‘इबलिस’ चित्रपटाची सोशल मीडियावर धुमाकूळ

काही दिवसांपूर्वी ‘आता लढाई होणार’ अशा शब्दांत व्हायरल झालेल्या व्हिडिओमुळे चर्चेत आलेल्या ‘इबलिस’ या चित्रपटाचं पोस्टर नुकतंच प्रदर्शित झालं. भगवा झेंडा, किल्ला, दुर्बीण, शालेय दप्तर आणि दूरध्वनी यांसारख्या प्रतिमा असलेल्या या पोस्टरमुळे प्रेक्षकांमध्ये उत्कंठा निर्माण झाली आहे.

पालक आणि शिक्षकांना विचारात टाकणारी कथा

‘इबलिस’ या चित्रपटात काही हुशार पण हटके विचार करणारी मुलं त्यांच्या ध्येयासाठी एक मोहीम आखतात. या मोहिमेतून त्यांचा इतिहासाशी असलेला संवाद आणि त्यातून उद्भवणाऱ्या समस्या हाताळण्याची क्षमता प्रेक्षकांना भावणार आहे. या कथेमध्ये प्रेरणा, कुतूहल आणि सामाजिक भान आहे.

‘बंदुक्या’ फेम राहुल चौधरी यांचे दिग्दर्शन

‘बंदुक्या’सारख्या चित्रपटाने नाव मिळवलेल्या राहुल मनोहर चौधरी यांनी ‘इबलिस’चं दिग्दर्शन केलं आहे. ‘बंदुक्या’च्या यशानंतर त्यांनी पुन्हा एकदा सामाजिक विचार असलेला, पण प्रेक्षकांना गुंतवून ठेवणारा चित्रपट घेऊन यायचं ठरवलं. चित्रपटाचे कथालेखक, संवादलेखक आणि पटकथालेखक नामदेव मुरकुटे आहेत.

‘इबलिस’ म्हणजे काय?

राहुल चौधरी सांगतात, “‘इबलिस’ हा उर्दू शब्द असून गावाकडच्या भागात अतिबुद्धिमान आणि खोडकर मुलांसाठी वापरला जातो. यात ११ मुलांचं अभिनय कौशल्य दिसणार आहे. या नावामागे एक सशक्त सामाजिक अर्थ आहे जो चित्रपट पाहिल्यानंतर उमगेल.”

उत्कृष्ट कलाकारांची मांदियाळी

या चित्रपटात विजय निकम, पूनम शेंडे, अशोक केंद्रे, मंगेश सातपुते, नामदेव मुरकुटे आणि राजेश आहेर यांसारख्या कलाकारांसोबत ११ बालकलाकारांनीही लक्षवेधी भूमिका साकारल्या आहेत. चित्रपटाच्या निर्मितीची धुरा तेशा गर्ल चाइल्ड प्रोडक्शन, सार्थी एंटरटेनमेंट आणि प्राजक्ता राहुल चौधरी यांनी सांभाळली आहे.

कुटुंबासह पहावासा चित्रपट

राहुल चौधरी प्रेक्षकांना आवाहन करत म्हणतात, “या चित्रपटात छत्रपती शिवाजी महाराजांचे विचार मुलांमध्ये कसे रुजवता येतील, हे दाखवलं आहे. त्यामुळे प्रत्येकाने आपल्या कुटुंबासह आणि मुलांसह हा चित्रपट पाहावा.”

‘इबलिस’ येत आहे २० जून रोजी सर्वत्र प्रदर्शित होण्यासाठी सज्ज

२० जूनपासून ‘इबलिस’ चित्रपट संपूर्ण महाराष्ट्रात चित्रपटगृहात प्रदर्शित होणार आहे. रहस्य, विचारप्रवृत्त आणि प्रेरणादायी असा हा चित्रपट सामाजिक संदेश देणाऱ्या सिनेमांची परंपरा पुढे नेईल, यात शंका नाही.