शिवाजी दोलताडे दिग्दर्शित आणि गोवर्धन दोलताडे, गार्गी निर्मित ‘स्मार्ट सुनबाई’ २१ नोव्हेंबरला प्रेक्षकांच्या भेटीला

मराठी चित्रपटसृष्टीतील चर्चेत असलेला आणि प्रेक्षकांच्या उत्सुकतेचा विषय ठरलेला आगामी सिनेमा ‘स्मार्ट सुनबाई’ येत्या २१ नोव्हेंबर २०२५ रोजी संपूर्ण महाराष्ट्रात प्रदर्शित होणार आहे. या चित्रपटाचे दिग्दर्शन शिवाजी दोलताडे यांनी केले असून निर्मितीचा मान गोवर्धन दोलताडे आणि गार्गी यांनी सांभाळला आहे, तर सहनिर्माते म्हणून कार्तिक दोलताडे पाटील सहभागी आहेत. या सिनेमाच्या पहिल्या पोस्टरनेच प्रेक्षकांची उत्सुकता शिगेला पोहोचवली होती, आणि आता त्याचे मुख्य रंगतदार पोस्टरही प्रदर्शित झाले आहे.

अजितदादा पवार यांच्या हस्ते अनावरणाचा भव्य सोहळा

या पोस्टरचे अनावरण महाराष्ट्राचे उपमुख्यमंत्री अजितदादा पवार यांच्या प्रमुख उपस्थितीत करण्यात आले. या विशेष प्रसंगी लेखक-निर्माते गोवर्धन दोलताडे आणि अभिनेते रोहन पाटील उपस्थित होते. संपूर्ण टीमसाठी हा क्षण अत्यंत अभिमानास्पद आणि अविस्मरणीय ठरला. अजितदादा पवार यांनी पोस्टरचे अनावरण करत टीमचं मनापासून कौतुक केलं आणि चित्रपटासाठी शुभेच्छा दिल्या. त्यांच्या प्रोत्साहनाने आणि आशीर्वादाने संपूर्ण टीममध्ये उत्साह आणि आनंदाची लाट पसरली.

चित्रपटातील कलाकारांचा भव्य ताफा

‘स्मार्ट सुनबाई’ मध्ये मराठी चित्रपटसृष्टीतील दिग्गज आणि लोकप्रिय कलाकारांचा भव्य ताफा झळकणार आहे. या चित्रपटात संतोष जुवेकर, रोहन पाटील, भाऊ कदम, किशोरी शहाणे, मोहन जोशी, दीपक शिर्के, अंशुमन विचारे, विनम्र बाबल, सायली देवधर, प्राजक्ता गायकवाड, प्राजक्ता हनमगर, स्नेहल शिदम, उषा नाईक, भक्ती चव्हाण, दीप्ती सोनवणे, अनुष्का बेनके, पूजा राजपूत, सुचिका जोशी, विद्या मेहेत्रे, आर्या सकुंडे, वैशाली चौधरी, सपना पवार आणि कांचन चौधरी यांच्या भूमिका पाहायला मिळणार आहेत. इतक्या मोठ्या कलाकारसंघाची एकत्रित उपस्थिती हा चित्रपट खास बनवते, आणि त्यांच्या केमिस्ट्रीमुळे ‘स्मार्ट सुनबाई’ प्रेक्षकांसाठी एक वेगळाच अनुभव ठरणार आहे.

संगीत आणि गीतांचा सुरेल मेळ

चित्रपटाची कथा आणि लेखन योगेश शिरसाट यांनी केले असून, संगीताची जबाबदारी विजय नारायण गवंडे आणि साई–पियुष यांनी सांभाळली आहे. गीतकार वैभव देशमुख आणि अदिती द्रविड यांच्या गीतांना अजय गोगावले, वैशाली माढे, आनंदी जोशी, सावनी रवींद्र आणि उर्मिला धनगर यांचे आवाज लाभले आहेत. या सुरेल संगीतामुळे चित्रपटातील भावभावना आणि हास्याचा ताणा अधिक खुलणार आहे.

कौटुंबिक आणि मनोरंजक सिनेमा

‘स्मार्ट सुनबाई’ हा केवळ हास्य आणि रहस्याने सजलेला सिनेमा नाही, तर तो एक कौटुंबिक मेजवानीसारखा अनुभव देणारा चित्रपट आहे, जो प्रेक्षकांच्या चेहऱ्यावर हास्य आणत हृदयात आनंदाची छाप सोडणार आहे. २१ नोव्हेंबरला संपूर्ण महाराष्ट्रात प्रदर्शित होणारा हा चित्रपट नक्कीच प्रेक्षकांच्या मनात आपली ‘स्मार्ट’ जागा निर्माण करेल.