चित्रपटाचा संगीत प्रकाशन सोहळा मोठ्या दिमाखात पार पडला
मुंबई : केरळातील दिग्दर्शक व निर्माते आणि महाराष्ट्रातील कलाकार असलेला बहुचर्चित ‘रील स्टार’ हा मराठी चित्रपट प्रेक्षकांच्या भेटीला येण्यासाठी सज्ज झाला आहे. १७ ऑक्टोबरला हा चित्रपट संपूर्ण महाराष्ट्रात प्रदर्शित होणार आहे. सुरुवातीपासूनच चर्चेत असलेल्या या चित्रपटातील सुमधूर गीत-संगीत प्रेक्षकांच्या भेटीला आले आहे. ‘रील स्टार’च्या माध्यमातून सुमधूर संगीताची जोड देत एक आशयघन कथानक सादर करण्यात आले आहे. दादर येथील स्वातंत्र्यवीर सावरकर सभागृहात २६ सप्टेंबर २०२५ रोजी ‘रील स्टार’ चित्रपटाचा दिमाखदार संगीत प्रकाशन सोहळा पार पडला. या सोहळ्याला चित्रपटातील कलाकार, तंत्रज्ञ, निर्माते आणि संपूर्ण टीम उपस्थित होती. सारेगामा अंतर्गत संगीतप्रेमींना या चित्रपटातील गीते सादर केली जाणार आहेत.

चित्रपटाची निर्मिती आणि सर्जनशीलता
जे-फाइव्हज एंटरटेनमेंट्स, फिनिक्स ग्रुप आणि इनिशिएटिव्ह फिल्म्सच्या बॅनरखाली जोस अब्राहम, मोनिका आणि निशील कंबाती यांनी ‘रील स्टार’ चित्रपटाची निर्मिती केली असून, निर्मलदीप प्रोडक्शनचे नासिर खान आणि गुरविंदर सिंग या चित्रपटाचे प्रस्तुतकर्ते आहेत. ‘अन्य’ या हिंदी-मराठी चित्रपटानंतर दिग्दर्शक सिम्मी आणि रॉबिन यांनी ‘रील स्टार’चे दिग्दर्शन केले आहे. ‘रील स्टार’मध्ये भानुदास नावाच्या रस्त्यावरील विक्रेत्याची आणि त्याच्या कुटुंबाची कथा पाहायला मिळणार आहे. भानुदासच्या स्वप्नपूर्तीचा हा प्रवास अनेकांसाठी प्रेरणादायी ठरणारा आहे. नागराज मंजुळे यांचे बंधू भूषण मंजुळे या चित्रपटात मुख्य भूमिकेत असून, प्रसाद ओकने साकारलेली पत्रकाराची व्यक्तिरेखाही खूप महत्त्वाची आहे.

संगीत आणि गीते
एका रील स्टारची कथा सांगणाऱ्या या चित्रपटात वेगवेगळ्या प्रसंगांना अनुसरून एकूण पाच गाणी आहेत. ‘दृश्यम’ फेम संगीतकार विनू थॉमस यांनी चार गीतांना संगीत दिलं असून, ‘घाव दे जरा रा…’ हे गाणं शुभम भट यांनी संगीतबद्ध केलं आहे. शुभम भट यांनी सुप्रसिद्ध संगीतकार ए. आर. रेहमान यांचे सहायक म्हणून काम केले आहे. ‘गर गर गरा…’ हे गाणं मंदार चोळकर यांनी लिहिलं असून, अभिजीत कोसंबी व सायली कांबळे यांनी ते गायले आहे. मंदारनेच लिहिलेलं ‘जगूया मनसोक्त सारे…’ हे गाणं रोहित राऊतच्या आवाजात आहे. गुरू ठाकूर यांचे ‘का सुनं सुनं झालं…’ हे गाणं मनीष राजगिरे यांनी गायले आहे. तर मंदार चोळकर लिखित ‘फुलोरा…’ हे गाणं मुग्धा कऱ्हाडेच्या आवाजात आहे. वैभव देशमुख लिखित ‘घाव दे जरा रा…’ हे गाणं आदर्श शिंदेने गायले असून संगीतकार शुभम भट यांनी त्याला संगीत दिलं आहे.

तांत्रिक टीम आणि कलाकार
नागराज मंजुळे यांचे सहायक दिग्दर्शक सुधीर कुलकर्णी यांनी या चित्रपटाचं लेखन केलं आहे. यात भूषण मंजुळे, प्रसाद ओक, मिलिंद शिंदे, कैलास वाघमारे, उर्मिला जगताप, रुचिरा जाधव, स्वप्नील राजशेखर, शुभांगी लाटकर, विजय पाटकर, अनंत महादेवन, ज्ञानेश वाडेकर, महेश सुभेदार, शिवाजी पाटणे, गणेश रेवडेकर, अभिनव पाटेकर, विशाल अर्जुन, राजेश मालवणकर, प्रशांत शिंदे, करीश्मा देसले आदी कलाकारांनी भूमिका साकारल्या आहेत. बालकलाकार अर्जुन गायकर आणि तनिष्का म्हाडसे यांच्या भूमिका देखील महत्त्वाच्या आहेत. भागवत सोनावणे यांनी रंगभूषा, राणी वानखडे यांनी वेशभूषा केली आहे. दीपक पांडे हे कास्टिंग डायरेक्टर असून, रोहित कुलकर्णी असोसिएट डायरेक्टर आहेत. महेंद्र पाटील हे क्रिएटिव्ह निर्माते तर नंदू आचरेकर हे मुख्य सहयोगी दिग्दर्शक आहेत. प्रोडक्शन डिझाईन राहुल शर्मा आणि समीर चिटणवीस यांनी केले असून निलेश रसाळ यांनी कला दिग्दर्शन केले आहे.