सामाजिक भान जपणारे दिग्दर्शक अरविंद भोसले यांची नवी कलाकृती

स्वच्छतेची सामाजिक गरज, कचऱ्यातून उद्‍भवणाऱ्या आरोग्यविषयक असंख्य समस्या व त्या जाणीवेची आणि त्यावरील उपायांची प्रभावी मांडणी झाली ती नाट्य सादरीकरणातून. रवींद्र नाट्यमंदिरातल्या रंगमंचावर रंगलेल्या बहारदार पथनाट्याने रसिकांची मने जिंकली. चित्रपटाच्या प्रमोशनसाठी स्वच्छतेचं पथनाट्य सादर करीत पहिल्यांदाच अनोख्या पद्धतीने ‘अवकारीका’ या मराठी चित्रपटाचा ट्रेलर अनावरण सोहळा रंगला. याप्रसंगी चित्रपटातील कलाकार, तंत्रज्ञ, तसेच अनेक मान्यवर उपस्थित होते. या सोहळ्यासाठी प्रमुख पाहुणे म्हणून अतिरिक्त पोलीस महासंचालक मा. श्री. कृष्णप्रकाशजी आवर्जून उपस्थित होते.

‘अवकारीका’ चित्रपट १ ऑगस्टला होतोय प्रदर्शित

रेडबड मोशन पिक्चर या बॅनर अंतर्गत ‘अवकारीका’ हा मराठी चित्रपट येत्या १ ऑगस्टला प्रेक्षकांच्या भेटीला येत आहे. या चित्रपटाचे दिग्दर्शन अरविंद भोसले यांनी केलं असून निर्मिती भारत टिळेकर, अरुण जाधव यांनी केली आहे. सहनिर्मिती मनोज गायकवाड, अरविंद भोसले, मृणाल कानडे, गीता सिंग यांची आहे.

मनोरंजनातून समाजप्रबोधनाचा प्रयत्न

चित्रपट मनोरंजनाचे माध्यम असले तरी त्यातून समाजप्रबोधन होणे आवश्यक असतं. देशातील सामाजिक समस्यांबाबत लोकांना जागरूक करणे हे साहित्यिक, कलाकार यांचे आद्य कर्तव्य आहे. आपल्यासमोर उभ्या ठाकणाऱ्या प्रश्नांना आपणच तोंड द्यायचं आहे, हे लक्षात येऊन एका महत्त्वाच्या सामाजिक प्रश्नाची जाणीव करून देण्यासाठी एकत्र आलेल्या ‘अवकारीका’ चित्रपटाच्या टीमच्या विलक्षण प्रयत्नांना दाद देत अतिरिक्त पोलीस महासंचालक श्री. कृष्णप्रकाश यांनी मनःपूर्वक शुभेच्छा दिल्या.

स्वच्छतादूतांच्या वेदना पडद्यावर

स्वच्छते बाबतच्या अनास्थेच्या प्रश्नावर फक्त हळहळण्या व्यतिरिक्त समाजात फारशी कृती घडताना दिसत नाही. व्यथित करणारी हीच गोष्ट दिग्दर्शक अरविंद भोसले यांच्या मनात खोलवर रुजली आणि त्यातून या चित्रपटाची संकल्पना साकार झाली. समाजाकडून दुर्लक्षित झालेल्या स्वच्छतादूतांच्या आयुष्यावर भाष्य करणारा ‘अवकारीका’ हा चित्रपट त्यांनी समाजासमोर सादर केला आहे. सफाई कामगारांच्या आयुष्यात सकारात्मक बदल व्हावा, या उद्देशाने हा चित्रपट निर्माण झाल्याचं भोसले यांनी सांगितलं.

जागतिक प्रश्न झालेल्या स्वच्छतेचा संदर्भ

‘स्वच्छता हा आज जागतिक प्रश्न आहे. वेळीच आपण आपली जबाबदारी घेतली नाही तर मोठ्या संकटांना सामोरं जावं लागेल. या चित्रपटाच्या निमित्ताने दिग्दर्शक अरविंद भोसले यांनी ही जबाबदारी घेतली आणि मला ती महत्त्वाची वाटली,’ असे मत अभिनेता विराट मडके यांनी व्यक्त केले. सामाजिक भान जपण्याचा आणि चांगल्या प्रोजेक्टचा भाग होण्याचा आनंद त्यांनी शेअर केला.

दैनंदिन वास्तवाशी जोडलेली कथा

‘अवकारीका’ चित्रपटामार्फत अत्यंत महत्त्वाचा विषय प्रेक्षकांसमोर मांडला जातो आहे. समाजाला नवा दृष्टिकोन मिळावा, या उद्देशाने हा चित्रपट मोठ्या पडद्यावर येत असून प्रेक्षक नक्कीच सकारात्मक प्रतिसाद देतील, असा विश्वास निर्मात्यांनी व्यक्त केला आहे.

कलाकारांची दमदार टीम

या चित्रपटात अभिनेता विराट मडके स्वच्छतादूताच्या भूमिकेत झळकणार असून त्याच्यासोबत राहुल फलटणकर, रोहित पवार, विनोद खुरंगळे, पिया कोसुम्बकर, नितीन लोंढे, प्रफुल्ल कांबळे, स्नेहा बालपांडे तसेच बालकलाकार वैभवी कुटे, उन्नती माने, कार्तिकी बट्टे हे कलाकार महत्त्वपूर्ण भूमिका साकारत आहेत.

तांत्रिक टीम आणि संगीतविभाग

चित्रपटाची कथा, पटकथा, संवाद आणि गीते अरविंद भोसले यांनी लिहिली असून छायांकन करण तांदळे यांचे आहे. संकलन अथर्व मुळे यांनी केलं असून सहदिग्दर्शक रेहमान पठाण आहेत. कार्यकारी निर्माता चेतन परदेशी असून संगीत श्रेयस देशपांडे यांचं आहे. चित्रपटातील गीते कैलास खेर, सुनिधी चौहान आणि ज्ञानेश्वर मेश्राम यांनी गायली आहेत. कलादिग्दर्शन शैलेश रणदिवे यांचं आहे.

१ ऑगस्टपासून ‘अवकारीका’ चित्रपटगृहात

रेडबड मोशन पिक्चर प्रस्तुत, दिग्दर्शक अरविंद भोसले यांचा ‘अवकारीका’ हा चित्रपट १ ऑगस्टपासून संपूर्ण महाराष्ट्रात प्रदर्शित होत आहे. समाजासाठी आणि स्वतःच्या अंतर्मनासाठी काहीतरी विचार करायला भाग पाडणारा हा सिनेमा प्रेक्षकांना निश्चित भावेल.