गणेशोत्सव म्हणजे उत्साह, भक्ती, आणि चैतन्याने भरलेलं वातावरण! या सणामध्ये घराघरात आणि मनामनात एक वेगळीच ऊर्जा जाणवते. हाच सकारात्मकतेचा अनुभव यावर्षी अभिनेत्री मृण्मयी गोंधळेकर हिनेसुद्धा घेतला तोही दोन ठिकाणी! ‘लाखात एक आमचा दादा’मध्ये तुळजा ही भूमिका साकारत असलेली मृण्मयीने सांगितले की, “यावर्षी मी गणपती बाप्पाची पूजा दोनदा केली. मी खरंच स्वतःला भाग्यवान समजते की मला दोनदा गणपती बाप्पा अनुभवायला मिळाले.”

मालिकेच्या सेटवर साजरा झाला गणेशोत्सव

मृण्मयी सांगते की, “एक आमच्या मालिकेत म्हणजेच जगताप कुटुंबांनी बाप्पाचं स्वागत केलं. गणेश आगमनाचा सीन आम्ही गणेशोत्सव सुरू व्हायच्या आधी शूट केला होता आणि गणपतीच्या आगमनापासून ते विसर्जनापर्यंत सर्व आम्ही मनापासून आणि उत्साहपूर्वक शूट केलं. फक्त गणपतीचं नाही तर आमच्याकडे गौराईही बसल्या होत्या. त्याआधी हरतालिकेची पूजा होती. मला सर्व पूजा करायला मिळाल्या. या सणाची सुरुवात आधीच आमच्या सेटवर झाली होती, आणि ‘लाखात एक आमचा दादा’ मालिकेमुळे हे इतकं सगळं सुंदरपणे अनुभवायला मिळालं. मी माझ्या भूमिकेला ‘तुळजा’ ला धन्यवाद म्हणेन की तिच्यामुळे मला गणेशोत्सव दोनदा साजरा करायला मिळाला.”

घरातल्या गणेशोत्सवाची खास तयारी

मृण्मयीने सांगितले, “माझ्या घरी १.५ दिवसांचा गणपती असतो आणि नेहमीप्रमाणे या वर्षीही १५–२० दिवस आधीपासूनच तयारी सुरु केली होती. आम्ही इको-फ्रेंडली पद्धतींनी गणेशोत्सव साजरा करतो. अगदी साधं आणि सुंदर डेकोरेशन केलं होतं, बाप्पाच्या आवडीचे मोदक नेवेद्याला केले, गणपती अथर्वशीर्ष आवर्तन असतं. त्यामुळे हे वर्ष माझ्यासाठी खूपच विशेष आणि भाग्याचं ठरलं.”

प्रेक्षकांसाठी खास आमंत्रण

मृण्मयीने शेवटी आवर्जून सांगितले, “तेव्हा बघायला विसरू नका ‘लाखात एक आमचा दादा’ दररोज संध्या. ६:०० वा. झी मराठी वाहिनीवर.”