वर्ष संपताना अमृताचं प्रेक्षकांसाठी नवं सरप्राईज

२०२५ हे वर्ष संपत असताना अभिनेत्री अमृता खानविलकर हिने आपल्या चाहत्यांना एकामागून एक खास सरप्राईज दिली आहेत. अभिनयाच्या विविध माध्यमांमध्ये सातत्याने स्वतःला नव्याने सादर करणारी अमृता नव्या वर्षात रंगभूमीवर पदार्पण करणार असतानाच, वर्षाच्या अखेरीस नेटफ्लिक्सवरील एका नव्या कोऱ्या वेब सीरिजमध्ये मुख्य भूमिकेत झळकताना दिसणार आहे.

नेटफ्लिक्सवर येणारी ‘तस्करी’ वेब सीरिज

नेटफ्लिक्सवर लवकरच प्रदर्शित होणाऱ्या ‘तस्करी’ या वेब सीरिजमध्ये अमृताची भूमिका विशेष लक्ष वेधून घेणारी असल्याचं समजतंय. या सीरिजमध्ये तिच्यासोबत अनेक बॉलिवूडमधील बडे कलाकारही महत्त्वाच्या भूमिकांमध्ये दिसणार आहेत. थरारक कथानक, वेगवान घडामोडी आणि दमदार व्यक्तिरेखांमुळे ‘तस्करी’बद्दल आधीपासूनच उत्सुकता निर्माण झाली आहे.

पहिल्यांदाच अमृता–इम्रान हाश्मीची जोडी

‘तस्करी’मध्ये पहिल्यांदाच अमृता खानविलकर आणि बॉलिवूड अभिनेता इम्रान हाश्मी यांची जोडी प्रेक्षकांना पाहायला मिळणार आहे. या नव्या ऑन-स्क्रीन केमिस्ट्रीमुळे प्रेक्षकांच्या अपेक्षा अधिक वाढल्या असून दोघेही या थरारक विश्वात नेमक्या कोणत्या भूमिकांमध्ये दिसणार, याची उत्सुकता कायम आहे.

सोशल मीडियावर टिझर, कॅप्शनने वेधलं लक्ष

अमृताने नुकताच ‘तस्करी’चा टिझर सोशल मीडियावर शेअर केला असून तिच्या कॅप्शनने विशेष लक्ष वेधून घेतलं आहे. “तस्करीच्या दुनियेत तुमच्या सगळ्यांचं स्वागत आहे,” असं म्हणत तिने हा टिझर सोशल मीडियावर पोस्ट केला आहे. इम्रान हाश्मी सोबत ती नेमकी कोणती भूमिका साकारणार आणि या तस्करीच्या विश्वात अमृताचा रोल काय असणार, हे जाणून घेण्यासाठी प्रेक्षकांना थोडी वाट पाहावी लागणार आहे.

वर्षभर नावीन्यपूर्ण प्रोजेक्ट्स, वर्षाअखेरीसही निखळ मनोरंजन

वर्षभर विविध आणि नावीन्यपूर्ण प्रोजेक्ट्समधून प्रेक्षकांच्या मनावर अधिराज्य गाजवणारी अमृता खानविलकर वर्ष संपताना देखील प्रेक्षकांचं निखळ मनोरंजन करणार, यात शंका नाही. त्याचबरोबर येणाऱ्या वर्षात तिला रंगभूमीवर पाहण्यासाठीही प्रेक्षक तितकेच उत्सुक असल्याचं चित्र दिसून येत आहे.