भव्य सादरीकरणाने भारावलेलं वातावरण
भव्य रंगमंच, दिलखेचक रोषणाई, मंत्रमुग्ध करणाऱ्या वातावरणाला ढोल-ताशांच्या गजराची साथ—हे सगळंच क्षणभर श्वास रोखून धरणारं होतं. आणि अशातच भरजरी वस्त्र, शिरोभागी आकर्षक जिरेटोप, गळ्यात आभूषणांसह कवड्यांची माळ, कमरेला लटकणारी भवानी तलवार यांसह घोड्यावर स्वार झालेले साक्षात छत्रपती शिवाजी महाराज आणि त्यांचे पराक्रमी शिलेदार अवतरले… एकच जल्लोष उसळला. निमित्त होतं ‘रणपति शिवराय स्वारी आग्रा’ या आगामी मराठी चित्रपटातील एका भव्य प्रसंगाच्या सादरीकरणाचं.

आग्रा भेटीचा ऐतिहासिक अध्याय मोठ्या पडद्यावर
शिवकालीन इतिहासाच्या पानांमध्ये अभिमानाने कोरलेला छत्रपती शिवाजी महाराज यांच्या ऐतिहासिक आग्रा भेटीचा अध्याय ‘रणपति शिवराय स्वारी आग्रा’ या भव्य चित्रपटातून प्रेक्षकांसमोर येणार आहे. पॅनोरमा स्टुडिओज आणि मुगाफी निर्मित, दिग्पाल लांजेकर दिग्दर्शित हा चित्रपट ३० जानेवारीला प्रेक्षकांच्या भेटीला येणार आहे.

शिवराज अष्टकातील सहावे पुष्प
लेखक-दिग्दर्शक दिग्पाल लांजेकर यांच्या संकल्पनेतून साकारलेल्या शिवराज अष्टकातील सहावे पुष्प असलेल्या ‘रणपति शिवराय स्वारी आग्रा’ या चित्रपटात छत्रपती शिवाजी महाराजांचे प्रथमदर्शन यावेळी उपस्थितांना अनुभवता आलं. या चित्रपटात छत्रपती शिवरायांच्या भूमिकेत नव्या दमाचा उमदा अभिनेता अभिजीत श्वेतचंद्र दिसणार आहे.

‘महारुद्र शिवराय’ गीताचे दमदार सादरीकरण
या सोहळ्यात चित्रपटातील ‘महारुद्र शिवराय’ या गीताचं प्रभावी सादरीकरण करण्यात आलं. हे गीत दिग्पाल लांजेकर यांनी लिहिलं असून अवधूत गांधी आणि अमिता घुगरी यांच्या दमदार आवाजाने गीताला वेगळंच बळ मिळालं आहे. अवधूत गांधी आणि मयूर राऊत यांचं संगीत गीताला लाभलं असून चित्रपटाच्या संगीत वितरणाची जबाबदारी पॅनोरमा म्युझिकने सांभाळली आहे. विशेष म्हणजे ‘मुगाफी पल्स’ या अॅप्लिकेशनचा वापर करून या चित्रपटाच्या पटकथेचं विश्लेषण करण्यात आलं आहे.

शौर्य, धाडस आणि रणनीतीचा थरार
छत्रपती शिवाजी महाराजांच्या आयुष्यात घडलेल्या घटना अनेक पिढ्यांसाठी प्रेरणादायी आणि रोमांचित करणाऱ्या आहेत. महाराजांची आग्रा भेट ही अत्यंत जोखमीची आणि इतिहासात अजरामर झालेली घटना होती. या प्रसंगातून त्यांच्या नेतृत्वाची, धैर्याची आणि धोरणात्मक रणनीतीची खरी झलक समोर येते. महाराजांचं शौर्य आणि मुत्सद्देगिरी प्रेक्षकांना या चित्रपटातून अनुभवता येणार आहे.

निर्मिती, दिग्दर्शन आणि जागतिक वितरण
पॅनोरमा स्टुडिओज आणि मुगाफी निर्मित ‘रणपति शिवराय स्वारी आग्रा’ या चित्रपटाचं लेखन-दिग्दर्शन दिग्पाल लांजेकर यांनी केलं आहे. कुमार मंगत पाठक, अभिषेक पाठक (पॅनोरमा स्टुडिओज), विपुल अग्रवाल, जेनील परमार (मुगाफी) आणि मुरलीधर छतवानी (पॅनोरमा स्टुडिओज) हे चित्रपटाचे निर्माते असून रवींद्र औटी (पॅनोरमा स्टुडिओज), तान्शा बत्रा आणि आलोक शर्मा (मुगाफी) हे सहनिर्माते आहेत. पॅनोरमा स्टुडिओज या चित्रपटाचं जगभरात वर्ल्डवाइड वितरण करणार आहे.