१४ नोव्हेंबरला संपूर्ण महाराष्ट्रात होणार प्रदर्शित

शिकलेली किंवा अशिक्षीत, मॅाडर्न किंवा साधीभोळी, शांत किंवा तापट – कशीही असली तरी आई ही आई असते. निसर्गाने दिलेल्या पुनर्निमितीच्या वरदानामुळे आईला देवानंतरचं सर्वोच्च स्थान दिलं जातं. आजवर अनेक कवींनी आणि चित्रपट निर्मात्यांनी आईवर आधारित कलाकृती सादर केल्या, तरीही आईच्या प्रेमाची महती संपत नाही. आता त्याच भावनेला विनोदी बाज देणारा ‘वेल डन आई’ हा नवा मराठी चित्रपट प्रेक्षकांच्या भेटीला येतोय.

मोशन पोस्टर आणि प्रदर्शनाची घोषणा

दीपाली प्रोडक्शन प्रस्तुत ‘वेल डन आई’ या चित्रपटाचे मोशन पोस्टर नुकतेच प्रदर्शित करण्यात आले. चित्रपट १४ नोव्हेंबर रोजी राज्यभरात प्रदर्शित होणार असून, पोस्टरमध्ये चाळीच्या पार्श्वभूमीवर थम्प-अप करणारी आईच्या रूपातील विशाखा सुभेदार लक्ष वेधून घेतात. ‘वेल डन आई’ या शीर्षक गीतासह हे पोस्टर सोशल मीडियावर चर्चेत आले आहे.

विशाखा सुभेदारची आईच्या भूमिकेत धमाल

‘महाराष्ट्राची हास्यजत्रा’ फेम विनोद कलाकार विशाखा सुभेदार या चित्रपटात एका अशा आईची भूमिका साकारत आहेत, जी आपल्या मुलावर जीवापाड प्रेम करते. मुलाच्या सुखासाठी नवऱ्याशी आणि संपूर्ण जगाशी वैर घेणारी, खानावळीत काम करत संसार चालवणारी, लहानसहान व्यवसाय करणारी ही आई म्हणजे असंख्य सामान्य आईंचं प्रतिक आहे.

कलाकार आणि तांत्रिक बाजूचा भक्कम संच

या चित्रपटात विशाखा सुभेदारसोबत विजय निकम, आयुष पाटील, जयवंत वाडकर, सिमरन खेडेकर, बीना सिद्धार्थ, तन्वी धुरी, विपुल खंडाळे यांच्यासारखे अनुभवी कलाकार सहभागी आहेत. चित्रपटाचे लेखन आणि दिग्दर्शन शंकर अर्चना बापू धुलगुडे यांनी केले असून, निर्मिती सुधीर पाटील यांची आहे. छायांकन रंजीत साहू, संकलन निलेश गावंड, संगीत निशाद गोलांबरे, पार्श्वसंगीत ऍग्नेल रोमन, तर गीते संदीप गचांडे यांची आहेत.

तांत्रिक टीमची भक्कम साथ

कलादिग्दर्शन देवेंद्र तावडे, वेशभूषा प्रतिभा गायकवाड, रंगभूषा माधव म्हापणकर, केशभूषा मयुरी बस्तावडेकर, नृत्य दिग्दर्शन चिनी चेतन, सहदिग्दर्शन मानस रेडकर यांनी जबाबदारी सांभाळली आहे. पोस्ट प्रोडक्शन आय फोकस स्टुडिओ (विजय दिनेश) यांनी केलं असून, विज्युअल प्रमोशन प्रेमांकुर बोस यांचं आहे. चित्रपटाचं वितरण सिनेपोलीस करत आहे.

आईच्या अस्सल प्रेमाची विनोदी मांडणी

‘वेल डन आई’ हा चित्रपट आईच्या अस्सल प्रेमाचा विनोदी आणि भावनिक अविष्कार असून, आईच्या संघर्षातलं हास्य आणि हळवेपण प्रेक्षकांच्या मनाला भिडणार आहे. १४ नोव्हेंबरला हा चित्रपट थिएटरमध्ये पाहायला विसरू नका!