‘तुला जपणार आहे’ ह्या नव्या मालिकेतून शर्वरी लोहोकरे झी मराठीवर पुन्हा एकदा कमबॅक करत आहेत. त्यांच्या जोडीला नीरज गोस्वामी, प्रतीक्षा शिवणकर, मिलिंद फाटक, पूर्णिमा तळवलकर, निलेश रानडे, मनोज कोल्हटकर आणि अमोल बावडेकर ह्या दमदार कलाकारांची फौज प्रेक्षकांच्या भेटीला येणार आहे.

एका आईच्या संघर्षाची रहस्यमय कथा

ही मालिका एका आईच्या अंबिका नावाच्या महत्त्वाच्या पात्राभोवती फिरते. अंबिका आपल्या मुलीच्या संरक्षणासाठी व्रत घेत आहे. ती आत्मारूपात आपल्या मुलीच्या आजूबाजूला असणार आहे. पण तिच्या मृत्यूनंतर, घरातील बदललेले प्रसंग, मुलीच्या जीवनाला असलेला धोका आणि वडिलांशी झालेली ताटातूट तिला स्पष्ट दिसते.

अंबिकाच्या प्रार्थनांना प्रतिसाद देत देवी तिच्या मुलीच्या संरक्षणासाठी मीराला पाठवते, जिचा देवीवर विश्वास नाही, जिची देवीवर नाराजी आहे. मात्र, ह्या दोघींमध्ये एक अद्वितीय नातं तयार होतं. मीरा आत्मारूपी अंबिकाला पाहू शकते, तिच्याशी संवाद साधू शकते आणि तिला स्पर्श करू शकते. या दोघींच्या नात्यामागील रहस्य उलगडण्याचा प्रवास हा मालिकेतील प्रमुख आकर्षण असेल.

हॉरर, थ्रिलर आणि कौटुंबिक नाट्याचा संगम

‘तुला जपणार आहे’ ही मालिका हॉरर, थ्रिलर आणि कौटुंबिक नाट्याचा अनोखा मिलाफ आहे. या मालिकेतील प्रसंग larger than life असणार आहेत, जे प्रेक्षकांसाठी एक अनोखा अनुभव ठरणार आहे.

VFX आणि भव्य निर्मितीमुळे आणखी खास

या मालिकेचं खास आकर्षण म्हणजे VFX तंत्रज्ञानाचा प्रभावी वापर. VFX दृश्यप्रभाव अत्यंत उच्च दर्जाचे असणार असून, ते प्रेक्षकांना एक नवीन अनुभव देतील. भव्य कथानकासह उत्कृष्ट निर्मितीमूल्ये ही देखील या मालिकेची मोठी जमेची बाजू आहे.

कथानक, पटकथा आणि दिग्दर्शन

या मालिकेचं पटकथा लेखन चेतन सैंदाणे यांनी केले असून, संवादलेखन पूर्णानंद वांढेकर यांचे आहे. मालिकेचे निर्माते आयरिस प्रोडक्शन्सचे विद्याधर पाठारे असून, दिग्दर्शनाची जबाबदारी जयंत पवार यांनी सांभाळली आहे.

एक आई आणि देवीच्या चमत्कारीक मदतीची कथा

“मायेची साद जेव्हा देवी ऐकते, तेव्हा फक्त संरक्षण नाही तर चमत्कार घडतो!” अशा अनोख्या कथानकासह प्रेक्षकांच्या मनाचा ठाव घेणारी मालिका ‘तुला जपणार आहे’ १७ फेब्रुवारीपासून रात्री १०.३० वाजता फक्त आपल्या झी मराठीवर प्रेक्षकांच्या भेटीला येणार आहे.