महिला सशक्तीकरणाचा ठळक संदेश देणारा अनोखा ट्रेलर लाँच

Zee Studios आणि Sunflower Studios निर्मित बहुप्रतिक्षित अगं अगं सूनबाई! काय म्हणताय सासूबाई? या चित्रपटाची सध्या सर्वत्र चर्चा रंगली आहे. चित्रपटाच्या टीझर आणि शीर्षक गीताने आधीच प्रेक्षकांमध्ये उत्सुकता निर्माण केली होती. या उत्सुकतेत अधिक भर घालत नुकताच या चित्रपटाचा भव्य ट्रेलर अनावरण सोहळा एका अनोख्या आणि अर्थपूर्ण पद्धतीने पार पडला.

महिलांच्या हस्ते ट्रेलर अनावरण – सोहळ्याचे खास आकर्षण

हा चित्रपट स्त्री सशक्तीकरणावर भाष्य करणारा असल्याने ट्रेलर अनावरणाचा मान उपस्थित महिला पत्रकार आणि चित्रपटाच्या तंत्रज्ञ टीममधील महिला सदस्यांना देण्यात आला. हा क्षण संपूर्ण सोहळ्याचे खास आकर्षण ठरला. त्याचबरोबर याच दिवशी अभिनेत्री प्रार्थना बेहेरे यांचा वाढदिवस असल्याने संपूर्ण टीमने केक कापून त्यांचा वाढदिवसही उत्साहात साजरा केला.

सासू–सुनेच्या नात्याची खरी-खुरी मांडणी

सासू-सुनेचं नातं अनेक घरांमध्ये तुझं माझं जमेना, तुझ्यावाचून करमेना अशा स्वरूपाचं असतं, तर काही ठिकाणी ‘असून अडचण, नसून खोळंबा’ अशी स्थिती असते. थोडक्यात घरोघरी मातीच्या चुली असल्या, तरी या नात्यामध्ये एक अतूट भावनिक बंध असतो जो कधीच सैल होत नाही. अशाच भावना मांडणारा आणि या नात्याचे नवे पैलू उलगडणारा हा चित्रपट आहे.

हसवत-हसवत विचार करायला लावणारी कथा

ट्रेलरमध्ये सासू-सुनेच्या नात्याचं केवळ आदर्श चित्रण न करता त्यातील चांगले-वाईट पैलू, संघर्ष आणि भावनिक क्षण प्रामाणिकपणे मांडण्यात आले आहेत. ही केवळ सासू-सुनेची गोष्ट नसून स्त्रियांची सामूहिक गोष्ट आहे. स्त्रियांनी एकमेकींना समजून घेत, एकमेकींची साथ दिल्यास त्या अधिक सक्षम आणि मजबूत कशा होऊ शकतात, हा प्रभावी विचार या चित्रपटातून पुढे येतो.

कौटुंबिक चौकटीतली मनोरंजक गोष्ट – केदार शिंदे

दिग्दर्शक केदार शिंदे यांच्या मते, ‘अगं अगं सूनबाई! काय म्हणताय सासूबाई?’ हा एक संपूर्ण कुटुंबासाठीचा मनोरंजक चित्रपट आहे. चौकोनी कुटुंबाची ही कथा असून त्यात विनोद, भावना आणि प्रत्येक घरात दिसणाऱ्या सासू-सुनेच्या ओळखीच्या परिस्थिती आहेत. प्रेक्षकांना या नात्यातील गंमतीदार प्रसंग, भावनिक वळणं आणि दोन्ही व्यक्तिरेखांची ताकद अनुभवता येईल.

कुटुंब आणि स्त्रीदृष्टीकोनाचा नवा विचार – झी स्टुडिओज

झी स्टुडिओजचे व्यवसाय प्रमुख बवेश जानवलेकर यांनी सांगितले की, केदार शिंदे यांनी ही गोष्ट पहिल्यांदा ऐकवली तेव्हाच हा चित्रपट करण्याचा निर्णय घेण्यात आला. ही गोष्ट केवळ सासू-सून या नात्यापुरती मर्यादित नसून संपूर्ण कुटुंबाची आणि स्त्रियांकडे पाहण्याचा नवा दृष्टीकोन देणारी आहे, जो सर्वांनाच आवडेल, असा विश्वास त्यांनी व्यक्त केला.

तांत्रिक टीम आणि प्रदर्शनाची तारीख

या चित्रपटाचे दिग्दर्शन केदार शिंदे यांनी केले असून सना शिंदे आणि उमेश कुमार बन्सल यांची निर्मिती आहे. कथा व संवाद वैशाली नाईक आणि ओमकार मंगेश दत्त यांचे असून पटकथा वैशाली नाईक यांची आहे. छायाचित्रण आणि संकलनाची जबाबदारी मयूर हरदास यांनी सांभाळली आहे. हा चित्रपट येत्या १६ जानेवारीपासून प्रेक्षकांच्या भेटीला येत आहे.