राष्ट्रीय पुरस्कार विजेत्या दिग्दर्शकाची नव्या विषयावर पकड

राष्ट्रीय पुरस्कार विजेते दिग्दर्शक रमेश मोरे हे आपल्या मातीशी जोडलेल्या आणि सामाजिक जाणिवेला स्पर्श करणाऱ्या कथांसाठी ओळखले जातात. त्यांच्या नव्या मराठी चित्रपट **‘आदिशेष’**चे शूटिंग नुकतेच पूर्ण झाले आहे. शीर्षकापासूनच उत्सुकता निर्माण करणारा हा सिनेमा आजवर न पडद्यावर आलेल्या विषयावर आधारित आहे.

अष्टमी एन्टरटेन्मेंटकडून निर्मितीक्षेत्रात पदार्पण

अष्टमी एन्टरटेन्मेंटच्या बॅनरखाली निर्माते प्रा. दत्तात्रय सांगोरे यांनी ‘आदिशेष’ची निर्मिती केली आहे. पहिल्याच निर्मितीत त्यांनी चित्रपटसृष्टीत पाऊल ठेवले आहे. या चित्रपटाचे दिग्दर्शन, कथा, पटकथा, संवाद आणि गीतलेखन सर्वस्वी रमेश मोरे यांनी केले आहे. २००४ साली ‘अकल्पित’ या चित्रपटातून दिग्दर्शन क्षेत्रात पदार्पण करणाऱ्या मोरे यांनी आजवर १९ चित्रपटांचा लेखक-दिग्दर्शक म्हणून कारभार सांभाळला असून तीन चित्रपटांचे निर्मातेही राहिले आहेत. त्यांच्या ‘चॅम्पियन्स’ या चित्रपटाला सर्वोत्कृष्ट सामाजिक चित्रपट आणि सर्वोत्कृष्ट बालकलाकार या दोन राष्ट्रीय पुरस्कारांसह अनेक आंतरराष्ट्रीय सन्मान मिळाले आहेत.

काँक्रीटीकरण, बदलते राहणीमान आणि हरवणारा निसर्ग

‘आदिशेष’मधून रमेश मोरे यांनी विकासाच्या नावाखाली होत असलेल्या काँक्रीटीकरणावर आणि त्यातून हरवत चाललेल्या निसर्गाच्या जिवंतपणावर भाष्य केले आहे. शहरांबरोबरच गावेही या विळख्यात अडकत आहेत. माणूस, नाती आणि राहणीमान हे सर्व व्यावहारीक होत आहे. परंपरा केवळ फॅशनसारख्या पाळल्या जात आहेत. हा सिनेमा प्रेक्षकांना आरसा दाखवत विचार करायला भाग पाडणार आहे.

कोकणाच्या निसर्गरम्य पार्श्वभूमीवर चित्रपटाची उभारणी

चित्रपटाचे चित्रीकरण कोकणातील संगमेश्वर तालुक्यातील कडवाई, तुरळ, हारेकर वाडी या निसर्गरम्य ठिकाणी करण्यात आले आहे. या चित्रपटात अरुण नलावडे, प्रणव रावराणे, आराधना देशपांडे, वैशाली भोसले, सुचित जाधव, सुरेश वाडिले आदी कलाकार झळकणार आहेत.

तांत्रिक टीम आणि कलात्मक योगदान

सिनेमॅटोग्राफी राजा फडतरे, संगीत व पार्श्वसंगीत अमेय नरे आणि साजन पटेल, संकलन अभिषेक म्हसकर, वेशभूषा यशश्री मोरे, रंगभूषा सतिश भावसार, ध्वनी अरुण चेन्नवार आणि केशभूषा रसिका गुरव यांनी केली आहे. धीरज सांगोरे निर्मिती प्रबंधक असून यशश्री मोरे कार्यकारी निर्मात्या आहेत.