नेहमीच अभिनयातून प्रेक्षकांच्या मनावर अधिराज्य गाजवणारी, दमदार उपस्थिती आणि भावनांचा सखोल आविष्कार करणारी अभिनेत्री अमृता खानविलकर यंदाच्या गुढीपाडव्याच्या दिवशी एका विशेष भावनिक अनुभवातून जात आहे. कारण, ‘एकम’ या तिच्या स्वप्नवत नव्या घरातला हा पहिलाच गुढीपाडवा, आणि त्यामुळे तो तिच्यासाठी एक वेगळंच स्थान बाळगून आहे.

गुढीपाडवा — एक सण, अनेक आठवणी

अमृता सांगते, “गुढीपाडवा हा सण कायमच माझ्या हृदयाच्या अगदी जवळचा राहिलाय. लहानपणी पुण्यात बाबा गुढीपाडव्याच्या सगळ्या विधी अगदी बारकाईने करत. पूजा संपल्यावर आम्हा बहिणींना बसवून त्या सणाचं महत्त्व सांगायचे. एक वाक्य त्यांनी तेव्हा म्हटलं होतं — ‘गुढी आकाशाला भिडली पाहिजे’ — आणि हेच वाक्य माझ्या आयुष्याचं ब्रीद बनलं.”

ती पुढे सांगते की, “गुढी म्हणजे विजय, नव्या सुरुवातीचं प्रतीक आणि आपल्या स्वप्नांची प्रतिमा. गुढी उंच उभारतो म्हणजे आपली ध्येयंही उंच असावी आणि त्यासाठी न थांबता प्रयत्न करावा, हेच मला कायम प्रेरणा देत आलं आहे.”

‘एकम’ — स्वतःचं घर, स्वतःचं अस्तित्व

अलीकडेच अमृताने मुंबईत स्वतःचं स्वप्नवत घर घेतलं आहे. ती अभिमानाने सांगते, “एवढी वर्षं इंडस्ट्रीत काम केल्यावर मी आज ठामपणे म्हणू शकते की ‘एकम’ हे माझं खरंखुरं घर आहे. केवळ वास्तू नाही, तर यात मला स्वतःला सापडले आहे. इथं मला शांतता, स्थैर्य, आणि आत्मविश्वास लाभला आहे.”

या नव्या घरातला पहिलाच सण असल्यामुळे अमृता म्हणते, “हा गुढीपाडवा माझ्यासाठी खरंच एक स्वप्नपूर्ती आहे. हे घर आकाराला येताना जसं जादू झाली तसं माझ्या आयुष्यातही नवी ऊर्जा आली आहे.”

आगामी प्रोजेक्ट्स आणि पहिले ‘आयटम साँग’

अमृता लवकरच ‘सुशीला – सुजीत’ या आगामी मराठी चित्रपटात पहिल्यांदाच आयटम साँग करताना दिसणार आहे. याशिवाय तिचे अनेक हिंदी आणि मराठी प्रोजेक्ट्सही येणाऱ्या काळात प्रेक्षकांच्या भेटीला येणार आहेत.

स्वप्नं उंच उभारायची असतात – अमृता खानविलकर स्टाइलने!

अमृता खानविलकरसाठी गुढीपाडवा हा केवळ सण नसून स्वतःच्या आयुष्यातील सकारात्मक ऊर्जा, स्वप्नपूर्ती, आणि आभार प्रदर्शन करण्याचा दिवस आहे. आणि यंदा, ‘एकम’मध्ये उभारलेली गुढी म्हणजे केवळ धार्मिक प्रतीक नव्हे, तर तिच्या जीवन प्रवासातली एक सशक्त, आत्मविश्वासाने भरलेली उंच भरारी आहे.