भक्ती आणि जल्लोषाची पर्वणी
नवरात्र म्हटलं की भक्तीचा उत्साह, नृत्याचा जल्लोष, ढोल-ताशांचा गजर आणि आनंदाची पर्वणी! हाच आनंद अधिक रंगतदार करण्यासाठी ‘सन मराठीचा नवरात्रोत्सव २०२५’ रसिक प्रेक्षकांसाठी अविस्मरणीय सोहळा घेऊन येतो आहे.

नंदेश उमपांचा दमदार पोवाडा
या सोहळ्यात सुप्रसिद्ध लोककलाकार नंदेश उमप आपल्या दमदार आवाजात पोवाडा सादर करून प्रेक्षकांना रोमांचित करणार आहेत. त्यांच्या पोवाड्यातून मराठी मातीचा अभिमान, पराक्रमाची झलक आणि संस्कृतीची श्रीमंती अनुभवता येणार आहे.

वैदही परशुरामीची नाट्यमय मांडणी
लोकप्रिय अभिनेत्री वैदही परशुरामी नाट्यमय मांडणीद्वारे ‘स्त्रीचा प्रवास’ प्रेक्षकांसमोर सजीव करणार आहे. स्त्रीची जिद्द, संघर्ष आणि विजयाचा प्रवास या सादरीकरणातून प्रभावीपणे उभा राहणार आहे.

‘द कोकण कलेक्टिव्ह’ची संगीताची जादू
या बहारदार सोहळ्याची आणखी एक खास भेट म्हणजे ‘द कोकण कलेक्टिव्ह’ ग्रुप. आपल्या आगळ्या-वेगळ्या शैलीत ते गाण्यांची जादू पसरवून रसिकांना संगीताच्या सुरेल दुनियेत घेऊन जाणार आहेत.

कलाकारांचे खास सादरीकरण
‘सन मराठी’चे लाडके कलाकारही खास सादरीकरण घेऊन येणार आहेत. तेजा म्हणजेच अभिनेता अशोक फळदेसाई जोगवा सादर करणार आहे. त्याचबरोबर मालिकेतील काही कलाकार रंगतदार गरबा नृत्य सादर करून नवरात्रीच्या जल्लोषात रंग भरणार आहेत.

कार्यक्रमाचे आयोजन
हा संपूर्ण कार्यक्रम रसिक प्रेक्षकांसाठी मोफत खुला असून, ११ सप्टेंबर रोजी सायं. ६:३० वाजता प्रभादेवीतील रवींद्र नाट्यमंदिर, सिद्धिविनायक मंदिराजवळ रंगणार आहे.