कलेच्या क्षेत्रात उत्तुंग कर्तबगारी करत एका मराठी माणसाने उभं केलेलं भव्य साम्राज्य म्हणजे एन.डी. स्टुडिओ. त्यांनी पाहिलेलं स्वप्न पूर्ण करण्यासाठी शासनाने पुढाकार घेत एन.डी. स्टुडिओच्या जतन आणि संवर्धनाची जबाबदारी नम्रपणे स्वीकारली असून, या स्टुडिओला पुन्हा गतवैभव प्राप्त करून देण्यासाठी शासन सर्वतोपरी प्रयत्न करेल, असे प्रतिपादन सांस्कृतिक कार्य विभागाचे सचिव डॉ. किरण कुलकर्णी यांनी केले.

पत्रकार आणि टूर ऑपरेटरसाठी विशेष भेट

महाराष्ट्र चित्रपट, रंगभूमी आणि सांस्कृतिक विकास महामंडळाअंतर्गत एन.डी. आर्ट वर्ल्ड लिमिटेड येथे शुक्रवारी पत्रकार आणि टूर ऑपरेटर यांची विशेष भेट आयोजित करण्यात आली होती. यानिमित्ताने आयोजित करण्यात आलेल्या छोटेखानी सांस्कृतिक कार्यक्रमात डॉ. कुलकर्णी बोलत होते.

मान्यवरांची उपस्थिती

या कार्यक्रमाला दादासाहेब फाळके चित्रनगरीच्या व्यवस्थापकीय संचालक स्वाती म्हसे पाटील, सह-व्यवस्थापकीय संचालक प्रशांत साजणीकर, पु. ल. देशपांडे महाराष्ट्र कला अकादमीच्या संचालक तथा एन.डी.चे मुख्य कार्यकारी अधिकारी मीनल जोगळेकर, वित्तीय सल्लागार व मुख्य लेखा वित्ताधिकारी चित्रलेखा खातू-रावराणे, उप अभियंता (स्थापत्य) विजय बापट, एन.डी.चे प्रशासकीय अधिकारी सचिन निबाळकर आणि श्रीकांत देसाई उपस्थित होते.

एन.डी. कार्निव्हल पोस्टरचे अनावरण

यावेळी २५ ते ३१ डिसेंबर दरम्यान एन.डी. स्टुडिओ येथे होणाऱ्या भव्य कार्निव्हलच्या पोस्टरचे मान्यवरांच्या हस्ते अनावरण करण्यात आले.

नितीन देसाई : आधुनिक विश्वकर्मा

दादासाहेब फाळके चित्रनगरीच्या व्यवस्थापकीय संचालक स्वाती म्हसे पाटील यांनी आपल्या मनोगतात नितीन देसाई यांचा उल्लेख “आधुनिक विश्वकर्मा” असा करत, त्यांनी उभारलेलं कार्य सदैव स्मरणात राहील, असे सांगितले. एन.डी. स्टुडिओचे परिचलन आता गोरेगाव चित्रनगरीच्या माध्यमातून केले जात असून, स्टुडिओचे संकेतस्थळ आणि बुकिंग ॲप सुरू करण्यात आले आहे. आगामी काळात अधिक सुविधा उपलब्ध करून देण्याचे नियोजन असल्याची माहितीही त्यांनी दिली.

भव्यतेची व्याख्या नितीन देसाईंनी घडवली

प्रास्ताविक करताना मीनल जोगळेकर म्हणाल्या की, भव्यता म्हणजे काय हे नितीन देसाई या मराठी माणसाने प्रत्यक्ष कृतीतून दाखवून दिले. शासनाशी त्यांचे असलेले ऋणानुबंध आणि त्यांच्याशी संबंधित आठवणी त्यांनी यावेळी जागवल्या.

२५ ते ३१ डिसेंबर : एन.डी. कार्निव्हलची सविस्तर माहिती

दिनांक २५ ते ३१ डिसेंबर २०२५ दरम्यान, एन.डी. कर्जत येथे सकाळी १० ते सायंकाळी ५ या वेळेत भव्य कार्निव्हलचे आयोजन करण्यात आले आहे. या कार्निव्हलमध्ये खेळ, मनोरंजन यांसोबतच सेलिब्रिटींसोबत गप्पांचा विशेष कार्यक्रम दररोज होणार आहे.

तिकीट दर आणि बुकिंग माहिती

पाच वर्षांपासून पुढील सर्व वयोगटांसाठी कार्निव्हल तिकीट १४९९ रुपये असून, या दरामध्ये जेवण आणि नाश्त्याचा समावेश आहे. एकाच वेळी २५ किंवा त्याहून अधिक तिकिटांची बुकिंग केल्यास प्रति तिकीट १३९९ रुपये दर आकारण्यात येणार आहे. तिकीट बुकिंग ऑनलाईन आणि ऑफलाईन दोन्ही पद्धतीने उपलब्ध असून, ऑनलाईन तिकीट http://www.ndartworld या संकेतस्थळावर मिळणार आहे.

कार्निव्हलमध्ये कलाकारांची विशेष उपस्थिती

२५ डिसेंबर रोजी दुपारी ४ ते ६ – कविता लाड
२६ डिसेंबर रोजी दुपारी ४ ते ६ – सुव्रत जोशी, सखी गोखले
२७ डिसेंबर रोजी दुपारी ४ ते ६ – अदिती सारंगधर
२८ डिसेंबर रोजी दुपारी १२ ते २ – विराजस कुलकर्णी, उर्मिला कोठारे, विक्रम गायकवाड
२९ डिसेंबर रोजी दुपारी ४ ते ६ – आनंद इंगळे
३० डिसेंबर रोजी दुपारी ४ ते ६ – डॉ. गिरीश ओक
३१ डिसेंबर रोजी दुपारी ४ ते ६ – संजय मोनेकला, मनोरंजन आणि आठवणींचा अनोखा संगम असलेला हा एन.डी. कार्निव्हल प्रेक्षकांसाठी नक्कीच अविस्मरणीय ठरणार आहे.

कला, मनोरंजन आणि आठवणींचा अनोखा संगम असलेला हा एन.डी. कार्निव्हल प्रेक्षकांसाठी नक्कीच अविस्मरणीय ठरणार आहे.