ए अँड एन सिनेमाज एलएलपी आणि ए३ इव्हेंट्स अँड मिडिया सर्व्हिस प्रॉडक्शन निर्मित ‘जारण’ हा रहस्य आणि भयपट प्रकारातील मराठी चित्रपट ६ जून २०२५ रोजी प्रेक्षकांच्या भेटीला येत आहे. या चित्रपटाचे दिग्दर्शन आणि लेखन हृषीकेश गुप्ते यांनी केले असून, निर्माते अमोल भगत आणि नितीन भालचंद्र कुलकर्णी आहेत.

मोशन पोस्टरने निर्माण केली उत्सुकता

या चित्रपटाचे नुकतेच मोशन पोस्टर प्रदर्शित झाले असून, त्यात एका विवाहितेच्या हातात एक बाहुली दिसते, ज्यावर टाचण्या टोचलेल्या आहेत. पोस्टरला भीतीदायक संगीताची साथ असून त्यातून एक रहस्य आणि करणीचा सुगावा लागतो. यामुळेच प्रेक्षकांमध्ये उत्सुकता वाढली आहे – ही केवळ जारण की त्यामागे दडलेले अजून काही?

‘जारण’ म्हणजे काय?

दिग्दर्शक हृषीकेश गुप्ते यांच्यानुसार, “हा चित्रपट करणी, जारण या अंधश्रद्धांमुळे एका कुटुंबावर येणाऱ्या संकटांची गोष्ट सांगतो. भयपट असला तरी त्यात मानवी भावना, दुहेरी आयुष्य आणि कौटुंबिक संघर्ष यांचे मिश्रण आहे. प्रेक्षकांना हे कथानक एक वेगळा भयगूढ अनुभव देईल.”

निर्मात्यांचा विश्वास

निर्माते अमोल भगत म्हणतात, “‘जारण’ च्या निर्मितीमागे भय, भावनिक संघर्ष आणि रहस्य यांचा त्रिवेणी संगम प्रेक्षकांसमोर मांडायचा प्रयत्न आहे. हृषीकेश यांचे दिग्दर्शन या कथानकाला अधिक सशक्त बनवते.”

६ जून २०२५ ला उलगडणार रहस्य

चित्रपटातील कलाकारांची माहिती अद्याप गुलदस्त्यात ठेवण्यात आली आहे, ज्यामुळे रहस्य आणखी गहिरं झालं आहे. तरीही चित्रपटाच्या विषयामुळे ‘जारण’ हा चित्रपट प्रेक्षकांच्या उत्सुकतेचा केंद्रबिंदू बनला आहे.

‘जारण’ ६ जून २०२५ पासून आपल्या जवळच्या चित्रपटगृहात – भीती, भावना आणि रहस्याचा एक अनोखा अनुभव.