दलित आणि जातीभेदाविरोधातील संघर्षाची थरारक आणि वास्तववादी कथा ‘जयभीम पँथर – एक संघर्ष’ या आगामी चित्रपटातून मोठ्या पडद्यावर येणार आहे. या चित्रपटाचा ट्रेलर नुकताच लाँच झाला असून, त्याला समाजमाध्यमांवर मोठा प्रतिसाद मिळत आहे. महामानव भारतरत्न डॉ. बाबासाहेब आंबेडकर यांच्या जयंतीनिमित्त, ११ एप्रिल रोजी हा चित्रपट प्रदर्शित होणार आहे.

नवयान ड्रीम फिल्म प्रोडक्शनची सशक्त निर्मिती

भदंत शीलबोधी थेरो यांच्या नवयान ड्रीम फिल्म प्रोडक्शनद्वारे निर्मित ‘जयभीम पँथर’ चित्रपट सामाजिक क्रांतीच्या दिशेने एक सशक्त पाऊल मानला जात आहे. आयु. रामभाऊ तायडे हे सहनिर्माते असून, बहुजन समाजाच्या न्याय आणि स्वाभिमानासाठी आवाज उठवणाऱ्या माध्यमांची गरज ओळखून हा प्रकल्प साकारला आहे.

दिग्दर्शक निशांत नाथाराम धापसे यांची ताकदवान मांडणी

चित्रपटाचे लेखन आणि दिग्दर्शन निशांत नाथाराम धापसे यांनी केले आहे. संतोष गाडे प्रोजेक्ट हेड, बाबासाहेब पाटील कार्यकारी निर्माता तर प्रकाश सिंगारे यांनी कलादिग्दर्शनाची जबाबदारी सांभाळली आहे. चित्रपटाचे संगीत आणि पार्श्वसंगीत रोहित नागभिडे यांनी दिले असून, “माझ्या भीमाची जयंती” हे आनंद शिंदे यांच्या आवाजातील गीत सध्या लोकप्रियतेच्या शिखरावर आहे.

तगडी स्टारकास्ट, प्रभावी अभिनय

चित्रपटात गौरव मोरे, चिन्मय उदगीरकर, मिलिंद शिंदे, अभिजीत चव्हाण, सोनाली पाटील, शशांक शेंडे, जयवंत वाडकर, संजय कुलकर्णी, प्रवीण डाळिंबकर, विनय धाकडे आणि प्रियांका उबाळे यांसारख्या सशक्त अभिनेत्यांची मांदियाळी आहे. त्यांच्या अभिनयाच्या बळावर चित्रपटातली कथा अधिक प्रभावीपणे उभी राहते.

संघर्ष, क्रांती आणि समतेचा आवाज

दलित, शोषित, बहुजन समाजातील घटकांवर होणाऱ्या अन्यायाच्या पार्श्वभूमीवर ‘जयभीम पँथर’ ही कहाणी उभी राहते. जातीभेद, अत्याचार, बहुजन संघटनांची चळवळ, शिक्षण आणि सामाजिक जागृती यांचा सर्वसमावेशक पट या चित्रपटात उलगडतो. डॉ. बाबासाहेब आंबेडकर यांच्या विचारधारेला आधार मानत, सामाजिक परिवर्तनाचा संदेश हा चित्रपट देण्याचा प्रयत्न करतो.

११ एप्रिलला चित्रपटगृहात भिडणार वास्तवाचे दर्शन

सध्याच्या सामाजिक-राजकीय संदर्भात ‘जयभीम पँथर – एक संघर्ष’ हा चित्रपट एक महत्त्वाचा विचार मंच ठरू शकतो. ट्रेलरमधून दिसणाऱ्या दृश्यांवरून आणि संवादांवरून हे स्पष्ट होतं की, हा चित्रपट केवळ मनोरंजन न राहता विचारांना हादरवणारा अनुभव ठरेल. त्यामुळे ११ एप्रिल रोजी चित्रपटगृहात हा चित्रपट पाहण्याची प्रचंड उत्सुकता प्रेक्षकांमध्ये निर्माण झाली आहे.