बालरसिकांसाठी हसवणारे, विचार करायला लावणारे आणि निसर्गाशी नाते जोडणारे नाट्य

मुंबई : बालप्रेक्षकांना मनसोक्त आनंद देण्यासाठी आणि त्यांना निसर्गाशी जोडणारा एक आगळावेगळा अनुभव देण्यासाठी ‘माकडचाळे’ हे उत्क्रांती घडवणारे बालनाट्य रंगभूमीवर दाखल होत आहे. प्रशांत निगडे लिखित आणि दिग्दर्शित हे नाट्य केवळ मनोरंजनापुरते मर्यादित नसून, यात शिक्षण, निसर्गप्रेम आणि बालमनातील कल्पनाशक्ती यांचा सुंदर संगम साधला आहे.

माझे पूर्वज, माझे सुपरहिरो!

या प्रभावी घोषवाक्याने सुसज्ज असलेले हे नाट्य आजच्या पिढीतील मोबाईलमध्ये हरवलेल्या मुलांची कथा सांगते. सहलीला गेलेली काही मुले जंगलात हरवतात आणि तिथे त्यांची एका माकडाशी झालेली अनोखी मैत्री त्यांच्या जीवनाचा वेगळा अध्याय सुरू करते. जंगलातील त्यांचे साहस, विनोद आणि शहाणपणाने भरलेले प्रसंग प्रेक्षकांना हसवतील आणि भावूकही करतील.

बालनाट्याची नवी चौकट

दिग्दर्शक प्रशांत निगडे यांनी या नाटकातून बालनाट्याची पारंपरिक चौकट मोडत शिशु, बाल आणि कुमार अशा तिन्ही वयोगटांचा विचार करून कथा बांधली आहे. ‘माकडचाळे’ ही केवळ परीकथा नाही, तर माकडांच्या जगण्याच्या दृष्टिकोनातून माणसाच्या वर्तनावर भाष्य करणारी सामाजिक रूपककथा आहे.

उत्कृष्ट कलाकारांचा सहभाग

‘स्वाभिमान’ मालिकेतील ‘बबन दादा’ आणि ‘लक्ष्मीच्या पावलांनी’ मालिकेमधील भूमिकांमुळे प्रसिद्ध असलेले प्रशांत निगडे स्वतः माकडाच्या मध्यवर्ती भूमिकेत दिसणार आहेत. त्यांच्यासोबत श्रद्धा शितोळे, ओमकार तेली, रुपेश जगताप, राकेश शिर्के, रितेश बायस, श्रुती हळदणकर, रिया साटम आणि प्रज्योत देवळे हे कलाकार विविध व्यक्तिरेखांमधून प्रेक्षकांना मनोरंजन देतील.

संगीत, गाणी आणि तांत्रिक टीम

या नाटकाचे शीर्षक गीत लोकप्रिय गायक अवधूत गुप्ते यांच्या आवाजात आहे, तर नागेश मोरवेकर यांच्या संगीत रचनाही धमाल उडवतील. बालगायक काव्य भोईर आणि पलाक्षी दीक्षित यांच्या गोड आवाजातली गाणी मुलांच्या मनाला भिडतील.
संगीत – रोहन पाटील, नेपथ्य – संदेश बेंद्रे, प्रकाशयोजना – शीतल तळपदे, नृत्यदिग्दर्शन – रुपेश बने, रंगभूषा – मिलिंद कोचरेकर, वेशभूषा – सुप्रिया बर्वे, सूत्रधार – दिनू पेडणेकर आणि व्यवस्थापन – विरीशा नाईक यांनी या नाटकाला भक्कम पाठबळ दिले आहे.

दिवाळीत रंगणार धमाल शुभारंभ

‘रंगशीर्ष’ निर्मित या बालनाट्याच्या प्रकाशितीची जबाबदारी ‘शिव रणभूमी प्रशांत प्रतिष्ठान’ आणि ‘अनामिका’ या नाट्य संस्थांनी घेतली आहे. ‘माकडचाळे’ या बालनाट्याचा शानदार शुभारंभ दिवाळीत — १९ ऑक्टोबर, रविवारी सकाळी श्री शिवाजी मंदिर, दादर येथे होणार आहे.

बालरसिकांना हसवणारे, विचार करायला लावणारे आणि निसर्गाच्या सान्निध्यात नेणारे हे अर्थपूर्ण बालनाट्य अनुभवण्याची ही एक सुवर्णसंधी आहे.