तीन मित्र आणि त्यांचं आंबट शौकीन आयुष्य… ‘आंबट शौकीन’ या धमाल मराठी चित्रपटाचा ट्रेलर नुकताच प्रदर्शित झाला असून त्याने प्रेक्षकांच्या मनात उत्सुकता निर्माण केली आहे. ललित, वरुण आणि रेड्डी या खट्याळ तिघांची कथा या ट्रेलरमधून उलगडते आणि त्यांचा वेगळा अंदाज प्रेक्षकांना हसवतो आणि विचारही करायला लावतो.

प्रेम, मैत्री आणि सोशल मीडियाच्या गुंत्यात अडकलेलं आयुष्य

चित्रपटात केवळ विनोद नाही, तर प्रेम, मैत्री, सोशल मीडियामुळे बदललेली ओळख आणि भावनिक गुंतागुंत यांचा सुरेख मिलाफ आहे. या तिघांच्या आयुष्यातील आंबट क्षण त्यांच्या भविष्यावर कसा परिणाम करतात, हे पाहणं रंजक ठरणार आहे.

१३ जून रोजी होणार धमाल चित्रपटाचा प्रदर्श

हेक्सव्हिजन एंटरटेनमेंट, एसएस अँड केएल ब्रदर्स प्रॉडक्शन्स, लॅब्रोस एंटरटेनमेंट आणि बिग ब्रेन प्रॉडक्शन्स प्रस्तुत ‘आंबट शौकीन’ १३ जून २०२५ रोजी प्रदर्शित होणार आहे. दिग्दर्शनाची धुरा निखिल वैरागर यांनी सांभाळली असून त्यांनी एका हलक्याफुलक्या पण अंतर्मुख करणाऱ्या कथानकाची मांडणी केली आहे.

स्टारकास्ट – विनोद, प्रतिभा आणि धमाल यांचा तुफान तडका

या चित्रपटात पूजा सावंत, अक्षय टंकसाळे, निखिल वैरागर, किरण गायकवाड यांच्या प्रमुख भूमिका आहेत. यांच्यासोबत प्रार्थना बेहेरे, भाऊ कदम, पार्थ भालेराव, अभिजीत खांडकेकर, मोनालिसा बागल, अमेय वाघ, चिन्मय संत, राहुल मगदूम यांचाही प्रभावी सहभाग आहे.

दिग्दर्शकाचा दृष्टिकोन – तरुणांच्या वास्तवाशी जोडलेली कथा

दिग्दर्शक निखिल वैरागर सांगतात, “‘आंबट शौकीन’ ही केवळ मैत्री-प्रेमाची कथा नाही, तर सोशल मीडियाच्या आभासी दुनियेत हरवलेल्या ओळखीच्या भावनिक परिणामांची कहाणी आहे. हास्याच्या माध्यमातून आजच्या तरुणांच्या मानसिकतेवर भाष्य करणं हे आमचं मुख्य उद्दिष्ट आहे.”

‘आंबट शौकीन’ – एक आंबटगोड प्रवास, जो हसवूनही जातो आणि विचारातही टाकतो!