एव्हरेस्ट एंटरटेनमेंट प्रस्तुत आणि वेटक्लाऊड प्रोडक्शन निर्मित ‘गुलकंद’ मधील ‘चंचल’ हे गोड प्रेमगीत काही दिवसांपूर्वीच प्रदर्शित झालं होतं आणि प्रेक्षकांनी त्याला भरभरून प्रेम दिलं. आता ‘चल जाऊ डेटवर’ हे चित्रपटातील दुसरं गाणंही प्रेक्षकांच्या भेटीला आलं आहे.

गंमतीदार गाण्याचे खास आकर्षण

‘चल जाऊ डेटवर’ हे गाणं वैशाली सामंत आणि अवधूत गुप्ते यांच्या जोशपूर्ण आवाजात स्वरबद्ध झालं आहे. प्रशांत मडपूवार यांच्या शब्दांना अविनाश विश्वजीत यांच्या संगीतातील तालाची जोड मिळाल्याने हे गाणं प्रेक्षकांच्या मनात घर करेल.

सई ताम्हणकर आणि समीर चौघुले यांची भन्नाट केमिस्ट्री

गाण्यात सई ताम्हणकर आणि समीर चौघुले यांची धमाल केमिस्ट्री दिसते, तर प्रसाद ओक आणि ईशा डे यांचाही यात खास सहभाग आहे. सई आणि समीरचे नृत्य हा एक विशेष सरप्राइझ ठरणार आहे. ढवळे फॅमिली नेमकी कुठे आणि कशी डेटवर जाणार, हे पाहण्यासाठी प्रेक्षकांना १ मे २०२५ रोजी चित्रपटगृहात जावं लागेल!

दिग्दर्शक आणि निर्मात्यांची खास प्रतिक्रिया

चित्रपटाचे दिग्दर्शक आणि निर्माते सचिन गोस्वामी सांगतात,
“गाण्याचं संगीत आणि बोल इतके भन्नाट आहेत की, त्याचं चित्रीकरणही तसंच करावं लागलं. मस्त कलरफुल ठिकाणी चित्रित करण्यात आलेलं हे गाणं संगीतप्रेमींना नक्कीच आवडेल. सई आणि समीर जरी डेटवर जात असले तरी प्रेक्षकांनी मात्र १ मे रोजी संपूर्ण कुटुंबासोबत ‘गुलकंद’ ची डेट एन्जॉय करावी.”

निर्माते संजय छाब्रिया म्हणतात,
“चित्रपट यशस्वी होण्यात गाण्यांची मोठी भूमिका असते. काही गोष्टी कथेतून व्यक्त करता येत नाहीत, पण गाण्यातून त्या अधिक प्रभावीपणे पोहोचता येतात. ‘चल जाऊ डेटवर’ हे असंच एक एनर्जेटिक आणि थिरकायला लावणारं गाणं आहे, जे प्रेक्षक चित्रपटगृहात पाहतानाही एन्जॉय करतील.”

तगड्या कलाकारांची फौज ‘गुलकंद’ मध्ये

सचिन मोटे लिखित आणि सचिन गोस्वामी दिग्दर्शित ‘गुलकंद’ मध्ये सई ताम्हणकर, समीर चौघुले, ईशा डे, प्रसाद ओक, वनिता खरात, मंदार मांडवकर, जुई भागवत, तेजस राऊत, शार्विल आगटे यांसारखे दमदार कलाकार झळकणार आहेत.

चित्रपटाची निर्मिती

‘गुलकंद’ हा चित्रपट सचिन गोस्वामी, सचिन मोटे आणि संजय छाब्रिया यांनी संयुक्तरीत्या निर्मित केला आहे.

१ मे २०२५ रोजी ‘गुलकंद’ चित्रपटगृहात

ही धमाल डेट नेमकी कशी असेल, हे जाणून घेण्यासाठी १ मे २०२५ रोजी ‘गुलकंद’ चित्रपटगृहात पाहायला विसरू नका!