोहक लोकेशन्स आणि मधुर संगीत यामुळे ‘ओ बावरी’ हे गाणे नक्कीच व्हॅलेंटाईन स्पेशल ठरणार आहे.

तगड्या कलाकारांच्या भूमिका...

हा चित्रपट वैवाहिक जीवनातील लैंगिक सुसंगती आणि त्याभोवती निर्माण होणाऱ्या प्रश्नांवर भाष्य करतो. चित्रपट २१ मार्च रोजी प्रेक्षकांच्या भेटीला येणार आहे. यात पुष्कर जोग, हेमल इंगळे, पूर्वी मुंदडा, विशाखा सुभेदार, अभिजीत चव्हाण, अनुष्का सरकटे, पृथ्विक प्रताप, विजय पाटकर, भरत सावळे आणि किशोरी अंबिये यांसारख्या तगड्या कलाकारांच्या भूमिका आहेत.

चित्रपटाचे दिग्दर्शक आणि प्रमुख अभिनेता पुष्कर जोग सांगतात –

“‘हार्दिक शुभेच्छा… पण त्याचं काय?’ हा चित्रपट प्रेम, विश्वास आणि मानवी भावना यांचा हृदयस्पर्शी प्रवास मांडतो. ‘ओ बावरी’ हे गाणं जुन्या आठवणी जाग्या करणारे आणि नव्या प्रेमकहाण्यांना प्रेरणा देणारे आहे. दुबईत शूटिंग करताना हा एक वेगळाच अनुभव होता. हे गाणं प्रत्येक कपलच्या मनाचा ठाव घेईल.”

आनंद पंडित मोशन पिक्चर्स प्रस्तुत, गुझबम्प्स एंटरटेनमेंट यांच्या सहयोगाने हा चित्रपट तयार करण्यात आला आहे. दिग्दर्शन व लेखन पुष्कर जोग यांचे असून, निर्माते आनंद पंडित, रुपा पंडित आणि पुष्कर जोग आहेत. सहलेखन नमिष चापेकर यांनी केले असून, पॅनोरमा स्टुडिओजने या चित्रपटाच्या वितरणाची जबाबदारी घेतली आहे.

हे गाणं प्रेमाच्या जाणीवा अधिक गहिर्या करणारे असून, व्हॅलेंटाईनच्या निमित्ताने प्रेमी हृदयांसाठी एक रोमँटिक सरप्राईज ठरणार आहे. गाण्यातील मोहक लोकेशन्स, उत्कट भावना, सोनू निगमचा जादुई आवाज आणि साजेसं संगीत – या सगळ्याचा मिलाफ ‘ओ बावरी’ला स्पेशल बनवतो.

प्रेमाचा हा रोमँटिक प्रवास २१ मार्चला मोठ्या पडद्यावर अनुभवायला विसरू नका!