महाराष्ट्रातील प्रत्येक प्रांतात एक बोली भाषा बोलली जाते. महाराष्ट्राच्या विदर्भात बोलली जाणारी वऱ्हाडी ही मराठीची अत्यंत महत्त्वाची आणि लोकप्रिय बोली आहे. विदर्भात बोलली जाणारी ही बोली आपल्या सहज संवादशैलीमुळे प्रसिद्ध आहे. वऱ्हाडी भाषेचा विनोदी बाज हा तिचा खास गुणधर्म आहे. वऱ्हाडी बोलीत बोलताना एक वेगळीच गंमत असते. शब्दांच्या उच्चारांतील लयबद्धता आणि लहेजा मराठीला एक वेगळेच सौंदर्य प्रदान करतो. असचं एक व-हाडी भाषेतील “झामल झामल” हे व-हाडी भाषेतील गाणं नुकतंच प्रसिद्ध झालं आहे. आणि विशेष म्हणजे हे गाणं प्रसिद्ध होताच सोशल मीडियावर ट्रेंडिंग सुद्धा गेलं आहे. यावरून असे दिसते की आपल्या माय मराठी भाषेतील बोली भाषांना आजही लोक आवडीने स्वीकारतात तसेच अमराठी लोकांनाही या भाषा आवडतात.

गाण्यात लोकप्रिय जोडी – विश्वास पाटिल आणि राजेश्वरी बोकन

‘झामल झामल’ गाण्यात लोकप्रिय अभिनेत्री राजेश्वरी बोकन आणि अभिनेता विश्वास पाटिल यांची नवीन जोडी पाहायला मिळेल. अक्षय शिवाजी भाकरे यांच्या दिग्दर्शनाखाली तयार झालेल्या या गाण्याला सौरभ मास्तोळी यांनी संगीत दिलं आहे. गाण्याचे बोल प्रशांत तिडके यांचे आहेत. गायिका सानिका अभंग हिने हे गाणं गायलं असून या गाण्यातील रॅपचा भाग रॅपर ओंकार दासगुडे यांनी गायला आहे. या गाण्याचे कोरिओग्राफर विकी वाघ हे आहेत. या गाण्याची निर्मिती सौरभ मास्तोळी यांनी केली आहे.

अभिनेता विश्वास पाटिल यांचा गाण्याच्या चित्रीकरणाचा अनुभव

“मी मुळचा मराठवाड्यातला आहे. आणि हे गाणं विदर्भातील व-हाडी प्रांतातील आहे. मी जेव्हा पहिल्यांदा ही भाषा ऐकली तेव्हा ती खूप साजूक वाटली. त्यामुळे मी लगेच गाण्यासाठी होकार दिला. गाण्याची संपूर्ण टीम फार मेहनती होती, त्यामुळे गाणं शूट करताना खूप मजा आली. टीमचे आणि प्रेक्षकांचे मी मनापासून आभार मानतो.”

अभिनेत्री राजेश्वरी बोकन यांच्या आठवणी

“गाण्याची प्रोसेस खूप कमाल होती. परंतु गाण्याच्या शूटिंगच्याच दिवशी मी आजारी पडले होते. कोरिओग्राफर विकी दादा बोलत होता की, तू आता कसं शूट करणार आणि हे गाणं डान्सीकल आहे, यात एनर्जीवाले स्टेप्स आहेत. पण काय माहित माझ्यात कुठून एनर्जी आली आणि मी ते संपूर्ण गाणं शूट केलं. आता प्रेक्षकांचा उत्तम प्रतिसाद मिळतोय हे पाहून खूप आनंद होत आहे.”

गाण्याच्या निर्मितीमागील प्रेरणा – संगीतकार सौरभ मास्तोळी

“गीतकार प्रशांत तिडके माझे मित्र आहेत. ते म्हणाले की, आमच्या विदर्भाच्या भाषेत एकही गाणं अजून आलेलं नाही. तेव्हा आम्ही ठरवलं की, विदर्भाच्या भाषेत व-हाडी गाणं करूया. “झामल झामल” या शब्दाचा अर्थ आहे टंगळ मंगळ करणे किंवा टाईमपास करणे.

हे रोमँटिक गाणं एका कपलच्या गोड प्रेमकथेवर आधारित आहे. त्यात मुलगी मुलावर प्रेम करत असते, आणि तो मुलगा थोडासा इंट्रोवर्ट असतो. या गाण्यातून मुलगी प्रेमाने त्याला विचारत असते, ‘चल आता भाव खाऊ नकोस, हो म्हण.’ व-हाडी भाषेचा तडका आणि दोघांची प्रेमाने केलेली नोकझोक गाण्यात अगदी उत्तम झाली आहे. प्रेक्षकांचा प्रतिसाद पाहता हे गाणं त्यांना खूप आवडलं आहे आणि हीच आमच्या मेहनतीची पोचपावती आहे.”

गायिका सानिका अभंग यांचा रेकॉर्डिंगदरम्यानचा अनुभव

“हे माझं पहिलंच व-हाडी गाणं आहे. जेव्हा आम्ही या गाण्याचं रेकॉर्डिंग करत होतो, तेव्हा प्रत्येकाचे पाय या गाण्यावर थिरकत होते. आणि हे गाणं रेकॉर्ड करताना आम्ही खूप धम्माल केली.”

प्रेक्षकांसाठी एक परिपूर्ण रोमँटिक भेट!

मधुर संगीत, हृदयस्पर्शी कथा, व-हाडी बोली भाषा आणि लाजवाब लोकेशन्सच्या माध्यमातून ‘झामल झामल’ हे गाणं सर्व प्रेमीयुगूलांसाठी एक परिपूर्ण रोमँटिक भेट ठरणार आहे. प्रेमाच्या दुनियेत हरवण्यासाठी तयार व्हा! 🎶💃🕺💖