नव्या नाटकाची रंगत वाढवणारी चर्चा

मुंबईतील नाट्यवर्तुळात सध्या हृषिकेश जोशी यांच्या आगामी बोलविता धनी या नाटकाची जोरदार चर्चा सुरू आहे. प्रवीण भोसले, भरत नारायणदास ठक्कर, समृद्धी तांबे, गंधाली कुलकर्णी आणि सुनंदा काळुसकर यांच्या निर्मितीतून सादर होणाऱ्या या नाटकाचे लेखन आणि दिग्दर्शन स्वतः हृषिकेश जोशी यांनी केले आहे. या नाटकात महत्त्वपूर्ण भूमिका साकारणाऱ्या क्षितीश दातेनं आपल्या भूमिकांविषयी आणि हृषिकेशसोबतच्या कामाच्या अनुभवाविषयी मनमोकळा संवाद साधला.

क्षितिज दातेच्या दोन वेगळ्या भूमिका

या नाटकात क्षितीश दाते दोन अनोख्या, पूर्णपणे भिन्न भूमिका साकारत आहे. तो सांगतो, “दोन्ही व्यक्तिरेखा एकमेकांपासून खूप भिन्न आहेत. त्यामुळे एकाच नाटकात दोन वेगवेगळी माणसं उभी करणं हे माझ्यासाठी आव्हानात्मक आहे.” नाटक दोन वेगवेगळ्या काळात पुढे सरकते आणि ‘बोलविता धनी’ या शीर्षकाचा अर्थ कथानुरूप अनेक स्तरांवर उमटतो. क्षितिजच्या मते, “बोलविता धनी ही संकल्पना कोणत्याही एका क्षेत्रापुरती मर्यादित नाही; बोलणारा किंवा कृती करणारा जरी एक असला, तरी मागून सूचना देणारा दुसराच असतो.”

नेतृत्वप्रधान भूमिकांनंतर नवा अभिनयप्रवास

गेल्या काही वर्षांत लोकमान्य टिळक, एकनाथ शिंदे यांसारख्या नेतृत्वप्रधान व्यक्तिरेखा साकारल्यानंतर आता कनिष्ठ पदाच्या भूमिकेत स्वतःला पाहण्याची संधी मिळाल्यामुळे तो उत्सुक आहे. एक अभिनेता म्हणून विविधता आणि आव्हानं यांना तो नेहमीच प्राधान्य देतो. त्यामुळे या भूमिकांनी मिळणारं नवं अनुभवविश्व त्याच्यासाठी खास ठरतं आहे.

हृषिकेश जोशींसोबत काम करण्याचा आनंद

हृषिकेश जोशींसोबत काम करण्याविषयी बोलताना क्षितिज म्हणतो, “त्यांचं लिखाण मला खूप आवडतं. नांदी, संयुक्त मानअपमान ही नाटकं मी आधीपासूनच पाहिली आहेत. सध्या आम्ही मी व्हर्सेस मी या नाटकात एकत्र आहोत. त्यामुळे त्यांनी फोन करून या नाटकासाठी विचारताच मी क्षणाचाही विलंब न करता होकार दिला.” नाटक काय आहे, वाचन केव्हा आहे—या कोणत्याही गोष्टींची फिकीर न करता त्याने त्वरित या प्रकल्पात सामील होण्याचा निर्णय घेतला.

विनोद, कथानक आणि टीमवर्कची सुंदर सांगड

हृषिकेश यांच्या निवडक विनोदी शैलीमुळे बोलविता धनी हे नाटक सहकुटुंब पाहण्यासारखं असल्याचं क्षितीश सांगतो. कलाकार निवडीची त्यांची नजर अचूक असल्यामुळे १३ जणांची टीम एकत्र येणं हेच एक वेगळं आकर्षण निर्माण करतं. ओंकार कुलकर्णी, संग्राम साळवी यांच्यासह एक मजबूत कलावंत फळी या नाटकात झळकते. विशेष म्हणजे, जुन्या नाटकांच्या इतिहासातील एका महत्त्वपूर्ण प्रसंगावर हे नाटक भाष्य करतं—आणि तोही कोणाच्याही खिजगणतीत नसलेला!

रसिकांसाठी खास रंगतदार पर्वणी

क्षितीशला खात्री आहे की, रंगमंचावर १३ कलाकारांना एकत्र पाहण्याचा अनुभव प्रेक्षकांसाठी अविस्मरणीय ठरेल. त्याच्या मते, बोलविता धनी हे नाटक नाट्यरसिकांसाठी १०० टक्के पर्वणी ठरणार आहे. पुण्यातील शुभारंभाचा प्रयोग १३ डिसेंबर रोजी रात्री ९.३० वाजता बालगंधर्व रंगमंदिर येथे, तर मुंबईतील शुभारंभ २४ डिसेंबर रोजी दुपारी ४ वाजता दिनानाथ नाट्यगृह, विलेपार्ले येथे सादर केला जाणार आहे.