सोनी मराठी वाहिनीने ‘कोण होणार महाराष्ट्राचा लाडका कीर्तनकार’ या भारतातील पहिल्या कीर्तनावर आधारित रिअ‍ॅलिटी शोची घोषणा करत महाराष्ट्राच्या कीर्तन परंपरेला अनोखी मानवंदना अर्पण केली आहे. या शोमधून महाराष्ट्राच्या धार्मिक, सामाजिक आणि सांस्कृतिक परंपरेचा ठेवा रसिकांसमोर सादर होणार आहे.

मुख्यमंत्र्यांच्या हस्ते ट्रॉफीचे अनावरण

या रिअ‍ॅलिटी शोचा शुभारंभ आणि पु.ना. गाडगीळ यांनी हस्तनिर्मित केलेल्या वीणेच्या आकारातल्या चांदीच्या ट्रॉफीचे अनावरण महाराष्ट्राचे माननीय मुख्यमंत्री श्री. देवेंद्र फडणवीस यांच्या हस्ते नुकतेच पार पडले.

शोच्या उद्घाटनाला मान्यवरांची उपस्थिती

उद्घाटनप्रसंगी सोनी पिक्चर्स नेटवर्क्स इंडियाचे एमडी आणि सीईओ गौरव बॅनर्जी, विविध संतांचे वंशज, शोचे सूत्रसंचालक गीतकार ईश्वर अंधारे, परीक्षक ह.भ.प. जगन्नाथ महाराज पाटील आणि ह.भ.प. राधाताई सानप यांच्यासह अनेक मान्यवर उपस्थित होते.

कीर्तनकार परीक्षकांची प्रतिष्ठित निवड

ह.भ.प. राधाताई सानप यांनी सामाजिक जागरूकतेसाठी कीर्तनाचा प्रभावी वापर केला आहे, तर ह.भ.प. जगन्नाथ महाराज पाटील यांनी शिक्षण आणि समाजप्रबोधनासाठी कीर्तनाचा वापर करत लोकांमध्ये विचारांची चळवळ निर्माण केली आहे.

संतांच्या वंशजांचा सन्मान

या शोमध्ये महाराष्ट्राच्या संत परंपरेचे प्रतिनिधित्व करणाऱ्या संतांच्या वंशजांचा मुख्यमंत्री देवेंद्र फडणवीस यांच्या हस्ते विशेष सन्मान करण्यात आला. या प्रसंगी अनेक संत वंशजांची उपस्थिति शोला अध्यात्मिक अधिष्ठान देणारी ठरली.

मुख्यमंत्र्यांचा अभिमान आणि कौतुक

मुख्यमंत्री देवेंद्र फडणवीस म्हणाले, “ही संकल्पना केवळ अभिनव नाही तर महाराष्ट्राच्या अध्यात्मिक परंपरेला पुढे नेणारी आहे. नव्या पिढीसमोर कीर्तनाच्या माध्यमातून संस्कार आणि सामाजिक जागरूकता पोहोचवण्याचं हे एक प्रभावी माध्यम आहे.”

सोनी मराठीकडून संस्कृती जपण्याचा प्रयत्न

सोनी पिक्चर्स नेटवर्क्स इंडियाचे एमडी आणि सीईओ गौरव बॅनर्जी यांनी सांगितले की, “हा शो केवळ मनोरंजन नाही तर तो एक सांस्कृतिक उत्सव आहे. ‘विणुया अतुट नाती’ या ब्रीदवाक्याशी सुसंगत अशा या शोमधून कीर्तनाचा वारसा पुढील पिढीपर्यंत पोहोचवण्याचा आमचा प्रयत्न आहे.”

डॉ. सदानंद मोरे यांचे मार्गदर्शन लाभणार

या शोसाठी महाराष्ट्राच्या अध्यात्म, समाजशास्त्र आणि इतिहास यांचा अभ्यास करणारे डॉ. सदानंद मोरे यांचे मार्गदर्शन लाभणार आहे, ज्यामुळे कार्यक्रमाची वैचारिक खोली अधिक समृद्ध होणार आहे.

१ एप्रिलपासून दररोज प्रेक्षकांच्या भेटीला

‘कोण होणार महाराष्ट्राचा लाडका कीर्तनकार’ हा नव्याने सादर होणारा रिअ‍ॅलिटी शो १ एप्रिलपासून सोमवार ते शनिवार, रात्री ८ वाजता सोनी मराठीवर प्रसारित होणार आहे. महाराष्ट्राच्या परंपरेला आधुनिकतेच्या माध्यमातून नवसंजीवनी देणारा हा शो निश्चितच प्रेक्षकांच्या मनाला भावणार आहे.