ज्येष्ठ रंगकर्मी अशोक मुळ्ये यांच्या संकल्पनेतून दरवर्षी वेगवेगळ्या स्वरूपाची संमेलने होत असतात. यंदा ‘असेही एक नाट्यसंमेलन’ या उपक्रमांतर्गत ‘भूमिका’ या नाटकाला ‘माझा पुरस्कार’ प्रदान करून गौरविण्यात येणार आहे. हा सोहळा दादर येथील श्री छत्रपती शिवाजी महाराज नाटय़ मंदिरात २४ सप्टेंबर रोजी सायंकाळी साडेसात वाजता रंगणार आहे.

अध्यक्ष शरद पोंक्षे, वार्तास्वागताध्यक्ष विजय केंकरे

या विशेष नाट्यसंमेलनाचे अध्यक्ष ज्येष्ठ अभिनेते शरद पोंक्षे असून वार्तास्वागताध्यक्ष म्हणून दिग्दर्शक विजय केंकरे यांची निवड करण्यात आली आहे. अशोक मुळ्ये यांनी यापूर्वीही पत्रकारांचे, गतिमंद-अपंगांच्या मातांचे, कॅन्सरमुक्तांचे, घटस्फोटापासून परावृत्त झालेल्यांचे असे वेगळ्या स्वरूपाचे संमेलन आयोजित केले होते.

सात विभागांत ‘भूमिका’ची निवड

‘माझा पुरस्कार’च्या यंदाच्या २०व्या वर्षी ‘भूमिका’ नाटकाला सात वेगवेगळ्या विभागांत गौरविण्यात येत आहे. सर्वोत्कृष्ट नाटकाचा पुरस्कार ‘भूमिका’ला मिळणार असून सर्वोत्कृष्ट नाटककार क्षितिज पटवर्धन, दिग्दर्शक चंद्रकांत कुलकर्णी, अभिनेता सचिन खेडेकर, अभिनेत्री समिधा गुरू, सहाय्यक अभिनेता सुयश झुंजूरके आणि नेपथ्यकार प्रदीप मुळ्ये यांना पुरस्कार देण्यात येणार आहे.

प्रेक्षकांसाठी विनामूल्य सन्मानिका

या कार्यक्रमाची खास सन्मानिका २२ सप्टेंबरपासून श्री छत्रपती शिवाजी महाराज नाटय़ मंदिरात सकाळी साडेआठ ते अकरा आणि संध्याकाळी पाच ते आठ या वेळेत प्रेक्षकांसाठी विनामूल्य उपलब्ध राहणार असल्याचे आयोजकांनी सांगितले.

सांस्कृतिक कार्यक्रमाची मेजवानी

सोहळ्याचा समारोप ‘गाणी तुमच्या आवडीची’ या विशेष सांस्कृतिक कार्यक्रमाने होणार आहे. याचे संगीत संयोजन प्रशांत लळीत यांनी केले असून गायक केतकी भावे जोशी, शिल्पा मालंडकर, श्रीरंग भावे, जयंत पिंगुळकर आणि नीलिमा गोखले प्रेक्षकांसाठी मराठी गीतांची सुरेल मेजवानी सादर करणार आहेत.