विशेष मुलाखतीत उलगडला ‘जिप्सी’चा प्रवास
वंचितांच्या जीवनातील संघर्ष, आत्मजाणीवा आणि परिवर्तनाची प्रेरणादायी कहाणी सांगणाऱ्या ‘जिप्सी’ या चित्रपटाच्या खास प्रदर्शनाला रविवारी उत्स्फूर्त आणि हाऊसफुल्ल प्रतिसाद मिळाला. महाराष्ट्र चित्रपट, रंगभूमी आणि सांस्कृतिक विकास महामंडळाच्या दादासाहेब फाळके चित्रपट रसास्वाद मंडळातर्फे पु. ल. देशपांडे महाराष्ट्र कला अकादमी येथे आयोजित या प्रदर्शनात प्रेक्षकांनी चित्रपटाला मनापासून दाद दिली.

चित्रपट टीमची उपस्थिती आणि विशेष संवाद
या प्रसंगी महामंडळाचे सह व्यवस्थापकीय संचालक प्रशांत साजणीकर, चित्रपटाचे दिग्दर्शक शशि खंदारे, राष्ट्रीय पुरस्कार विजेता बालकलाकार कबीर खंदारे यांच्यासह ‘जिप्सी’ची संपूर्ण टीम उपस्थित होती. चित्रपटानंतर श्री. साजणीकर यांनी कलाकारांशी खास संवाद साधला. निर्मिती प्रक्रियेतील अनुभव, शूटिंगदरम्यानच्या गमतीदार घटना आणि राष्ट्रीय पुरस्कारापर्यंतचा प्रवास या मुलाखतीतून प्रेक्षकांसमोर खुला झाला.

रसास्वाद मंडळाचा उपक्रम
महामंडळाच्या व्यवस्थापकीय संचालक स्वाती म्हसे पाटील यांच्या मार्गदर्शनाखाली स्थापन झालेल्या दादासाहेब फाळके चित्रपट रसास्वाद मंडळाचा उद्देश म्हणजे जुन्या चित्रपटांचे वैभव प्रेक्षकांना पुन्हा अनुभवता यावे आणि नव्या पिढीतील उत्तमोत्तम चित्रपट प्रेक्षकांपर्यंत पोहोचावेत. या उपक्रमाअंतर्गत दर महिन्याला किमान एक निवडक चित्रपट रसिकांसाठी प्रदर्शित केला जातो.

‘जिप्सी’—प्रेरणादायी कथेला मिळालेली भरभरून दाद
अर्थपूर्ण आशय, प्रभावी अभिनय आणि हृदयाला भिडणारी कथा यामुळे ‘जिप्सी’च्या खास प्रदर्शनाने मनावर ठसा उमटवला असून रसिकांनी चित्रपटाला दिलेला हाऊसफुल्ल प्रतिसाद हा या कथानकाच्या ताकदीचा मोठा पुरावा ठरला.