महाराष्ट्राच्या परंपरेवर आधारित कथा
महाराष्ट्राची परंपरा आणि संस्कृती यांना मोठ्या पडद्यावर नव्या उंचीवर नेणारा ‘गोंधळ’ हा चित्रपट येत्या नोव्हेंबर रोजी प्रेक्षकांच्या भेटीला येत आहे. नुकतेच या चित्रपटाचे पोस्टर प्रदर्शित झाले असून त्याला प्रेक्षकांकडून उत्स्फूर्त प्रतिसाद मिळत आहे. मात्र या पोस्टरइतकीच चर्चेचा विषय ठरली आहे, या चित्रपटाची भव्य टेक्निकल टीम. खरंतर, एका परंपरेची गोष्ट जेव्हा मोठ्या पडद्यावर आणायची ठरते, तेव्हा त्या मागे असते एक ताकदीची स्वप्नवत टीम. ‘गोंधळ’लाही अशीच साथ लाभली आहे.

आंतरराष्ट्रीय दर्जाची टेक्निकल टीम
‘अज्ञात’ या लघुपटासाठी नॅशनल अवॉर्ड प्राप्त झालेले दिग्दर्शक संतोष डावखर, ‘सिंधू भैरवी’, ‘रुद्रवीणा’, ‘सागरा संगमम’, ‘पझसी राजा’, ‘विश्व थुलासी’ अशा दाक्षिणात्य चित्रपटांसाठी नॅशनल अवॉर्ड मिळवणारे आणि आपल्या सुरांनी भारतीय चित्रपटसृष्टीला नवा आयाम देणारे दिग्गज संगीतकार पद्मविभूषण इलैयाराजा, ‘हरिश्चंद्राची फॅक्टरी’, ‘न्यूड’, ‘स्त्री’, ‘छिछोरे’, ‘कच्चा लिंबू’, ‘फुकरे ३’ अशा सुपरहिट चित्रपटांचे छायाचित्रण करणारे राज्य पुरस्कार विजेते अमलेंदू चौधरी आणि ‘घरत गणपती’, ‘संगीत मानापमान’, ‘रानटी’, ‘आणि डॉ. काशिनाथ घाणेकर’ अशा अनेक चित्रपटांचे अनुभवी संकलक आशिष म्हात्रे, ‘सॅम बहादूर’ साठी राष्ट्रीय पुरस्कार विजेते मेकअप डिझायनर श्रीकांत देसाई, ‘सायकल’ व ‘सॅम बहादूर’साठी पुरस्कार प्राप्त कॉश्यूम डिझायनर सचिन लोवाळेकर, ‘दंगल’चे आर्ट डिरेक्टर संदीप मेहेर, ‘लाईफ ॲाफ पाय’ आणि ‘स्लमडॅाग मिलिनियर’साठी काम केलेले साऊंड डिझायनर जयेश ढाकण, ‘लापता लेडीज’चे कास्टिंग डिरेक्टर रोमिल, ‘मैं हू ना’, ‘क्रिश ३’, ‘चक दे इंडिया’, ‘चेन्नई एक्सप्रेस’चे डिआय कलरिस्ट मकरंद सुरते (रेडचिलीज कलर), जस्टीन जोस आणि साऊंड मिक्सीग मारीयानो स्टुडिओ अशा मान्यवरांची दमदार टीम या चित्रपटाला लाभली आहे.

भव्यतेची झलक पोस्टरमध्येच
पोस्टरमध्येही या भव्यतेची झलक दिसत आहे. महाराष्ट्राच्या परंपरेवर आधारित ‘गोंधळ’ चित्रपटाची कथा, कलाकार आणि संगीत यांचा समन्वय या दमदार टीममुळे अधिक प्रभावीपणे मांडला जाणार आहे. पोस्टर पाहून चित्रपटाची उत्सुकता वाढली असून आता प्रेक्षक या चित्रपटाच्या टीझरची आतुरतेने वाट पाहात आहेत.

दिग्दर्शक संतोष डावखर यांचे मत
दिग्दर्शक संतोष डावखर म्हणाले, ” ‘गोंधळ’ या चित्रपटाची संकल्पना पारंपरिक असूनही त्याला साकारताना आम्ही आंतरराष्ट्रीय दर्जा गाठण्याचा प्रयत्न केला आहे. अशा दमदार टेक्निकल टीमसोबत काम करण्याचा अनुभव विलक्षण होता. मला खात्री आहे की, प्रेक्षकांना हा चित्रपट भव्यतेचा नवा अनुभव देईल तसेच महाराष्ट्रसह विविध राज्यांत ही महाराष्ट्राची परंपरा ठसा उमटवेल. यात अशा काही गोष्टी आहेत, ज्या ७०एमएमवर भारतात पहिल्यांदाच पाहायला मिळणार आहेत.’’

कलाकार आणि निर्मिती टीम
डावखर फिल्म्स प्रस्तुत या चित्रपटाची कथा, पटकथा आणि संवाद संतोष डावखर यांनी लिहिले असून सहनिर्मात्या दीक्षा डावखर आहेत. या चित्रपटात किशोर कदम, इशिता देशमुख, योगेश सोहोनी, निषाद भोईर, अनुज प्रभू, सुरेश विश्वकर्मा, माधवी जुवेकर, ऐश्वर्या शिंदे, कैलाश वाघमारे, प्रभाकर मठपती, विठ्ठल काळे, प्रवीण डाळींबकर, शरद जाधव, पूनम पाटील यांच्या प्रमुख भूमिका आहेत.