अध्यात्म, ज्ञान आणि भक्तीचा संगम – संत ज्ञानेश्वर माऊली

कैवल्यसाम्राज्य चक्रवर्ती, संतश्रेष्ठ श्री ज्ञानेश्वर माऊली हे केवळ वारकरी संप्रदायाचे आधारस्तंभ नव्हे, तर मराठी समाजाच्या अध्यात्मिक चेतनेचे प्रतीक आहेत. त्यांचे अभंग, हरिपाठ आणि विचार आजही लाखो हृदयांना आधार देतात. आळंदीत समाधिस्थ झाल्यानंतरही, माऊलींची करुणामयी विचारधारा आणि माणुसकीचा झरा अखंड वाहतो आहे.

ज्ञानेश्वरी आणि अमृतानुभव – ज्ञानसंपन्नतेचे ग्रंथरत्न

ज्ञानेश्वरांनी लिहिलेल्या ‘भावार्थदीपिका’ (ज्ञानेश्वरी) आणि ‘अमृतानुभव’ या ग्रंथांद्वारे त्यांनी वेद-उपनिषदांचे ज्ञान सामान्य जनांसाठी सुलभ केलं. त्यांच्या ओवीबद्ध लेखनशैलीत साधेपणासोबतच गहन तात्त्विक अर्थही सामावलेला आहे, जो आजही वाचकाला अंतर्मुख करतो.

‘संत ज्ञानेश्वरांची मुक्ताई’ — एक भावस्पर्शी चित्रमालिका

या दिव्य चरित्राच्या सोबत त्यांच्या लाडक्या बहिणी मुक्ताईच्या जीवनकथेवर आधारित चित्रपट ‘संत ज्ञानेश्वरांची मुक्ताई’ १८ एप्रिलपासून प्रेक्षकांच्या भेटीस येणार आहे. दिग्पाल लांजेकर लिखित-दिग्दर्शित, रेश्मा कुंदन थडानी निर्मित आणि ए.ए.फिल्म्स प्रस्तुत या चित्रपटात माऊलींच्या जीवनाचे दर्शन घडणार आहे.

तेजस बर्वे — संत ज्ञानेश्वरांच्या भूमिकेत भावभावनांनी नटलेलं साकार रूप

या चित्रपटात संत ज्ञानेश्वर माऊलींच्या भूमिकेत तेजस बर्वे झळकणार आहे. मराठी रंगभूमी, मालिका आणि चित्रपटातून आपली अभिनयसंपन्न ओळख निर्माण करणाऱ्या तेजसने या भूमिकेसाठी विशेष मेहनत घेतली आहे.

आळंदीच्या समाधी मंदिराच्या गाभाऱ्यातून प्रांगणात माऊलीच्या रूपात तेजस अवतरला, तेव्हा उपस्थित भाविकांच्या डोळ्यांत श्रद्धेचा अश्रू दाटला. “अव्यक्त आकार आकारले रूप । प्रकाशस्वरूप बिंबलेसे।।” या ओळींचा अनुभव जणू प्रत्यक्षरूपात मिळाला.

माऊलींचे भावविश्व आणि मुक्ताईच्या सहवासाचे हृद्य चित्रण

या चित्रपटात माऊली आणि मुक्ताई यांच्यातील भावबंधांचे सुंदर चित्रण अनुभवायला मिळणार आहे. भावनांनी ओथंबलेले हे नाते आणि त्या काळातलं अध्यात्मिक कुटुंब जीवन, चित्रपटाच्या कथानकाला गहिरं रंग देणार आहे.

सशक्त तांत्रिक बाजू आणि प्रतिभावंत कलावंतांचा सहभाग

संगीत – अवधूत गांधी, देवदत्त बाजी
छायांकन – संदीप शिंदे
संकलन – सागर शिंदे, विनय शिंदे
कलादिग्दर्शन – प्रतीक रेडीज
ड्रोन/स्थिर छायाचित्रण – प्रथमेश अवसरे
रंगभूषा – अतुल मस्के, वेशभूषा – सौरभ कांबळे
नृत्यदिग्दर्शन – किरण बोरकर
ध्वनीआरेखन – निखिल लांजेकर
पार्श्वसंगीत – शंतनू पांडे
साहसदृश्ये – बब्बू खन्ना
सहनिर्माते – सनी बक्षी, कार्यकारी निर्मात्या – केतकी गद्रे अभ्यंकर

१८ एप्रिलपासून — माऊलींच्या प्रकाशरूप दर्शनासाठी सज्ज व्हा

‘संत ज्ञानेश्वरांची मुक्ताई’ हा चित्रपट केवळ एक चरित्रपट नाही, तर माणुसकी, भक्ती आणि ज्ञानाचं एक जीवनदर्शन आहे. आणि माऊलीच्या भूमिकेत तेजस बर्वे — हे दर्शन अधिकच तेजस्वी होणार आहे.