अशा टॅगलाईनसह आलेल्या ‘अवकारीका’ या आगामी चित्रपटाचे मोशन पोस्टर नुकतेच प्रदर्शित झाले असून, त्यामध्ये कचऱ्याच्या ढिगाऱ्यासमोर हातात झाडू घेऊन एक स्वच्छता दूत अगतिकपणे उभा असल्याचे भावस्पर्शी दृश्य पाहायला मिळते.

स्वच्छतेच्या माध्यमातून वेदनेचा शोध

‘अवकारीका’ ही फक्त एका माणसाच्या जीवनकहाणीवर आधारित नसून, ही त्याच्या वेदनेचा आणि आत्मसन्मानाच्या शोधाची कहाणी आहे. समाजाला स्वच्छता कामगारांच्या श्रमांची जाणीव व्हावी आणि स्वच्छतेविषयी जागरूकता निर्माण व्हावी या भावनेतून हा चित्रपट साकारला जात आहे.

१३ जून रोजी प्रदर्शित होणारा चित्रपट

रेडबड मोशन पिक्चर प्रस्तुत ‘अवकारीका’ हा चित्रपट येत्या १३ जून रोजी प्रेक्षकांच्या भेटीला येणार आहे. चित्रपटाचे दिग्दर्शन अरविंद भोसले यांनी केले असून, निर्मिती भारत टिळेकर यांनी केली आहे. सहनिर्मिती मनोज गायकवाड, अरविंद भोसले, मृणाल कानडे आणि गीता सिंग यांची आहे.

विराट मडके स्वच्छता दूताच्या भूमिकेत

चित्रपटात अभिनेता विराट मडके एका स्वच्छता कर्मचाऱ्याच्या भूमिकेत दिसणार असून, त्याच्यासोबत राहुल फलटणकर, रोहित पवार, विनोद खुरंगळे, पिया कोसुम्बकर, नितीन लोंढे, प्रफुल्ल कांबळे, स्नेहा बालपांडे आणि बालकलाकार वैभवी कुटे, उन्नती माने, कार्तिकी बट्टे हे देखील झळकणार आहेत.

तांत्रिक बाजू आणि संगीताची जमेची बाजू

चित्रपटाचे कथा-पटकथा, संवाद आणि गीते स्वतः दिग्दर्शक अरविंद भोसले यांनी लिहिली आहेत. छायांकन करण तांदळे यांचे असून संकलन अथर्व मुळे यांचे आहे. सहदिग्दर्शक रेहमान पठाण आणि कार्यकारी निर्माता चेतन परदेशी आहेत. संगीत श्रेयस देशपांडे यांचे असून गायक कैलास खैर, सुनिधी चौहान आणि ज्ञानेश्वर मेश्राम यांच्या सुमधुर आवाजात चित्रपटातील गाणी सजली आहेत.

‘अवकारीका’ हा चित्रपट सामाजिक भान जागवणारा आणि अंतर्मुख करणारा ठरणार आहे, याची झलक मोशन पोस्टरवरूनच मिळते.