राजकुमार हिरानी, आर. माधवन, शर्मन जोशी आणि रितेश देशमुख यांनी शेअर केला ट्रेलर

उन्हाळ्याच्या सुट्ट्यांची धमाल अनुभवण्यासाठी सज्ज झालेला ‘एप्रिल मे ९९’ हा चित्रपट २३ मे रोजी प्रदर्शित होणार असून, या चित्रपटाच्या ट्रेलरने सध्या सर्वांचे लक्ष वेधून घेतले आहे. विशेष म्हणजे, ‘थ्री इडियट्स’सारख्या आयकॉनिक चित्रपटाच्या टीमने – राजकुमार हिरानी, आर. माधवन, शर्मन जोशी आणि रितेश देशमुख यांनी ट्रेलर शेअर करत टीमला दिल्या शुभेच्छा.

सुट्टीच्या आठवणींना उजाळा देणारी कथा

‘एप्रिल मे ९९’ हा चित्रपट आपल्या बालपणीच्या उन्हाळी सुट्ट्यांचे सुंदर स्मरण करून देतो. कोकणाच्या पार्श्वभूमीवर आधारित या चित्रपटात कृष्णा, सिद्धेश, प्रसाद आणि जाई या चार किशोरवयीन मुलांचा भावनिक व आनंददायी प्रवास उलगडतो. सायकलवरून गाव पालथे घालणे, बर्फाचे गोळे खाणे, विहिरीत डुबक्या मारणे आणि खोडकरपणा करत दिवस घालवणे – ही सगळी अनुभूती ट्रेलरमधून प्रेक्षकांना भिडते.

चित्रपटाच्या दिग्दर्शकाचे मनोगत

दिग्दर्शक रोहन मापुस्कर म्हणतात, “आजकाल व्हेकेशन्स हे शहरी पद्धतीने साजरे होतात, पण कोकणात अनुभवलेली सुट्टी काही वेगळीच असते. हीच जुनी जादू या चित्रपटातून पुन्हा उलगडण्याचा प्रयत्न केला आहे.”

निर्मात्यांचा भावनिक दृष्टिकोन

निर्माते राजेश मापुस्कर म्हणतात, “हा चित्रपट म्हणजे आपल्या सर्वांच्या बालपणाचा, कोकणाच्या सुट्ट्यांचा आरसा आहे. प्रेक्षकांनी नक्कीच या चित्रपटात स्वतःला शोधलं पाहिजे.”

प्रमुख कलाकार आणि सशक्त टीम

चित्रपटात आर्यन मेंगजी, श्रेयस थोरात, मंथन काणेकर आणि साजिरी जोशी प्रमुख भूमिकेत आहेत. चित्रपटाचे लेखन-दिग्दर्शन रोहन मापुस्कर यांनी केलं असून, निर्माते राजेश मापुस्कर, मधुकर कोटीयन, जोगेश भूटानी, मॉरिस नून आहेत आणि लॉरेन्स डिसोझा सहनिर्माते आहेत.

‘एप्रिल मे ९९’ – केवळ एक चित्रपट नाही, तर एक नॉस्टाल्जिक प्रवास

‘एप्रिल मे ९९’ हा चित्रपट प्रेक्षकांना त्यांच्या बालपणीच्या रम्य सुट्ट्यांमध्ये घेऊन जाणार आहे – खऱ्या अर्थाने एक निखळ, अनुभवशील आणि आनंददायी सिनेमा जो प्रत्येकाच्या अंतःकरणाला भिडेल. २३ मे पासून सर्व चित्रपटगृहांत.