महेश मांजरेकर, रेणुका शहाणे आणि सुबोध भावे यांच्या प्रमुख भूमिका असलेल्या ‘देवमाणूस’ या बहुप्रतिक्षित चित्रपटातील पहिले गाणे ‘पांडुरंग’ प्रेक्षकांच्या भेटीला आले आहे. लव रंजन आणि अंकुर गर्ग यांच्या लव फिल्म्स निर्मित, या चित्रपटातील हे भक्तिगीत संगीतप्रेमींना भावनिक आणि अध्यात्मिक प्रवासाची अनुभूती देणारे ठरत आहे.

सोनू निगम यांच्या आवाजात विठ्ठल भक्ती

सोनू निगम यांच्या सुमधुर स्वरांनी सजलेले, रोहन-रोहन यांचे संगीत असलेले आणि प्रसाद मदपुवार यांनी लिहिलेले ‘पांडुरंग’ हे गाणे विठ्ठलाच्या भक्तीसाठी समर्पित आहे. या गाण्यात महेश मांजरेकर यांची वारी यात्रेतील दृश्येही दिसत असून, ती त्यांच्या भावनिक प्रवासाची गाथा सांगतात.

सोनू निगम यांचा अनुभव

सोनू निगम म्हणतात, “हे माझं पहिलं वारी गाणं असून, त्याचा भाग होणं माझ्यासाठी अत्यंत भावनिक आहे. रोहन-रोहन यांनी हे गाणं ऐकवलं तेव्हा त्यातील भक्तिरसाने मी भारावून गेलो. यातले काही पारंपरिक शब्द समजून घेण्यासाठी मी विशेष संवाद साधला आणि त्यातूनच गाण्याच्या भावनेचा गाभा समजला.”

संगीतकार रोहन-रोहन यांचे मत

“या गाण्यासाठी शांत, भावपूर्ण आवाज हवा होता, आणि सोनू निगम सरांच्या स्वरांमध्ये ती उंची सहज उमटते,” असं संगीतकार रोहन रोहन म्हणतात. “हे गाणं रेकॉर्ड करताना आम्हालाही एका आध्यात्मिक प्रक्रियेचा अनुभव आला.”

सर्व संगीत प्लॅटफॉर्मवर उपलब्ध

‘पांडुरंग’ हे गाणे युनिव्हर्सल म्युझिक इंडियाद्वारे वितरित करण्यात येणार असून, ते सर्व संगीत प्लॅटफॉर्मवर उपलब्ध आहे.

२५ एप्रिल रोजी ‘देवमाणूस’ प्रेक्षकांच्या भेटीला

तेजस प्रभा विजय देऊस्कर दिग्दर्शित आणि लव रंजन, अंकुर गर्ग निर्मित ‘देवमाणूस’ हा चित्रपट २५ एप्रिल २०२५ रोजी चित्रपटगृहांमध्ये प्रदर्शित होणार आहे. विठ्ठल भक्ती, भावनिक कथेचा वेध आणि उत्कृष्ट संगीत यांचा संगम असलेला हा चित्रपट प्रेक्षकांच्या मनात आपली खास जागा निर्माण करेल.