२८ नोव्हेंबरला संपूर्ण महाराष्ट्रात होणार प्रदर्शित
असंख्य गणेशभक्तांचे श्रद्धास्थान असलेल्या मुंबईतील चिंचपोकळीच्या श्री चिंतामणीच्या दरबारात ‘देवघर ऑन रेंट’ या आगामी मराठी चित्रपटाचा टिझर मोठ्या थाटात प्रदर्शित करण्यात आला. शीर्षकामुळे मनात उत्सुकता निर्माण करणाऱ्या या चित्रपटाच्या टिमने चिंतामणीचे दर्शन घेतले आणि गणरायाच्या आशीर्वादाने टिझर प्रेक्षकांच्या भेटीला आणला. या प्रसंगी कलाकार, निर्माते, दिग्दर्शक व तंत्रज्ञ उपस्थित होते. हा चित्रपट येत्या २८ नोव्हेंबरला संपूर्ण महाराष्ट्रात प्रदर्शित होणार आहे.

आध्यात्माशी सांगड घालणारी कथा
राधाकृष्ण प्रोडक्शनची प्रस्तुती असलेल्या या चित्रपटाची निर्मिती पूनम चौधरी पाटील यांनी केली आहे. दिग्दर्शन स्वरूप सावंत यांनी केले असून कथालेखन त्यांनी स्वतः पूनम चौधरी पाटील यांच्यासह केले आहे. पटकथा व संवादलेखन संजय नवगिरे तर अतिरिक्त पटकथा विशाल सुदाम जाधव यांनी लिहिली आहे. ‘देवघर ऑन रेंट’ या शीर्षकावरूनच हा चित्रपट आध्यात्माची वर्तमानाशी सांगड घालणारा असल्याचे स्पष्ट होते. टिझरमधूनही हा विचार अधोरेखित होतो की बेभान जीवनात आपल्या आतल्या आवाजाला शरण गेलो तर आयुष्याचे मार्ग सोपे होतात.

दिग्दर्शक व निर्मात्यांचे विचार
दिग्दर्शक स्वरूप सावंत म्हणाले की, “देवघर ऑन रेंट या शीर्षकातच देव दडला असल्याने श्री चिंतामणीच्या दरबारात टिझर प्रदर्शित झाल्याचा विशेष आनंद आहे. हा चित्रपट जरी आजच्या काळातील गोष्ट सांगणारा असला तरी त्यातील आध्यात्माचा धागा महत्त्वाचा आहे. देवाचे अस्तित्व कोणी नाकारू शकत नाही. गरीब असो वा श्रीमंत, ती दैवी शक्ती सर्वांचा सांभाळ करते.”* निर्मात्या पूनम चौधरी पाटील यांनी सांगितले की, या चित्रपटात नाट्यमय कथानकासोबत मनोरंजनपर सर्व घटक आहेत, जे प्रेक्षकांना अखेरपर्यंत खिळवून ठेवतील.

कलाकार व तांत्रिक बाजू
या चित्रपटात निखिल चव्हाण, अंकित मोहन, भाऊ कदम, शशांक शेंडे, अश्विनी चावरे, वैभव चव्हाण, सुरेश विश्वकर्मा, अनिल नगरकर, चेतन रायकर, सिद्धेश्वर झाडबुके आणि गौतमी पाटील यांच्या भूमिका आहेत. छायाचित्रण चैतन्य साळुंखे, कला दिग्दर्शन दिलीप कंधारे यांनी केले आहे. संगीतकार एस. सागर आणि कबीर शाक्य यांनी गीतांना संगीत दिले आहे. अपेक्षा गांधी सोनी वेशभूषा डिझायनर असून सुजीत सुरवसे यांनी मेकअप केला आहे. प्रकाशयोजना शर्मा यांच्या टिमने सांभाळली आहे. कार्यकारी निर्माती अनुनेहा घोडके, निर्मिती व्यवस्थापक यश सणस असून नृत्य दिग्दर्शन किशोर दळवी यांनी केले आहे. प्रॉडक्शन हेड विजय म्हस्के आहेत.