मराठीतील लोकप्रिय अभिनेता आता हिंदीत नायकाच्या भूमिकेत
आजवर अनेक मराठी कलाकारांनी हिंदी चित्रपटसृष्टीत यशस्वी पदार्पण केले आहे. त्यात आता प्रथमेश परब याचेही नाव सामील होणार आहे. आपल्या विनोदी आणि प्रभावी अभिनयासाठी ओळखला जाणारा प्रथमेश लवकरच ‘पोडर’ या हिंदी चित्रपटात मुख्य भूमिकेत झळकणार आहे.

‘पोडर’ चित्रपटात प्रथमच मुख्य भूमिका

‘पोडर’ या चित्रपटाची निर्मिती गुलमोहर टॉकीजच्या बॅनरखाली समीर शेख करत आहेत. या चित्रपटाचे दिग्दर्शन आदित्य केळगावकर यांनी केले असून गणेश पूजनाच्या दिवशी प्रथमेशच्या हस्ते क्लॅप देत चित्रपटाचा मुहूर्त पार पडला.

छत्रपती संभाजीनगरमध्ये सुरू झाले चित्रिकरण
मुहूर्तानंतर लगेचच छत्रपती संभाजीनगरमध्ये ‘पोडर’ चित्रपटाचे चित्रीकरण सुरू करण्यात आले आहे. शहरातील विविध लोकेशन्सवर हे शूटिंग होणार असून संदीप यादव हे या चित्रपटाचे सिनेमॅटोग्राफर आहेत.

प्रथमेशच्या अभिनय प्रवासात नवा टप्पा
प्रथमेशने याआधी काही हिंदी चित्रपटांमध्ये सहाय्यक भूमिका साकारल्या होत्या. मात्र, ही त्याची पहिलीच मुख्य भूमिका आहे. विनोदी, गंभीर, भावनिक अशा विविध शेड्सच्या व्यक्तिरेखा साकारण्याचा अनुभव त्याच्याकडे आहे.

चित्रपटात रजत कपूरसह दमदार कलाकारांची फळी
या चित्रपटात रजत कपूर, राजसी भावे, दुर्गेश कुमार यांसारखे कलाकार देखील झळकणार आहेत. त्यामुळे हा चित्रपट रसिकांसाठी नक्कीच एक वेगळी अनुभूती देणारा ठरणार आहे.

प्रेक्षकांमध्ये निर्माण झाली उत्सुकता
प्रथमेश परबप्रेमी प्रेक्षकांसाठी ही आनंदाची बातमी असून मराठीतील आपला लाडका अभिनेता आता हिंदीतही नायक म्हणून आपले वेगळे स्थान निर्माण करेल, अशी अपेक्षा व्यक्त केली जात आहे.