पहिलं गाणं प्रदर्शित

झी स्टुडिओज प्रस्तुत, ओशन फिल्म कंपनी आणि ओशन आर्ट हाऊस निर्मित ‘दशावतार’ हा मराठी चित्रपट १२ सप्टेंबर रोजी प्रेक्षकांच्या भेटीला येत आहे. पोस्टर आणि टीझरनंतर आता या चित्रपटातील पहिलं गाणं ‘आवशीचो घो’ प्रदर्शित झाले असून कोकणच्या मातीचा गंध घेऊन आले आहे. मालवणी भाषेत ‘आवशी’ म्हणजे आई आणि ‘घो’ म्हणजे नवरा. त्यामुळे वडिलांना प्रेमाने ‘आवशीचो घो’ म्हणण्याची पद्धत आहे. हे गाणं बाप आणि मुलाच्या अनोख्या नात्यावर आधारित असून दिलीप प्रभावळकर आणि सिद्धार्थ मेनन यांच्या जोडीवर चित्रित करण्यात आले आहे.

मिश्किलतेतून नात्याचं हळुवार दर्शन

हे गाणं वरवर पाहता मिश्किल आणि गंमतीशीर वाटत असलं तरी बाप – मुलाच्या नात्याचं सार मांडतं. कधी मुलगा वडिलांची जबाबदारी घेणारा ‘वडील’ बनतो आणि वडील त्याचे ‘मूल’ होतात, हा भावनिक बदल यातून दिसतो. गुरु ठाकूर यांनी लिहिलेल्या या गीताला ए. व्ही. प्रफुल्लचंद्र यांनी संगीत दिलं असून गायक ओंकार स्वरूप यांनी ते गायले आहे.

गीतकार गुरु ठाकूर यांची भावना

गुरु ठाकूर सांगतात, “बाप आणि मुलगा यांच्यातील मैत्रीचं नातं मिश्किल आणि खट्याळ पद्धतीने सादर करणारं गाणं आजवर झालं नव्हतं. मालवणी बोलीतील शब्दांचा गोडवा, ए. व्ही. यांचं संगीत आणि दिलीपजी व सिद्धार्थ यांचा परफॉर्मन्स यांनी या गाण्याला वेगळं परिमाण दिलं आहे.”

दिग्दर्शक सुबोध खानोलकर यांचं मत

दिग्दर्शक सुबोध खानोलकर म्हणतात, “‘आवशीचो घो’ हे गाणं वडील-मुलाच्या नात्याची वीण अत्यंत लोभसपणे मांडतं. प्रेम, ताण, समज-गैरसमज आणि बदलणारी जबाबदारी हे सगळं एका गाण्यातून दाखवणं हे आव्हान होतं, जे संपूर्ण टीमने उत्कृष्टरीत्या पूर्ण केलं.”

झी स्टुडिओजची प्रतिक्रिया

झी स्टुडिओजचे व्यवसाय प्रमुख बवेश जानवलेकर म्हणाले, “‘दशावतार’ प्रेक्षकांना भावनिक आणि कलात्मक अनुभव देणार आहे. ‘आवशीचो घो’ हे गाणं या प्रवासातील एक महत्त्वपूर्ण टप्पा आहे.”

निर्मात्यांचं मत

निर्माते सुजय हांडे सांगतात, “हे गाणं केवळ धमाल देण्यासाठी नव्हतं, तर नात्यांची गुंतागुंत आणि सहजता दाखवण्यासाठी होतं. दिलीपजी आणि सिद्धार्थ यांनी याला वेगळ्या उंचीवर नेलं आहे.”

भावनिक बाजूचा उलगडा

टीझरनंतर आता ‘आवशीचो घो’ गाण्यामुळे चित्रपटातील भावनिक बाजूही समोर आली आहे. धमाल आणि हृदयस्पर्शी भावनांचं हे सुंदर मिश्रण प्रेक्षकांना नक्की भावेल, अशी निर्मात्यांची अपेक्षा आहे.