झी मराठीने मराठी मनोरंजन विश्वात पुन्हा एकदा नवा बेंचमार्क प्रस्थापित केला आहे. ‘तुला जपणार आहे’ या नव्या मालिकेच्या प्रेस लाँचच्या निमित्ताने, झी मराठीने अत्याधुनिक होलोग्राफिक तंत्रज्ञानाचा वापर करून उपस्थित पत्रकारांना एका अनोख्या कथाकथनाचा अनुभव दिला. हा प्रेस लाँच इव्हेंट खरोखरच आगळावेगळा आणि ऐतिहासिक ठरला.

शर्वरी लोहोकरे पुन्हा एकदा झी मराठीवर कमबॅक करणार

‘तुला जपणार आहे’ ह्या नव्या मालिकेतून शर्वरी लोहोकरे झी मराठीवर पुनरागमन करत आहेत. त्यांच्यासोबत या मालिकेत नीरज गोस्वामी, प्रतीक्षा शिवणकर, मिलिंद फाटक, पूर्णिमा तळवलकर, निलेश रानडे, मनोज कोल्हटकर आणि अमोल बावडेकर यांसारख्या दमदार कलाकारांची फौज प्रेक्षकांच्या भेटीला येणार आहे.

ही आहे एका आईच्या संघर्षाची अनोखी कथा

‘तुला जपणार आहे’ ही कथा आहे अंबिकाची, जिने आपल्या मुलीच्या संरक्षणाचं व्रत घेतलं आहे. मात्र, आत्मारूपी अंबिकाला तिच्या जाण्यानंतर घरातले बदललेले फासे, तिच्या मुलीच्या जीवावर उठलेले लोक आणि पित्याशी झालेली ताटातूट दिसते. अंबिकाच्या प्रार्थनेला प्रतिसाद देत देवीने तिच्या मुलीच्या रक्षणासाठी मीराला पाठवलं आहे.

मीरा ही देवीवर नाराज आहे, तिला देवीवर विश्वास नाही. मात्र, मीरा आत्मारूपी अंबिकाला पाहू शकते, स्पर्श करू शकते आणि तिच्यासोबत देवळाच्या पायऱ्याही चढू शकते. या दोघींच्या नात्यामागील गूढ काय आहे? अंबिकाच्या मदतीला धावून आलेली मीरा तिच्या मुलीच्या आयुष्यात कशी येणार? या सगळ्याचा थरार मालिकेत अनुभवता येणार आहे.

हॉरर, थ्रिलर आणि कौटुंबिक नाट्याचा अनोखा मिलाफ

‘तुला जपणार आहे’ ही मालिका हॉरर, थ्रिलर आणि कौटुंबिक नाट्य यांचा अद्वितीय संगम आहे. या मालिकेतील घटनांना larger than life स्वरूप देण्यात आले असून, प्रेक्षकांना रोमांचक अनुभव मिळणार आहे.

भव्य VFX आणि डोळे दिपवणारे दृश्यमान परिणाम

या मालिकेचे खास आकर्षण म्हणजे VFX आणि तांत्रिक दृष्टिकोनाने परिपूर्ण दृश्यात्मक अनुभव. मालिकेतील VFX अत्यंत उच्च दर्जाचे असणार असून, प्रेक्षकांना एका वेगळ्याच स्तरावरचा अनुभव मिळणार आहे.

कथानक, पटकथा आणि दिग्दर्शनाची भक्कम बाजू

या मालिकेचं पटकथा लेखन चेतन सैंदाणे यांनी केले असून, संवादलेखन पूर्णानंद वांढेकर यांचे आहे. मालिकेचे निर्माते आयरिस प्रोडक्शन्सचे विद्याधर पाठारे असून, दिग्दर्शनाची जबाबदारी जयंत पवार यांनी सांभाळली आहे.

‘तुला जपणार आहे’ – प्रत्येक आईच्या आपल्या बाळासाठी असलेल्या प्रेमाची गोष्ट

“मायेची साद जेव्हा देवी ऐकते, तेव्हा फक्त संरक्षण नाही तर चमत्कार घडतो!” अशा अनोख्या कथानकासह प्रेक्षकांच्या मनाचा ठाव घेणारी मालिका ‘तुला जपणार आहे’ १७ फेब्रुवारीपासून रात्री १०.३० वाजता फक्त आपल्या झी मराठीवर प्रेक्षकांच्या भेटीला येणार आहे.