मैत्री, प्रेम आणि कुटुंब यासारख्या विषयांवर आजवर अनेक चित्रपट आले, पण ‘राजकमल एंटरटेनमेंट’ प्रस्तुत आणि लोकेश गुप्ते लिखित-दिग्दर्शित ‘अशी ही जमवा जमवी’ या चित्रपटात वृद्ध मित्र-मैत्रिणींच्या नात्याची मजेशीर आणि हृदयस्पर्शी कथा पहिल्यांदाच मोठ्या पडद्यावर मांडली जाणार आहे.

टिझरने वाढवली प्रेक्षकांची उत्सुकता

या बहुप्रतीक्षित चित्रपटाचा टीझर नुकताच प्रदर्शित झाला आहे, ज्यामध्ये अशोक सराफ आणि वंदना गुप्ते यांची हास्याने भरलेली धमाल जुगलबंदी प्रेक्षकांच्या चेहऱ्यावर हसू पसरवते. चित्रपटाचं नाव, त्यातली विनोदी ढंगातील मांडणी आणि टीझरमधून मिळालेली झलक – या सगळ्यांमुळे चित्रपटाबाबतची उत्सुकता प्रचंड वाढली आहे.

थोडं खट्याळ, थोडं गोंडस, थोडं हळवं

या चित्रपटाची कथा गोंडस विनोद, हळव्या भावना आणि वयाच्या पलीकडचा उत्साह यांचा संगम आहे. आजच्या तरुणाईसाठी जितकी ही कथा जवळची आहे, तितकीच ती प्रौढांनाही आपलीशी वाटेल.

दिग्गज कलाकारांचा चमकदार ताफा

चित्रपटात अशोक सराफ आणि वंदना गुप्ते यांच्यासोबत सुनील बर्वे, चैत्राली गुप्ते, मिलिंद फाटक, सुलेखा तळवलकर, पुष्कराज चिरपुटकर, ओमकार कुलकर्णी आणि तनिष्का विशे हे लोकप्रिय कलाकारही महत्त्वाच्या भूमिका साकारत आहेत.

राजकमल एंटरटेनमेंट – एक नवा सिने प्रवास

भारतीय सिनेसृष्टीतील दिग्गज चित्रपती व्ही. शांताराम यांचे नातू आणि किरण व्ही. शांताराम यांचे चिरंजीव राहुल शांताराम यांनी ‘राजकमल एंटरटेनमेंट’ या नव्या बॅनरची स्थापना करून प्रेक्षकांसाठी नवीन आणि अर्थपूर्ण मनोरंजन देण्याचा संकल्प केला आहे.

१० एप्रिल २०२५ – सिनेमागृहात जमवायला विसरू नका!

‘अशी ही जमवा जमवी’ ही केवळ एक प्रेमकथा नाही, ती आहे नात्यांची नवी समज, मैत्रीची नवी परिभाषा आणि वयाच्या पलीकडील हास्याची रंगत.
ही धमाल गोष्ट १० एप्रिल २०२५ रोजी आपल्या जवळच्या सिनेमागृहात पाहायला विसरू नका!